Yohanes 5
5
Yesu mampumatalete: tau i Limmong Betesda àlo kapillìheang
1Ladu nai anto, ara besa perayaang tu Yahudi, jadiꞌ làngang ti Yesu mao i Yerusalem. 2I Yerusalem, dùkuꞌ i Bambangang Domba, ara besa limmong ung nikonai: Betesda i laling sua: Ibrani.*#5:2 sua: Ibrani pang sua: Aram. I limmong to, ara lima pililòngang 3ung na kaonei: maturu-turu boso: tau ung si mipanaꞌ. Ara ti ung buta, ung kempang, pang ung na kosu. [Nasang to‑i se, mangahong tilintana uhai i limmong to. 4Sàbaꞌ ara lao na minguluꞌ ti besa malaikaꞌ mao i limmong to, mallinta: uhai. Pang dea ti tau ung parrara mintama i limmong to tempona tilinta: ti uhai, matalete: nai sai aka teng ti ung na sàrong‑ing.]
5I kaoneang to, ara besa muane ung mipanaꞌ itàlu‑mo pulona karoꞌa: heaꞌna masainna. 6Na ita Yesu ti tau to maturu one:, pang Na ìsang moa teꞌ masai‑moda tungka mipanaꞌ. Na kutikìna‑mi moa teꞌ, “U mio: naꞌ matalete:?”
7Misùmunna‑mi teꞌ, “O Tuang, hari:‑da solaku ung manguluꞌ‑kaꞌ mao i limmong ìna tempona tilinta:. Pang ìna ku tarrang mao i limmong, ku na pidolui‑moko ho teng tau.”
8Musuana‑mi ti Yesu teꞌ, “Tèdeꞌ‑mo:! Lolong‑mi ti alemu pang mammulao‑mo:.” 9Tempo dea ho teng to, matalete:. Na lolong ti alena pang mammulao.
Àlo dea to, àlo kapillìheang. 10Deanna‑mo to, tau ung si nipiama: i aluku tu Yahudi massilàha:‑ing to tau ung màli: nipumatalete: moa teꞌ, “Àlo tee, àlo kapillìheang. U niapuꞌ mambaha alemu.”
11Hampoꞌ na sùmui teꞌ, “Tau ung mampumatalete:‑kaꞌ i langena: ti ung massuo:‑kaꞌ mallolong aleku, pang mammulao.”
12Na kutikìna‑mi se teꞌ, “Isai ti ung massuo:‑ko mène: to?”
13Hampoꞌ ha na ìsang‑i, sàbaꞌ malai ti Yesu pang ha na ita‑I, tiꞌ boso: tau i anto.
14Ha masai‑i nai anto, na pampasikorai:‑ing Yesu ti tau to i kaoneang Tamming Kabussùngang. Na onginna‑ming moa teꞌ, “Pisàdìngi. I latenna, u matalete:‑mo. Hau mampukauꞌ hura: dosa, mangking hari: ung làbi kadetu bùruꞌ mao i dio.”
15Lumanna‑mi ti tau to pang mampaìsàngi ung si nipiama: i aluku tu Yahudi moa teꞌ, “Yesu‑mo ti ung mampumatalete:‑maꞌ.”
16Deanna‑mo to, ung si nipiama: to mamponi: Yesu, sàbaꞌ mampukauꞌ nasang aka to, tempo àlo kapillìheang.
17Hampoꞌ musua: ti Yesu mao i dei: se teꞌ, “AmangKu tùrung mingkamaꞌ deaꞌ i latenna, pang mène: ho Koi:.”
18Nai suaNa to, sa: mangokaꞌ-okaꞌna‑i se dalang mampatei‑I. Sàbaꞌ handei:‑da teng mantengkai: atorang aluku mampatu: àlo kapillìheang, sangadinna mangkonai: ho teꞌ, “Puang, dea‑mo AmangKu,” palleona mangkonai: kalaeNa Puang.
Passabiinna Yesu mampatu: kalaeNa
19Nai anto, musua: ti Yesu mao i tau to‑i se moa teꞌ, “Matantu te ung Ku pusua: matung e teꞌ Anaka hang hela‑ida mampukauꞌ kalenanna aka-aka nai kalaeNa teng. Sangadinna, mangulaꞌ‑Da aka ti ung Na ita ung na pukauꞌ Ama:. Sàbaꞌ aka ti ung na pukauꞌ Ama:, dea‑da ho to ti ung na pukauꞌ Anaka. 20Sàbaꞌ Ama: mampulemu Anaka, pang mampupiita mao i Anaka nasang aka ti ung Na pukauꞌ. Mampupiitaa ho aka ti ung làbi lammuꞌ kang ho, mangking u mimàha se. 21Sàbaꞌ Ama: mampatuho: tau ung mate, pang mampanghengi‑ing se katuhoang. Mène: ho to ti Anaka manghengi‑ing katuhoang mao i tau siulaꞌ pampuinahanNa.
22Pang Ama: hang mangkàtui‑ida pangaena moi besa tau, sangadinna Na patongang‑ming AnakàNa ti mamparessa pang mangkàtui pangaena nasang tau. 23Na pukauꞌ Ama: ti to, mangking nasang tau massangadi Anaka, mène: massangadi‑i se Ama:. Tau ung dang massangadi Anaka, hang massangadi‑i ho Ama: ung mampantuyu Anaka.
