Soma Biblia Kila Siku Oktoba 2021Mfano

Tunajaribiwa kukata tamaa tunapokabiliwa na vikwazo visivyoondolewa kwa juhudi zetu. Msaada upo kwa Kristo pekee. Yeye anaweza kuzuia na kuondoa shida. Wanaomtegemea Kristo wanalindwa na Roho Mtakatifu. Ni milki ya Mungu. Wanatambulika kwa alama ya msalaba wa Kristo. Muhuri wa Mungu unatenganisha mali ya Mungu na ile ya Ibilisi. Walio wa Shetani nao wana alama yao (13:16, Awafanya wote, wadogo kwa wakubwa, na matajiri kwa maskini, na walio huru kwa watumwa, watiwe chapa katika mkono wao wa kuume, au katika vipaji vya nyuso zao). Idadi ya 144,000 inawakilisha wateule wote wa Mungu. Ili kujua idadi kamili ya wanaourithi uzima wa milele, soma 7:9 ambapo Yohana anasema, Nikaona, na tazama, mkutano mkubwa sana ambao hapana mtu awezaye kuuhesabu, watu wa kila taifa, na kabila, na jamaa, na lugha, wamesimama mbele ya kile kiti cha enzi, na mbele za Mwana-Kondoo, wamevikwa mavazi meupe, wana matawi ya mitende mikononi mwao.