Lukas 21
21
Pinombanna besa tau ung pali: ung mase-mase
(Mrk. 12:41-44)
1I kaoneang Tamming Kabussùngang to, Yesu mangita tau ung si sukiꞌ mampatama seengna i panti pangànaang pinomba. 2Pang massabii ho besa bahine ung pali: ung mase-mase mampatama idua seeng bassi ung kàle: i hoiꞌna. 3Musuana‑mi ti Yesu moa teꞌ, “Matantu te ung Ku pusua: matung e teꞌ Ung pali: tee mampatama làbi boso: nai nasang tau too. 4Sàbaꞌ nasang‑i se miàdo: nai làbinna kaaraangna, hampoꞌ ung pali: tee, miàdo:‑da nai kakurangangna, nasang aka ung ara i dea, ung na paralluinna i laling katuhoangna.”
Kamaronnòngangna Tamming Kabussùngang
(Mat. 24:1-2, Mrk. 13:1-2)
5I anto, ara pira-pira tau ung mangulaꞌ Yesu ung mampirerèngi nasang pampatèdeꞌ ung ara i kaoneang Tamming Kabussùngang. Na konai:‑i se moa teꞌ matairing tungka sàbaꞌ nibabe nai hatu ung si matairing pang nibeloi: nai angka-angkanna ung nipinomba‑ing mao i Puang. Musuana‑mi ti Yesu mao i dei: se teꞌ, 6“Araa‑da tempona nasang ti aka ung nu ita se tee niràba:‑i. Harai:‑da moi besa hatu nai pampatèdeꞌ to ung leta:, ung dang nironnònga nai kaoneangna.”*#21:5-6 Hele catatan kaki i 19:43-44.
Tau ung si mupatongang mao i Yesu nisolàngia
(Mat. 24:3-14, Mrk. 13:3-13)
7Nai anto, tau ung mangulaꞌ Yesu to mingkutiki moa teꞌ, “O Tungguru, i sangkannaa ti tempona aka to deꞌ? Pang aka ti tanda ung manturo: moa teꞌ jadia‑mo ti aka to?”
8Na sùmui teꞌ, “Toka:-tokana‑ko se, pakala‑rang u nipahùling se mampatu: aka ti ung bùruꞌa. Sàbaꞌ boso: tau ung bùruꞌa mampake konaKu moa teꞌ, ‘Koi:‑mo ti Datu: Pipasalamaꞌ,’ pang ‘Tempona‑mo ti Àlona Puang.’ Hampoꞌ hau ulaꞌ‑i se! 9Pang ìna u massàding kareba kaputudaang pang gorombolang, hau mariaꞌ se. Sàbaꞌ nasang to parallu‑da ìnang nipaara dolu, hampoꞌ handei:‑da palleona moa teꞌ tempona‑mo ti Àlona Puang.”
10Yesu mampatùrung suaNa moa teꞌ, “Suku besa situdaa suku sintàna:, pang mène: ho ti kadatuang besa mao i kadatuang sintàna:. 11Pang iaka-aka araa pidodaꞌ ung lammuꞌ, sìnang kaburoràngang pang sai ung mi ampaꞌ. Pang araa ho tanda kalle-kalleang ung si nikariaꞌ ung lammuꞌ i langiꞌ.
12Hampoꞌ hang jadi‑mi nasang ti to, u nitingkànga se pang nisolàngi. U nibahaa se mao i tamming-tamming kapinombaang niparessa, màli: nipatama‑ko se i putarungkuꞌang. Ung mène: to, nipukauꞌa ho matung i heleꞌna datu:-datu: pang ampu parenta dang dea tu Yahudi sàbaꞌ konaKu. 13Ìna u niparessa se, miluhali kanàha: ti to mao i dio se mampatidolu passabiimmu se. 14I laling tempo hang niparessa‑mo: se, pumatotoꞌ ti pinanahammu se. Hau tangaꞌ se ti ung nu pusuaa se mampusuai: kalaemu. 15Sàbaꞌ Koi: ti manghengiing‑ko se tangaꞌ ung belo: pang kapahelaang musua:-sua:, mambùruꞌ‑ing nasang poni:-ponimu hang hela‑i mantòkoꞌ‑ko se, dea‑raka mampasala:. 16Mala tudolummu sola: mantàdi:-tàdimu, tau deammu pang seko-sekomu, ung dang mupatongang mampeheao: se, pang pira-pira nai àlaꞌmu nipateia. 17Pang boso: tau mampukàràngo: se sàbaꞌ konaKu. 18Hampoꞌ moi besa bahulakàmu hang hùlìngi: nai bakàmu. 19Ìna u lupu se sabaraꞌ, u salamaꞌa.”
