मत्ती 23

यहूदी कानुनके गुरु और फरिसीनहे धिक्कार

(मर्कू. १२:३५-३७; लूक. ११:३९-५२; २०:४५-४७)

1तब् येशू भीड़ और अपन चेलनहे असिक कलाँ: 2“यहूदी कानुनके गुरु और फरिसी दलके मनैनमे मोशक नियम कानुनहे अधिकारसे व्याख्या करना क्षमता बतिन। 3तबेकमारे ओइन्के कहल बात करो और मानो। पर ओइन्के करल हस भर ना करो। काकरेकी ओइने सिखैना ते सिखैथाँ, पर अप्ने भर पालन नै करथाँ। 4ओइने अपने बनाइल नियम कानुन पालन नै करथाँ। पर ओइने मेरमेरके नियम कानुन बनैथाँ, जोन दोसुर जहनहे पालन करना महा कर्रा होजिथिन (जोन मनैनके लग बरवार बोझ बनजिथिन।) 5पर ओइने अपन सारा काम मनैनहे देखाइक लग करथाँ। काकरेकी ओइने अपन लिल्हार और हाँथक पख्रामे मोशक नियम कानुन लिखल पट्टी बहन्थाँ। और अपन लुग्गामे नम्मा और चाकर झल्लर बनैथाँ। 6ओइन्हे बैठक भवनमे आदरके ठाउँमे और कौनो फेन उत्सवके खाना खाइबेर खास ठाउँमे बैठ्ना मजा लग्थिन। 7बजारमे मनै ओइन्हे आदरसे नमस्कार करिँत् कना ओइने चहथाँ। और मनैनसे गुरुजी कहल रुचैथाँ। 8पर तुहुरिन्हे ‘गुरुजी’ कहिके केऊ ना कहे। काकरेकी तुहुरिन्के एक्केथो गुरु बा। और तुहुरे ते सक्कु जाने दादू-भैया, दिदी-बाबु हस बराबर हुइतो। 9तुहुरे पृथ्वीमे किहुहे फेन बाबा#23:9 बाबा यी बाबा हम्रिहिन्हे जलम देहुइया नै हो पर धार्मिक बात सिखुइया बरवार गुरु-बाबाहे जनागिल बा। कहिके नै कहहो। काकरेकी तुहुरिन्के सक्कुहुनके एक्केथो बाबा बा, जे स्वर्गमे रहत। 10तुहुरिन्हे केऊ ‘मलिक्वा’ कहिके ना कहे। काकरेकी तुहुरिन्के एक्केथो मलिक्वा ख्रीष्ट हुइताँ। 11जे दोसुर जहनके अगुवाई करे चाहत, उहिहे सक्कु जहनके लग नोकर हस बनके सक्कुहुनके सेवा करे परत। 12जे अपनहे भारी मानी, उहिहे छुटी कराजाई और जे अपनहे छुटी मानी, उहिहे भारी बनाजाई।”

कपटीनके विरोधमे चेतावनी

13येशू कलाँ, “हे कपटी यहूदी कानुनके गुरु और फरिसी दलके मनै, परमेश्वर तुहुरिन्हे दण्ड दिहीँ! काकरेकी तुहुरे स्वर्गक राजमे ना अप्ने जैथो, और ना ते दोसुर मनैनहे जैना अनुमति देथो। 14हे कपटी यहूदी कानुनके गुरु और फरिसी दलके मनै, परमेश्वर तुहुरिन्हे दण्ड दिहीँ! काकरेकी तुहुरे छल करके विधवनके सम्पतिहे लुटलेथो, और खुल्ला रुपमे नम्मा समयसम प्राथना करथो ताकि मनै यी सोचिँत कि तुहुरे धर्मी बतो। तबेकमारे दोसुर जहनसे धेउर दण्ड तुहुरे भेटैबो।” 15“हे कपटी, यहूदी कानुनके गुरु और फरिसी दलके मनै, परमेश्वर तुहुरिन्हे दण्ड दिहीँ! काकरेकी तुहुरे अविश्वासीहे अपन धरममे नानक लग हर ठाउँ घुम्थो, और जब ऊ तुहुरिन्के सिखाइल बातमे विश्वास करत। तब जस्ते तुहुरे अप्ने बतो, ओस्ते उहिहे फेन दुई गुणा धेउर नरकमे जैना योग्यक बनादेथो।

16हे आँधर अगुवन, परमेश्वर तुहुरिन्हे दण्ड दिहीँ! तुहुरे सिखैथो कि ‘यदि केऊ मन्दिरके कसम खाके उ कसमहे टुरी कलेसे उहिहे कुछु नै हुइहिस। पर मन्दिरके सोनक कसम खाके उहिहे पूरा करे परना जरुरी रहत।’ 17हे मूर्ख और आँधर मनै, कोन भारी हो? सोन कि सोनहे पवित्र बनैना मन्दिर? 18यदि केऊ वेदीक कसम खाके उ कसमहे टुरी कलेसे उहिहे कुछु नै हुइहिस, पर वेदीमे धारल दानके कसम खाके उहिहे पूरा करे परना जरुरी रहत। 19तुहुरे कसिन आँधर हुइतो! कोन भारी हो? दान कि दानहे पवित्र बनैना वेदी? 20तबेकमारे केऊ वेदीक कसम खाइत कलेसे ऊ वेदीक और वेदीमे रहल सक्कु चिजके कसम खाइत। 21केऊ मन्दिरके कसम खाइत कलेसे ऊ मन्दिर और मन्दिरके भित्तर रहल पमेश्वरके कसम खाइत। 22जे स्वर्गक कसम खाइत, ऊ परमेश्वरके सिंहासन और ओकर उप्पर बैठुइयक कसम खाइत।

