Luka 13

Ŵanthu wosayaluka mitima akafwe

1Ŵanthu ayakine enze pamene apo etatika kumuwuzya Yesu va Agalileya wecilamulila Pilato kuti apayiwe kuti milopa yawo iyavizyiwe na nsembe zenzotwala kwa Mulungu. 2Tetyo, Yesu eŵakonsha kuti, “Kansi muyesa kuti Agalileya awo enze woyifya kupula Agalileya ayakine wonse, cikomo esawushiwa moteti? 3Yayi, koma mukaleka kuyaluka mtima, namwe soti mukacenekeke ngani ŵamene ŵala. 4Nga ŵala ŵanthu kumi na mphuzyo zisanu na zitatu (18), ngʼanda yosanja iŵaponela ku Siloamu noŵapaya – kansi muyesa kuti enze ofwaya Matetulo kupula ŵanthu ayakine wonse onkhala mu Yelusalemu? 5Yayi, koma mukaleka kuyaluka mtima, namwe soti mukacenekewe ngani ŵamene ŵala.”

Linganizyo ya mkuyu wosatwala vitwalo

6Yesu eŵawuzya linganizyo elaŵila kuti, “Munthu muyakine enze na mkuyu wokomola mu munda wake. Eciyosakilamo vitwalo, koma osavifwana. 7Tetyo, ewuzya wosamala mu munda mwala kuti, ‘Papita vyaka vitatu lomba nusakila vitwalo mu mkuyu uyu, koma nuvifwanalini. Uwutende lomba, ugugishila vinji nthaka?’

8“Koma nyanchito wala elaŵila kuti, ‘Asikulu, ulekeni caka cino ceka. Ni ukumbile pa nsinde nowutila ndoŵe. 9Ukazotwala vitwalo caka cikuza vizevinkhale viweme. Koma ukazokanga kutwala vitwalo, muzemuwutende.’”

Yesu opozya mwanakazi woŵelama msana pa Sabata

10Pa nsiku iyakine ya Sabata Yesu enzosambizya mu kacisi wa Ayuda. 11Mwamene umo mwenze mwanakazi muyakine enze ekatiwa na ciŵanda cemulwalisha vyaka kumi na mphuzyo zisanu na zitatu (18). Enze na msana woŵelama, mwakuti enzoŵinukalini. 12Yesu pecimuwona, emuyita nomuwuzya kuti, “Wewo mwanakazi, wamasuka ku ulwele ŵako.” 13Emuyikapo manja, pamene apo mwanakazi wala eyondoloka, notatika kutembezya Mulungu.

14Koma mkulu wa kacisi wa Ayuda ekalipa, powona kuti Yesu wapozya munthu pa nsiku ya Sabata. Tetyo, mkulu wala ewuzya ŵanthu wonse kuti, “Pali nsiku zisanu na imo za nchito. Mukoŵela pa nsiku izi kuzopozyewa, osati pa nsiku ya Sabata yayi.”

15Koma Asikulu emuyasuka elaŵila kuti, “Mwewo anyamkuvwengu! Kansi ni mwewolini monse mumangulula ngʼombe zanu keno abulu ŵanu pa nsiku ya Sabata kuyowamwesha manzi? 16Nga mwanakazi uyu mwana wa Abulahamu, Satana emumanga vyaka kumi visanu na vitatu (18), kansi cuwamilalini kuti amangululiwe ku nsinga iyi pa nsiku ya Sabata?”

17Yesu pecilaŵila ivi, alwani ŵake wonse ecita nsoni. Koma winji wisangalala cikomo ca nchito zokanganisha zenzocita Yesu.

Linganizyo ya kambuto katontho ngako na cofufumishila mkate

(Mt 13:31-33; Mk 4:30-32)

18Nipo Yesu elaŵila kuti, “Kansi Ufumu wa Mulungu uli ngani vinji? Nipo ningaulinganizye na vinji? 19Uli ngani kambuto katontho ngako kecikomola munthu mu munda mwake. Kemela nokula nakuŵa cimuti, nipo tunyoni twiwela kuzomanga tuvumbo pa misambo yake.”

