Yohanes 3
3
Yesu pang Nikodemus
1Ara besa tu Parisi ung nipiama: i tu Yahudi, ung nikonai: Nikodemus. 2Ara sambengi na bùruꞌ mao i Yesu pang musua: teꞌ, “O Rabi, ki ìsang moa teꞌ U na pantuyu Puang bùruꞌ miluhali tungguru. Sàbaꞌ hari:‑da moi besa tau ung hela mampukauꞌ tanda-tanda mène: ung Nu pukauꞌ, i dang dei: Puang ti manterei‑i.”
3Na sùmuinna‑mi Yesu teꞌ, “Matantu te ung Ku pusua: matung e teꞌ Ha hela‑ida ti tau mangita kadatuangna Puang, i dang nikianak‑ing pole.”
4Musuana‑mi ti Nikodemus teꞌ, “Oꞌ, niakaa‑mo ti mangkianàking pole tau ung baraꞌ‑mo? Hela naꞌ mintama pole i balammangna inanna pang nikianak‑ing pole?”
5Na sùmuinna‑mi Yesu teꞌ, “Matantu te ung Ku pusua: matung e teꞌ Ìna tau ha nikianak‑ing nai uhai pang Pinanaha Malìsong, tau to hang hela‑ida mintama i kadatuangna Puang. 6Dea ti ung na kianak‑ing tulino, tulino‑da. Hampoꞌ dea ti ung na kianak‑ing Pinanaha Malìsong, malìsong‑da. 7Deanna‑mo to, hau kallei ti pusuaKu moa teꞌ u parallu se nikianak‑ing pole. 8Pasaui mukaenang pàli iaka ung na puroa:. Ta sàding ti moninna hampoꞌ hang ta ìsang‑i nai iaka ti bùruꞌna pang pàli iaka ti palainna. Mène:‑da ho to ti tau ung na kianak‑ing Pinanaha Malìsong.”
9Mingkutikìna‑mi ti Nikodemus teꞌ, “Na akaa‑mo hela jadi ti to?”
10Na sùmui Yesu teꞌ, “U besa tungguru ung makona: i Israel, hampoꞌ ha u ìsang‑ido ti palleona suaKu. 11Matantu te ung Ku pusua: matung e teꞌ Ung ki pusua: dea‑mo nai none: aka ti ung ki ìsang‑mo, pang ki mampakareba passabiingki mampatu: aka ti ung ki ita‑mo. Hampoꞌ ha u tarima‑ko se ti ung ki pusua:. 12U Ku ongi‑ming se ti aka-aka ung jadi i lino tee, mènena nikianak‑ing pang pasaui, pang ha u patongang‑ko se. Jadiꞌ, u akaa‑mo se ti mampatongang ìna Ku mampusua: mao i dio se aka-aka ti ung one: i suruga? 13Hari:‑da moi besa tau ung millanto‑mo mao i suruga, sangadi Dea ung minguluꞌ‑mo nai anto, dea‑mo Anaka Tulino.
14Pang mène: Musa mallanto‑ing rapangangna talubammaꞌ iahona kayu i padang ung tunini,*#3:14 Hele i Bil. 21:4-9. mène:‑da ho ti Anaka Tulino parallu nilanto‑ing, 15mangking nasang tau ung mampatongang‑I hela mangampu katuhoang ung màle.”
16Sàbaꞌ Puang mampulemu tungka tulino, urungang Na hengi‑ming ti Anaka besanNa, mangking nasang tau ung mampatongang‑I ha mate‑i, sangadinna mangampu katuhoang ung màle. 17Sàbaꞌ Puang mampantuyu AnakàNa mao i lino, handei:‑da mangking manghukung tulino, sangadinna mangking tulino nipasalamaꞌ mangola: Dea. 18Isai-sai ti ung mampatongang‑I hang nihukung‑i. Hampoꞌ tau ung dang mampatongang, mangkorai:‑mo hukungang nai Puang, sàbaꞌ ha mupatongang‑i mao i Anaka besanNa.
