Soma Biblia Kila Siku 9Mfano

Ni ajabu! Baraka zile zilizotajwa jana, Waisraeli hawakupokea kwa moyo wa shukrani na unyenyekevu mbele za Bwana. Badala yake walizipokea kwa kiburi na kaidi (m.15: Yeshuruni[= jina la heshima kwa Israeli] alinenepa, akapiga teke; umenenepa, umekuwa mnene, umewanda; ndipo akamwacha Mungu aliyemfanya, akamdharau Mwamba wa wokovu wake) na kuiabudu miungu batili (m.16-17: Wakamtia wivu [Bwana]kwa miungu migeni, wakamkasirisha kwa machukizo. Walitoa sadaka kwa pepo, si Mungu, kwa miungu wasiyoijua, kwa miungu mipya iliyotokea siku zilizo karibu, ambayo baba zenu hawakuiogopa). Bwana alichukizwa sana na tendo hilo na kutaka kuwafutia mbali. Ila hakufanya hivyo, maana alijua kwamba mataifa yataanza kujidai kuwa miungu yao ni yenye nguvu kuliko Mungu wa Israeli (m.27: Naliogopa makamio ya adui, Adui zao wasije wakafikiri uongo, Wasije wakasema, Mkono wetu umetukuka, Wala Bwana hakuyafanya haya yote). Je, wewe ndugu, Waudharau wingi wa wema wake … usijue kuwa wema wa Mungu wakuvuta upate kutubu? (Rum 2:4).