Maɛ 14
14
Nyɔ̍ klaaᵻ sɔ̌ Jusu
(Matio 26.1-5; Luu 22.1-2; Chɔɔn 11.45-53)
1Ɛ̍ si̍e̍-o wǐh sɔɔ̌n wɛ̀ ɛ̍ iě blèe̍ ɛ̀ se̍-a fù-i dɛ̍ᵻ we̍ poe-ɛ ke Sììkɛ̍n-a Peě nu̍. Nɛ̀ Nyɔsoa-a slaǎ sà nyɔ̍ klaaᵻ ke telě nǎ poe nyɔ̍-a pɔ̀n jiila̍ i̍ u̍h iě Jusu gbɛ̍n soɛɛ, u̍h iě ɔ̍ dbǎ. 2Wɛ̀ u̍h la̍a̍, “Nɛ̀ mɔ̀ à bɔ̌ ɛ̍ nu̍-ɛ da̍a peě kɛ̍n, wɛ̀ nyɔ̍gbei je̍e à slɛ̀ dlǔ i̍ sà-ɛ.”
Nynɔ̌ due tù Jusu chlǎn
(Matio 26.6-13; Chɔɔn 12.1-8)
3Samo ɔ̀ wìèìdih-a nu̍-a de-ɛ, dě ɔ̍ blǐ gbò bo Jusu sǐi-o dɛ̍ di̍ la̍ dǒ Bɛtani wlɔ̀ di̍i̍ wɛ̀ nynɔ̌ due ji̍. Nɛ̀ ɔ̍ blě-e chlǎn dě sɔɔ̌ u̍h-a dǎɛ-a alebasla-a ɛ̍ sòlɛ̀ di̍i̍. Tu̍ ɛ̀ u̍h nui-a dɛ̍kɛ̍n gbǎ chlǎn wlihwlǐh-a chɛ̀-ɛ, ɛ̍ nynɛ̌ bo naa. Wɛ̀ ɔ̍ chɛ̍n ɛ̍ sòlɛ̀ wɔ̍i̍n, iě ɔ̍ chɛ̌li ɛ̍ dǒ Jusu dlǔ. 4Sɔ nyɔ̍ ùh nɛ-a doǒ-ɛ, ɛ̍ se̍ u̍h-a duuh gbǐh po̍, iě u̍h-a pu̍e̍e ɛ̍ wɔ̍ɔ̍n i̍. U̍h la̍a̍, “Dɛ̍nu̍ nynɔ̌ la ɔ̍ gbɔ̀lɔ chlǎn la-a ɛ? 5Pò nyɔ̍ ple̍ ɛ̍-ɛ, ɛ̍ bɛ̌ɛ sebla̍ wlǐ-a kmɛ ta̍a̍n (300) kɛ̍n sì-ɛ, wɛ̀ i̍h iě nyɔ̍gbà nyɔ̍ nyǐ-ɛ de wa.” Sɔ u̍h-a wlaɛ ɔ̍ la̍-ɛ sǔh.
