Lukas 22
22
Pangaku: mampatei Yesu
(Mat. 26:1-5, Mrk. 14:1-2, Yoh. 11:45-53)
1Dùkuꞌ‑mo ti perayaang Paska pang perayaang Roti Dang Nipasumangkaꞌ. 2Tempo to, kapala-kapala imang pang ung si manarangna i aluku, mimmànaꞌ-mànaꞌ mangokaꞌ dalang mampatei Yesu, sàbaꞌ mariaꞌ‑i se mao i tau boso:.
Yudas mambaloko Yesu
(Mat. 26:14-16, Mrk. 14:10-11)
3Tempo to ho, Yudas tu Kariot, besanna nai sampulo: idua pasikolaNa, na katama Datuna dihata bulituku. 4Lumanna‑mi silàha:-làha: kapala-kapala imang pang pungkaba-kabana tau ung mangkuyaꞌ Tamming Kabussùngang mangaka ti mampehea Yesu mao i dei: se. 5Tau to‑i se haka: tungka pang sadia manghengi‑ing Yudas seeng peraꞌ. 6Pang dea ti Yudas mantarima aka to. Mangokaꞌna‑mi kanàha: ung belo: mampehea Yesu mao i tau to‑i se, pang hang na ìsang‑i tau boso:.
Mampatokana manne: Paska
(Mat. 26:17-19, Mrk. 14:12-16)
7Bùruꞌ‑mo ti tempona mangheleꞌi perayaang Roti Dang Nipasumangkaꞌ ung na kaonei: tau marrereꞌ anaka domba ung nipake i laling manne: Paska.*#22:7 Paska dea‑mo àlo ung parrara i laling perayaang Roti Dang Nipasumangkaꞌ. 8Mampantuyunna‑mi Petrus pang Yohanes ti Yesu mao i Yerusalem teꞌ, “Nao: se mampatokana‑ingke se manne: Paska.”
9Mingkutikìna‑mi se moa teꞌ, “Iaka ti kaoneang ung Ta kapelai: ki mampatokana manne: Paska?”
10Na sùmui Yesu teꞌ, “Ìna u mintama‑mo se i lipu:, u sikoraia se besa muane ung mangkoha: pangànaang uhai. Ulaꞌ‑ko se ti tau to mao i tamming ung na pintamaia, 11pang ongi‑ingko se mao i ampunna tamming moa teꞌ, ‘Pipasangna Tungguru mène: tee, Iaka ti kaoneang ung nipatokana‑mingNaꞌ Ku kaoneia manne: Paska sola: pasikolaKu?’ 12Tau to manturoing‑ko se besa kaoneang ung baluaꞌ one: iaho pang tokana‑mo. I anto parallu u mampasadia se manne: Paska.”
13Kakarangna‑mi se ti Petrus pang Yohanes mao i lipu:. Dea tòna bùruꞌ‑mi se one:, na korai:‑i se nasang mène: ung na pusua: Yesu. Na pasadianna‑mi se ti manne: Paska.
Pararanna ung nikonai: perjamuang
(Mat. 26:20-29, Mrk. 14:17-25, Yoh. 13:21-30, 1Kor. 11:23-25)
14Tòna bùruꞌ‑mo ti tempona manne: Paska, Yesu maturu manne: i kaoneang to sola: ung Na tonnoꞌ. 15Musuana‑mi ti Yesu mao i dei: se teꞌ, “Ku makalela tungka manne: Paska sola: dio se hang tempona‑Maꞌ mangola: kamaparriꞌang. 16Sàbaꞌ matantu te ung Ku pusua: matung e teꞌ Hang Ku annei: hura: ti tee deaꞌ nipukauꞌ i kadatuangna Puang.”
17Na alanna‑mi Yesu ti anggoroꞌ, musumbayang mukurusumangaꞌ, màli: na musua: teꞌ, “Ala pang enung‑ko se. 18Sàbaꞌ matantu hang Ku enùngi: hura: ti anggoroꞌ nai i latenna deaꞌ tempona kadatuangna Puang bùruꞌ.”
