Lukas 20
20
Kuasanna Yesu nipingkutik‑ing
(Mat. 21:23-27, Mrk. 11:27-33)
1Ara sangàlo mingku to, tempona Yesu mampaturo: tau boso: i kaoneang Tamming Kabussùngang pang mampakareba Kareba Belo:, bùruꞌ ti kapala-kapala imang pang ung si manarangna i aluku sìnang ung si matua:-tuana tu Yahudi. 2Musuana‑mi se mao i Yesu teꞌ, “Patidolu‑ingnang aka ti pingkakìniangMu mampukauꞌ nasang te. Isai ti ung mampakuasa‑Ko?”
3Na sùmui moa teꞌ, “Baꞌ Ku mingkutìka‑kangko ho. Patidolu‑ingNaꞌ se. 4Pudoiꞌna Yohanes, isai ti ung mampakuasa? Puang? dea‑raka tulino.”
5Silàha:-làhana‑mi se teꞌ, “Ìna ta konai: se Puang, Na konaia moa teꞌ, ‘Baꞌ aka pu dang nu patongang‑ko se deꞌ?’ 6Hampoꞌ ìna ta konai: se tulino, nasang tau te‑i se manghatuie: se deaꞌ mate, sàbaꞌ na patongang‑i se moa teꞌ Yohanes besa‑da nabi.” 7Jadiꞌ, na sùmui‑i se moa teꞌ, “Hang ki ìsang‑ika.”
8Musuana‑mi ti Yesu mao i dei: se teꞌ, “Ìna mène: to, hang Ku konaii:‑ko ho matung isai ti ung mampakuasa‑Kaꞌ mampukauꞌ nasang te.”
Rampeang mampatu: pumpingkamaꞌ kinete: anggoroꞌ
(Mat. 21:33-46, Mrk. 12:1-12)
9Mampatidolunna‑mi rampeang ti Yesu mao i tau boso: i anto teꞌ, “Ara besa tau ung mallamùngi kinete: anggoroꞌ. Na pupisaro ti kinete: to mao i pira-pira pumpingkamaꞌ, màli: na lumehoꞌ mao i lipu: sintàna: masai. 10Tòna tempona‑mo muratu, na pantuyu‑mo ti besa pangkoringna lumao mampalau umpana. Hampoꞌ pumpingkamaꞌ to‑i se mampanaꞌi sule: pangkoring to pang na suo:‑i se mangule:‑ing mubaba. 11Jadiꞌ, ampunna kinete: to mampantuyu ho pole pangkoringna sintàna:, hampoꞌ na panaꞌi‑i se ho teng pang na pakadia:-dia:, màli: na suo:‑i mubaba mangule:‑ing. 12Mambùruꞌ‑ing ung kapintàlung mampantuyu pangkoringna sintàna:. Hampoꞌ pangkoring to nikoyòngi ho pang na pitibe mao i sòhongna eteng. 13Tampàkang, ampunna kinete: to musua: moa teꞌ, ‘Aka ti ung ku pukauꞌa? Ku mampantuyua anakàku ung ku pulemu. Ingke: na sangadi‑i se.’ 14Hampoꞌ to na ita‑mi se ti anakàna to, silàha:-làha:‑mi se teꞌ, ‘Hoda‑mi o ti ung mampumanaꞌa o. Hàme:, patei‑ke se, mangking kìta: se ti ung mangala manaꞌna.’ 15Na tibena‑mi se mao i sòhongna kinete:, màli: na patei‑i se.”
Mingkutikìna‑mi ti Yesu moa teꞌ, “Ya:, aka ti ung na pukauꞌa ampunna kinete: to mao i pumpingkamaꞌ to‑i se? 16Manassa bùruꞌa mampatei‑i se, màli: na hengi‑ing pumpingkamaꞌ sintàna: ti kinetena to.”