6Iě Jusu la̍a̍, “Dɛ̍nu̍ mɔ̀-a gba̍ nynɔ̌ la ɔ̍ dounᵻ de̍i̍ ɛ? Dɛ̍ ɔ̍ nu̍-a dǒ ǐn we̍-ɛ, ɛ̍ nmɔ jii̍. Ɛ̍ tìh-ɛ, mɔ̀ sà dǒ ɔ̍ we̍ wlu̍. 7Nyɔ̍gbà nyɔ̍ nɔ̀ɔ̍, u̍h ke mɔ̀-a mu̍ da̍a nɛ ma̍u̍. Ti̍-o-ti̍ mɔ̀-a pɔ̀n-a u̍h dɛ̍ chɛ̀ pùn nu̍-ɛ i̍-ɛ, mɔ̀-a mu̍ ɛ̍ nu̍. Jɛ mɔ̍ɔ-ɛ, mɔ̀ ke ǐn ke à se̍ da̍a nɛ mu̍ ma̍u̍. 8Chlǎn nynɔ̌ la ɔ̍ po̍-a ǐn dlǔ-ɛ, pò u̍h ja ǐn i̍ tè la̍ gba̍-ɛ, ɔ̍ naɛ ɔ̍ bɛ̌ɛ-a nu̍-ɛɛ, ɛ̍ bo ɔ̍ nu̍-a duedɛ. 9Tìh-a taǐn ǎn sèàɛ̍ mɔ̀ wlùh, tà nyɔ̍gbei-a mu̍-a Nyɔsoa-a pɔ̀n chɛ̀ la bla̍-ɛ nɔ̌ kmɔ̌ kli̍hgbɛ̍ la we̍-ɛ, nɛ̀ dɛ̍ nynɔ̌ la ɔ̍ nu̍-aɛ, u̍h-a mu̍ ɛ̍-ɛ sà ke, wɛ̀ nyɔ̍gbei iě ɔ̍ wlùh we̍ nu̍.”
Juda wɔ̌n-ɛ ɔ̍ iě Jusu kwlǎ sà
(Matio 26.14-16; Luu 22.3-6)
10Wɛ̀ Juda Ɛkɛlia ɔ̀ nu̍-a kòà-a pùè jɔ̌ sɔɔ̌n laa̍ u̍h-a due-ɛ, ɔ̍ mu̍ dě Nyɔsoa-a slaǎ sà nyɔ̍ klaaᵻ we̍, ɔ̍ iě u̍h Jusu kwlǎ sà-ɛ. 11U̍h wɔ̌n-a ɔ̍ wlu̍-ɛ, sɔ ɛ̍ pɛ̌n-ɛ u̍h-a pɔluh i̍. Wɛ̀ u̍h po̍ wlu̍ tɔ̀ma̍a̍ u̍h iě ɔ̍ wlǐ nyǐ. Sɔ Juda-a pɔ̀n la̍ jiila̍ i̍ sǔh ɔ̍ iě Jusu kwlǎ sà.
Jusu ke ɔ̍ kòà di̍-i Sììkɛ̍n-a di̍-dɛ̍ᵻ tàdùè
(Matio 26.17-25; Luu 22.7-14, 21-23; Chɔɔn 13.21-30)
12Peě u̍h-u poe-a blèe̍ fù-i dɛ̍ᵻ we̍-ɛ, dǒ ɛ̍ sàǐtòò weɛ̍ di̍i̍, dǒ-o bo u̍h-a sà-ɛ Sììkɛ̍n-a blawɛ̌ plɔ̀ slaǎ. Iě Jusu-a kòà tèle ɔ̍ i̍. U̍h la̍a̍, “Tàwe̍ àn pɔ̀n à iě mu̍ wɛ̀ à iě Sììkɛ̍n la ɛ̍ di̍-dɛ̍ᵻ gba̍a̍ po̍ dǒ ìn we̍ ɛ?”
13Dǒ ɔ̍ dbo̍-e ɔ̍ kòà sɔɔ̌n, ɔ̍ la̍a̍ dě u̍h we̍, “Mɔ̀ mu̍ dě tùgbàwlɔ̀ di̍i̍, jɔ̍gbau ɔ̀ ke mɔ̀-a mu̍-a ja̍ wlǎɛ-ɛ, ɔ̍ tè tee̍ dlǔ. Nɛ̀ mɔ̀ wɔ̀ dǒ ɔ̍ de̍e̍. 14Gbò kɔn di̍i̍ ɔ̍ mu̍-a pa̍-ɛ, nɛ̀ mɔ̀ sèàɛ̍ gbò joi wlùh, mɔ̀ la̍a̍, ‘À Dlǔtu la̍ toe àɔ̀ dihwi̍h gbòju, tà ɔ̍ ke ɔ̍ kòà-a mu̍-a Sììkɛ̍n Peě-a di̍-dɛ̍ᵻ di̍-iɛ.’ 15Nɛ̀ ɔ̍ mu̍ mɔ̀ ja̍i̍ gbòju klaa ɛ̀ dɛ̍ᵻ kli̍hgbɛ̍ nɛ-a dě di̍i̍-ɛ toe. Dě mɔ̀ iě dɛ̍ᵻ kli̍hgbɛ̍ gba̍a̍ po̍-e dǒ àɔ̀ we̍.”