19Pu na korai:‑i ti hukungang to, sàbaꞌ kamasilaoang to bùruꞌ‑mo mao i lino, hampoꞌ tulino mampuroa:‑da kamakarinnìngang nai none: kamasilaoang, sàbaꞌ kauꞌ-kauꞌna‑i se kadetu. 20Sàbaꞌ nasang tau ung mampukauꞌ ung kadetu, mampukàrang‑da kamasilaoang. Ha bùruꞌ‑ida mao i kamasilaoang, mangking kauꞌna ung kadetu to, ha niita‑i. 21Hampoꞌ tau ung mampukauꞌ ung tongang, bùruꞌ‑da mao i kamasilaoang, mangking niita moa teꞌ aka ti ung na pukauꞌ to, nai Puang.
Passabiinna Yohanes Pumpudoiꞌ mampatu: Yesu
22Ladu nai anto, Yesu pang pasikolaNa sòhong nai Yerusalem, hampoꞌ i pangalanna maang propinsi Yudea. Leta:‑i se one: pang mudoiꞌ.
23Yohanes mudoiꞌ‑da ho, i Ainon, dùkuꞌ i Salim, sàbaꞌ i anto kànaꞌ ti uhai. Tau tùrung-tùrung bùruꞌ i anto pang nidoiꞌ. 24Tempo to, ha nitarungkuꞌ‑mi ti Yohanes.
25Aranna‑mi ti kasitòkoꞌang sua: i àlaꞌna pasikolana Yohanes pang besa santuYahudinna‑i se mampatu: atorang aluku mulìsòngi. 26Lumai: se i Yohanes pang massilàha:‑ing teꞌ, “O Rabi, ta kalehai naꞌ to Tau ung ta pasola: i heteꞌna Uhai Yordan? Dolung u pusua:‑mo ti passabiimmu mampatu: Dea. I latenna mudoiꞌ to‑Da ho pang nasang tau lumao i Dea!”
27Na sùmuinna‑mi Yohanes teꞌ, “Tulino ha hela‑ida mangkorai: aka-aka i dang nipanghengi‑ing nai suruga. 28U sàding kalenanna‑mo se ti suaku teꞌ, ‘Hang dea‑kaꞌko Datu: Pipasalamaꞌ, sangadinna ku nipantuyu‑ko mampidolung‑ing.’ 29Ung mangampu lopaka bahine dea‑mo lopaka muane. Hampoꞌ ara besa tau, dea‑mo sekona lopaka muane to, ung tèdeꞌ mangahong mampisàdìngi‑i, pang tau to haka: tungka i massàding‑mi suana lopaka muane moa teꞌ jadi‑mo ti kasilopàkang. Mène:‑mo to ti koi: i latenna, kahakaangku miluhali kànaꞌ. 30Dea parallu sa: iaho-iahona, pang koi: sa: i hoiꞌ-hoiꞌna.”
31Dea ti ung bùruꞌ nai iaho, iaho‑Da nai nasangna. Dea ti ung nai lino, tulino‑da teng, pang musua: mampatu: angka-angkanna i lino. Dea ti ung bùruꞌ nai suruga, iaho‑Da nai nasangna. 32Mampusua:‑Da passabiinNa mampatu: aka ti ung Na ita‑mo pang ung Na sàding nai AmanNa, hampoꞌ passabiinNa to, hari: tau ung mantarima. 33Tau ung mantarima passabiinNa, miluhali sabi moa teꞌ mahulo: ti Puang. 34Sàbaꞌ Dea ung na pantuyu Puang, mampusua:‑Da suana Puang, sàbaꞌ Pinanaha Malìsong hang sannana‑i nihengi‑ing.
35Ama: mampulemu AnakàNa, pang manghengi‑ming kuasa mao i nasang angkanna. 36Tau ung mampatongang Anaka to, mangampu katuhoang ung màle deaꞌ tùrungna. Hampoꞌ tau ung dang manuruꞌ mao i Anaka to, hang mangitai: katuhoang, sangadinna kalalàkangna Puang pàraꞌ i tau to deaꞌ tùrungna.
Iliyochaguliwa sasa
Yohanes 3: skx
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