19Ladu to, Yesu mangala roti pang musumbayang mukurusumangaꞌ. Na tòpe-tòpekèna‑mi, màli: Na àdo:‑ing mao i ung si Na tonnoꞌ teꞌ, “KalaeKu ti te, ung nipehea mampatu: dio se. Pukauꞌ‑ko se ti te miluhali pipakalehai mao i dio se mampatu: Koi:.” 20Mène: ho ti anggoroꞌ. Tòna ladu‑mi se manne:, Na àdo:‑ing Na pasianu musua: teꞌ, “Anggoroꞌ tee dea‑mo pangàluꞌ ung màle, ung na papàraꞌ raaKu, ung nibolang mao i dio se.
21Hampoꞌ hele‑ko se! Dea ti tau ung mambaloko‑Maꞌ, inne: ho i meja tee. 22Anaka Tulino ìnang mangolaa‑da kamateang, mène: ti ung na patantu‑mo Puang, hampoꞌ masolang ti tau ung mampehea‑I.”
23Mambùruꞌ‑ing na rara‑mi se ti sikuti-kutiki moa teꞌ, “Isaintaa‑ra: se ti ung mampukauꞌ aka to?”
Masseroi isai ti ung miluhalia ung iaho nai àlaꞌna‑i se
24Tùrung nai anto, sisala:-sala:‑i se mampatu: isai ti ung sipatu: nilanto‑ing miluhali ung iaho nai àlaꞌna‑i se. 25Musuana‑mi ti Yesu mao i dei: se teꞌ, “Datu:-datu: i lino ung dang mangìsang Puang mampène: kaunang rayaꞌna. Pang mène: ho ti tau ung si makuasa mao i rayaꞌ, mangkonai: kalaena Pililongna Rayaꞌ. 26Hampoꞌ dea ti dio se hang mading‑i mène: to. Sangadinna, ung iaho nai àlaꞌmu se parallu miluhali mène: ung kamìnang i hoiꞌ, pang dea ti ung nipiama: parallu mapangae: mène: pangkoring. 27Sàbaꞌ umma ti ung làbi iaho, tau ung mesong manne:? dea‑raka ung mallayani‑i. Handei: naꞌ to ung mesong manne:? Koi: tee dea‑mo Tungguru i àlaꞌmu se, hampoꞌ mène: pangkoring.
28Na moi mène: to, u lupu se mampasola:‑Kaꞌ i laling nikakaꞌingKu. 29Deanna‑mo to, nai pinumpummu se u Ku hengi‑ing se kuasa, mène: AmangKu manghengi‑mingNaꞌ kuasa muparenta i kadatuangKu. 30U mannea se ho sola: Koi: i laling kadatuangKu. Pang u mesònga se i esòngang kadatuang mamparenta sampulo: idua rapu tu Israel.”
Yesu mampupiìsang pissangkaꞌnaa Simon Petrus
(Mat. 26:31-35, Mrk. 14:27-31, Yoh. 13:36-38)
31Tempo to, musua: ti Yesu teꞌ, “Simon, Simon, pisàdìngi! Datuna dihata bulituku mampalau pang nikanàhai:‑mo mangkakaꞌi‑ko se, mène: gandum nitapi:. 32Hampoꞌ u Ku pusumbayang‑ming, mangking hang hùling‑i ti kapatongangangmu. Pang ìna u mangule:‑ming mao i Koi:, parallu u mampumatotoꞌ sola:-solamu.”
33Hampoꞌ na sùmui Petrus teꞌ, “O Tuang, ku sadia‑ko maparriꞌ sola: Kinta: moi mintama i putarungkuꞌang dea‑raka ku pupate.”
34Musuana‑mi ti Yesu moa teꞌ, “Ku pusua: matung Petrus teꞌ, Hang moni‑mi ti manoko hengi tee, u pintàlùnga‑mo Mi pissangkaꞌ‑ing.”
35Ladu to, musua: ti Yesu mao i dei: se teꞌ, “Dolung tòna u Ku pantuyu se, pang u Ku apuꞌ se mambaha pangànaang seeng dea‑raka pangànaang aka-aka pang sapatu, u kakurangang se naꞌ aka-aka ung nu paralluinna?”
Na sùmui‑i se moa teꞌ, “Hari:.”