16Wɛ̀ kòà laa̍ u̍h sɔ-ɔ, iě u̍h mu̍ dě tùgbàwlɔ̀ laa̍ di̍i̍. Wɛ̀ u̍h jě dɛ̍ᵻ kli̍hgbɛ̍ ìh kɔn taǐn Jusu sèàɛ̍-a u̍h wlùh-ɛ. Wɛ̀ u̍h po̍ Sììkɛ̍n Peě-a di̍-dɛ̍ᵻ gba̍a̍.
17Ti̍ ɛ̍ nu̍-a wìe̍we̍-ɛ, wɛ̀ Jusu ke ɔ̍ kòà-a pùè jɔ̌ sɔɔ̌n ji̍. 18U̍h nɛ-a dǒ dɛ̍ di̍ la̍ dǒ teble̍ gbɔ̀-ɛ, wɛ̀ Jusu la̍a̍, “Bɔ̌ ǐn sèàɛ̍ mɔ̀ tìh-a taǐn wlùh, mɔ̀ɔ̍ ùh ke ǐn ke à di̍-ia dɛ̍ tàdùè-ɛ, mɔ̀-a nyɔ̍ due-a mu̍ ǐn kwlǎ sà.”
19Sɔ ɛ̍ po̍ ɔ̍ kòà-a wlùh seɔn, iě u̍h-a nu̍ jɔ gbǎ-o ɔ̍ tèle ɔ̍ i̍. Jɔ nu̍ ka-a, “Ɛ̍ se̍ mɔ̍ ae?”
20Wɛ̀ Jusu la̍a̍ dě u̍h we̍, “Mɔ̀ɔ̍ nu̍-a pùè jɔ̌ sɔɔ̌n-ɛ, mɔ̀-a due bo. Ɔ̀ ke ǐn ke à di̍-ia blewe̍ɛ̍ due di̍i̍-ɛ bo. 21Nyi̍ɔ̍-a Jǔ-a mu̍ mɛ̌ dǒ ka Nyɔsoa-a wlu̍ dǎ-a we̍. Jɛ nyɔ̍ ɔ̀ sà-a ɔ̍ kwlǎ-ɛ, chlě dǒ ɔ̍ we̍. Nyɔ̍ laa̍ pò ɔ̍ se̍ wlǔh de-ɛ, nɛ̀ ɛ̍ nmɔ jii̍ dǒ ɔ̍ we̍.”
Joi-a wìe̍dɛ
(Matio 26.26-30; Luu 22.14-20; 1 Kɔwlɛntiɔn 11.23-25)
22Ti̍ Jusu ke ɔ̍ kòà-a di̍-a dɛ̍-ɛ, wɛ̀ ɔ̍ dǔ blèe̍ gba̍n-a, iě ɔ̍ po̍ Nyɔsoa tlɔ̌. Wɛ̀ ɔ̍ chɛɛn ɛ̍ i̍, iě ɔ̍ nyǐ ɛ̍ ɔ̍ kòà. Ɔ̍ la̍a̍, “Mɔ̀ gbɛ̍n i̍, ɛ̀ la ǎn ku̍ bo.”
