লূক 12

তিবিরোগো সুয়েংসাং পিইখ্রাং

(মথি ১০:২৬-৩৩)

1য়াং আক্রামা কংগং লুঃউম্যারোচা য়াংদেমা চুককেলিরি, য়জংকিজু য়াংসুউরো তয়ককো তয়ক তুঃগেরো তয়ক আথাকমা তয়ক লিঃগেলিরি। য়াংখা যীশু পাথামা কোঃ তিবিরোগো প্রলিরি, “ফরীশীরো মাঃতারাগা সিঃদি রেঃক্কে। য়াং মাঃতারাচা ফ্রইতি য়াংসুউরোমা মিকছা ক্যাং। 2খুঃরো হিকচা আলুংচা তাং প্রামি অর ওয়েংথিমা হিকচা আলুংচা সিকরামি। 3নাংরো যাচা মঃমঃমা প্রগেতি, লুঃউরো য়াংচাগো লাঃলাংনা ক্রাগেমি। ইং আথিইমা যাচারো নাঃমা নাঃমা প্রগেলিরি, য়াংচারোগো ইংখং আথাককা হঃ প্রালিমি।”

4“ঙাক মিকছুয়িইরো, ঙা নাংরোগো প্ররি, যাসুউরো কাইংথাগো ফ্যকপ্রিনক অর তুখুউলি মুলুকনৈংব্যা য়াংসুউরোগো মক্রককেকি। 5যাসুগো ক্রককেফুলি ঙা য়াংচাগো প্রপ্রামিঃ। নাংরোগো সেঃবলৈব্রিনক, আওয়িজিই ঙারিদুঃ য়ুউ লাঃফু যাসুউমা ক্ষেমতা হিকরিলি, য়াংসুউগোরা ক্রককে। হকতি, ঙা নাংরোগো প্ররি, য়াংসুউগোরা ক্রককে।

6“চাবৈশ্যি ঙাগং কংগং আনৈং আফুনা আরং মাক্যা লঃ? য়িগিলি থাওরা ফুরাচা য়াংচারো তুখুগোলি মিংরো মাঃলাঃ। 7প্রফুছুগি, নাংরো আগংমা ছেংবাংগোতয়ং, য়াংসুউ রুওয়িই থাঃরি। মক্রককেকি, আম্যা আম্যা চাবৈশ্যি আফুথাকপাং নাংরো আফু কংগং ম্যারি।

8“ঙা নাংরোগো প্ররি, ক্যাংসুমুছু লুঃউরো হ্রিকথাকমা ঙাগো লাক খেংরিছুগি, মনুসাওয়া সাঃলি য়াংসুউগো থাওরা ফুরা ঈ তেমেংদ হ্রিকগা লাক খেংমি। 9ছুগি ক্যাংসুউমুছু ঙাগো লুঃউ হ্রিকথাকমা লাক মেখেং ছুগি, য়াংসুউগো থাওরা ফুরা ঈ তেমেংদ হ্রিকথাকমা লাক মেখেং ফ্রইফু। 10মনুসাওয়া সাঃগো য়ুউরো, খ্যাংসুউমুছু মুখুমাসা প্রগি য়াংসুউগো খুওয়ং মুরুওয়ে, ছুগি খ্যাংসুউমুছু সেংস্যাংস ওয়িইঞেংগো ছেংগ্যাংফাক লূকরো আঞ্যচি চাঃগা প্রগি, য়িগিলি য়াংসুউগো খুওয়ং রুওয়েফু।” 11লুঃউরো নাংরোগো যাখা তাঃরা চেঃরেতুঃ অর ওকখ্যুকসুনা গোনস্যাংরো হ্রিকদুঃ য়ুউ লাঃমি, য়াংখা যাপুয়েং প্যাংরো কোঃফাককা চাঃগা প্রফুলি মুহুকিলি যা আফ্রি পিইফুলি য়াংচাগো য়ুউরো মেচেংজাগেকি। 12যা প্ররাফুলি সেংস্যাংস ওয়িঞেংচা, খ্যাং খ্যাং নাংরোগো সাং পিইলিঃমি।

পৈঞ্যা মিহিক উচাস্যাং লুঃউ আক্রংলিলা

13লুঃউ আচুককা তয়কচা যীশুগো প্রলিরি, “ছারা, ঙারো ফাখাং আক্যুয়েংরোগো যা আঃরা খ্যং বৈখারি, ঙা ঙিংগো য়াংচারোগো ঙানা আঃফু ফুঃরো য়ুঃছুরো প্রবা লঃ।”

