Yohanes 6
6
Yesu mampakanne: lima sàbunna tau
(Mat. 14:13-21, Mrk. 6:32-44, Luk. 9:10-17)
1Pira-pira masainna nai anto, Yesu one: i Galilea pang lumao i heteꞌna Tasiki Galilea, ung nikonai: ho Tasiki Tiberias. 2Boso: tungka tau mangulaꞌ‑I iaka teng Na lumaꞌi, sàbaꞌ manghele‑i se kalle-kalleang ung Na pukauꞌ, dea‑mo mampumatalete: tau ung mipanaꞌ. 3Yesu millanto mao i mungku, pang mesong i anto sola: pasikolaNa. 4Tempo to, dùkuꞌ‑mo perayaang Paska tu Yahudi.
5Tòna mihele ti Yesu, mangita tau ung dang makàdaꞌ bosona bùruꞌ mao i Dea. MingkutikìNa‑mi mao i Pilipus teꞌ, “Iaka ti nipambalaꞌia kinanne: mangking manne: nasang ti tau tee‑i se?” 6(Na ìsang‑moda Yesu aka ti ung Na pukauꞌa, hampoꞌ mingkutiki mène: to sàbaꞌ mangkakaꞌi Pilipus.)
7Misùmunna‑mi ti Pilipus teꞌ, “Moi ni mambalaꞌ roti ung idua atuꞌna seeng peraꞌ, hang kànaꞌi:‑da mao i dei: se na moi si sangkìdoꞌ‑i.”
8Besa kang nai pasikolaNa, dea‑mo Andreas mantàdina Simon Petrus, musua: teꞌ, 9“Ara besa anaka muane i ante ung mangampu lima roti jelai pang idua urung. Hampoꞌ tiꞌ akaa‑mo ti palleona to? Tau ung sama tee bosona e?”
10Musuana‑mi ti Yesu teꞌ, “Suo:‑i se mesong.” I kaoneang to, kilàmaka pang belo: niesòngi. Jadiꞌ, mesong‑mi se. Bosona tau to‑i se, muane maang, nikapang ara lima sàbunna. 11Na alanna‑mi Yesu ti roti to, màli: na musumbayang mukurusumangaꞌ. Na tòpe-tòpekèna‑mi, màli: na kàlaꞌ-kàlaꞌ‑i pasikolaNa mao i tau boso:. Mène: ho to ti urung, sangaka ung na kapelai:‑i se.
12Tòna boro‑mi se, musua:‑mo ti Yesu mao i pasikolaNa teꞌ, “Kobu:‑ko se ti tàranna ung nianne:, mangking hari: ung nipuleleang.” 13Na kobuna‑mi se ti tàranna nai lima roti jelai to, sampulo: idua rota:.
14Manghele to kalle-kalleang ung na pukauꞌ Yesu, musua: ti tau to‑i se teꞌ, “Ìnang tongang‑da. Dea‑moda te ti Nabi ung niàluꞌ bùruꞌa mao i lino!”*#6:14 Nabi ung niàluꞌ bùruꞌa. Hele i 1:21 pang Ul. 18:15-18. 15Na ìsang Yesu moa teꞌ bùruꞌa‑mi se mangala‑I pang mamparuku‑I miluhali datuna‑i se. Jadiꞌ, missaraka pole mao i mungku.
Yesu mammulao iahona Tasiki Galilea
(Mat. 14:22-33, Mrk. 6:45-52)
16Tòna dungkuꞌ hengi‑mo, sumòloꞌ‑i se mao i tasiki ti pasikolana Yesu. 17Millantona‑mi se i lemmang pang heteꞌ, mampatu: mao i Kapernaung. Dea ti Yesu hang bùruꞌ‑mi, pang tiꞌ makarinning‑mo. 18Pang marrara‑mo mabalumba ti tasiki, sàbaꞌ pasaui baraꞌ.