24Matantu te ung Ku pusua: matung e teꞌ Tau ung mampisàdìngi suaKu pang mampatongang ung mampantuyu‑Maꞌ, mangampu katuhoang ung màle. Tau to, hang nihukùngi:‑da, sangadinna nieliꞌ‑mo nai kamateang mao i katuhoang.
25Matantu ho te ung Ku pusua: matung e teꞌ Bùruꞌa‑mo ti tempona, mala tempona‑moda, ti tau ung si mate kapatongangang massàdìnga suana Anakàna Puang. Pang dea ti ung si mampisàdìngi, mangkoraia katuhoang, 26sàbaꞌ Anaka to dea‑mo toaꞌna katuhoang sibali Ama:. Ama: manghengi‑ming kuasa to. 27Pang manghengi‑ming ho kuasa mangkàtui pangaena tulino, sàbaꞌ Anaka Tulino‑da.
28Hau kalle se massàding aka te, sàbaꞌ bùruꞌa‑da ti tempona teꞌ nasang tau i laling kaburuꞌ massàdìnga suaNa, 29pang missòhònga. Nasang tau ung mampukauꞌ‑mo ung si tongang, nipatuhoa pang mangkoraia katuhoang. Hampoꞌ nasang tau ung mampukauꞌ‑mo ung si kadetu, nipatuhoa pang mangkoraia hukungang.
30Hang hela‑Kaꞌko mampukauꞌ kalenanna aka-aka nai kalaeKu. Ku mangkàtui‑ko teng siulaꞌ ung na pipantuyu‑ing Ama:. Deanna‑mo to, ung Ku kàtui to, mahulo:‑da, sàbaꞌ hang mangulaꞌ‑Kaꞌko pampuinahangKu, sangadinna pampuinahanNa ung mampantuyu‑Maꞌ.”
Passabii sintàna: mampatu: Yesu
31“Ìna Koi: teng ti ung mampusua: passabiingKu mampatu: kalaeKu, mading u moa se teꞌ passabiingKu to, hang sipatu:‑ida nitarima. 32Hampoꞌ ara kang sintàna:, dea‑mo AmangKu. Pang Ku ìsang‑ko moa teꞌ passabiinNa to, sipatu:‑da nitarima. 33Pang u mampantuyu‑mo se tau mao i Yohanes Pumpudoiꞌ, pang Yohanes mampadeaꞌ‑mo passabiinna mampatu: aka ti ung tongang mampatu: kalaeKu. 34Ku pusua: ti aka to, handei:‑da sàbaꞌ Ku parallu passabiinna tulino, sangadinna mangking u mupatongang se pang nipasalamaꞌ. 35Yohanes to, mène: besa lampu ung nipahùrong, pang tumpana: i laling mampakareba bùruꞌKu. Pang sangkìdoꞌ‑i teng ti masainna u mingulaꞌ se haka:, sàbaꞌ pampanana to.
36Hampoꞌ ara sabi i Koi: ung làbi lammuꞌ nai passabiinna Yohanes. Dea‑mo, kamaꞌang ung na patongang‑mingNaꞌ Ama:, ung Ku pukauꞌ i latenna, miluhali sabi teꞌ Ama: mampantuyu‑Maꞌ.
37Pang Ama: kalenanna, ung mampantuyu‑Maꞌ, mampadeaꞌ‑mo ho passabiinNa mampatu: kalaeKu. Hara‑mo: dosse: massàding suaNa, dea‑raka mantannai: rupanNa. 38Pang suaNa ha one:‑ida i laling pinanahammu se, sàbaꞌ ha u patongang‑Kaꞌ se, pang tiꞌ Koi: ti ung Na pantuyu.
39U mampikurui se Suraꞌna Puang, sàbaꞌ u moa se teꞌ nai anto u mangampu se katuhoang ung màle, pambàtiꞌ Suraꞌna Puang to, miluhali ho sabi mampatu: kalaeKu. 40Hampoꞌ hang mio:‑ko se bùruꞌ mao i Koi: pang mangkorai: katuhoang to.
41Pampirerènginna tulino, hari: palleona mao i Koi:. 42Sàbaꞌ Ku ìsang‑ko ti i pinanahammu se moa teꞌ hari: malemummu se mao i Puang. 43Ku bùruꞌ‑moko i laling konana AmangKu, hampoꞌ u Mi tumpaꞌ se. Hampoꞌ ìna tau sintàna: bùruꞌ i laling konana kalenanna, u tarima se. 44U akaa‑mo se ti mupatongang? U mangokaꞌ se nipirerèngi, hampoꞌ mangokaꞌ na pirerèngi Puang ung dang ara sibaliangNa, hara‑ko se.
45Hau tangaꞌ se moa teꞌ Koi: ti ung marrampoꞌo: se mao i Ama:. Hampoꞌ ara ung marrampoꞌ‑ko se, dea‑mo Musa ung nu ranung‑mo se. 46Sàbaꞌ, àla: ung mampatongang‑ko se Musa, àla: u Mi patongang se ho, sàbaꞌ mampatu: kalaeKu ti ung na ronno:. 47Hampoꞌ i dang nu patongang‑ko se ti aka ung na ronno:, u akaa‑mo se ti mampatongang aka ung Ku pusua:?”
Iliyochaguliwa sasa
Yohanes 5: skx
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