14যীশু য়াংসুউগো প্রলিরি, “তাঃরা চৈফু মুহুক্কি কোবাংরোবামা আঃরাখ্যংগো ফুঃরো পিইফু তাওয়েং ঙাগো যাসু পিইরিলি?” 15য়াংনক যীশু লুঃউরোগো প্রলিইরি, “সিঃদি রেঃ! খ্যাংখামুছু লঃফাগা কোঃগোকোঃ মাঃরো থাঃগে, আক্রংগা কংগং আম্যা আঃরাখ্যং হিকফুচা লুঃউ বাওয়ামা আম্যা আলুহিক আক্রং মুহুক।”

16য়াংনক যীশু লুঃউরোগো সুয়েংসাং পিইফু কিজু দিঃ উপমাগো তাং প্রালিইরি, “তয়ক কামাস্যাং লিঃমা কংগং আম্যা আঃসিই সিইলিরি। 17য়জংকিজু য়াংসুউচা চিইমা চিইমা প্রলিরি, ‘দক আম্যা আঃসিইগো থাঃফুচাগা ঙামা আঃরা মিহিই; ঙা আগো যা প্যাংফুলিঃ? 18আচ্ছা, ঙা তুখু অলুক লূকমি। ঙাকমা চাঃবা থাঃচা ইংগো ফ্যাকলো আগ্রি আগ্রি চাঃবা থাঃইংনা ঙাকমা হিকচা আলুঃউং আঃসিইনা উচ্চাপৈচিগো য়াংদেমা থাঃফু। 19নক্কা ঙা কোগো কোঃ প্রফু, হ্রিইদুঃ রাক কিজু কংগং আকং আকং ওয়েং খেংরো হিকরি। আখেংসাঃ, চাঃ-সক, প্য-খুংরো নিং।’ 20য়জংছুগি থাওরা ফুরাচা য়াংসুউগো প্রলিরি, ‘অ, আমৈ, গানি ঙিই নাং সিইরাফুব্যা। য়জংছুগি যা ওয়েংরো নাং খেংথাঃলিরি, য়াংচারোগো যাসুউ চুঃফুলিঃ?’”

21আতুংমা যীশু প্রলিরি, “যা লুঃউ কোঃ কিজু উচ্চাপৈচি খেংথাঃরি, প্রফুছুগি থাওরা ফুরাবামা উচ্চাস্যাং মুহু, য়াংসুউ আক্রংচা থুঃউচাঞ্যং ফ্রইতি।”

বাওয়ামা আলুংজুংথাক আলুহিকগো য়ুউরো সুয়েংসাং পিইচা

(মথি ৬:১৯-২১,২৫-৩৪)

22য়াংনক যীশু কোঃ তিবিরোগো প্রলিরি, য়জংকিজু ঙা নাংরোগো প্ররি, “যা চাঃরো হ্রাং নিংফুলি মুহুক্কিলি কাইংথামা যা ওয়েফুলি য়াংচাগো য়ুউরো মাজেংযাগেকি। 23আসকচা কেবলে চাঃফু সকফু মুহুক, অর কেইংথাচা কেবলে ওয়েফু-আঃচা কিজু মুহুক। 24ক্যাগাইংরোগো ক্রিঃ, য়াংসুউরো আচিইলি মুপুয়িও, আসিইলি মুরুয়িই। য়াংসুউরোমা চাবা কেইংরোলি মিহিক, য়িগিলি থাওরা ফুরাচা য়াংসুউরোগো আঃচা পিইথাঃরি। 25নাংরো আতুওয়ংমা যাসুউ চেংজা আছাংখ্রাং প্যাংরো তানাড়ি আসাক হ্রিনৈজিফুলিঃ? 26য়জংছুগি দিঃ আলূকশ্যিগো তয়ং মুলূক নৈংগি, আখ্রা আক্রংরোগো য়ুউরো যাফু চেংজাগেতিলিঃ?

27“চেংজারো ক্রি, পেং যাপুয়েং ক্রিরো তাকতিলিঃ। য়াংসুউরো অলুকলিঃ মুলুক, খ্রিলি মাঙাং। য়িগিলি ঙা নাংরোগো প্ররি, মাং শলোমং কংগং আখেংসামা পাঃরো নিংহারিতয়ং, তুখুগোলি কোঃ চিইক্র ছাংফু মনৈংলিঃ। 28প্রাং আরামা যা আপাং গিনি হিকরিলিঃ, নাঙফ্রেং য়াংচাগো মিংমা থিঃফুব্যা, থাওরা ফুরাচা যাখা দিঃচারুগো দিঃপুয়েং ছাংথাঃরি, য়াংখা অঃ আক্যুংমিহিকরো, থাওরা ফুরাচা নাংরোগো ছাংফু য়াংচা মন্হকতয়ং আম্যা ম্হেতিলিঃ! 29যা চাঃফু-সকফুলিঃ য়াংচাগো য়ুউরো চিইকো তুদুরুং-দুরুং মাপ্যাংগি। 30দিঃ কাবামা আখ্রা লুঃউম্যুরো য়াংচাগো য়ুউরো ছাংখ্রাংগেতি; ছুগি নাংরো ফাখাং সিকরিচাগা, দিঃচারোচা নাংরোমা অলু হিকরি। 31য়াংচাথাক প্রফুছুগি থাওরা ফুরা ঈ নেংঙেংদগো য়ুউরো চিই খ্যাগে, য়জংছুগি দিঃচারোলি নাংরো রাঃমি।

