Lukas 24
24
Yesu tuho: pole
(Mat. 28:1-10, Mrk. 16:1-8, Yoh. 20:1-10)
1Hampoꞌ mingkakaꞌ àlo parara mingku to, bahine to‑i se mao i kaburuꞌ mambaha hingkùrang ung na patokana‑mi se. 2Tòna bùruꞌ‑mi se i liokoꞌ, hatu pitanaꞌ tiloli‑mo. 3Mintamanna‑mi se i laling, hampoꞌ hang na korai:‑i se ti hatang puntinna Puang Yesu i anto. 4Tarrang‑i se tèdeꞌ i anto pang maliling mantangaꞌ aka to, hang nisàdaꞌ-sàdaꞌ‑i idua tau ung mipakeang pasiang-siang tèdeꞌ sidungkuꞌ dei: se. 5Mariaꞌ‑i se tungka, dea pùna mukalimuntuꞌ‑i se tumunnuku deaꞌ i tampo:, hampoꞌ idua tau to musua: mao i dei: se moa teꞌ, “Aka pu u mangokaꞌ se Tau ung tuho:‑mo i àlaꞌna tau ung mate! 6Hari:‑Da hura: inne:. Tuho:‑moDa pole! Kalehai‑ko se aka ti ung Na pusua:‑mo mao i dio se tòna one: maang i Galilea, 7moa teꞌ, ‘Anaka Tulino parallu nipehea mao i tau ung madosa màli: nipai oròngang‑I, pang àlo ung kaitàlu tuhoa pole.’ ” 8Na kalehainna‑mi se bahine to ti sua:-suana Yesu.
9Tòna sumule:‑mo nai kaburuꞌ to, na patidolu‑i se ti nasang aka ung jadi to mao i sampulo: besa ung na tonnoꞌ Yesu pang nasang ung mangulaꞌ‑Mi. 10Bahine to‑i se ung mampadeaꞌ aka to dea‑mo Maria tu Magdala, Yohana, Maria inanna Yakobus, pang bahine-bahine sintàna: ung na pasola:‑i se. 11Hampoꞌ kareba ung na patidolu‑i se to, na àna:‑i se teng ung si na tonnoꞌ Puang, ung nipatara:-tarai:. Hang na patongang‑i se ti ung na patidolu. 12Hampoꞌ na moi mène: to, dea ti Petrus tèdeꞌ pang miruru: mao i liokoꞌ. Tòna mutatengke: mihele pàli i laling, mangitanna‑mi ihanang lenang pibabaꞌinNa mannang i anto. Mimàhanna‑mi tungka pang sumule: sola: boso: pingkutìkang i pinanahanna mampatu: aka ti ung jadi‑mo.
I pallummuna dalang mao i Emmaus
(Mrk. 16:12-13)
13Àlo to ho, idua tau ung mangulaꞌ Yesu tarrang mammulao mampatu: besa lipu: ung nikonai: Emmaus, kira-kira sampulo: besa kilo karaona nai Yerusalem. 14Na pasianu mammulao, silàha:-làha:‑i se mampatu: nasang aka ti ung jadi‑mo to. 15Tarrang‑i se silàha:-làha: pang situkaꞌ tangaꞌ, Yesu kalena bùruꞌ pang sola:‑i se mammulao. 16Na ita‑i se ti Yesu, hampoꞌ hang na tannai:‑i se, sàbaꞌ kuasanna Puang. 17Musuana‑mi ti Yesu moa teꞌ, “Aka ti ung nu silàhai: se i lummu: dalang te?”
Tonto:‑i se sola: sila ung bàlung. 18Mingkutikìna‑mi ti besa ung nikonai: Kleopas mao i Yesu moa teꞌ, “Ta besa naꞌ tubùruꞌ i Yerusalem ung dang mangìsang aka ti ung màli: jadi i anto?”
19Na kutiki Yesu moa teꞌ, “Aka ti ung jadi to?”
