Lukas 23
23
Yesu i heleꞌna Pilatus
(Mat. 27:1-2, 11-14, Mrk. 15:1-5, Yoh. 18:28-38a)
1Tèdeꞌna‑mi nasang ti tau i kasikobuang to pang mambaha Yesu mao i heleꞌna Pilatus. 2I anto na rara‑i se ti mantannaꞌ‑I. Musua:‑i se moa teꞌ, “Ki lampiꞌ ti Tau tee mampahùling tau bosoki. Mangasu-asui tau mangking hang mambayaꞌ‑i sima mao i Kaisar, pang mangkonai: kalaeNa besa datu:, dea‑mo Datu: Pipasalamaꞌ.”
3Mingkutikìna‑mi ti Pilatus mao i Yesu moa teꞌ, “Tongang naꞌ U datuna tu Yahudi?”
Na sùmui Yesu moa teꞌ, “Mène:‑mo ti ung ta pusua:.”
4Musuana‑mi ti Pilatus mao i kapala-kapala imang pang tau boso: sintàna: moa teꞌ, “Hari: ku korai: moi besa kasalaangna Tau tee mangking nihukung.”
5Hampoꞌ sa: na paruku-rukunna‑i se moa teꞌ, “Mangola: pipaturoNa, mangasu-asui‑Da tau i nasang pangalanna Yudea, na rara nai Galilea, deaꞌ inne:.”
Yesu i heleꞌna Herodes
6To na sàding‑mo Pilatus ti to, mingkutiki moa teꞌ, “Tu Galilea naꞌ ti Tau tee?” 7To nipaìsàngi‑mo moa teꞌ Yesu ung nai pangalanna ung na parenta Herodes, na pisuo:‑ing nibaha ti Yesu mao i Herodes, ung tempo to sileo: ho one: i Yerusalem.
8Masannang tungka ti Herodes tòna mangita Yesu, sàbaꞌ masai‑mo na sàding‑i ti Yesu pang palea: mangita‑I. Na ranung hela massabii Yesu mampukauꞌ besa tanda kalle-kalleang. 9Deanna‑mo to, Herodes mampadeaꞌ boso: pingkutìkang mao i Yesu, hampoꞌ hari: Na misùmu. 10Kapala-kapala imang pang ung si manarangna i aluku one:‑i se ho pang mantannaꞌ tungka Yesu. 11Nai anto, Herodes sola: pasukangna mangòhoꞌ-òhoꞌi pang mampaihoiꞌ Yesu. Na pakei‑i se pakeang makàsaꞌ, ung mène: pakeangna datu:, màli: na pisuo:‑ing nibaha pole mao i Pilatus. 12Àlo to ho teng Herodes pang Pilatus, ung nai dolungna siponi:, miluhali museko.
Yesu i heleꞌna pole Pilatus
(Mat. 27:15-26, Mrk. 15:6-15, Yoh. 18:38b~– 19:16a)
13Mangkobuna‑mi kapala-kapala imang pang Ung si Nipiama: sintàna: pang tau boso: ti Pilatus, 14màli: na musua: mao i dei: se moa teꞌ, “U mambaha se Tau tee mao i koi: pang mangkonai: moa teꞌ, ‘Tau tee mambahaꞌi tau boso: mangkeboꞌi ung muparenta.’ I latenna i heleꞌmu se, ku paressa‑mo, hampoꞌ hari:‑ko tungka ku korai: moi besa kakadetuang ung nu pantannaꞌ‑ing se. 15Mène: ho pantangaꞌna Herodes. Sàbaꞌ dea‑da ho mampakatu‑mo Yesu sumule: mao i kami. Jadiꞌ, makàso:‑mo moa teꞌ Tau te hang mampukauꞌ‑Ida angkanna ung sipatu: nipanghukung mate‑ing. 16Deanna‑mo to, ku pisuoing nisasa:, màli: ku holi‑I.” [ 17Siulaꞌ kabiasaang, tumpuꞌ perayaang Paska, Pilatus parallu mangholi besa tau ung nitarungkuꞌ mao i tu Yahudi.]*#23:17 Palleona mingku perayaang Paska pang Roti Dang Nipasumangkaꞌ dea‑mo mangkalehai kasalokaꞌang nai kanipukaunàngang ung na korai: tu Israel tempona malai nai Masir. Miluhali tanda moa teꞌ ung muparenta tu Roma pola: i laling perayaang to, na babe Pilatus ti kabiasaang mangholi besa tau nai putarungkuꞌang, isai-sai ti ung na palau‑i se tu Yahudi.