23Wɛ̀ ɔ̍ dǔ kàu̍n-u, iě ɔ̍ po̍ Nyɔsoa tlɔ̌. Wɛ̀ ɔ̍ nyǐ ɛ̍ u̍h, iě u̍h kli̍hgbɛ̍ nǎ-ɛ ɛ̍ di̍i̍. 24Jusu la̍a̍ dě u̍h we̍, “Ɛ̀ la ǎn nymɔ̍ bo. Nymɔ̍ la bo ɛ̀ nu̍ ku̍o̍ Nyɔsoa po̍. Ɛ̍ wlǎ i̍ dǒ nyɔ̍ dɔu we̍. 25Tìh-a taǐn ǎn sèàɛ̍ mɔ̀ wlùh, ǐn se̍ nmɔ̍ la nǎ mu̍ dɛ. Weɛ̍ ǎn mu̍-a ɛ̍ nǎ-a delee i̍ po̍-ɛ, nɛ̀ ɛ̍ mu̍ dě Nyɔsoa-a kmɔ̌ wlu̍ i̍ kɔn-ɛ di̍i̍ nu̍.”
26Wɛ̀ u̍h ble̍ Nyɔsoa duǐh, iě u̍h sǐ sɔ̀n u̍h mu̍ dě Ɔle-Tu̍ᵻá Tlu̍h kɛ̍n.
Jusu la̍ Pitɛ-a mu̍ ɔ̍ tìh-i tòlo
(Matio 26.31-35; Luu 22.31-34; Chɔɔn 13.36-38)
27Jusu la̍a̍ dě ɔ̍ kòà we̍, “Mɔ̀ kli̍hgbɛ̍ mɔ̀-a mu̍ ple̍ mɔ̀ iě ǐn si̍e̍. Dɛ̍nu̍ɛ, kǎ ɛ̍ nu̍ ka chlǐh-ɛ, ‘Ǎn mu̍ blawɛ̌ᵻ we̍ i̍ gbɛ̀n nyɔ̍ dbǎ, nɛ̀ blawɛ̌ᵻá mu̍ ja̍i̍ gbà.’ 28Jɛ ǐn wɔ̀-e wlǔh-ɛɛ, wɛ̀ iě mɔ̀ jǔ mu̍ dě Kaladii fɔɔ.”
29Wɛ̀ Pitɛ la̍a̍ dě ɔ̍ we̍, “Juh sie-a dǒ de̍-ɛ, pò u̍h-a jɛ ja ple̍-ɛ, mɔ̍ɔ-ɛ, ǐn se̍ ple̍ mu̍.”
30Iě Jusu la̍a̍ dě ɔ̍ we̍, “Bɔ̌ ǐn sèàɛ̍ ìn tìh-a taǐn wlùh, wlù weɛ̍ la àn mu̍ ǎn tìh-i tòlo ìè gbɔ̍ᵻ ta̍a̍n nu̍ sasǎ wɛ̀ suuh iě slò-ɛa sɔɔ̌n nu̍.”
31Jɛ Pitɛ nyɛ̌ɛn ɛ̍ wlu̍ i̍, iě ɔ̍ la̍a̍, “Pò ǎn jɛ ja ìn we̍ mɛ̌-ɛ mu̍-ɛ, jɛ ǐn se̍ àn tìh-i tòlo mu̍.”
Kòà kli̍hgbɛ̍ sie-a dode̍-ɛ, kǎ u̍h dǎ ke.
Jusu ba̍le-e dě Kɛsɛmani
(Matio 26.36-46; Luu 22.39-46)
32Wɛ̀ u̍h mu̍ dě tà u̍h-a dǎɛ-a Kɛsɛmani-ɛ. Iě Jusu la̍a̍ dě ɔ̍ kòà we̍, “Ka ǎn mu̍-a ba̍le la̍-ɛ, mɔ̀ tè i̍ da̍a.” 33Ɔ̍ wɔ̌an mu̍-u tìh-ɛ, ɔ̍ dǔ Pitɛ ke, Chiin ke Chɔɔn ɔ̍ gba̍ u̍h. Nɛ̀ dɛ̍-a wa̍ ɔ̍ we̍, wɛ̀ dě ɔ̍ di̍i̍-a si̍n. 34Iě ɔ̍ la̍a̍ dě u̍h we̍, “Wɔɛ nɛ-a dě ǐn wlùh di̍i̍-ɛ, ɛ̍ wɛ̀la ɛ̍-ɛ dbǎ m̌. Mɔ̀ sie da̍a mɔ̀ iě ǐn de̍e̍ i̍ tè.”