36Musuana‑mi ti Yesu teꞌ, “Hampoꞌ i latenna, isai ti ung mangampui pangànaang seeng, dea‑raka pangànaang aka-aka, parallu na baha, pang isai ti ung dang mangampui piso, na balok‑i ti kayaꞌ i sòhongnanna na pambalaꞌ‑ing piso. 37Ku pusua: mène: to matung i dio se sàbaꞌ parallu nikannaꞌi aka ti ung nironno: i laling Suraꞌna Puang mampatu: Datu: Pipasalamaꞌ teꞌ, ‘Nipènea tau ung làsi:.’*#22:37 Yes. 53:12. Pang aka dea to tarrang‑mo nipukauꞌ mao i Koi: i latenna.”
38Musuana‑mi ti pasikolaNa teꞌ, “O Tuang, ara idua piso inne:.”
Misùmu ti Yesu moa teꞌ, “Kànaꞌ‑mo.”
Yesu musumbayang i Mungku Saitun
(Mat. 26:36-46, Mrk. 14:32-42)
39Missòhongna‑mi lipu: ti Yesu mao i Mungku Saitun mène: kabiasaangNa, pang dea ti pasikolaNa mingulaꞌ ho. 40Tòna deaꞌ‑mo i anto, musua: mao i pasikolaNa teꞌ, “Lupu‑ko se musumbayang mangking ìna u nikakaꞌi se, hang marèneꞌ‑ko se.”
41Mingkarao: sangkìdoꞌ nai pasikolaNa, màka: araa sampitumpa: karaona, màli: na mukalimuntuꞌ musumbayang 42moa teꞌ, “O Ama:, i mading‑i, pakarao:‑ingNaꞌ ti enùngang*#22:42 enùngang. Hele catatan kaki i Mat. 26:39. ung Ku heleꞌi tee. Hampoꞌ hau na mangulaꞌ pampuinahangKu, sangadinna pampuinahamMu‑ra:.” [ 43Mingèneꞌna‑mi ti besa malaikaꞌ nai suruga mampumatotoꞌ‑I. 44Hampoꞌ na moi mène: to, Yesu sa: maparriꞌ-parriꞌna, dea pùna sa: lupu-lupunna musumbayang, mambùruꞌ‑ing pangkaliasanNa tumìtiꞌ mène: raa: mao i tampo:.]
45Ladu musumbayang, mangule:‑ming mao i pasikolaNa. Hampoꞌ leto Na kabùruꞌi, sàbaꞌ àsaꞌ‑i se i laling kamasussaang. 46MusuaNa‑mi mao i pasikolaNa teꞌ, “Tèdeꞌ‑ko se! Aka pu u leto se? Lupu‑ko se musumbayang mangking ìna u nikakaꞌi se, hang marèneꞌ‑ko se.”
Yesu nitingkang
(Mat. 26:47-56, Mrk. 14:43-50, Yoh. 18:1-11)
47Tòna tarrang maang musua: ti Yesu, bùruꞌ‑mo ti tau boso:. Tau to‑i se na pidolung‑ing Yudas, besanna nai sampulo: idua pasikolana Yesu. Na dùkuꞌinNa‑mi Yudas pang na udung siulaꞌ kabiasaangna tu Yahudi ìna sikorai:. 48Hampoꞌ musua: ti Yesu mao i Yudas teꞌ, “Mangola: naꞌ puudung ti u mampehea Anaka Tulino Yudas?”
49To na hele‑mo pasikolaNa ti aka ung jadia‑mo, musua:‑i se moa teꞌ, “O Tuang, ki lola piso‑mi se teng na?” 50Pang besa nai àlaꞌna‑i se pasikola to, mangae:‑ing pisona, urungang lumpong ti talinga konangna kaunangna Kapala Imang.
51Hampoꞌ musua: ti Yesu teꞌ, “Hàni:! Hau patùrung se!” Na pingànana‑ming pole Yesu ti talinganna tau to, pang sitokaꞌ belo: pole.