20Yesu elaŵila soti kuti, “Ningaulinganizye na vinji Ufumu wa Mulungu? 21Uli soti ngani cofufumishila mkate, ceciyavizya mwanakazi muyakine na unga unyinji wokwanila miyeso itatu, mpaka mkate wonse wifufumila.”

Mulyango wopatikizya

(Mt 7:13-14,21-23)

22Pa ulwendo wake wakuya ku Yelusalemu, Yesu enzoyendela mizinda na minzi osambizya. 23Munthu muyakine emukonsha kuti, “Asikulu, ŵanthu ŵatiazepulumuke ni ŵanthu oŵelengeka tyala?”

Yesu eŵayasuka kuti, 24“Lwishani kuloŵela pa kamulyango kopatikizya, pakuti anyinji, nukuwuzyani, azeapangwe kuloŵa, koma azeatweshelini.

25“Nsita ikawele pati mwine wa ngʼanda azeapaname kuyovala ku mulyango. Pamene apo, mwewo muli panja muzemutatike kukonkhosha nolaŵila kuti, ‘Asikulu tivulilenkoni.’ Koma yeve azeakuyasukeni kuti, ‘Nuziŵalini kwamufumila.’

26“Apo mwewo muzemutatike kulaŵila kuti, ‘Ni palalini tenzokulya na kumwa namwe pamo, nipo mwewo mwenzosambizya mu misewu yasu?’

27“Koma yeve azeakuwuzyeni kuti, ‘Pepani nuziŵalini kwamufumila. Fumamponi apa, ŵanthu ocita viyipa.’

28“Ku malo ŵala kukaŵe kulila nokukuta menu, patimukawone Abulahamu na Isaki na Yakobo na aneneli wonse mu Ufumu wa Mulungu, koma mwewo mupozewa kunja. 29Ŵanthu akafumile ku mmawa na ku mcingulo, ku mpoto na ku mmwela, nakuzonkhala polyela mu Ufumu wa Mulungu. 30Mvwishishani, pamene apo ŵala wosilizyila azeaŵe wotatika, nipo wotatika azeaŵe wosilizyila.”

Yesu olila cikomo ca Yelusalemu

(Mt 23:37-39)

31Nsita yamene iyo Afalisi ayakine eciyokupa Yesu ulangizi kuti, “Mufumeko kuno, cikomo cakuti Helode opangwa kukupayani.”

32Yesu elaŵila kuti, “Mvwani, nkhoyani mukamuwuzye kalulu#13:32 kalulu Yesu eteya Helode zina yakuti kalulu cikomo ca vocita vake. uyo kuti, ‘Nufumya viŵanda nipo nupozya ŵanthu lelo na mailo, nipo mazo niye patinikasilizye nchito yangu.’ 33Cukanga ciŵe tetyo, nuwamila kupitilila na ulwendo wangu lelo na mailo na mazo, pakuti nuwamilalini kufwila kuyakine koma ku Yelusalemu ngani mwacuwamila kuŵa.

34“Wewo Yelusalemu, Yelusalemu! Upaya aneneli noŵapoza myala ŵanthu ŵakukutumizyila Mulungu. Nsita zinyinji nepangwa kuwunganisha ŵanthu ŵako, ngani nkhuku mwayuwunganishila tuŵana twake pansi pa mapapiko ŵake, koma wewo wekana. 35 Cendi ngʼanda yanu ikulu teti izeiŵe matongwe. Nipo nulaŵilisha kuti muniwonelini soti cendi kufwikila muzemulaŵile kuti, ‘Ni woshukishiwa akuza mu zina ya Leza.’”

ప్రస్తుతం ఎంపిక చేయబడింది:

Luka 13: GMN

హైలైట్

షేర్ చేయి

కాపీ