লূক 13

আকং লেংদুঃ লাঃফু আক্রংলিলাগো সুসেংসাং পিইচা

1য়াং আখিংখা য়াংমা হিকচা লৈগায়ক লুঃউ যীশুগো গালীল প্রিনিমা লৈগায়ক লুঃউ আক্রংলিলাগো প্রগেলিরি। য়াংসুউরো প্রগেলিচাগা, রোমীয় শাসনা প্রুচা গংখ্যুক পীলাতচা দিঃ গালীলিয়রোগো খুওয়েরো য়াংসুউরো ল্হুউচা সুদুওয়া স্যুইনা য়াংসুউরো স্যুইগোলি পংলিরি। 2দিঃ চাঃগাগো ক্রারো যীশু প্রলিইরি, “কুবাংরো তুওয়ককেতিলঃ, য়াং গালীলিরো য়াংচা পুয়েং মাখেংনৈং মুতুয়িনৈং ফ্রক্কেরি, য়াংসুউরো আখ্রা হিকচা গালীলিয়রো থাকপাং আম্যা আপ্রইস্যাং লঃ? 3ঙা কুবাংরোগো প্ররি, য়াংচা মুহুক, চাঃগাগা আপ্রইকা চিই মিল্হিছুগি, কুবাংরো আলুংসুউলি হ্রারো মাঃরাফ্রফু। 4শীলংমা আম্রাং ইংগো রাঃরি কিজু, যাসুরো তিছিশৈইয়ক সিইলিরি, কুবাংরো তুওয়ক্কেতি লঃ, যিরুশালেংমা আখ্রা হিচা লুঃউঃও থাকপাং য়াংসুউরোমা আম্যা আপ্রই হিকলিরি? 5ঙা কুবাংরোগো প্ররি, য়াংচা মুহু, য়িগিলি আপ্রইকা চিই মিহ্লিছুগি, কুবাংরো আলুংসুউগো মাঃরাফ্রফু।”

6য়াংনক যীশু সুয়েংসাং পিইফু কিজু দিঃ চাঃগা প্রলিইরি, “লুঃউ তয়ক আঃসিই ওয়ায়েংমা, সুবুওয়েসিই তাবাং চৈরো হিকলিরি। তখকখা য়াংসুউ লাঃরো, আসিই আপাংগো হ্রালিরি, ছুগি মাঃরালি। 7য়াংখা য়াংসুউচা আঙাসাগো প্রলিরি, ‘ক্রি, সুংন্হপেলুং দিঃ সুবুওয়েপাংমা ঙা আঃসিই হ্রারি য়িগিলি তুখুউলি মাঃরা। য়াংচা কিজু নাং আপাংগো খুওয়েবলৈফি। যাফু ‍দিঃচা ‍কিজু ঙা আঃরা ফ্যাকফুলি?’ 8আঙাসা আফ্রি পিইলিরি, ‘লুঃউগ্রিই, ‍দিঃ ন্হমা মুখুওয়েগিসি। ঙা য়াংচা লিফাক লাকচি তুকরো আঃছিই থিইমি। 9য়াংনক আপাংমা আঃসিই সিইগিগা কংরি, মিসিই ছুগি কুঃবাং য়াং আপাংগো খুওয়ে বলৈই।’”

আস্যাং যীশু গোংজা মিঃছুমাগো কেইংমাজিলিরি।

10তাঃরানিক তারাকখা যীশু তাঃরাচেরে তছংমা সুয়েংসাং পিইলিইরি। 11য়াংদেমা মিকমা তয়ক হিকলিইরি, য়াং মিকমাগো তিছিশৈইন্হ পেলুং মকং নেঃচা কাইংথাগো আনিং মকং প্যাংরো থাঃলিরি। য়াং মিঃমাচা গোংজা হিকলিরি য়াংচা কিজু তাখ্যাকলি পব্রং মাপ্যাংনৈং। 12যীশু য়াংসুউগো ম্রাংলিরি অর য়াংসুউগো নেংদুঃ খঃরো প্রলিরি, “মিঃখাং, নাং নাক রঃগাগা কংব্যা।” 13দিঃ চাঃগা প্ররো যীশু য়াংসুউ আঃপমা আলাক তাংলিরি অর খ্যাং খ্যাং য়াং গোংজাচা পব্রং রেঃলিরি অর থাওরা ফুরাগো খিমুয়েংলিরি।