35Ɔ̍ klɛɛn-a dǒ nya̍-ɛ, wɛ̀ ɔ̍ chlìi i̍ dǒ bloɔ̍. Iě ɔ̍ ba̍le, ɔ̍ la̍ pò ɛ̍ nɛ ɛ̍ ka̍-ɛ, nɛ̀ tìh jě ti̍ la ɛ̍ sì ɔ̍ jii̍. 36Ɔ̍ la̍a̍, “Baa, ǐn Baa, ka ìn bɛ̌ɛ-a dɛ̍ᵻ kli̍hgbɛ̍ nu̍-ɛɛ, sà ǐn kàu̍n la wɔ̍i̍n lě. Gbɔ̀gbɔ̀-ɛ, bɔ̌ naɛ̍ wlùh nu̍-ɛ, nu̍ àn chɛ̀-a wlùh.”
37Ɔ̍ iě-a de̍ mu̍-ɛ, nɛ̀ kòà ta̍a̍n laa̍ u̍h-a mɔ̌-ɛ. Iě ɔ̍ la̍a̍ dě Pitɛ we̍, “Samo, àn mɔ̌-ɛ ae? Ìn se̍ nyinɔ̍ jlǐh i̍ sà-a bɛ̌ɛ dǒ ti̍ gbɔ̍ di̍i̍ ae?” 38Iě ɔ̍ la̍a̍ dě u̍h we̍, “Mɔ̀ tù ba̍le-ɛ jlǐhɛ̍, wɛ̀ mɔ̀-ɔ je̍e blu̍ja̍a̍ gbǎ. Mɔ̀-a pɔ̀n i̍ slɛ̌ dɛ̍ nu̍-ɛ i̍ de, jɛ mɔ̀ se̍ ɛ̍ we̍ gbǐh blě.”
39Iě ɔ̍ mu̍ ba̍le la̍ dode̍, wlu̍ due laa̍ bo ɔ̍ bla̍. 40Ɔ̍ ji̍-a de̍ka-ɛ, ɔ̍ jɛɛ ɔ̍ kòà laa̍ mɔ̌ la̍ i̍ dɛ, dɛ̍nu̍ɛ, u̍h-a jlǐh ku̍ᵻ ku kwa̍ kaa̍. Sɔ dɛ̍ u̍h iě-a bla̍ dě ɔ̍ we̍-ɛ, u̍h se̍ ɛ̍ juo.
41Gbɔ̍ᵻ ta̍a̍n naɛ ɔ̍ ja-a de̍-ɛ, iě ɔ̍ la̍a̍ dě u̍h we̍, “Mɔ̀-a sà-e gbǔh mɔ̀-a mɔ̌ ke̍ sǔh ae? Mɔ̀ gbɛ̀n-e, ti̍ la ɛ̍ nɛ à i̍ wɛ̀. Nyi̍ɔ̍-a Jǔ sà-ɛ kwlǎ wɛ̀ dě gblɛ̍n sɔ̀ɛ̀n nyɔ̍ kwa̍a̍. 42Mɔ̀ sɔ-ɔ à iě mu̍ la̍ sǔh. Ɔ̀ mu̍-a ǐn kwlǎ sà-ɛ, ɔ̍ nɛ à i̍ wɛ̀.”