Kamaronnòngangna Yerusalem
(Mat. 24:15-21, Mrk. 13:14-19)
20“Ìna u mangita se Yerusalem marrara‑mo na lebo tantara, u ìsànga se moa teꞌ lipu: to hang masaii: hura: nipapunta. 21Tempo to, tau ung one: i Yudea parallu mampalai‑ing kalaena mao i mungku. Ung one: i laling lipu: parallu mampalii: lipu:, pang ung one: i kinete: hau na mintama pole i lipu:. 22Sàbaꞌ tempo to, dea‑mo àlo hukungang, mangkannaꞌi nasang ti ung tisuraꞌ. 23Hang makàdaꞌ‑ida masussannaa ti bahine ung kaleang pang ina: ung mupasusu maang anakàna tempo to! Sàbaꞌ lipu: te mangolaa kamaparriꞌang ung lammuꞌ tempona na hukung Puang. 24Araa ung na anne: sulampaka, araa ho ti ung nibaha mao pai lipuna tau miluhali ung na pukaunang. Pang Yerusalem na ida-idàka tau ung dang si mangìsang Puang, deaꞌ na lampiꞌ ti tempo ung na patantu Puang mao i dei: se.”
Bùruꞌna Anaka Tulino
(Mat. 24:29-31, Mrk. 13:24-27)
25“Bùruꞌnaa Anaka Tulino, araa tanda-tanda ung lammuꞌ niita i kùlaꞌ, hulang pang ana-anaka hulang. Lipu:-lipu: i lino masussaa pang huta mangheleꞌi pihuuna tasiki pang balumbanna. 26Tulino malimpànga mangheleꞌi aka ti ung jadi i lino tee. Sàbaꞌ kuasa-kuasa i langiꞌ nidodaꞌa. 27Tempo dea‑mo to, Anaka Tulino niitaa bùruꞌ i laling kahung sìnang kuasa pang kamalabiꞌang ung lammuꞌ. 28Ìna marrara‑mo ti aka to jadi, tèdeꞌ‑ko se pang tumonga:, sàbaꞌ dungkuꞌ‑mo ti Pipasalamaꞌmu.”
Pipaturo: nai lòpo: ara
(Mat. 24:32-35, Mrk. 13:28-31)
29Musuana‑mi ti Yesu i laling rampeang mao i dei: se teꞌ, “Hele‑ko se ti lòpo: ara, dea‑raka lòpo: aka teng. 30Ìna sòhong‑mo ti lolona, niìsang moa teꞌ kùlaꞌ kaùnga‑mo. 31Mène: ho to ìna u mangita se kamasussaang to ung Ku konai:‑mo, u ìsànga‑mo se moa teꞌ Puang muparentaa‑mo mao i nasang tulino.
32Matantu te ung Ku pusua: matung e teꞌ Hang lòsoꞌa‑mida mate ti tau ung si mangita tanda-tanda to, ìnang bùruꞌa‑mo ti Anaka Tulino. 33Moi langiꞌ pang lino hùlìnga, hampoꞌ suaKu tontònga deaꞌ tùrungna.”
Parallu lupu tokana
34“Jadiꞌ, kuyaꞌ‑ko se ti kalaemu, maa‑rang u masannang-sannang se teng pang menung-menung enùngang ung mi liling, dea‑raka mampadiokoꞌ teng tàruꞌ katuhoangmu se, mambùruꞌ‑ing hang tokana‑ko se tempona bùruꞌ sangka: ti àlo to 35mène: sàdi:. Sàbaꞌ àlo to, bùruꞌa mao i nasang tau i lìliꞌna lino. 36Jadiꞌ, tokana‑ko se, pang lupu musumbayang mangking u matotoꞌ se mangheleꞌi nasang aka ti ung jadia. Nai anto u hela se tèdeꞌ i heleꞌna Anaka Tulino.”
37Mingku to Yesu mupaturo: pai pitàlo i kaoneang Tamming Kabussùngang, pai pihengi lumao i Mungku Saitun, pang one: i anto muhengi. 38Tumpuꞌ miluhengi, boso: tau mingkakaꞌ lumao i kaoneang Tamming Kabussùngang mampisàdìngi pipaturoNa.
Iliyochaguliwa sasa
Lukas 21: skx
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
