Yohanes 4
4
Yesu massilàha:‑ing besa bahine tu Samaria
1Tempo to, làbi boso: ti tau ung mangulaꞌ Yesu pang nidoiꞌ, nai none: ung mangulaꞌ Yohanes. Pang na ìsang‑mo Yesu moa teꞌ na sàding‑mi se tu Parisi ti aka to. 2(Moi sitongangna handei: Yesu ti ung mudoiꞌ, sangadinna pasikolaNa‑da teng.) 3Deanna‑mo to, Yesu kakarang nai Yudea lumao pole i Galilea.
4I laling pammulaoangNa to, parallu pone: i Samaria. 5BùruꞌNa‑mi i besa lipu: i Samaria ung nikonai: Sikar, sidùkuꞌ i tampo: ung na hengi‑ming Yakub nai lùlung mao i Yusup anakàna. 6I sòhongna lipu: to, ara besa bubung ung nikonai: bubungna Yakub. Mesongna‑mi ti Yesu i minanaꞌna bubung to, sàbaꞌ àsaꞌ‑mo nai pammulaoangNa. Tempo dea to, nikapang na làsuku kùlaꞌ.
7Bùruꞌna‑mi ti besa bahine tu Samaria misi:. Na silàhana‑ming Yesu teꞌ, “O Ina:, mading naꞌ Ku mampalau menung?” 8Tempo to, pasikolaNa ha one:‑i se sàbaꞌ lumao‑mo i lipu: mambalaꞌ ung niannena.
9Misùmunna‑mi teꞌ, “Tuang tu Yahudi, pang koi:, bahine tu Samaria. Aka pu Ta mampalau menung i koi:?” (Na konai: mène: to, sàbaꞌ tu Yahudi hang sola: anneang‑ida pang enùngang tu Samaria.)
10Na sùmuinna‑mi Yesu teꞌ, “Àla: u ìsang‑i ti piheanna Puang pang isai‑I ti ung mampampalaui‑ko menung, matantu dio ti ung mampampalaui‑I, pang u Na panghengiing uhai ung mi patuho:.”
11Musuana‑mi ti bahine to teꞌ, “Hari: pitimmanta Tuang, pang bubung tee kaladung. Jadiꞌ, iaka Ta korai:‑i ti uhai ung mi patuho: to? 12Ampeta se Yakub manghengi‑ingnang bubung tee. Dea kalenanna mangenung uhai ung niala nai ante, mène: ho ti ana-anakàna pang patuhoangna. U konai: naꞌ moa teꞌ Ta làbi iaho nai Yakub?”
13Na sùmuinna‑mi Yesu teꞌ, “Nasang tau ung mangenung uhai tee, mangkaharaa pole. 14Hampoꞌ tau ung mangenung uhai ung Ku hengiing, hang mangkaharai:‑da hura: deaꞌ tùrungna. Sangadinna, uhai ung Ku hengiing to, miluhalia mata uhai i laling kalaena, ung sumbuku, ung manghengi‑ing katuhoang ung màle deaꞌ tùrungna.”
15Musuana‑mi ti bahine to teꞌ, “Hengi‑ingnaꞌko ti uhai to Tuang, mangking hang mangkahara‑kaꞌ hura: pang ha parallu‑i hura: ku mai misi:.”
16Na sùmuinna‑mi Yesu teꞌ, “Nàmo: manghàngo muanemu, pang u mangule:‑ingko mai.”
17Misùmunna‑mi teꞌ, “Hari:‑ko muaneku.”
Musuana‑mi ti Yesu teꞌ, “Tongang ti ung nu pusua:, moa teꞌ hari: muanemu, 18sàbaꞌ u pillima‑mo kimuane, pang muane ung nu pasola: i latenna, handei: muanemu. Tongang‑da ti ung nu pusua:‑mo.”
19Misùmunna‑mi teꞌ, “I latenna ku ìsang‑mo moa teꞌ Tuang dea‑mo nabi. 20Ampe-ampeki pang ama:-amangki tu Samaria minomba mao i Puang i mungku tee,*#4:6, 20 Bubungna Yakub dùkuꞌ i Mungku Gerisim ung na kaonei: tu Samaria minomba. hampoꞌ dio se tu Yahudi mangkonai: moa teꞌ i Yerusalem‑da teng ti kaoneangna tau parallu minomba mao i Puang.”
