Yohanes 1
1
Sua: ung mi patuho:
1Nai tempo ung parrara, Sua: ara‑moda. Sua: one: sola: Puang, pang Sua: to dea‑mo Puang. 2Nai tempo ung parrara, sola:‑Da Puang. 3Nasang angkanna nitampa mangola: Dea, pang nai nasang aka ung nitampa, hari:‑da moi besa ung dang mangola: Dea. 4Dea‑mo ti toaꞌna katuhoang, pang katuhoang to dea‑mo kamasilaoang ung massilaoi: tulino. 5Kamasilaoang to, tumpana: i laling kamakarinnìngang, pang ha hela‑i ti kamakarinnìngang mantaloi.
6Ara besa tau ung bùruꞌ ung na pantuyu‑mo Puang, ung nikonai: Yohanes. 7Tau to, bùruꞌ miluhali sabi mangking mampatidolu passabiinna mampatu: kamasilaoang to, mangking mangola: passabiinna to, nasang tau mupatongang. 8Tau to handei:‑da kamasilaoang to, sangadinna bùruꞌ mangking mampatidolu passabiinna mampatu: kamasilaoang to.
9Kamasilaoang to dea‑mo kàle: kamasilaoang ung bùruꞌ i lino massilaoi: nasang tulino. 10One:‑Da i lino. Nitampa ti lino mangola: Dea, hampoꞌ lino ha mantannai:‑I. 11Bùruꞌ‑Da i lipuNa, hampoꞌ santuYahudinna ha mantarima‑I. 12Hampoꞌ ara ho ti tau ung mantarima‑I pang mampatongang konaNa. Tau to‑i se nipanghengi‑ing esòngang miluhali anakàna Puang, 13ung nikianak‑ing handei: hura: nai tulino, sangadinna nai Puang.
14Sua: miluhali‑mo tulino, pang leta: one: i àlaꞌ-àlaꞌki, pang ki ita‑mo ti kamalabiꞌangNa, ung kànaꞌ i laling kamalemuang pang katongangang. KamalabiꞌangNa to dea‑mo kamalabiꞌangna Anaka besanna Ama:.
15Yohanes mampatidolu passabiinna mampatu:‑I, na pikakoang‑ing moa teꞌ, “Dea‑mo te ti ung na patu: suaku moa teꞌ, Bùruꞌa‑Da i hunningku ti ung iaho nai koi:. Ha ara‑maꞌko, ara‑moDa ìnang.”
16Nai kamalabiꞌangNa ung kànaꞌ to, ta nasang mantarima‑mo kamalemuang ung massònoꞌ kamalemuang ung dolung. 17Sàbaꞌ dolung atorang-atorang nihengi‑ming mangola: Musa, hampoꞌ i latenna bùruꞌ‑mo ti kamalemuang pang katongangang mangola: Yesu Datu: Pipasalamaꞌ.
18Dea ti Puang, hara‑mida moi besa tau ung mangita, hampoꞌ Anaka besanNa, ung one: i ahìngangna Ama:, Dea‑mo ti ung mampupiìsang mao i kìta:.
Passabiinna Yohanes Pumpudoiꞌ mampatu: kalaena
(Mat. 3:1-12, Mrk. 1:1-8, Luk. 3:3-6, 15-17)
19Ung si nipiama: i aluku tu Yahudi i Yerusalem mampantuyu pira-pira imang pang tu Lewi mao mangkutiki Yohanes teꞌ, “Isai‑ko?”
20Yohanes mahulo: mangakui teꞌ, “Hang koi:‑kaꞌko ti Datu: Pipasalamaꞌ ung na àluꞌ Puang.”
21Mingkutikìna‑mi se teꞌ, “I mène:‑i to, isai‑ko deꞌ? U Elia naꞌ?”*#1:21a Hele i Mal. 4:5, Mat. 17:9-13 pang Luk. 1:17.
“Hang dea‑kaꞌko.”
Na kutikìna‑mi se ho pole teꞌ, “Dio naꞌ ti Nabi ung na àluꞌ Puang?”*#1:21b Hele i Ul. 18:15-18.
“Handei:.”
22Musuana‑mi se teꞌ, “Isai‑ko deꞌ? Aka ti ung nu pusua: mampatu: kalaemu? mangking hela ki padeaꞌ mao i tau ung mampantuyu‑kang.”
23Na konaina‑mi teꞌ, “Koi:‑mo te ti ‘tau ung mikako-kakoang i padang ung tunini teꞌ, Pakahulo:‑ingko se dalang ti Puang!’ mène: ung nironno: i suraꞌ nabi Yesaya.”*#1:23 Yes. 40:3. Ung na ronno: nabi Yesaya, mampatu: bùruꞌna Datu: Pipasalamaꞌ.
24I àlaꞌna tau ung si nipantuyu to ara ho pira-pira tu Parisi. 25Mingkutiki‑i se mao i Yohanes teꞌ, “Ìna mène: to, aka pu u mudoiꞌ deꞌ, i dang dea‑ko Datu: Pipasalamaꞌ, dea‑raka Elia, dea‑raka Nabi to ung bùruꞌa?”
26Misùmunna‑mi teꞌ, “Uhai‑ko ti ung ku pudoiꞌ‑ing, hampoꞌ i àlaꞌ-àlaꞌmu se ara‑mo besa Tau ung dang nu tannai:‑kang se. 27Bùruꞌa‑Da i hunningku, hampoꞌ manghùraꞌ‑ing pòteng ulang sapatunNa pang, hang sipatu:‑kaꞌko.”
