লূক 14

গংখ্যুক ফরিশী তয়ক ইংমা আস্যাং যীশু

1সাদাং তারাকনি যীশু গংখ্যুক ফরিশী ইংমা আমাং চাঃফু লাঃখারি। ফরিশীরো কংগং চিইখ্যারো যীশু ম্যাকচি খ্যাগেলিরি। 2যীশু হ্রিইগা সানাসি তয়ক হিকলিরি, যাসুমা কেইংথাচা রাবাং রঃগা ফ্রইরো রংরো হিকলিরি। 3যীশুচা কেইং ছারানা ফরিশীরোগো মিংলিরি, “মোশি পৈঞে আলৈই, তাঃরারাকমা লুঃউরোগো আকং লুকনৈং লঃ?” 4কেইং ছারারোচা তিংদিং নিংগেলিরি। য়াংখা যীশুচা য়াং সানাসি কাইংথামা কৈংরো, কেইংমাজিলিরি অর য়াং আঃরাগা রুওয়েলৈতি।

5য়াংনক যীশু য়াং বাসা গংখ্যুকরোগো প্রলিরি, “যং ফ্রইকিনা, কুবাংরোমা সাঃফ্র-নাওয়াফ্র রিই তুওয়ংমা ক্যালাঃখাগি, কুবাংরো তাখ্যাকলি মাতাং লঃ?” 6য়জংছুগি য়াং কেইং ছারারোচা তুখুউলি আফ্রি মিপিনৈগেলি।

7আখঃ রাঃসা লুঃউরো যাপুয়েং প্যাংরো ম্যাকন্হা হিরি আঃরাগো রুইকক য়ুউ লাঃরিলি, যীশু য়াংচাগো ম্রাংরো সুয়েংসাং পিফু কিজু দিঃ চাঃগাগো প্রলিরি, 8“যাখা তয়ক মুসু কুবাংগো মাঙ্গালাছং পুয়িই চাঃফু পাংরিছুগি, য়াংখা কুঃবাং ম্যাকন্হা হিরি আঃরামা লাঃরো মঃথইংগি আক্রংগা জংলি ফ্রনৈংরি কুবাংথাক ম্যাকন্হা হিরি লুঃউঃওগোলি চাঃফু কিজু পাংরো হিকনৈংরি। 9য়জংছুগি যাসুউ কুবাংনা য়াংসুউগো পাংলিইরি, য়াং পাংসা লাঃরো কুবাংগো প্রমিচাগা, ‘দিঃ থৈইরাগো ‍দিঃসুউগো পিলৈই।’ য়াংখাগা কুঃবাং আহ্রাক রাকরো কংগং অক আঃরামা থৈইরাফুব্যা। 10কুঃবাং যাখা আপাং রাঃরিলি য়াংখা ম্যাকন্হা হিরি আঃরামা মাথৈইব্রি, আলুঃউংচাথাক অক আঃরামা থৈইলি। য়জংছুগি কুবাংগো পাংসা ইংস্যাংচা লাঃরো প্রঃমি, ‘মিছুয়ি, দিঃচাথাক আকং আঃরামা লাঃরো থৈইং।’ য়াংখা হিচা আখ্রা আগেংদুক হ্রিথাকমা কুঃবাং ম্যাকন্হা রাঃমি। 11যাসু কোগো আগ্রি তুওয়কতিলি, য়াংসুউগো অক খ্যাফু অর যাসু কোগো লুঃউ মুহুক তুওয়কতিলি, য়াংসুউগো আগ্রিই প্যাংফু।”

