Soma Biblia Kila Siku Julai 2021Mfano

Taifa la Israeli liligawanyika alipokufa Sulemani. Israeli kaskazini na Yuda kusini. Migawanyiko hii haikuleta baraka. Nabii anatabiri umoja mpya kwa kuunganisha vijiti viwili na kuvionyesha kama kimoja. Ni mfano kwa watu hao wawili kuonekana tena katika umoja. Huo utawezekana tu kwa sababu Mfalme wa watu hawa wapya atakuwa ni Masihi. Utabiri wa Ezekieli hutukumbusha Yn 17. Karibu mlango mzima Yesu anaombea umoja. Soma polepole m.17-26 ukitafakari maana ya kila ombi la Yesu: Uwatakase kwa ile kweli; neno lako ndiyo kweli. Kama vile ulivyonituma mimi ulimwenguni, nami vivyo hivyo naliwatuma hao ulimwenguni. Na kwa ajili yao najiweka wakfu mwenyewe, ili na hao watakaswe katika kweli. Wala si hao tu ninaowaombea; lakini na wale watakaoniamini kwa sababu ya neno lao. Wote wawe na umoja; kama wewe, Baba, ulivyo ndani yangu, nami ndani yako; hao nao wawe ndani yetu; ili ulimwengu upate kusadiki ya kwamba wewe ndiwe uliyenituma. Nami utukufu ule ulionipa nimewapa wao; ili wawe na umoja kama sisi tulivyo umoja. Mimi ndani yao, nawe ndani yangu, ili wawe wamekamilika katika umoja; ili ulimwengu ujue ya kuwa ndiwe uliyenituma, ukawapenda wao kama ulivyonipenda mimi. Baba, hao ulionipa nataka wawe pamoja nami po pote nilipo, wapate na kuutazama utukufu wangu ulionipa; kwa maana ulinipenda kabla ya kuwekwa msingi ulimwengu. Baba mwenye haki, ulimwengu haukukujua; lakini mimi nalikujua, na hao wamejua ya kuwa ndiwe uliyenituma. Nami naliwajulisha jina lako, tena nitawajulisha hilo; ili pendo lile ulilonipenda mimi liwe ndani yao, nami niwe ndani yao.