Jusu-a gbɛ̍n-ɛ
(Matio 26.47-56; Luu 22.47-53; Chɔɔn 18.3-12)
43Jusu nɛ dǒ wlu la̍ sǔh, wɛ̀ Juda ji̍. Ɔ̍ kòà-a pùè jɔ̌ sɔɔ̌n laa̍ u̍h-a due bo. Nɛ̀ ɔ̍ ke nyɔ̍ tlùgbei̍ na. U̍h blě plàn chlɛ̀nᵻ ke gbòmina̍ᵻ kwa̍ i̍. Nɛ̀ Nyɔsoa-a slaǎ sà nyɔ̍ klaaᵻ ke telě nǎ poe nyɔ̍ ke nyɔ̍ klaaᵻ bo ùh dbo̍ u̍h. 44Wɛ̀ ɔ̀ nu̍-a nyɔ̍ kwlǎ sà nyɔ̍-ɛ, iě ɔ̍ toe u̍h juola. Ɔ̍ la̍a̍, “Nyɔ̍ ǎn mu̍-a gblèè-ɛ, nɛ̀ ɔ̀ mɔ̀-a pɔ̀n-a i̍-ɛ bo. Nɛ̀ mɔ̀ gbɛ̍n ɔ̍ la̍ sǔh. Jɛ mɔ̀ tù ɔ̍ jlǐhɛ̍ o.”
45Juda sǐ-a dǒ u̍h we̍ i̍-ɛ, ɔ̍ slɛ̌ i̍ ɔ̍ mu̍ Jusu wlì. Ɔ̍ la̍a̍, “Dlǔtu,” sɔ ɔ̍ gblèè ɔ̍-ɛ sǔh. 46Wɛ̀ u̍h wlǎ Jusu kɛ̍n, iě u̍h gbɛ̍n ɔ̍. 47Iě nyɔ̍ ùh nyna-a doǒ i̍-ɛ, u̍h-a due chlì ɔ̍ plàn chlɛ̀n, wɛ̀ ɔ̍ tba̍ slaǎ sà nyɔ̍-a dlǔtu-a kèi̍ dɛ̍, iě ɔ̍ chɛ̍n ɔ̍ doun i̍. 48Wɛ̀ Jusu la̍a̍ dě u̍h we̍, “Ɛ̀ mɔ̀ nu̍-a plàn chlɛ̀nᵻ ke gbòmina̍ᵻ kwa̍ i̍ blě-ɛ wɛ̀ mɔ̀ ji̍-a ǐn gbɛ̍n la̍-ɛ, nɛ̀ ka nyɔ̍ la̍ mɔ̍ jlǐ-nyɔ̍-ɛ. 49Ka sɔ̀n-a sɛ̀n-aɛ, mɔ̀ ke ǐn ke à nɛ dě Nyɔsoa-a slaǎ sà gbò sɔ̀n ǎn po̍ nyɔ̍ nǎ, dǒ-o nɔ̀ɔ̍, mɔ̀ se̍-o ǐn gbɛ̍n-ɛ. Jɛ Nyɔsoa-a wlu̍ kɔn ɛ̍ iě tìh-a taǐn nu̍.”
50Wɛ̀ ɔ̍ kòà kli̍hgbɛ̍ ple̍, u̍h si̍e̍ ɔ̍.
51Nɛ̀ jǔgbèlà due ke Jusu na, jɛ nɛ̀ flɛmɛ̍ jliɛ̍ nɛ due bo ɔ̍ gbà. Wɛ̀ u̍h gbɛ̍n ɔ̍, 52jɛ ɔ̍ jliɛ̍ bo ɛ̀ sie dě u̍h kwa̍a̍. Iě ɔ̍ chɛn gbaǎn ɔ̍ ple̍.