12যাসুউ য়াংসুউগো পাংলিইরি নক্কা যীশু য়াংসুউগো প্রলিইরি, “নাং যাখা আচা-আসক হ্লউফুলি য়াংখা কুবাংমা মিকছুয়ি, ঞিংরোগো, ম্যুওসা-ছুয়িইসারোগো অর উচ্চাস্যাংরোগো মাপাংগি। য়াংচা প্যাংগি য়াংসুউরোলি নাককো চাঃফু আতুওয়ক পাংমি অর দিঃপুয়েং কুবাংগো কিজু ছেমি। 13ছুগি কুবাং যাখা আচা-আসক হ্লুউফুলি য়াংখা ছাংরিসা, আকিই, আকেইং অর আনুনগেরোগো খলিই। 14য়জংছুগি কুবাংচা থাওরা ফুরা ছুককো রামি আক্রংগা কুঃবাং পাংচাকো য়াংসুউরো মাছেনৈং মুহুক। যাখা আসিই লুঃউরোগা, আপ্রইমিহি লুঃউরোগো আহ্রাং প্যাংরো থুঃউফু য়াংখা কুঃবাং য়াং আক্যুওগো রাঃমি।”

আচাঃ পুয়িগ্রি

(মথি ২২:১-১৪)

15যাসুউরো চাআঃফু থৈইগেরি, য়াংসুউরো আতুওয়ংগা লুঃউ তয়ক ‍দিঃ চাঃগাগো ক্রারো যীশুগো প্রলিরি, “যাসুউ থাওরা ফোরা ঈ নেংঙেংদমা চাঃআফু থৈংরিলি, য়াংসুউ মাঙ্গালা হিরি।”

16যীশু প্রলিরি, “লুঃউ তয়কচা কংগং আঃচা পুয়িগ্রিই তুখুক পিইলিইরি অর য়াংদেমা লুঃউম্যারোগো পাংলিইরি। 17চাঃআফু আখিং তৈংরিখা, য়াং ইংস্যাংচা, ক্যুয়েং তয়ককো, য়াং পাংসারো প্রফু রুওয়েলৈতিগা, ‘লাঃগে, আগো আলুংচা য়াংব্রিব্যা।’ 18য়জংছুখা য়াংসুউরো আলুংসুউ তয়ক ব্রিগি তয়ক অলুক হিরি ছুরো প্রগেলিরি। পাথামা সুঃচা য়াং ক্যুয়েংগো প্রলিরি, ‘ঙা আঃরা তেকে ওয়িলিরি, ঙা লাঃরো য়াংচাগো ক্রিরাফু। য়াংচাগো ছাংখ্রাংরো ঙাগো খুওয়ং রুওয়ে।’ 19অর তয়ক প্রলিরি, ‘ঙা নুথুঃউয়িই ঙাজু ওয়িলিরি, য়াংচাগো কংলঃ মকংলঃ চেংজং লাঃরি। য়াংচাগো ছাংখ্রাংলো ঙাগো খুুওয়ং রুুওয়ে।’ 20অর আখ্রা তয়কচা প্রলিরি, ‘ঙা মাঃয়া নেজেরি, য়াংচা কিজু মাঃলানৈং।’

21“য়াং ক্যুয়েংচা, প্রেং লাঃরো ইংস্যাংগো ‍দিঃ চাঃগারোগো প্রঃ প্রালিইরি। দিঃ চাঃগাগো ক্রারো, ইংস্যাংচা দঃসা তাকরো ক্যুয়েংগো প্রলিরি, ‘নাং আয়াং ম্রুমা লেংদৈং লেংদৈং, লেং আথং আথংদুঃ লাঃলি অর ছাংরিসা, আলাক আক্যুও, আকেইং অর আকিরোগো য়ুউ লাঃলে।’ 22দিঃ চারো লুকপ্রিনক য়াং ক্যুয়েংচা প্রলিরি, ‘আস্যাং, কুঃবাং আঃনা আতৈং, আলুংচা লূকপ্রিব্যা, য়িগিলি অর থৈংরা হিরিসি।’ 23য়জংছুখা ইংস্যাংচা ক্যুয়েংগো প্রলিরি, ‘ম্রু প্রাংগা লেংদৈং লেংদৈং অর লেংমা লেংমা লাঃলি অর দুঃ লাঃফু ‍কিজু লুঃউরোগো আনৈংজা প্যাং, যাফুলিছুগি ঙা ইংমা লুঃউ প্রি লাঃঅং। 24ঙা নাংরোগো প্ররিচাগা, যাসুরোগো চাঃআফু কিজু পাংলিরি, য়াংসুউরো আতুওয়ংগা তয়কলি, ঙাক আঃচাআগো মাঃচারামুঃ।’”