19Tòna ara‑mo màka: lima dea‑raka ùnung kilo na bose‑i se, mammulao‑mo ti Yesu iahona uhai, mindùkuꞌ i lemmangna‑i se. To na ita‑mi se moa teꞌ ara Tau mammulao iahona uhai, mariaꞌna‑mi se tungka. 20Hampoꞌ musua: ti Yesu teꞌ, “Koi:‑ko te. Hau mariaꞌ se!” 21Màli: na masannang‑i se mantadoꞌi‑I mallanto‑ing i lemmang, pang tempo dea ho teng to, lemmang to pàtu: deaꞌ mao i kàdaꞌ ung na patu:‑i se.
Tau boso: mangokaꞌ Yesu
22I hingkoꞌna to, tau boso: ung leta: maang i heteꞌna tasiki, pasàdaꞌ moa teꞌ hengi i langena: besa‑ida teng ti lemmang i anto. Na ìsang‑i se moa teꞌ pasikolana Yesu kakarang‑mo mampake lemmang to, pambàtiꞌ hang pola:‑ida ti Yesu. 23Aranna‑mi pira-pira lemmang nai Tiberias bùruꞌ mihingka: dungkuꞌ i kaoneang to, ung na kaonei: tau boso: manne: roti, tòna ladu musumbayang mukurusumangaꞌ ti Puang Yesu. 24To na ita‑mi tau boso: to moa teꞌ Yesu hari: i anto pang mène: ho ti pasikolaNa, millanto‑mi dasse: ho i lemmang to pang kakarang mao i Kapernaung mangokaꞌ Yesu.
Yesu dea‑mo kinanne: ung mi patuho:
25Tòna sikorai:‑mi se tau boso: ti Yesu i heteꞌna, mingkutikìna‑mi se moa teꞌ, “O Rabi, i sangkanna Ta bùruꞌ inne:?”
26Na sùmuinna‑mi Yesu teꞌ, “Matantu te ung Ku pusua: matung e teꞌ U Mi okaꞌ se, handei:‑da sàbaꞌ u pahang‑mo se ti kalle-kalleang ung Ku pukauꞌ, sangadinna sàbaꞌ u manne:‑mo se deaꞌ boro. 27Hau mingkamaꞌ se mangokaꞌ teng kinanne: ung liùnga teng, sangadinna mangokaꞌ‑ko se kinanne: ung mi patuho: deaꞌ tùrungna. Kinanne: to, u na hengiing se Anaka Tulino, sàbaꞌ na patongang‑mingDa Puang Ama: ti kuasa mampukauꞌ to.”
28Mingkutikìna‑mi se moa teꞌ, “Aka ti ung ki pukauꞌa deꞌ, mangking ki mangkamaꞌ kamaꞌang ung siulaꞌ pampuinahanna Puang?”
29Na sùmuinna‑mi Yesu teꞌ, “Dea tee ti kamaꞌang ung na kapelai: Puang nai dio se e. Mupatongang‑ko se mao i Dea ung Na pantuyu.”
30Musuana‑mi se moa teꞌ, “Ìna mène: to, aka ti tanda ung Nu pukauꞌa, mangking U ki patongang? 31Ampe-ampeta*#6:31 Ampe-ampeta, dea‑raka Ampe-ampeki. Sua: Yunani ha mampasisala:‑i. Nipake ‑ta sàbaꞌ Yesu ho tu Yahudi. lùlung manne: manna i padang ung tunini, mène: ung nironno: i Suraꞌna Puang teꞌ, ‘Kinanne: nai suruga, na pampakanne:‑ing tau.’ ”
32Musuana‑mi ti Yesu teꞌ, “Matantu te ung Ku pusua: matung e teꞌ Handei:‑da Musa ti ung mampanghengi‑ingko se kinanne: nai suruga dolung, sangadinna AmangKu‑ko. Pang Dea‑da ho ti ung mampanghengi‑ingko se kàle: kinanne: nai suruga i latenna. 33Sàbaꞌ kinanne: ung nai Puang dea‑mo to ung minguluꞌ‑mo nai suruga pang mampanghengi‑ing katuhoang ung màle mao i tulino.”
34Musuana‑mi se moa teꞌ, “O Tuang, hengi‑ingnangka ho tùrung ti kinanne: to.”