Na sùmui‑i se moa teꞌ, “Ung jadi mao i Yesu, tu Nasareꞌ to. Nabi‑Da. Sua:-suaNa pang pingkuheoꞌ-heoꞌNa makuasa tungka, belo: i pihelena Puang belo: i pihelena nasang tau. 20Hampoꞌ kapala-kapala imang pang ung si nipiama: i liputa se mampehea‑Mi nihukung mate, pang na pai oròngang‑i se, 21pambàtiꞌ ki ranung moa teꞌ Dea‑mo ti ung massalokaꞌia tu Israel! Pang àlo te, àlo ung kaitàlu songka: aka to nipukauꞌ. 22Ara ho pira-pira bahine nai kami ung mampatidàlaꞌ‑mang i langena:. Mingkakaꞌ‑i se lumao i liokoꞌ, 23hampoꞌ hang na korai:‑i se ti hatang puntinNa one:. Sumulena‑mi se pang musua: moa teꞌ, ‘Ki mangita malaikaꞌ, pang malaikaꞌ-malaikaꞌ to musua: moa teꞌ Yesu tuho:‑moda.’ 24Lumanna‑mi ti pira-pira tau nai kami i liokoꞌ pang mantongàngi moa teꞌ aka ti ung si na pusua: bahine to‑i se ìnang mène: sìda‑da. Hampoꞌ hang na ita‑i se ho ti Yesu.”
25Musuana‑mi ti Yesu mao i dei: se moa teꞌ, “Ìnang u bebe dosse:! U makuntu tàruꞌ dosse: mampatongang nasang ti ung na pusua:‑mo nabi-nabi! 26Hang parallu‑ida naꞌ ìnang ti Datu: Pipasalamaꞌ mangola: dolung kamaparriꞌang, màli: na mallapiꞌ kamalabiꞌangNa?” 27Na pumakàsona‑mi Yesu mao i dei: se aka ti ung nironno: nasang i laling Suraꞌna Puang mampatu: kalaeNa, marrara nai Suraꞌ Musa deaꞌ Suraꞌ Nabi-nabi.
28Tempo to, dungkuꞌ‑mi se i lipu: ung na patui:‑i se. Hampoꞌ dea ti Yesu àla: mampatùrung pammulaoangNa, 29hampoꞌ na apuꞌ‑i se moa teꞌ, “Leta:‑me: inne: sola: kami. Hengi‑mo pang na rara‑mo ti makarinning.” Mintamanna‑mi ti Yesu mangking muhengi sola: dei: se. 30Tempona mesong‑i se manne:, na ala Yesu ti roti, musumbayang mukurusumangaꞌ, Na tòpe-tòpeke, màli: Na hengi‑ing mao i dei: se. 31Tuhangkanna‑mi ti matanna‑i se, màli: na pasàdaꞌ‑i se moa teꞌ Yesu‑da ti to. Hampoꞌ tempo dea ho teng to, Yesu hùling nai pihelena‑i se. 32Silàha:-làha:‑i se moa teꞌ, “Hang tikado:‑i naꞌ i pinanahanta, tòna musua: mao i kìta: i lummu: dalang pang mampumakàso: isinna Suraꞌna Puang mao i kìta:?” 33Tempo to ho teng, tèdeꞌ‑i se pang sumule: mao i Yerusalem. I anto mallampiꞌ‑i se to sampulo: besa pasikolana Yesu sola: tau sintàna: tarrang mukobu:. 34Tau to‑i se musua: mao i idua tau ung bùruꞌ to moa teꞌ, “Ìnang tongang‑da, nipatuho:‑mo pole ti Tuang! Mampupiita‑moDa kalaeNa mao i Simon!” 35Mupatidoluangna‑mi ti idua tau to, mampatidolu ung na pasikorai:‑i se i lummu: dalang, pang mangaka ti na mangìsang‑i se Tuangna tempona Na mantòpe-tòpeke roti.