21Na silàhana‑ming Yesu teꞌ, “Patongang‑Kaꞌ Ina:, moa teꞌ bùruꞌa‑mo ti tempona u mampinombaia se Ama:, handei: teng hura: i mungku tee pang i Yerusalem. 22Dio se tu Samaria, u mampinombai‑mo se ung dang nu tannai:‑kang se. Hampoꞌ kami tu Yahudi mampinombai ung ki tannai:‑mo, sàbaꞌ kasalamaꞌang ung na àluꞌ Puang bùruꞌ nai àlaꞌ-àlaꞌna tu Yahudi.*#4:22 Nai iduanna tu Samaria pang tu Yahudi mampinombai Puang. Hampoꞌ aka ti ung na ìsang tu Samaria mampatu: Puang, hang sibali‑i ti ung na ìsang tu Yahudi, sàbaꞌ hang na tarima‑i se tu Samaria ti nasangna Pangàluꞌ Dolung miluhali suana Puang. Ung na tarima‑i se teng dea‑mo suraꞌ ung na ronno: Musa. 23Hampoꞌ bùruꞌa‑mo ti tempona, mala tempona‑mo, tau mampinombaia Ama: nai pinanahanna pang katongangang, sàbaꞌ Ama: ìnang mangokaꞌ ung si mampinombai‑I mène: to. Pang mène:‑mo to ti kapinombaang ung tongang. 24Sàbaꞌ Puang dea‑mo Pinanaha, pang tau ung mampinombai‑I parallu mampinombai nai pinanahanna pang katongangang.”
25Na konaina‑mi bahine to teꞌ, “Ku ìsang moa teꞌ Mesias, ung nikonai: ho Datu: Pipasalamaꞌ, bùruꞌa. I bùruꞌ‑Mi, mampupiìsànga nasang angkanna mao i kìta:.”
26Na sùmuinna‑mi Yesu teꞌ, “Koi:‑mo ti to, te ung tarrang massilàha:‑ingko.”
27Tempo to, sumule:‑mi se ti pasikolana Yesu. Kalle‑i se manghele Yesu silàha: bahine to. Hampoꞌ haranna‑i se moi besa ung mingkutiki teꞌ, “Aka ti ung ta parallui Ina:?” dea‑raka, “Aka pu Ta silàha: bahine to?”
28Na paliina‑mi teng bahine to ti pangànaang uhainna i anto, mao i lipu: manghàngo tau teꞌ, 29“Hàmo: se manghele besa Tau ung mangìsang nasang aka ung ku pukauꞌ‑mo. Dea‑mo naꞌ to ti Datu: Pipasalamaꞌ?” 30Sòhongna‑mi se nai lipu: ti tau, mao i Yesu.
31Hang bùruꞌ‑mi se, pasikolana Yesu mantena:‑I teꞌ, “Manne:‑Mo: Rabi.”
32Hampoꞌ Na sùmuinna‑mi teꞌ, “Ara‑Ko kinanneKu ung dang nu ìsang se.”
33Sikuti-kutikìna‑mi ti pasikolaNa teꞌ, “Oꞌ ara naꞌ tau ung mampambaha‑ing kinanne:?”
34Musuana‑mi ti Yesu teꞌ, “KinanneKu dea‑mo mampukauꞌ pampuinahanNa ung mampantuyu‑Kaꞌ, pang mampaladu kamaꞌangNa ung Na patongang‑mingNaꞌ. 35U konai: se moa teꞌ, ‘Ùpaꞌ kang hulangna màli: na tempo miheaꞌ.’ Hampoꞌ Ku pusua: matung teꞌ, Pumahele belo:-belo:‑ko se ti kinete:! Malea:‑mo ti linamungna. Kanikìtiꞌangna‑mo. 36Tau ung mangkìtiꞌ marrara‑mo mantarima sarona, na kobu:‑i se ti haseleꞌ mao i katuhoang ung màle, mangking tau ung sumahuꞌ pang tau ung mangkìtiꞌ hela sikahaka:-hakai:. 37Tongang‑da ti dalang sua: ung mangkonai: teꞌ, ‘Tau besa massahuꞌ, tau sintàna: ti mangkìtiꞌ.’ 38U Ku pantuyu se mangkìtiꞌ i kinete: ung dang nu kamaꞌ se. Tau sintàna: mingkamaꞌ‑mo, pang u mangkobua‑mo se haseleꞌ nai kamaꞌangna‑i se.”