18Hampoꞌ nasang tau ung mukobu: i anto mikakoang moa teꞌ, “Hùlìngi‑i ti Tau ti, pang holi‑ingnang ti Barabas!” 19(Dea ti Barabas nitarungkuꞌ sàbaꞌ mangeba ung muparenta i lipu: pang papateang.)
20Hampoꞌ tiꞌ na kapelai: Pilatus ti mangholi Yesu, dea pùna musua: kang pimbesa mao i tau boso:. 21Hampoꞌ lupu‑i se mikakoang moa teꞌ, “Pai oròngang‑I! Pai oròngang‑I!”
22Musua: ung kapintàlung ti Pilatus mao i dei: se moa teꞌ, “Hampoꞌ aka ti kasalaangNa? Hari:‑ko ku korai: moi besa ti kasalaangNa ung sipatu: nipanghukung mate‑ing. Na moi mène: to, ku pisuoing nisasa:, màli: ku holi‑I.”
23Hampoꞌ tùrung‑i se mampilabui: mikakoang moa teꞌ Yesu parallu nipai oròngang. Tampàkang pampalaunna‑i se kihaseleꞌ. 24Na kàtuinna‑mi Pilatus mangking pampalaunna‑i se nitoroꞌi, 25dea‑mo mangholi tau ung nipatama i laling putarungkuꞌang sàbaꞌ mangeba ung muparenta pang papateang, siulaꞌ ung na palau‑i se. Pang dea ti Yesu nipehea mangking nipukauꞌ ti ung mène: ung na kapelai:‑i se.
Yesu nipai oròngang
(Mat. 27:32-44, Mrk. 15:20b-32, Yoh. 19:16b-24)
26To na baha‑mi se ti Yesu, sikorai:‑i se besa tau ung nikonai: Simon tu Kirene, ung màli: mintama i Yerusalem. Na parukunna‑mi se tantara mangkoha: oròngangna Yesu mintoroꞌ i keboꞌna Yesu. 27Boso: tau pola: mammulao mingulaꞌ i Yesu, muane pang bahine. Bahine to‑i se mangkàràki pang mampantalihuhui: Yesu. 28Hampoꞌ misaile: ti Yesu mao i dei: se pang musua: moa teꞌ, “O ina:-ina: tu Yerusalem, hau Mi kàràki se. Sangadinna, kàràki ti kalaemu se pang ana-anakàmu. 29Sàbaꞌ araa ti tempona tau musua: moa teꞌ, ‘Hang makàdaꞌ‑ida maupaꞌna ti bahine ung mikamma, ung dang kianaka!’*#23:29 Bahine ung mikamma kalia:-lia: ti kamaparriꞌang ung na olaa, nai none: bahine ung kianaka, ung manghele kamaparriꞌang ung na ola: anakàna. 30Tempo to, araa tau ung musua: mao i mungku-mungku moa teꞌ, ‘Boling‑kang!’*#23:30 Rampeang ung sibali na pake nabi Hosea i Hos. 10:8. 31Sàbaꞌ, ìna pàli i kayu ung mata:, tau mampukauꞌ mène: tee, akaa ho ti ung nipukauꞌ mao i kayu ung màlo!”*#23:31 kayu ung mata: manturo: Yesu, ung dang sipatu: nihukung, mène: kayu ung mata: maang hang sipatu:‑i nituhe:. kayu ung màlo manturo: tau ung madosa, ung sipatu: ìnang nihukung, làbi-làbi tu Yerusalem, i bùruꞌ‑mi ti tempona.
32Ara ho idua tau sintàna: — nai iduanna tau ung làsi: — ung na baha‑i se mangking nihukung mate sola: Yesu. 33Tòna deaꞌ‑mi se i kaoneang ung nikonai: i Karurung, na pai oròngang‑i se ti Yesu pang idua tau ung làsi: to. Besa tau mui konang pang besa mui kairinNa. 34Musumbayangna‑mi ti Yesu moa teꞌ, “O Ama:, pantengkai:‑ing se! Hang na ìsang‑i se aka ti ung na pukauꞌ‑i se.”
Pakeangna Yesu na kàlaꞌ-kàlaꞌ‑i se tantara ung mampai oròngang‑I mangola: mantammo undi. 35Tau boso: tèdeꞌ i anto mihele-hele. Ung si nipiama: i tu Yahudi one: ho pang mampenge: Yesu. Na konai:‑i se teꞌ, “Tau sintàna: Na pasalamaꞌ. Jadiꞌ, ìna tongang-tongang Datu: Pipasalamaꞌ ung na pilei Puang, eloꞌna Na pasalamaꞌ‑i ti kalaeNa hon‑da teng!” 36Tantara-tantara ho mampenge:‑I. Mai: se mampaenung uhai ung nilaoko anggoroꞌ mihiaꞌ i Yesu*#23:36 Mampukauꞌ te dea‑mo mène: aka ti ung nironno: i Mas. 69:22. 37pang musua: moa teꞌ, “Ìna U Datuna tu Yahudi, pasalamaꞌ ti kalaeMu!” 38Ara ho ung nipampakasalaang‑ing nironno: i papang iahona bakàNa moa teꞌ, Dea‑mo te ti datuna tu Yahudi.
