Yohanes 2
2
Pampukauꞌ kasilopàkang i Kana
1I dadumbenginna to, ara pampukauꞌ kasilopàkang i lipu: Kana i Galilea, pang dea ti inanna Yesu one:. 2Pang Yesu sola: pasikolaNa nihàngo ho mao i pampukauꞌ to.
3To na hele inanNa moa teꞌ lòsoꞌ‑mo ti anggoroꞌna‑i se, musuana‑mi mao i Yesu teꞌ, “Kalòsoꞌang‑i dasse: anggoroꞌ.”
4Na sùmuinna‑mi Yesu teꞌ, “O Ina:, aka pu u Mi silàha:‑ing? Ha tempoKu‑miko.”
5Musuana‑mi ti inanNa mao i tau ung si mulayani i anto teꞌ, “Aka teng ti ung Na pantuyu‑ingko se, pukauꞌ‑ko se.”
6One: i anto ara ùnung pangànaang uhai ung nibabe nai hatu. Pangànaang to, biasa nipake mangàna: uhai ung nipake mallìsòngi kalae: pang parewa siulaꞌ atorang tu Yahudi. Ìna nipapùnoi:, araa màka: si sangatuꞌ liter ti pantang pangànaang to. 7Yesu mampantuyu to tau ung si mulayani teꞌ, “Papùnoi:‑ko se nasang ti pangànaang uhai.” Na papùnoina‑mi se. 8Ladu to, Yesu mampantuyu‑i se teꞌ, “Ya: i latenna, timmai‑ko se sangkìdoꞌ pang u baha‑ko se mao i ketua pampukauꞌ.” Na bahanna‑mi se mao.
9Na illaꞌinna‑i ketua pampukauꞌ ti uhai to ung miluhali‑mo anggoroꞌ, na hàngo ti lopaka muane. (Ha na ìsang‑i ketua nai iaka ti anggoroꞌ to, hampoꞌ dea ti tau ung mantimma uhai mangìsang.) 10Musuana‑mi teꞌ, “Biasanna‑da tau mampalennaꞌ dolung anggoroꞌ ung kamìnang belo:, pang ìna boso:‑mo na enung tau ung nihàngo, màli: na palennaꞌ‑i ti anggoroꞌ ung sukaꞌna. Hampoꞌ kinta:, mangàna: anggoroꞌ ung kamìnang belo: deaꞌ i latenna!”
11Dea‑mo to ti tanda ung parrara na pukauꞌ Yesu. Na pukauꞌ ti tanda to i Kana i Galilea pang mangola: aka to, Na pupiita ti kamalabiꞌangNa. Pang pasikolaNa mampatongang‑I.
Yesu mampasahu pumpubaloko nai kaoneang Tamming Kabussùngang
(Mat. 21:12-13, Mrk. 11:15-17, Luk. 19:45-46)
12Ladu nai anto, Yesu nau: mao i lipu: Kapernaung sola: inanNa, mantàdi:-tàdiNa pang pasikolaNa. Pang leta:‑i se one: pira-pira àlona.
13Tempo to, dùkuꞌ‑mo ti tempona perayaang tu Yahudi ung nikonai: Paska. Deanna‑mo to, làngang ti Yesu mao i Yerusalem. 14I kaoneang Tamming Kabussùngang i Yerusalem, Yesu mangkabùruꞌi pumpubaloko sapiꞌ, domba, merpati, pang pumputukaꞌ seeng ung mesong i meja-mejanna‑i se mantukaꞌ seeng.*#2:14 Hele catatan kaki i Mat. 21:12. 15Yesu tùrung mambabe besa pilahiꞌ nai pira-pira ulang pang Na pake mampasahu nasang pumpubaloko sìnang oloꞌ-oloꞌna‑i se nai kaoneang Tamming Kabussùngang. Na patisahuꞌ-sahuꞌ ti seengna‑i se pumputukaꞌ seeng, pang meja-mejanna‑i se Na haling‑ing. 16MusuaNa‑mi mao i pumpubaloko merpati teꞌ, “Esìngi nasang ti tee nai ninne:. Hau babe se kaoneang mubaloko ti Tammingna AmangKu!”
17Na kalehainna‑mi se pasikolaNa ti sua: tee i Suraꞌna Puang teꞌ, “PangkaraꞌingKu tungka mao i TammingMu Ama:, mangurungang‑ing massohe pinanahangKu.”*#2:17 Mas. 69:10.
18Ung si nipiama: i aluku tu Yahudi marràho Yesu teꞌ, “Aka ti butti, teꞌ U sipatu: mampukauꞌ mène: te? Tanda aka ti ung hela U pupiita mao i kami miluhali butti?”
19Na sùmuinna‑mi Yesu teꞌ, “Ronnong‑mo: se te tammingna Puang e, pang i laling itàlu àlona Ku patèdeꞌa‑ko pole.”
20Musuana‑mi se teꞌ, “Ai! Ùpaꞌ‑mo pulona ùnung heaꞌna ti tempo mampatèdeꞌ Tamming Kabussùngang tee. Pang U patèdeꞌa‑do pole i laling itàlu àlona?”
21Hampoꞌ ung na patu: Yesu mangkonai: “tammingna Puang” dea‑mo kalaeNa. 22Jadiꞌ, tempona tuho:‑mo nai kamateangNa ti Yesu, na kalehai‑mo pasikolaNa teꞌ aka to, ìnang Na pusua:‑moda. Pang na patongang‑mi se ti Suana Puang pang aka ti ung na pusua: Yesu.
Yesu mangìsang pinanahanna nasang tau
23Tempona one: i Yerusalem ti Yesu, dea‑mo tempona perayaang Paska to, boso: tau ung mampatongang‑I sàbaꞌ manghele tanda-tanda ung Na pukauꞌ. 24Hampoꞌ Yesu, Na ìsang‑da nasang ti tau, pang ha Na patongang‑i ti pinanahanna‑i se. 25Ha parallu‑ida nipumakàso:‑ing ti mampatu: tulino, sàbaꞌ Na ìsang‑da ti isinna pinanahanna tulino.
Iliyochaguliwa sasa
Yohanes 2: skx
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
