Soma Biblia Kila Siku 9Mfano

Basi ikawa hapo Musa alipomaliza kuandika maneno ya torati hii katika chuo, hata yakaisha(m.24). Maneno haya yanathibitisha kwamba Musa ndiye mwandishi wa kitabu cha Kumbukumbu la Torati na hata vitabu vile vinne vinavyotangulia, yaani, kitabu cha Mwanzo hadi kitabu cha Hesabu (taz. pia m.9: Musa akaiandika torati hii, akawapa makuhani, wana wa Lawi).  Kuanzia hapo Neno la Mungu lilikuwa linaambatana na taifa la Israeli kwa karibu (m.26: Twaeni chuo hiki cha torati, mkiweke kando ya sanduku la agano la Bwana, Mungu wenu, ili kiwepo kama shahidi juu yako). Sisi Wakristo tusio Wayahudi tuna deni kubwa kwa taifa la Israeli, maana wao wamekabidhiwa mausia ya Mungu(Rum 3:2). Wameyatunza kwa uangalifu mpaka sisi tukayapata.