28Nasang te nipukauꞌ i Betania, ung mui mata kùlaꞌ Uhai Yordan, kaoneangna Yohanes mudoiꞌ.
Yohanes manturo: mao i Yesu
29Àlo i hingkoꞌna, Yohanes mangita Yesu bùruꞌ mao i dea. Musuana‑mi ti Yohanes teꞌ, “Hele! Dea‑mo ti ti Anaka Dombanna Puang, ung manghùlìngi dosanna tulino. 30Dea‑mo ti ung na patu: suaku teꞌ, Bùruꞌa‑Da i hunningku ti besa Tau ung iaho nai koi:. Ha ara‑maꞌko, ara‑moDa ìnang. 31Ha ku ìsang‑iko dolung isai‑I, hampoꞌ patuku bùruꞌ mudoiꞌ uhai dea‑mo mangking nipupiìsang mao i tu Israel.”
32Na patidolu ho Yohanes ti passabiinna teꞌ, “Ku mangita‑mo Pinanaha Malìsong minguluꞌ nai langiꞌ mène: merpati pang leta: i kalaeNa. 33Dolung, ha ku ìsang‑miko isai‑I. Hampoꞌ Puang, ung mampantuyu‑kaꞌ mudoiꞌ uhai, mangongi‑mingnaꞌ teꞌ, ‘U mangitaa Pinanaha Malìsong minguluꞌ pang leta: i besa Tau. Tau to‑mo ti ung mudoiꞌa Pinanaha Malìsong.’ 34Ku ita‑moko, pang ku patidolu‑mo ti passabiingku teꞌ, Dea‑mo ti Anakàna Puang.”
Pasikolana Yesu ung parrara
35Àlo i hingkoꞌna, one: pole i anto ti Yohanes sola: idua pasikolana. 36Tòna mangita Yesu liung mammulao, musuana‑mi teꞌ, “Hele! Dea‑mo to ti Anaka Dombanna Puang.” 37Na sàdingna‑i se ti suana Yohanes, lumai: se mangulaꞌ Yesu.
38Misailena‑mi ti Yesu pang mangita tau to‑i se mangulaꞌ‑I. Na kutikìna‑mi teꞌ, “Aka ti ung nu okaꞌ se?”
Na sùmuinNa‑mi se teꞌ, “Rabi, Ta leta: iaka?” (Rabi, palleona Tungguru.)
39Na konaina‑mi Yesu teꞌ, “Hàmo: se manghele.”
Lumanna‑mi se. Tempo to, nikapang jaang ùpaꞌ i malena, pang leta:‑i se one: deaꞌ hengi.
40Besanna‑i se to ung massàding suana Yohanes pang lumao mangulaꞌ Yesu dea‑mo Andreas, mantàdina Simon Petrus. 41Andreas sàhe: lumao mangokaꞌ Simon, kàle: mantàdina, pang mampaìsàngi‑i teꞌ, “Ki korai:‑moka ti Mesias” (palleona Datu: Pipasalamaꞌ). 42Pang na baha ti Simon mao i Yesu.
To na ita‑mi Yesu ti Simon, Na onginna‑ming teꞌ, “Dio‑mo ti Simon, anakàna Yohanes. U nikonaia Kepas” (sua: Yunani, Petrus).
Yesu manghàngo Pilipus pang Natanael mangking mangulaꞌ‑I
43I hingkoꞌna to, Yesu mangaku: lumao i Galilea. LumanNa‑mi sikorai: Pilipus, pang massilàha:‑ing teꞌ, “Ulaꞌ‑Kaꞌ!”
44Dea ti Pilipus tu Betsaida, mène: ho Andreas pang Petrus. 45Pilipus lumao sikorai: Natanael, pang massilàha:‑ing teꞌ, “Ki korai:‑mo ti Tau ung na patu: ung na ronno: Musa i laling suraꞌna, pang ung na pakareba ho nabi-nabi. Tau to, Yesu tu Nasareꞌ, anakàna Yusup.”
46Hampoꞌ na sùmui Natanael teꞌ, “Aka? Tu Nasareꞌ! Ara naꞌ ung belo: nai lipu: to?”
Na sùmuinna‑mi Pilipus teꞌ, “Baꞌ, ingke manghele.”
47To na ita‑mi Yesu ti Natanael bùruꞌ mao i Dea, Na pusuana‑mi teꞌ, “Hele, tau tee ìnang tu Israel ung mahulo:. Hari:‑da na mutangkasi:.”
48Musuana‑mi ti Natanael teꞌ, “Oꞌ mangaka pu U mi ìsang?”
Na sùmuinna‑mi teꞌ, “Hang na hàngo‑mo:do Pilipus, u Ku ita‑modo millilong i lòpo: ara.”
49Musuana‑mi teꞌ, “Rabi, Ta Anakàna‑da Puang pang Datuna tu Israel!”
50Na konaina‑mi Yesu teꞌ, “Jadiꞌ, u patongang naꞌ nai suaKu teng, ung mangkonai: moa teꞌ u Ku ita‑modo millilong i lòpo: ara? U mangitaa ung làbi nipimàha kang nai anto.” 51MusuaNa‑mi kang ho teꞌ, “Matantu te ung Ku pusua: matung e teꞌ U mangitaa se langiꞌ tihungkai, pang malaikaꞌ-malaikaꞌna Puang millanto minguluꞌ mao i Anaka Tulino.”
Iliyochaguliwa sasa
Yohanes 1: skx
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