তিবি যাপুয়েং ফ্রইফুলি, য়াং আক্রংগো সুয়েংসাং পিইচা

(মথি ৫:১৩; ১০:৩৭-৩৯; মার্ক ৯:৫০)

25যীশুনা আতু আম্যাগ্রি লুঃউ হিকলিইরি। যীশু য়াং লুঃউরোগো প্রেং ক্রিরো প্রলিইরি, 26“যাসুউ ঙা বাদুঃ লাঃফুলি, য়াংসুউচা কুও আমিঃ-আঃফা, সাঃ-সিমিং, ঞিং-আকু প্রফুছুগি কুগোকু তয়ং ঙাথাক আনৈং খ্যতি তুওয়করাফু। প্রচা পুয়েং মফ্রনৈংছুগি, য়াংসুউ ঙাক তিবি মফ্রনৈংমু। 27যা লুঃউ কুও থুঃউখেচা তইংগো রুওকরো, ঙা নক্কা মাঃলানৈং, য়াংসুউ ঙা তিবি মফ্রনৈং।

28“কুবাংরো আতুওয়ংমা, খ্যাংসুমুছু আম্রাং ইং তছং লূকখ্যাংরিছুগি, য়াংসুউ হ্রিইগা থৈংরো টেংগা মন্হক লুফুলি খেতিসি। য়াংসুউ ক্রিখ্যাংরিচাগা, ইং তিব্রি য়াংসুউমা টেংগা হিরি লঃ মিহি লঃ। 29য়জংমুহুকি, য়াংসুউ তইং রেঃপ্রিনক য়াং আম্রাং ইংগো লূকরো মুতুংনৈংছুগি, য়াংখা যাসুরো ম্রাংফু, য়াংসুউরো আলুংসুউ য়াংসুউগো আরি-আসুয়েং প্রুক্কেফু। 30য়াংসুউরো প্রগেফুচাগা, ‘দিঃ লুঃউচা চাগাঃচারি য়িগিলি মুতুংনৈংলি।’

31“ছুগি মাং তাবাঃচা আখ্রা মাং তাবাঃগো ছেংগ্যাংফাক লূকরো চঃছৈংজং লাঃগি, য়াংখা য়াং মাংচা পাথামা থৈইরো চেংজাফুচাগা, ‘থং নৈইছি চঃ সুরুয়িই য়ুইরো যাসু ঙাগো ছেংগ্যাংফাক লূকরো চঃছৈংজং লাঃরি, ঙামাগা ছিঃথং চঃ সুরুয়িই য়ুউরো, ঙা য়াংসুউগো ছিইরো থাঃনৈংফু লঃ?’ 32য়াংপুয়েং লূকরোরা মনৈংছুগি, আখ্রা মাং আওয়িমা হিরিকাবাং, লুঃউঃও রুওয়েরো য়াং মাংচা থুঃউ মাংনা চাঃগা ঞিংফু কিজু আছুয়িছাক লুকমি।”

33আতুংমা যীশু প্রলিইরি, “য়াংপুয়েং কুবাংরো আতুওয়ংগা খ্যাংসুউমুছু চেংজা-ছাংখ্রাং প্যাংরো, আলুংচা বৈরো মাঃলাগি, য়াংসুউ ঙাক তিবি মফ্রনৈং।

34“ছাঃ আকং পৈচি ফ্রৈতি, য়জং ছোগেলেঃ য়াং ছাঃমা আঙাই প্রে লাঃখারিছুগি যাপুয়েং প্যাংরো আঙাইং আরাঃসাগো প্রাইংলো রান্হৈংমেলেঃ? 35য়াংখা য়াংচা কেইংফা কিজুতয়ং থঃমেতেংব্যা অর হাংগিঃমা থিঃফুলি থঃমেতেংব্যা। লুঃউরো য়াংচাগো বৈতিব্যা। যাসুউমা নাথংফু নাঃ হিকরিলি, য়াংসুউ নাঃথংবেচি।”

Iliyochaguliwa sasa

লূক 14: BBSRMZ

Kuonyesha

Shirikisha

Nakili