35Na sùmuinna‑mi Yesu teꞌ, “Koi:‑mo ti kinanne: ung mi patuho:. Isai-sai ti ung bùruꞌ mao i Koi: pang mupatongang, hang buroràngi:‑da hura: pang hang mangkaharai:‑da hura: deaꞌ tùrungna. 36Hampoꞌ mène: ti ung ladu‑mo Ku pusua: matung teꞌ, Na moi u Mi ita‑mo se, ha Mi patongang‑ko se ho. 37Nasang tau ung na hengi‑ingNaꞌ AmangKu, bùruꞌa mao i Koi:. Pang isai-sai ti ung bùruꞌ mai, matantu hang Ku patatàngi:‑ko.
38Sàbaꞌ Ku minguluꞌ‑mo nai suruga handei:‑Ko mangking Ku mampukauꞌ pampuinahangKu, sangadinna pampuinahanna‑da Dea ung mampantuyu‑Kaꞌ. 39Pang dea‑mo te ti pampuinahanNa, mangking nai nasang tau ung Na hengi‑mingNaꞌ, hau na ara ung Ku patatang hùling moi besa, sangadinna parallu Ku patuho: tempo àlo katampàkangna. 40Sàbaꞌ dea‑mo te ti pampuinahanna AmangKu, mangking nasang tau ung mangita Anaka pang mampatongang‑I, mangampu katuhoang ung màle. Pang Ku patuhoa‑ko tempo àlo katampàkangna.”
41Tau ung si nipiama: i aluku tu Yahudi marrara‑mo mamputuntui: Yesu, sàbaꞌ musua: moa teꞌ, “Koi:‑mo ti kinanne: ung minguluꞌ nai suruga.” 42Na konai:‑i se moa teꞌ, “Handei: naꞌ to Yesu, anakàna Yusup, ti te? Ta ìsang se ti tudolunNa. Mangaka pùna i latenna hela mangkonai: teꞌ, ‘Ku minguluꞌ‑mo nai suruga’?”
43Musuana‑mi ti Yesu moa teꞌ, “Hau mutuntu: se tùrung. 44Hari:‑da moi besa tau ung hela bùruꞌ mao i Koi: i dang na baha‑i mai Ama:, ung mampantuyu‑Kaꞌ. Pang isai-sai ti ung bùruꞌ mai, Ku patuhoa tempo àlo katampàkangna. 45I laling Suraꞌ Nabi-nabi nironno: mène: tee, ‘Nasang‑i se na paturoa Puang.’*#6:45 Yes. 54:13. Jadiꞌ, nasang tau ung mampisàdìngi Ama: pang mikuru nai Dea, bùruꞌ mao i Koi:. 46Hampoꞌ aka dea to, handei:‑da palleona moa teꞌ ara tau ung mangita‑mo Ama:. Dea‑da teng to ung bùruꞌ nai Puang ti ung mangita‑mo Ama:.
47Matantu te ung Ku pusua: matung e teꞌ Isai-sai ti ung mupatongang, mangampu katuhoang ung màle.
48Koi:‑mo ti kinanne: ung mi patuho:. 49Ampe-ampemu se manganne: manna i padang ung tunini, hampoꞌ mate kang‑da ho. 50Hampoꞌ kinanne: tee dea‑mo kinanne: ung nai suruga, ung minguluꞌ mangking na anne: tau pang hang mate‑i. 51Koi:‑mo ti kinanne: ung mi patuho:, ung minguluꞌ‑mo nai suruga. Tau ung manganne: kinanne: tee, tuhoa deaꞌ tùrungna. Kinanne: ung Ku hengiing na putuho: tulino dea‑mo kalaeKu.”
52Sitòkoꞌ suana‑mi ti ung si nipiama: to‑i se. Na konai:‑i se teꞌ, “Mangaka pùna helaa‑da ti Tau te manghengi‑ingke se kalaeNa nianne:?”