Yesu mampupiita kalaeNa mao i pasikolaNa
(Mat. 28:16-20, Mrk. 16:14-18, Yoh. 20:19-23, KUNP 1:6-8)
36Tarrang‑i se maang mupatidoluang, hang nisàdaꞌ-sàdaꞌ‑i Yesu kalenanna tèdeꞌ i àlaꞌ-àlaꞌna‑i se pang musua: moa teꞌ, “Na kabeloang‑rangmo mao i dio se!” 37Hampoꞌ tipadàlaꞌ‑i se pang mariaꞌ, sàbaꞌ na konai:‑i se mangita anitunNa. 38Hampoꞌ musua: ti Yesu moa teꞌ, “Aka pu u mariaꞌ se? Aka pùna bata-bata ti pinanahammu se? 39Hele‑ko se ti kangkangKu pang kokoꞌKu, u ìsang‑ko se moa teꞌ Koi: kalenanna‑ko ti te! Hele belo:-belo:‑ko se pang kakaꞌ‑ko se, sàbaꞌ anitu hang kibau:‑ida pang kibuu: mène: ti ung nu ita se mao i Koi:.” 40Ladu musua: mène: to, Na pupiita ti kangkangNa pang kokoꞌNa mao i dei: se. 41Hampoꞌ hang hela‑mi se mupatongang tungka, na tumang hakana‑i se pang mimàha. Jadiꞌ, mingkutiki ti Yesu mao i dei: se moa teꞌ, “Ara naꞌ ung niannena inne:?” 42Na àdo:‑ing se ti sallengkeꞌ urung ung nitunu. 43Na ala Yesu ti urung to, màli: Na anne:‑i i heleꞌna‑i se.
44Ara ho na musua: ti Yesu mao i dei: se moa teꞌ, “Dea‑mo te ti aka ung ladu‑mo Ku padeaꞌ‑ingko se tòna ta sola: se maang moa teꞌ, Nasang aka ti ung nironno: mampatu:‑Kaꞌ i laling Suraꞌ Musa, Suraꞌ Nabi-nabi, pang Suraꞌ Masmur, parallu nikannaꞌi.” 45Na hungkainna‑mi Yesu ti tangaꞌna‑i se mangking mangìsang patuna Suraꞌna Puang. 46Na konai: mao i dei: se moa teꞌ, “I laling Suraꞌna Puang nironno: moa teꞌ Datu: Pipasalamaꞌ parallu mangola: kamaparriꞌang deaꞌ mate, pang parallu tuho: pole nai kamateang àlo ung kaitàlu, 47pang nironno: ho moa teꞌ mangola: konana Datu: Pipasalamaꞌ, parallu nipakareba mao i lìliꞌna lino na rara nai Yerusalem moa teꞌ tulino parallu mingkatobaꞌ mangking dosa-dosanna‑i se nipantengkai:‑ing. 48Dio‑mo se ti sabi nai nasangna to. 49Pang Koi: kalenanna ti ung mampantuyua matung Pinanaha Malìsong ung ladu na àluꞌ AmangKu. Jadiꞌ, leta:‑kangko se i lipu: tee muahong deaꞌ u na kapùnoi: se kuasa nai Puang.”
Yesu titengke: mao i suruga
(Mrk. 16:19-20, KUNP 1:9-11)
50Pira-pira masainna nai anto, Yesu mambaha‑i se missòhong lipu: deaꞌ dungkuꞌ i Betania. I anto, Na palummàngi palaꞌ mampasakke‑i se. 51Tarrang Na pukauꞌ ti to, titengke: mao i suruga missaraka nai dei: se. 52Mukalimuntuꞌ‑i se mampinombai‑I, màli: na sumule: mao i Yerusalem sola: pinanaha ung haka: tungka, 53pang lupu mampudi-pudi Puang i kaoneang Tamming Kabussùngang.
Iliyochaguliwa sasa
Lukas 24: skx
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