23हे कपटी यहूदी कानुनके गुरु और फरिसी दलके मनै, परमेश्वर तुहुरिन्हे दण्ड दिहीँ! काकरेकी तुहुरे पुदैना, सोँप और जीरक दशांश देथो। पर न्याय, दया और विश्वास योग्यता जसिन मोशक नियम कानुनके गम्भीर विषयके वास्तै नै करथो। तुहुरे दशांश देहे परत, पर यकर संगसंगे यी महत्त्वपूर्ण बातहे फेन वास्ता करे परत। 24ए आँधर अगुवन! तुहुरे कम महत्त्वपूर्ण छुटीछुटी नियम भर महा ध्यान लगाके पालन करथो, जसिके कुछु पिना चिजसे माछीहे दूरे रखैथो। पर खास आज्ञाहे भर तुहुरे नै मन्थो, जोन ऊँटवाहे लिले हस हो। 25हे कपटी यहूदी कानुनके गुरु और फरिसी दलके मनै, परमेश्वर तुहुरिन्हे दण्ड दिहीँ! काकरेकी तुहुरे असिन भाँरा जसिन हुइतो, जोन बाहेरसे भर घोत्तैल बिल्गाइत, और भित्तर भर फुहर पलिरहत। अस्तेके तुहुरे दोसुर जहनके आघे भर अपनहे धर्मी देखाइक खोज्थो, पर मनमे भर लालच और स्वार्थसे भरल रथो। 26हे आँधर फरिसी दलके मनै, परमेश्वर तुहुरिन्हे दण्ड दिहीँ! आघे भाँरक भित्तर पाँजर घोत्तैल बनाऊ, और ओकर बाहेर पाँजर फेन घोत्तैल रहे।

27हे कपटी यहूदी कानुनके गुरु और फरिसी दलके मनै, परमेश्वर तुहुरिन्हे दण्ड दिहीँ! काकरेकी तुहुरे चुना लगाइल चिहान हस बतो, जोन बाहेरसे सुग्घुर देखैथाँ, पर भित्तर पाँजर भर मुअल मनैनके हड्डी और सक्कु मेरके अशुद्धतासे भरल रथाँ। 28अस्तेके तुहुरे फेन बाहेर भर मनैनके आघे धर्मी देखा पर्थो। पर भित्तर भर कपट और दुष्टतासे भरल बतो।”

दोषके दण्ड

29येशू कलाँ, “हे कपटी यहूदी कानुनके गुरु और फरिसी दलके मनै, परमेश्वर तुहुरिन्हे दण्ड दिहीँ! काकरेकी तुहुरिन्के पुर्खन जोन परमेश्वरके अगमवक्तनहे मुवैलाँ। तुहुरे वहे अगमवक्तनके चिहान बनैथो और धर्मी मनैनके चिहानहे सजैथो। 30और तुहुरे कथो, ‘हम्रे अपन पुर्खनके समयमे रति कलेसे हम्रे परमेश्वरके अगमवक्तनके खुन बहाइक लग ओइन्हे साथ नै देती।’ 31असिके तुहुरे परमेश्वरके अगमवक्तनके हत्या करुइयनके सन्तान हुइतो कना सबुत तुहुरे अप्निहीँ देथो। 32महिन्हे पता बा, तुहुरिन्के पुर्खन जोन पापके काम सुरु कर्ले रहिँत, तुहुरे वहे पापके काम पूरा करक लग बतो! 33तुहुरे बिखार साँपनके लरका हस हुइतो! तुहुरे नरकके दण्डसे उम्के नै सेक्बो। 34तबेकमारे मै तुहुरिन्के थेन परमेश्वरके अगमवक्तनहे, बुद्धिमान मनैनहे और यहूदी कानुनके गुरुनहे पठैम। ओइन्मेसे किहुहे तुहुरे मुवैबो, और क्रूसमे टँगैबो। और किहुहे अपन बैठक भवनमे कोर्रा लगैबो, और नगर-नगरमे सतैबो। 35पृथ्वीमे बहाइल सक्कु धर्मी जनके खुन निर्दोष हाबिलके खुनसे लेके बेरेक्याहक छावा जकरियक खुनसम, जत्रा धर्मी मनैनके हत्या पवित्र भवन और वेदीक बिच्चेम हुइलिन, उ सक्कुहुनके हत्या कर्लक दण्ड तुहुरिन्हे मिली। 36जात्तिके मै तुहुरिन्हे कहतुँ, यी सक्कु बात यहे पुस्ताके उप्पर आईपरहीँ।”

यरुशलेमहे चेतावनी

37“ए यरुशलेमके मनै, ए यरुशलेमके मनै! तुहुरे जेने परमेश्वरके अगमवक्तनहे मुवैलो, और तुहुरिन्के थेन पठागिलक मनैनहे पठरालेके मरुइयन! जसिके मुर्घनिया अपन चिङनिनहे पख्नक तरे छोपके नुकाइत। ओस्तेके मै बहुत्तेचो तुहुरिन्के लरकनहे बँचाई खोज्नु, पर तुहुरे नै मन्लो। 38हेरो, तुहुरिन्के घर उजाड़ छोरगिल बा। 39काकरेकी मै तुहुरिन्हे कहतुँ, ‘परमप्रभुक नाउँमे अधिकारके संग अउइया धन्यके हुइताँ’ नै कहतसम तुहुरे महिन्हे नै देख्बो।”

தற்சமயம் தேர்ந்தெடுக்கப்பட்டது:

मत्ती 23: DVGNT

சிறப்புக்கூறு

பகிர்

நகல்