14যীশু তাঃরা রাকমা লুঃউগো কেইংমাজিরি কিজু তাঃরাচেরেমা গংখ্যুকরোচা কংগং পাছা ত্যুইরো লুঃউরোগো প্রলিরি, “অলুক লূকফু কিজু খ্রকরা হিরিমু লঃ। য়াংচা কিজু তাঃরারাকমা মাঃলাব্রি, য়াং খ্রকরাকমা লাঃরো সানাসিরোগো আকং প্যাংমে।”

15য়াংখা আস্যাংচা য়াং গংখ্যুককো প্রলিইরি, “কুবাংরোচা ক্রংসুদঃ! তাঃরারাকমা কুবাংরো আলুংসুউ, কুবাংরোমা হিচা নুথুঃউয়িই মুহুকি ওয়েং রওকচা ম্রাংগো নগরাগা থুঃউকরো, রিই তঃফুকিজু প্রাংদুঃ য়ুউ মালাঃ লঃ? 16য়ল্হক মিগি অব্রাহাম আচৈং দিঃ মিকমাগো তিছিশৈইন্হ পেলুং মকং নেঃ কৈইরো হিকলিরি, য়াংচাগা কেইংমাফু কিজু তাঃরানিক আকং প্যাংফু মাসাং লঃ?”

17যীশু দিঃ চাঃগা প্রব্রিনক, যাসুরো যীশুগো ছেংগ্যাংফাক লূকতি, য়াংসুউরো আলুংসুউ আহ্রাক রাঃগেরি। য়িগিলি অর আখ্রা লুঃউরো যীশুমা দিঃ আগ্রিই আকি অলুকরোগো ম্রাংরো কংগং ওয়েংসাগেরি।

রিঃজিনা চিছিঃই ওয়েথুঃউ।

(মথি ১৩:৩১-৩৩; মার্ক ৪:৩০-৩২)

18য়াংনক যীশু প্রলিরি, “থাওরা ফুরা ঈ নেংঙেংদচা যানা তুঃরিলি? যানা ঙা ন্হুংফুলি? 19থাওরা ফুরা ঈ নেংঙেংদচা, রিঃজিনা তুঃরি, যাচাগো লুঃউ তয়কচা য়ুলাঃরো ওয়ায়ইংমা চঃলিরি। নক্কা আঞঅং পকরো, আপাং তাবাং ফ্রইরো তাকলিরি। য়াংখা ঙাকরো লাঃরো আখাকমা আস্বঃ লুককেলিইরি।”

20যীশু অরলি প্রলিইরি, “যানা ঙা থাওরা ফুরা ঈ নেংঙেংদগো নুংফুলি? 21থাওরা ফোরাঃস্যাং নৈংঙাইদ্চা চিছিইনা তুউরি, মিকমা তয়ক য়াং চিছিইগো য়ুউলো তিছি শৈস ময়দানা রলিইরি, য়াংখা ময়দা হিকচা রঃ তাকলিইরি।”

আপ্রইকা রুওয়েফু আক্রংলিলাগো সুয়েংসাং পিইখ্রাং

(মথি ৭:১৩,১৪,২১-২৩; মার্ক ৩:২০-২৭)

22রুওয়াদৈং রুওয়াদৈং, ম্রুদৈং ম্রুদৈং সুয়েংসাং পিঃরো পিঃরো যীশুচা যিরুশালেংদুঃ লাঃলিইরি। 23লুঃউ তয়ক যীশুগো মিংলিরি, “ছারাদঃ, আপ্রইইকা লৈগয়করা ক্যুওয়েফুব্যা লঃ?”