Massàding suaNa to, musua: ti tau boso: teꞌ, “Hau na jadi‑rang ti aka to!”
17Hampoꞌ na pumahele Yesu pang musua: mao i dei: se teꞌ, “I mène:‑i to, aka ti palleona ung nironno: tee?
‘Hatu ung na tibe puntamming
miluhali‑mo hatu ung kamìnang parallu.’*#20:17 Mas. 118:22. Hatu manturo: Datu: Pipasalamaꞌ ung na tibe ung si matua:-tuana tu Yahudi.
18Isai-sai ti ung marèneꞌ i hatu to masolànga, pang isai ti ung na karèneꞌi hatu to, marùbùka.”*#20:18 Hele catatan kaki i Mat. 21:44.
Mampatu: mambayaꞌ sima mao i Kaisar
(Mat. 22:15-22, Mrk. 12:13-17)
19Ung si manarangna i aluku pang kapala-kapala imang mangìsang moa teꞌ rampeang to, mampatu: dei: se. Deanna‑mo to, na okaꞌ‑i se ti dalang mantingkang Yesu tempo dea teng to. Hampoꞌ mariaꞌ‑i se mao i tau boso:. 20Jadiꞌ, lupu‑i se mampidalang Yesu mangokaꞌ kanàha: ung belo:. Massaroi‑i se tau ung mingka mahulo:-hulo: mao i Yesu, mangking na pakala‑i se mangola: pingkutìkang pang na baha‑i se mao i ung makuasa i Roma niparessa. 21Mingkutikìna‑mi mao i Yesu ti tau ung nisaroi to‑i se teꞌ, “O Tungguru, ki ìsang teꞌ nasang ung Ta pipaturo:‑ing pang Ta pusua:, tongang. Ta mahulo: mupaturo: mampatu: pampuinahanna Puang mao i tau sàbaꞌ hang mampasàrilaing‑Ke tau. 22Deanna‑mo to, konai:‑ingnang, manuruꞌ atorang alukùta, tongang naꞌ ni mambayaꞌ sima mao i Kaisar? hari:‑rika.”
23Hampoꞌ na ìsang Yesu ti matengkona pingkutikìna‑i se. Na sùmuinna‑mi teꞌ, 24“Èneꞌ‑ingNaꞌ se besa seeng peraꞌ tu Roma. Gambaraꞌna pang konana isai ti tee?”
Na sùmui‑i se moa teꞌ, “Kaisar.”
25Na oanna‑mi Yesu moa teꞌ, “Baꞌ, ìna mène: to, hengi‑ing mao i Kaisar aka ti ung sipatu: mao i Kaisar, pang mao i Puang aka ti ung sipatu: mao i Puang.”
26Pang hari: moi besa sùmunna Yesu ung hela na pantannaꞌ‑ing se i heleꞌna tau boso:. Minganga‑i se teng mampisàdìngi sùmunNa.
Mampatu: katuhoang pole nai kamateang
(Mat. 22:23-33, Mrk. 12:18-27)
27Bùruꞌna‑mi mao i Yesu ti pira-pira tu Saduki. (Tau to‑i se dea‑mo sallaoang pahang ung mangkonai: moa teꞌ tau ung mate hang tuhoi:‑da pole.) Mingkutiki‑i se mao i Yesu mangking marràsang‑ing teꞌ, 28“O Tungguru, Musa marronno: atorang tee mangking nitoroꞌi moa teꞌ, ‘Ìna muane mate pang hari: anakàna, mantàdina parallu mampubahine to ipaꞌna, mangking mampaara hatiꞌna mao i mantàdina to ung mate‑mo.’*#20:28 Hele i Ul. 25:5. 29Ara patidoluangna pitu tau ung mantaladi:. Anaka lihoa: kibahine, hampoꞌ hara‑mi anakàna, mate‑moda. 30Na pubahinena‑mi anaka ung kaidua ti ipaꞌna to. Hampoꞌ mate ho pang hari: anakàna. 31Mène: ho mao i anaka ung kaitàlu, pang tùrung deaꞌ mao i anaka ung kapitu. 32Tampàkang mate‑da ho ti bahine to. 33Jadiꞌ, ìna tempona nipatuho: pole ti tau ung mate, ummannaa nai àlaꞌna‑i se to ti kàle: muanena? Sàbaꞌ nai pitu‑i se mantaladi: to, lòsoꞌ‑mo mampubahine‑i.”
