Soma Biblia Kila Siku 9Mfano

Katika m.1, Mungu anajiita Hekima, na pia Busara. Mungu hunena na watu kila mahali, si kwa njia ya mahubiri tu, bali hata kwa matendo yake ya kila siku yanayoonekana: Kwa kuwa mambo ya Mungu yanayojulikana yamekuwa dhahiri ndani yao, kwa maana Mungu aliwadhihirishia. Kwa sababu mambo yake yasiyoonekana tangu kuumbwa ulimwengu yanaonekana, na kufahamika kwa kazi zake; yaani, uweza wake wa milele na Uungu wake(Rum 1:19-20). Hayo ni sauti inayotuita tumheshimu na kumnyenyekea; na wamchao wanaelewa. Ukitafakari kwa umakini yote uyasikiayo na kuyaona, humo ndani yake utapata ujumbe wa Mungu unaokuelekeza umtukuze! Utakapotenda hilo, atakufunulia utajiri udumuo wa maarifa na busara zake. Matunda yake ni haki na heshima (m.18-19: Utajiri na heshima ziko kwangu, Naam, utajiri udumuo, na haki pia.Matunda yangu hupita dhahabu, naam, dhahabu safi, Na faida yangu hupita fedha iliyo teule).