য়াংখা যীশু লুঃউরোগো প্রলিরি, 24“লেং আশ্যিগা ওয়ংফু কিজু কংগং ক্রোজাগে। ঙা কুবাংরোগো প্ররি, আম্যা লুঃউরো ওয়ংফু ক্রোজাগেতি য়িগিলি মুওয়ংনৈংমুঃ। 25যাখা ইংস্যাং থাঃরো লেংখুওয়া পুয়িইমি, য়াংখা কুবাংরো প্রাংগা রেঃরো, লেংখাওয়াওগা খকরো খকরো প্রগেমি, ‘আস্যাং, ঙারো কিজু লেংখাওয়া ল্হঃপি।’ ‍য়িগিলি ইংস্যাংচা কুবাংরো চাঃগাগো আপ্রই পিইফুচাগা, ‘নাংরো যাগা লাঃগেতিলি, ঙাগা মিঃসি।’ 26য়াংখা কুবাংরো প্রগেমি, ‘ঙারো কুবাংনা আতু চাঃগেরি সককেরি অর কুবাংমু লঃ ঙারোগো লেংদৈং লেংদৈং সুয়েংসাং পিইলিরি।’ 27য়াংখা ইংস্যাংচা প্রলিইরি, ‘নাংরো যাগা লাঃগেতিলি, ঙাগা মিসিক। লুঃউ আছুরো, ঙা নেংগা প্যককেলিই।’

28“কুবাংরো য়াংখা ম্রাংগেমি, অব্রাহাম, ইসহাক, যাকোব অর রিসি আলুংসুউ থাওরা ফুরা ঈ নেংঙেংদমা হিগেতি অর কুবাংরোগো প্রাংদুঃ থুঃউলৈতি। য়াংখা কুবাংরো ঙুঃগেমি অর মেখেংনৈ ফ্রইরো সুওয়ানা সুওয়া ক্রুইকেমি। 29আহ্রিইফাক, আনকফাক, ম্রকফাকনা তংফাককা লুঃউরো লাঃরো থাওরা ফোরাস্যাং নেংঙেংদমা চাঃফু থৈংগেমি। 30যাসুউরো আগু আছুংমা হিকরিলি-য়াংসুউরো আতুওয়ংমা তয়কতিরি পাথামা ফ্রইফু। অর যাসুউরো আগু পাথামা হিকরি-য়াংসুউরো আতুওয়ংমা তয়কতিরি আছুংমা ক্যাফু।”

যিরুশালেন আতুওয়ক ওয়েংনিচা

(মথি ২৩:৩৭-৩৯)

31য়াং আখিংমা লৈংগায়ক ফরিশী যীশুবাদুঃ লাঃরো প্রগেলিরি, “কুঃবাং দিগা লাঃলি, আক্রংগা হেরোদ মাংচা কুবাংগো সেঃবলৈফু ক্রেংরি।”

32যীশু য়াংসুউরোগো প্রলিরি, “কুবাংরো লাঃরো য়াং মুখ্রিগো প্রগেলি, ‘অর লৈগারাক ঙা মকং নেঃরোগো লইথুঃউফুসিই অর সানাসিরোগো কেইংমাজিফুসি য়ল্হকব্রিইমারা ঙা ঙাক অলুককো ছুংজিইফু।’ 33খ্যাংচা ফ্রইলি, অর লৈগারাক নক ঙাগা লাঃরাফুব্যা, আক্রংগা দিঃ যিরুশালেং আপি অর তেরেমালি তাবা রিসিই সিইনৈং লঃ?

34“য়েরূশ্যালাং, অঃ য়েরূশ্যালাং! নাংগা রিসিইরোগো সেঃতি অর নাংবামা যাসুউরোগো রুওয়েতি, য়াংসুউরোগো ক্যকখি বৈরো সেঃবৈতি। ক্রাক যাপুয়েন কোঃ আশ্যিরোগো, য়াংসুউ আতং অক্কা খ্যারো থাঃরি য়াংপুয়েং ঙা অর মনঃপ্রেং নাক লুঃউঃওরোগো লুঃউংরো চুকফু ক্রিলিরি য়িগিলি নাংরো আঃমা মাখেংগেলি। 35ক্রিগে,নাংরো ইংচা, নাংরো হ্রিঃগা লুঃউস্যাং মিহিক ফ্রইরো ক্যা হিকফু। ঙা নাংরোগো প্ররি, যানি তৈংঅং নারো মপ্রলি, ‘যাসু আস্যাং নামিনা লাঃরি, য়াংসুউ মাঙ্গালা হিবাজি, য়ল্হকরাক তৈংঅং নাংরো ঙাগো মাম্রাংমুকপ্যা।”

Iliyochaguliwa sasa

লূক 13: BBSRMZ

Kuonyesha

Shirikisha

Nakili