39Besanna nai tau ung làsi: ung nipatumpio: i anto mampenge: Yesu moa teꞌ, “Hang dea‑Ko naꞌ Datu: Pipasalamaꞌ? Baꞌ pasalamaꞌ‑mi ti kalaeMu pang kami!”
40Hampoꞌ na ràho to solana moa teꞌ, “Hang mariaꞌ‑kodo naꞌ mao i hukungangna Puang i lino i hunni? Sàbaꞌ ta sola: nihukung mate mène: Dea. 41Dea ti hukungangta, ìnang sipanto:‑da kauꞌta. Hampoꞌ Tau tee, hari:‑da tungka kasalaangNa.” 42Musuana‑mi moa teꞌ, “O Yesu, kalehai‑kaꞌko ìna U bùruꞌ‑mo i kadatuangMu!”
43Musuana‑mi ti Yesu mao i dea moa teꞌ, “Matantu te ung Ku pusua: matung e teꞌ Àlo tee ta solaa i Pirdaus.”
Kamateangna Yesu
(Mat. 27:45-56, Mrk. 15:33-41, Yoh. 19:28-30)
44Kira-kira na làsuku kùlaꞌ, nasang i pangalanna lipu: to miluhali makarinning deaꞌ mulummu: sumòloꞌ kùlaꞌ, 45sàbaꞌ hang tumpana:‑i ti kùlaꞌ. Tempo to, ihanang pisapaꞌ i laling Tamming Kabussùngang marèbaka idua. 46Na pilabuina‑mi Yesu ti mikakoang moa teꞌ, “O Ama:, i kangkangMu Ku pisasare‑ing ti pinanahangKu!”*#23:46 Sua: tee, na ala Yesu nai Masmur 31:6. Tu Yahudi biasa mampusua: sua: te i laling pusumbayangna tempona maturu i pihengi, pang tempona ho dùkuꞌ matena. Biasa ho na pusumbayang‑ing imang sipolai: pimmalaꞌ ung nipinomba‑ing i malena i Tamming Kabussùngang. Ladu musua: mène: to, mangkàtu‑mo.
47To na hele‑mo komandang kompi ti ung jadi, na paiaho ti Puang moa teꞌ, “Tongang hang kasalaang‑Ida!” 48Nasang tau boso: ung bùruꞌ mihele i anto, ung mangita aka ti ung jadi, sumule:‑i se sìnang pinanaha ung minassang tungka. 49Pang nasang ung mangulaꞌ Yesu, i àlaꞌna ara‑i se bahine ung sipolaiNa nai Galilea, tèdeꞌ nai karaona pang mangita nasangna to.
Yesu nikaburuꞌ
(Mat. 27:57-61, Mrk. 15:42-47, Yoh. 19:38-42)
50Ara besa tau i anto ung nikonai: Yusup, tau ung belo: pang mahulo:. Moi‑rika besanna nai Ung si Nipiama: i tu Yahudi, hampoꞌ 51hang na kasitoroꞌi‑i ti hukungang ung na kàtui pang ung na pukauꞌ Ung si Nipiama: to. Tau te tu Arimatea, besa lipu: i Yudea, pang mangahong-ahong bùruꞌna kadatuangna Puang. 52Yusup te mao i Pilatus mampalau hatang puntinna Yesu. 53Na uluꞌna‑mi ti hatang puntinna Yesu nai oròngang, màli: na babaꞌi‑i ihanang lenang. Ladu to, na loling i laling liokoꞌ ung niboboko i mungku hatu. Liokoꞌ to, hara‑mi nipukaburuꞌi‑i.
54Àlo to, àlo tokana mangheleꞌi àlo kapillìheang pang morai mintamaa‑mo àlo kapillìheang. 55Bahine ung sipolaina Yesu nai Galilea mangulaꞌ Yusup pang mangita liokoꞌ to. Na ita‑i se ho mangaka ti hatang puntinna Yesu niloling i anto. 56Sumulena‑mi se, màli: na mampatokana‑i se rampa-rampa pang hingkùrang nipanghingkùràngiing hatang puntinna Yesu. Hampoꞌ tiꞌ tempo àlo kapillìheang, millìhe‑kàngi se siulaꞌ atorang.
Iliyochaguliwa sasa
Lukas 23: skx
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