Jusu nɛ dǒ Juu-a taɔ jǔ
(Matio 26.57-68; Luu 22.54-55, 63-71; Chɔɔn 18.13-14, 19-24)
53Wɛ̀ u̍h gba̍ Jusu dě Nyɔsoa-a slaǎ sà nyɔ̍-a dlǔtu we̍. Nɛ̀ dě-e bo slaǎ sà nyɔ̍ klaaᵻ ke, nyɔ̍ klaaᵻ ke, telě nǎ poe nyɔ̍ kli̍hgbɛ̍ gbòe. 54Nɛ̀ Pitɛ wɔ̀ dǒ ɔ̍ de̍e̍, jɛ nɛ̀ ɔ̍ nynaɛ nya̍. Iě ɔ̍ pa̍ dě slaǎ sà nyɔ̍-a dlǔtu-a gbò-a gbaɛ̍we̍. Wɛ̀ ɔ̍ tè i̍ dǒ gbò jlǐhɛ̍ tù nyɔ̍ we̍, ɔ̍ wěla. 55Sɔ slaǎ sà nyɔ̍ klaaᵻ ke taɔ kli̍hgbɛ̍-a pɔ̀n la̍ sàànsi̍i̍h i̍ u̍h iě Jusu tìh i̍ blaɛ-ɛ, wɛ̀ u̍h iě ɔ̍ dbǎ. Jɛ u̍h se̍ nyɔ̍ wɛ-a chɛ̀ jě. 56Sàànsi̍i̍h dɔu tmɔ̌-ɛ ɔ̍ si̍h i̍, jɛ u̍h-a wlu̍ se̍ due nɛ.
57Wɛ̀ nyɔ̍ duuh nyna i̍, iě u̍h tmɔ̌-ɛ ɔ̍ si̍h i̍, u̍h la̍a̍, 58“À wɔ̌n ɔ̍ wlu̍ ɔ̍ la̍a̍, ‘Ǎn mu̍ Nyɔsoa-a slaǎ sà gbò la u̍h poe-a sɔ̍n-ɛ wlǎ. Nɛ̀ pò wǐh ta̍a̍n sì-ɛ, nɛ̀ ǎn mu̍ dɛɛ po̍, ɛ̀ sɔ̍n-a wɔ̀ɔ̀ se̍-a i̍ nɛ mu̍-ɛ.’ ” 59U̍h-a chɛ̀, u̍h-a wlu̍ se̍ due nɛ ke.
60Wɛ̀ slaǎ sà nyɔ̍-a dlǔtu nyna i̍ dǒ nyɔ̍ kli̍hgbɛ̍ jlǐhwai, iě ɔ̍ tèle Jusu i̍. Ɔ̍ la̍a̍, “Dɛ̍ nyɔ̍ la u̍h-a bla̍-a dǒ ìn pùn-ɛ, ìn se̍ ɛ̍ pɔ̀n we̍ sà mu̍ ae?”
61Jɛ Jusu se̍ u̍h tɔ̍n-ɔ sà, ɔ̍ nɛ tìi̍n kleǐn. Wɛ̀ slaǎ sà nyɔ̍-a dlǔtu tèle ɔ̍ i̍ dɛ. Ɔ̍ la̍a̍, “Mɔ̀ bo ɔ̀ nu̍ Chèɛ̀ Tba̍ju, ɔ̀ nu̍-a Pɔ̀ìě Nyɔsoa-a Jǔ-ɛ ae?”
62Jusu la̍a̍, “I̍i̍n, mɔ̍ bo, nɛ̀ mɔ̀-a mu̍ Nyi̍ɔ̍-a Jǔ jě ɔ̍ iě i̍ tè dǒ Gbǐh Kli̍hgbɛ̍ Blě Nyɔ̍-a di̍na̍ we̍, wɛ̀ ɔ̍ iě nǐgbanᵻ kɛ̍n naɛ blě dě ja̍u̍n wlì ɔ̍ iě ji̍.”
63Wɛ̀ slaǎ sà nyɔ̍-a dlǔtu gbǎ jlu̍h-u, wɛ̀ ɔ̍ fǎle ɔ̍ chɛ̀-a jliɛ̍. Iě ɔ̍ la̍a̍, “Dɛ̍ kɔn sàànsi̍i̍h à pɔ̀n i̍ dɛ ɛ? 64Na̍a̍, mɔ̀-a wɔ̌n ɔ̍ Nyɔsoa-a nynɛ̌ jii̍ nyni wlu̍ lě. Ka mɔ̀ dǎ ɛ?”
U̍h kli̍hgbɛ̍ la̍ ɔ̍ se̍ kɛ̀n gba̍, ɔ̍ kɔn ɔ̍ iě dbǎ-ɛ.