32“অ, ঙামা ছুয়িইমা আসাংশ্যিরো, মক্রককেকি, আক্রংগা নাংরোমা ফাখাং -ছেংদাচাগা, কোঃ নেংঙেংদগো নাংরোগো পিইফু। 33নাংরোমা আঃরা-খ্যংগো রংরো মিত্তা আতুওয়ক আল্হু পিইলৈকে। যা কেইংগা ওয়িই তাখালি মিং মলং, য়াংচা কোঃরো আতুওয়ক য়াংগে, প্রফুছুগি যা উচ্চাচা তাসাক পেলুঃউং আম্রিদৈং নিংরি, য়াংচাগো নেঃফুংমা খেংথাঃগে। য়াংদেমা সুখুঃলিঃ মাঃলা অর পুঃলিঃ মকঃ। 34নাংরো উচ্চা যাদেমা হিকরিলিঃ, নাংরো চিইলি য়াংদেমা হিকমি।

য়াংলো নিংফু আক্রংগো অওয়াদা

(মথি ১০:৩৪-৩৬; ১৬:২,৩; ২৪:৪৫-৫১)

35“খাঃমা আওয়ে খ্যয়েংরো অর ছিইমিং থুঃউয়েংরো য়াং নিংগে। 36নাংরোচা যাসু কোঃ ইংস্যাংগো চংনিংরি, য়াং লুঃউপুয়েং ফ্রইঅং, যাফুরিছুগি ইংস্যাংচা মাঙ্গালা পুয়িগা চাঃরো প্রেংগি, তুয়েংখা খকতি খ্যাং খ্যাং য়াংসুউরো তুওয়েংখা ল্হইনৈংঅং। 37ইংস্যাংচা যা ক্যুয়েংরো নুঃনিংচাগো ম্রাংফুলিঃ, য়াংসুউরো কেইংকংরি। ঙা নাংরোগো আম্হেং প্ররি, য়াং ইংস্যাংচা কোঃ খাঃমা আওয়ে তাদাং খ্যয়েংরো য়াংসুউরোগো থৈংজিকমি অর কোঃদৈং লাঃরো য়াংসুউরোগো আঃচা-আসক পিইমি। 38য়াং ক্যুয়েংরো কেইংকংরি, যাসুরোগো ইংস্যাং প্রেংলাঃখা নুঃহিকচাগো ম্রাংফু, য়াংচা ঞিক তুবুয়েংমালি ফ্রইতিতি মুহুকি মুঃলাংরোমালি ফ্রইতেতি। 39দিঃ চাঃগাচা নাংরো সিকরি, সুঃখু যা আখিংমা লাঃফুলি, য়াংচাগো ইংস্যাং সিকগি, ইংস্যাং নুঃলোনিংফু অর সুঃখুগো ইংদু ওয়ংফু মিঃপিইমুহু। 40য়াংপুয়েং নাংরোলি য়াং নিংগে, আক্রংগা যা আখিংগো নাংরো মাছাংখ্রাংব্রি নিংগেমি য়াং আখিংমা মনুসুওয়া সাঃচা লাঃফু।”

41য়াংখা পিতর প্রলিরি, “আস্যাং, কোবাং দিঃ সুয়েংসাং আক্যুয়েংরোগো পিইচা লঃ, মুহুক্কি আলুংসুউগো পিইচা লঃ?”

42আফ্রিমা আস্যাংচা প্রলিরি, “য়াং আক্যুংনা পৈঞ্যোহিক বেন্ডা যাসুউলি, যাসুউগো য়াংসুউ ইংস্যাংচা কোঃ ক্যুয়েংরোগো আখিং আতৈং আঃচা ওয়িইরো পিইফু তাওয়েং পিইফু?” 43য়াং ক্যুয়েংচা কেইংকংরি যাসুউগো ইংস্যাংচা লাঃরো আক্যুংনা অলুক লূকচাগো ম্রাংফু। 44ঙা নাংরোগো আম্হেং প্ররি, য়াং ইংস্যাংচা য়াংসুউগো কোঃমা হিকচা আলুং উচ্চা-পৈচি আথাকমা তাওয়েং পিইফু। 45ছুগি ক্রি, য়াং ক্যুয়েংচা চিইমা চিইমা প্রলিরি, ‘ঙাক ইংস্যাংচা লাঃফু ক্রারি।’ য়াং আঃলিঃমা থুঃউ ক্যুয়েংনা ক্যুংমারোচা আঃভু-আঃসেঃ প্যাংগেরি অর চাঃব্রি-সকব্রিনক আরাক সকরো য়ৈকেলিরি। 46য়জংছুগি যা রাক যা আখিং চাঃগাগো য়াংসুউ মুতুওয়কলি, য়াং রাকনা য়াং আখিংমা ইংস্যাংচা লাঃলো রকফু। ইংস্যাংচা য়াংসুউগো নৈপুয়েং পৈংরো মক্যুংরি লুঃউম্যুওমা নিংরা খ্যাফু।