34Na sùmui Yesu moa teꞌ, “Tau ung tuho: i lino tee silopaka. 35Hampoꞌ dea ti tau ung sipatu: nipatuho: nai kamateang pang tuho: i laling lino i hunni, hang sipubahinei:‑da hura: 36pang hang hela‑i hura: mate, sàbaꞌ tuho:‑i se mène: malaikaꞌ. Anakàna‑i se Puang sàbaꞌ nipatuho:‑mi se pole nai kamateang deaꞌ tùrungna.
37Pang mampatu: nipatuhona pole ti tau ung si mate, Musa kalenanna, ung nu pangorei: se, mampumakàso:‑mo i laling patidoluang mampatu: làmaka ung kisura ung hùrong, moa teꞌ, ‘Puang dea‑mo Puangna ampe-ampemu Abraham, Isak pang Yakub.’*#20:37 Hele i Kel. 3:6. 38Jadiꞌ, dea ti Puang, handei:‑Da Puangna tau ung mate, sangadinna Puangna‑Da tau ung tuho:. Sàbaꞌ i heleꞌna Puang, nasang taunNa tuho:.”
39Massàding to, pira-pira ung manarangna i aluku mangkonai: moa teꞌ, “Belo: ti sùmunTa Tungguru.” 40Deanna‑mo to, hari: hura: ung harani mampingkutik‑ing angkanna mao i Yesu.
Mampatu: Datu: Pipasalamaꞌ
(Mat. 22:41-46, Mrk. 12:35-37)
41Mingkutikìna‑mi ti Yesu mao i dei: se teꞌ, “Mangakaa na hela ti tau mangkonai: moa teꞌ dea ti Datu: Pipasalamaꞌ, hatiꞌna teng Daud? 42pambàtiꞌ Daud kalenanna mangkonai: i laling Suraꞌ Masmur teꞌ,
‘Puang musua: mao i Tuangku teꞌ,
Mesong‑Ko mui konangKu,
43deaꞌ Ku mampukauꞌ poni:-poniMu
one: i hoiꞌna palaꞌ kokoꞌMu.’*#20:42-43 Mas. 110:1.
44Jadiꞌ, ìna Daud miTuang mao i Datu: Pipasalamaꞌ to, baꞌ aka pùna hatiꞌnaa‑da ho teng Daud?”
Yesu mupasakiꞌ mangking ha tipapola:‑i se i ung si manarangna i aluku
(Mat. 23:5-7, Mrk. 12:38-40)
45Tòna tau boso: mampisàdìngi maang, Yesu musua: mao i tau ung mangulaꞌ‑Mi teꞌ, 46“Hele-hele‑ko se na? Hau mangulaꞌ ung na pukauꞌ ung si manarangna i aluku. Pampuroana‑i se ti mammulao-lao mampake juba, pang na puroa:‑i se ti nitabeꞌ pai pasaꞌ. Na puroa:‑i se ti i kaoneang-kaoneang ung nisangadi i tamming kapinombaang pang i pampukauꞌ. 47Mantangkasi:‑i se ung si pali: deaꞌ-deaꞌ marrampaꞌi rasangna. Pang musumbayang balanto-lanto, mangkapelai: pòteng mangking na ita tau. Deanna‑mo to, làbi matìmia ti hukungangna‑i se i hunni.”
Iliyochaguliwa sasa
Lukas 20: skx
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