52Musuana‑mi ti Yesu mao i kapala-kapala imang pang pungkaba-kabana tau ung mangkuyaꞌ Tamming Kabussùngang pang ung si matua:-tuana tu Yahudi ung bùruꞌ mantingkang‑I teꞌ, “U Mi àna: se naꞌ gorombolang ti te? pu u mai se mambaha sulampaka pang pibalobo:? 53Àlo-àlo ta sola: se i kaoneang Tamming Kabussùngang. Aka pu dang nu Mi tingkang se tempo to? Hampoꞌ dea‑mo te ti tempomu se, tempona kuasa kamakarinnìngang.”
Petrus mampissangkaꞌ‑ing Yesu
(Mat. 26:56-58, 67-75, Mrk. 14:53-54, 65-72, Yoh. 18:12-18, 25-27)
54Na tingkangna‑mi se ti Yesu pang na baha mao i tammingna Kapala Imang, pang Petrus mingulaꞌ tùrung nai karaona. 55I lummuna pangàloang to, tau mantuhe: api pang mesong‑i se mimpaling. Petrus ho mesong i àlaꞌ-àlaꞌna‑i se. 56Besanna nai bahine pangkoring mangita Petrus mesong i minanaꞌna api. Na pumahelena‑mi, màli: na musua: moa teꞌ, “Tau tee solana ho Yesu!”
57Hampoꞌ missangkaꞌ ti Petrus moa teꞌ, “Hang ku ìsang‑iko ti Tau to!”
58Hang masai‑i nai anto, besa ho tau mampumahele Petrus pang musua: moa teꞌ, “Dio ho ti besanna nai dei: se!”
Hampoꞌ na sùmui Petrus moa teꞌ, “Hari:, hang koi:‑kaꞌko Mantàdi:!”
59Kira-kira sanjaang nai anto, besa ho tau mangkìting musua: moa teꞌ, “Ìnang solana Yesu ti tau tee, sàbaꞌ tu Galilea‑da ho.”
60Hampoꞌ na sùmui Petrus moa teꞌ, “Hang ku ìsang‑iko aka ti ung na patu: suamu Mantàdi:!” Tempo to ho teng, tarrang maang musua: ti Petrus, moni‑mo ti manoko.
61Misailena‑mi ti Puang Yesu pang manghele Petrus. Na kalehainna‑mi Petrus aka ti ung ladu na pusua: Puang Yesu mao i dea moa teꞌ, “Hang moni‑mi ti manoko hengi tee, u pintàlùnga‑mo Mi pissangkaꞌ‑ing.” 62Missòhongna‑mi ti Petrus pang sùsuꞌ kumàraka.
63Tau ung mangkuyaꞌ Yesu, mangòhoꞌ-òhoꞌi‑I. 64Na potoꞌ‑i se ti matanna Yesu pang na panaꞌi, màli: na kutiki‑i se teꞌ, “O Nabi, konai: deꞌ isai ti ung mampanaꞌi‑Ko?” 65Boso: kang ho ti sua:-sua: ung mampenge:‑I ung na pusua:‑i se mao i Dea.
Yesu i heleꞌna Ung si Nipiama:
(Mat. 26:63-66, Mrk. 14:61-64, Yoh. 18:19-24)
66Tòna dungkuꞌ kùlaꞌ‑mo, ung si matua:-tuana tu Yahudi, kapala-kapala imang, pang ung si manarangna i aluku tu Yahudi mukobu:. Nibahanna‑mi ti Yesu mao i heleꞌna Ung si Nipiama: to. 67Na konai:‑i se mao i Yesu moa teꞌ, “Konai:‑ingnang, U Datu: Pipasalamaꞌ naꞌ?”
Hampoꞌ na sùmui Yesu moa teꞌ, “Ìna u Ku konai:‑ing se, ìnang ha u patongàngo: se. 68Pang ìna Ku mingkutiki matung, ìnang ha u sùmuio: se. 69Hampoꞌ na rara i latenna, Anaka Tulino mesònga mui konangna Puang ung Makuasa muparenta.”
70Musua:‑i se nasang moa teꞌ, “Ìna mène: to, U Anakàna naꞌ Puang te?”
Na sùmui Yesu moa teꞌ, “Mène: ti ung nu pusua: se.”
71Musuana‑mi se moa teꞌ, “Aka kang ti niparallui‑ing sabi? sàbaꞌ ta sàding‑mo se nai takoNa hon‑da teng.”
Iliyochaguliwa sasa
Lukas 22: skx
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