47“যা ক্যুয়েং কোঃ ইংস্যাং ছেংদাগো সিকরোলি য়াংরো মিনিং মুহুক্কিলি যাচা লুরিলিঃ য়াংচা মুলূক য়াংসুউগো কংগং আম্যা বুকখেংরাফু। 48য়িগিলি মিসিকব্রি য়াংসুউ যা ডেং অলুক লূকরিলিঃ, য়াংচা কিজু আনৈং ডেং রাঃফু। যাসুউগো আম্যা পিইলিরিলিঃ, য়াংসুউবাগা আম্যা তংফু; অর লুঃউরো যাসুবামা আম্যা থাঃগেলিরি, য়াংসুউগা লুঃউরো আম্যা তংফু।

49“ঙা কাবামা মিং তৈফু লাঃরি; য়াংচা হ্রিইগাকাবাং তকলিইগি কংগং আম্যা কংলিইফু! 50ঙা তুখু রিঃঙুক মাঙ্গালা য়ুউরাঃফু, অর মন্হরাক তৈঅং য়াংচা মফ্রলিঃ য়াংল্হক রাকতৈঅং ঙামা দুঃখুওয়া তুংরিলো মিহিক। 51নাংরো যা তুওয়কতিলি, ঙা লঃগামা ইখেইং পিইফু লাঃরি? য়াংচা মুহুক। ঙা ইখেইং পিইফু লাঃচা মুহুক প্রফুছুগি লুঃউখ্যাং লুঃউগো ছেংগ্যাংফাক লুকচিইফু লাঃচা। 52আগুকাবাং ইং তিইংমা লুঃউরোচা ঙাফু ফ্রইলাঃফু, সুংয়কচা নৈয়ককো ছেংগ্যাংফাক লুকফু অর নৈয়কচা সুংয়ককো ছেংগ্যাংফাক লুকফু। 53য়াংসুউরোচা দিপুয়েং ফ্রইলাঃফু-ফাখাংচা সাঃগো য়ুউলো ছেংগ্যাংফাক অর সাঃচা ফাখাংগো ‍য়ুউলো ছেংগ্যাংফাক, সিমিংচা মিকখাংগো য়ুউলো ছেংগ্যাংফাক, মিকখাংচা সিমিংগো য়ুউলো ছেংগ্যাংফাক, য়কখামাচা খাম্রাগো য়ুউলো ছেংগ্যাংফাক অর খাম্রাচা য়কখামাগো য়ুউলো ছেংগ্যাংফাক লুকফু।”

54য়াং নক যীশুচা লুঃউরোগো প্রলিইরি, “কুবাংরোচা আনক ফাক্কা মুও তাককি প্রগেতিচাগা, ‘মুও লাঃরি,’ অর য়াংখা মুও রুওয়ারি। 55অর তংফাক্কা লিই থাগি প্রগেতিচাগা, ‘আপুউ রাক লাঃরি,’ অর য়াংচা ফ্রইতি। 56কুবাংরোচা ক্রংসুউদ! কুবাংরোচা লঃগানা গংখাংগো ম্রাংলো সিকগেনৈংরি, ছুগি দিঃচা যাপুয়েংলি, কুবাংরোচা দিঃ খ-কালাগো মিসিকগে?

57“যাচা হুকতিলি য়াংচাগো কুঃদৈং চেংজালো যাফু মুলুককেলি? 58কুবাংরো ছেংগ্যাংফাক লুকসানা তাঃরা চৈসাদুঃ লাঃখা লেংমা য়াংসুউনা আছাং ফ্রিফুগো ক্রেংগে। দিঃচা মুহুককি য়াংসুউ নাককো তাঃরা চৈসাদুঃ ঙাং য়ুলাঃমি। য়াংখা তাঃরা চৈসাচা নাককো রিই (পুলিশ) আলাকমা এঃমি অর রিইচা নাককো থংমা থিঃমি। 59ঙা কুবাংরোগো প্রচাগা, হিকচা টেংগাগো মিপিইসাগ্রা কুবাংচা তাখালি থংগা মুরুওয়ে মুহুক।”

Iliyochaguliwa sasa

লূক 12: BBSRMZ

Kuonyesha

Shirikisha

Nakili