53Musuana‑mi ti Yesu teꞌ, “Matantu te ung Ku pusua: matung e teꞌ Ìna ha u anne:‑ko se ti kalaena Anaka Tulino, pang mangenung raaNa, hang mangampuo: se katuhoang ung màle. 54Isai-sai ti ung manganne: kalaeKu pang mangenung raaKu, mangampu katuhoang ung màle to, pang Ku patuhoa tempo àlo katampàkangna. 55Sàbaꞌ dea ti kalaeKu, kàle: kinanne:‑da, pang dea ti raaKu, kàle: ung nienungna. 56Tau ung manganne: kalaeKu pang mangenung raaKu, pàraꞌ i Koi: pang Ku pàraꞌ i laling tau to.
57Ama:, toaꞌna katuhoang pang mampantuyu‑Maꞌ. Ku tuho:‑ko nai Dea. Mène: ho to ti tau ung manganne: kalaeKu, tuhoa‑da ho nai Koi:. 58Kinanne: tee dea‑mo kinanne: ung minguluꞌ‑mo nai suruga. Hampoꞌ ha sibali‑i to ung na anne: ampe-ampemu se, sàbaꞌ moi manganne: manna to, mate teng‑i se ho. Hampoꞌ isai-sai ti ung manganne: kinanne: tee, tuhoa‑da deaꞌ tùrungna.”
59Nasang aka dea to, na pusua: Yesu tempona mupaturo: i tamming kapinombaang i Kapernaung.
Boso: tau ung mangulaꞌ Yesu mampalii:‑I
60Tòna massàding‑mi se sua:-suana Yesu, boso: tau ung mangulaꞌ‑Mi mangkonai: moa teꞌ, “Pipaturo: tee matìmi tàruꞌ. Isai‑do ti ung helaa mampisàdìngi?”
61Na ìsang‑moda Yesu i pinanahanNa moa teꞌ tau ung mangulaꞌ‑Mi mutuntu:, mamputuntui: aka to. MusuaNa‑mi teꞌ, “U putumpàle se naꞌ ti sua:-suaKu to? 62Pang u mangakaa se ìna u mangita Anaka Tulino millanto pole mao i kaoneangNa parara? 63Pinanaha Malìsong‑da ti ung mampatuho: tulino. Tulino hang hela‑i mampukauꞌ ti to. Sua:-sua: ung Ku padeaꞌ‑mo matung, nai Pinanaha Malìsong pang mi patuho:. 64Hampoꞌ ara ho nai àlaꞌmu se ung dang mampatongang.” Ìnang na ìsang‑moda Yesu nai pararanna, isai-sai ti ung dang mampatongang, pang isai ti ung mampeheaI:. 65MusuaNa‑mi kang ho teꞌ, “Dea‑mo to pu Ku pusua:‑i matung teꞌ, Hari:‑da moi besa tau ung hela bùruꞌ mao i Koi:, i dang nai Ama:‑i ti manghengi‑ing.”
66Na rara‑mo i anto, boso: nai àlaꞌna tau ung mangulaꞌ‑Mi malai pang hang sipolai:‑I hura:.
67Mingkutikìna‑mi ti Yesu mao i sampulo: idua pasikolaNa teꞌ, “Mangaka ti dio se? U Mi paliia‑do se ho naꞌ?”
68Misùmu ti Simon Petrus teꞌ, “Isai polea ti ki lumaꞌi Tuang? SuaTa‑mo ti mi panghengi‑ing katuhoang ung màle. 69Ki patongang‑moka, pang ki ìsang‑mo moa teꞌ Kinta: dea‑mo Ung Malìsong ung bùruꞌ nai Puang Matua.”
70Na sùmuinna‑mi Yesu teꞌ, “Hang Koi:‑i naꞌ ti mampilei‑ko se dio se sampulo: idua tau? Hampoꞌ tiꞌ besa nai àlaꞌmu se na pimmantoi: Datuna dihata bulituku!” 71Ung Na patu: dea‑mo Yudas anakàna Simon tu Kariot. Sàbaꞌ na moi‑rika Yudas besa nai àlaꞌna sampulo: idua pasikolaNa, dea ti ung mampeheaI:.
Iliyochaguliwa sasa
Yohanes 6: skx
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