65Sɔ u̍h-a duuh-a gbà la̍ ɔ̍ tɔ̍n sǔh, wɛ̀ u̍h kaɛn ɔ̍ dɛ̍ jlǐh. Pò u̍h tba̍ ɔ̍ dɛ̍-ɛ, nɛ̀ u̍h la̍a̍, “Po̍ gbànwli, nyɔ̍ bo ɔ̀ tba̍ ìn dɛ̍ ɛ?” Wɛ̀ taɔ-a jlǐhɛ̍ tù nyɔ̍ dǔ ɔ̍ iě u̍h bla̍ ɔ̍.
Pitɛ tòlo Jusu-a tìh-i
(Matio 26.69-75; Luu 22.56-62; Chɔɔn 18.15-18, 25-27)
66Nɛ̀ kǎ Pitɛ nɛ dǒ bloɔ̍ ke dǒ gbò-a gbaɛ̍we̍. Wɛ̀ nynɔ̌gbaɔ jǔ ɔ̀ nu̍-a pòi̍ju dǒ slaǎ sà nyɔ̍-a dlǔtu we̍-ɛ, iě ɔ̍ ji̍. 67Dǒ ɔ̍ jě-e Pitɛ, nɛ̀ ɔ̍ wěla-ɛ. Iě ɔ̍ la̍a̍, “Mɔ̀ la, Jusu ɔ̀ sɔ-a Naaslɔɛ wlɔ̀ di̍i̍-ɛ, ɔ̍ ke àn na ke o.”
68Jɛ Pitɛ tòlo-e, ɔ̍ la̍a̍, “Dɛ̍ àn sà-aɛ, ǐn se̍ ɛ̍ juo, nɛ̌ wɔ̌n ɛ̍-ɛ i̍.” Iě ɔ̍ mu̍ dě pa̍la̍ wɔ̍n we̍, dǒ suuh slò-e.
69Nynɔ̌gbaɔ jǔ ɔ̀ nu̍-a pòi̍ju-ɛ, ɔ̍ jě Pitɛ. Wɛ̀ ɔ̍ sèàɛ̍ nyɔ̍ ùh nyna-a doǒ i̍-ɛ wlùh dɛ. Ɔ̍ la̍a̍, “Jɔ̍gbau la u̍h-a due bo o.” 70Jɛ ɔ̍ tòlo-e dɛ.
Ɛ̍ wlè-o wɛɛ, iě nyɔ̍ ùh nyna-a ɔ̍ pùn-ɛ, u̍h la̍a̍, “Mɔ̀ u̍h-a nyɔ̍ due chɛ̀ka, dɛ̍nu̍ɛ, mɔ̀ Kaladii jǔ ke.”
71Wɛ̀ Pitɛ po̍ di̍h wlu̍we̍i̍, iě ɔ̍ slɛ̀ɛ̀n dě u̍h we̍. Ɔ̍ la̍a̍, “Jɔ̍gbau mɔ̀-a dǎ-aɛ, ǐn se̍ ɔ̍ dɛ̍ i̍ juo.”
72Dǒ suuh nyna ɛ̍ slò gbɔ̍ᵻ sɔɔ̌n naɛ. Wɛ̀ dɛ̍ ɛ̀ Jusu bla̍-a dě ɔ̍ we̍-ɛ, iě ɛ̍ sǐ dǒ ɔ̍ wlì i̍. Ɔ̍ la̍a̍, “Àn mu̍ ǎn tìh-i tòlo ìè gbɔ̍ᵻ ta̍a̍n nu̍ sasǎ wɛ̀ suuh iě slò-ɛa sɔɔ̌n nu̍.” Wàa̍, sɔ Pitɛ wǐ-i fìn-i wlu̍ sǔh.
Iliyochaguliwa sasa
Maɛ 14: KDNT
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
The New Testament in Western Krahn published as KU̍O̍ DELEE © The Bible Society in Liberia, 1999.