39Boso: tu Samaria i lipu: to mupatongang mao i Yesu, sàbaꞌ passabiinna bahine to ung moa teꞌ, “Ku Na pusua:‑ing nasang ti aka ung ku pukauꞌ‑mo.” 40Jadiꞌ, to na lampiꞌ‑mi se tu Samaria to ti Yesu, na palau‑i se tungka mangking leta: sola:. Dea pùna leta: i anto ti Yesu idua àlona.
41Pang làbi boso: kang ho ti ung mupatongang, sàbaꞌ nai aka ung na pipaturo:‑ing Yesu mao i dei: se. 42Musua:‑i se mao i bahine to teꞌ, “Dolung ki mupatongang sàbaꞌ nai aka ung nu pusua:‑ingnang. Hampoꞌ i latenna, hang mahulo: ki sàding‑i teng hura: nai dio, sangadinna ki sàding kalenanna‑mo, pang ki ìsang‑mo moa teꞌ ìnang Pipasalamaꞌna‑Da lino.”
Anakàna besa pegawai nipumatalete:
(Mat. 8:5-13, Luk. 7:1-10)
43Àlo ung kaitàlu nai anto, Yesu mampatùrung pammulaoangna mao i Galilea. 44Yesu mangìsang moa teꞌ ha nitarimaI: i anto, ha mène:‑i i Samaria. Sàbaꞌ ara‑mo na pusua:‑i Yesu teꞌ, “Besa nabi ha nisangadi‑i i kàle: lipuna.” 45Hampoꞌ na moi mène: to, tempona bùruꞌ i Galilea, na tarima‑i se tu Galilea sàbaꞌ na tumang teng kallena‑i se mangita ung na pukauꞌ Yesu i Yerusalem tempona perayaang Paska. Sàbaꞌ tau to‑i se one: ho i Yerusalem tempo perayaang to.
46Yesu bùruꞌ pole i Kana i Galilea, ung Na kaonei: mampupiluhali anggoroꞌ nai uhai. Pang ara besa pegawai tamming kadatuang ung mipanaꞌ anakàna i lipuna, dea‑mo i Kapernaung. 47Na sàdingna‑i pegawai to moa teꞌ bùruꞌ ti Yesu i Galilea nai Yudea, lumao mingkalemu mangking nau: mao i Kapernaung mampumatalete: anakàna ung kalayaang.
48Na silàhana‑ming Yesu teꞌ, “I dang mangita‑ko se tanda-tanda pang kalle-kalleang, hara tungka‑i kapatongangangmu se.”
49Misùmunna‑mi teꞌ, “Ingke‑me: Tuang, pakala‑ko mate ti anakàku.”
50Na konaina‑mi Yesu teꞌ, “Nàmo:. Anakàmu matalete:‑mo.”
Na patongang ti suana Yesu pang kakarang. 51I lummu: dalang maang, na tadoꞌi‑mi se pangkoringna teꞌ, “Anakàta Tuang, matalete:‑mo.”
52Na kutikìna‑mi teꞌ, “Oꞌ jaang pira na marrara matalete:?”
Misùmunna‑mi se teꞌ, “Tihuaꞌ kùlaꞌ i maloe ha na pupirarung‑i hura:.”
53Na kalehainna‑mi teꞌ jaang dea ho teng to ti na musua: ti Yesu teꞌ, “Anakàmu matalete:‑mo.” Nai anto, mupatongang‑mo mao i Yesu, sola: nasang tanandapoꞌna.
54Aka dea te, tanda ung kapindua na pukauꞌ Yesu i Galilea tempona bùruꞌ nai Yudea.
Iliyochaguliwa sasa
Yohanes 4: skx
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
