Maɛ 13

Slaǎ sà gbò-a mu̍-u gbɔ̀lɔ

(Matio 24.1-2; Luu 21.5-6)

1Ti̍ Jusu-a sɔ-a la̍ dě Nyɔsoa-a slaǎ sà gbò sɔ̀n-ɛ, dǒ-o bo ɔ̍ kòà due la̍a̍ dě ɔ̍ we̍, “Dlǔtu, gbɛ̀n sɔɔ̌ᵻ chɛ̀wɛᵻ ke gbòᵻ nmɔ jii̍ la ja̍ ìè jě.”

2Wɛ̀ Jusu la̍a̍, “Àn jě gbòᵻ klaaᵻ la, jɛ sɔɔ̌ᵻ u̍h poe-a i̍h-ɛ, i̍h-a dɛ̍ se̍ dǒ i̍h ba̍ kɛ̍n sie mu̍. I̍h-a mu̍ wlǎ-ɛ kli̍hgbɛ̍.”

Wě ke klě jě-ɛ

(Matio 24.3-14; Luu 21.7-19)

3Ti̍ Jusu tè-a i̍ dě Ɔle-Tu̍ᵻá Tlu̍h kɛ̍n dǒ Nyɔsoa-a slaǎ sà gbò-a i̍ blaɛjlǐh-ɛ, wɛ̀ Pitɛ ke, Chiin ke, Chɔɔn ke Andlu chɛn gbɔ̍i̍, iě u̍h tèle ɔ̍ i̍. 4U̍h la̍a̍, “Flɔn-ɛ dě à di̍i̍ i̍. Ti̍we̍ ìh la i̍h-a mu̍ nɛ ɛ? Nɛ̀ dɛ̍ we̍ à mu̍ i̍ juo dǒ ìh kli̍hgbɛ̍ la i̍h-a nɛ-ɛ dɛ we̍ ɛ?”

5Wɛ̀ Jusu wlu dě u̍h we̍, ɔ̍ la̍a̍, “Mɔ̀ nu̍ nɛnɛ̌, wɛ̀ nyɔ̍-ɔ je̍e mɔ̀-a dlǔ wìè-e sàɛ̀. 6Nyɔ̍ dɔu-a mu̍ dǒ ǎn nynɛ̌ kɛ̍n jii, u̍h iě ka nu̍, ‘Mɔ̍ bo ɔ̀ nu̍ Nyɔsoa-a Chèɛ̀ Tba̍ju.’ Nɛ̀ u̍h-a mu̍ nyɔ̍ dɔu-a dlǔ wìè-e sàɛ̀. 7Mɔ̀-a mu̍ tu̍h-a fɔ̀n-ɔ slɛ̀ wɔ̌n ɛ̍ iě mɔ̀ i̍ kɔǎn-ɛ, wɛ̀ mɔ̀ iě tu̍h-a pɔ̀n wɔ̌n dě tà tɔ̀ɔ̀n. Jɛ ɛ̍ bɔ̌ mɔ̀ sèò nui-ɛ. Ìh kaɛn la i̍h-a mu̍ nɛ, jɛ nɛ̀ ɛ̍ se̍ ti̍-a dlǔ i̍ chlà-a ke̍. 8Bloa̍ ke bloa̍-a mu̍ fɔ̀n, wɛ̀ kɔ̀mla̍ ke kɔ̀mla̍ iě fɔ̀n. Nɛ̀ wlù poɔ-a mu̍ blǔh kli̍hgbɛ̍ i̍ sèke, wɛ̀ mɔ̌ iě gbǎ. Jɛ nɛ̀ i̍h wɔ̀ ka nynɔ̌-a kwlǐ-a tɛ̀n gbǐh ɔ̍ iě gbàɔ̀n sà-ɛ.

9“Jɛ mɔ̀ nu̍ mɔ̀-a chɛ̀-a nɛnɛ̌, dɛ̍nu̍ɛ, u̍h-a mu̍ mɔ̀ gbɛ̍n, wɛ̀ u̍h iě mɔ̀ koti̍ i̍ po̍. Nɛ̀ u̍h-a mu̍ mɔ̀ bla̍ dě wɛɛ sà gbòᵻ sɔ̀n i̍. Nɛ̀ u̍h-a mu̍ mɔ̀ i̍ nyna-ɛ dǒ kɛɛ̍n nyɔ̍ ke blǔh baaᵻ jǔ ǎn tìh. Dǒ mɔ̀-a mu̍ pɔ̀n chɛ̀-a tìh bla̍-ɛ dě u̍h we̍. 10Jɛ ti̍ iě chlà-ɛ, nɛ̀ pɔ̀n chɛ̀-a tìh-a mu̍ bla̍-ɛ ke̍ sàǐtòò blǔh kli̍hgbɛ̍ kɛ̍n i̍. 11Ti̍ u̍h-a mu̍-a mɔ̀ gbɛ̍n wɛ̀ u̍h iě mɔ̀ koti̍ i̍ gba̍-ɛ, dɛ̍ mɔ̀-a mu̍-a sà dě koti̍ i̍-ɛ, ɛ̍ sèò bɔ̌ mɔ̀ nu̍-ɛ. Pò ti̍ nyni̍-ɛ, dɛ̍ mu̍-a dě mɔ̀ wɔ̍ɔ̍n gbǎ-a, mɔ̀ bla̍ ɛ̍. Dɛ̍nu̍ɛ, nɛ̀ ɛ̍ se̍ mɔ̀-a chɛ̀ ùh se̍ wlu dɛ, jɛ nɛ̀ Nyɔsoa-a Sùù bo wɛ̀. 12De̍di̍i̍ᵻá mu̍ u̍h-a chɛ̀-a de̍di̍i̍ᵻ nyɔ̍ kwlǎ sà-ɛ u̍h iě u̍h dbǎ. Kǎ baaᵻá mu̍ u̍h-a nynuu̍ nu̍ ke. Nɛ̀ nynuu̍-a mu̍ u̍h de̍ᵻ ke baaᵻ faɛn, wɛ̀ u̍h iě u̍h dbǎ. 13Nɛ̀ ǎn tìh-ɛ nyɔ̍ kli̍hgbɛ̍-a mu̍ mɔ̀ faɛn. Jɛ nyɔ̍ ɔ̀ mu̍-ae klì i̍ ku̍ wɛ̀ ɛ̍ iě-a dlǔ i̍ chlà-ɛ, nɛ̀ ɔ̍ mu̍ pǔh.

Slèwlì dɛ̍

(Matio 24.15-28; Luu 21.20-24)

14“Tà slèwlì dɛ̍ se̍-a kɔn ɛ̍ iě-a i̍ nyna-ɛ, mɔ̀-a mu̍ ɛ̍ jě ɛ̍ iě-o i̍ nyna.” (Nɛ̀ nyɔ̍ mu̍-a wlu̍ la slè-ɛ, ɔ̍ wɔ̌n ɛ̍ we̍i̍ chɛ̀gbɛɛ.) “Nɛ̀ nyɔ̍ ùh nɛ-a dě Judia fɔɔ-ɛ, u̍h ple̍ u̍h iě dě tlu̍hᵻ kɛ̍n i̍ mu̍. 15Nɛ̀ nyɔ̍ ɔ̀ nɛ-a dě gbò pɛ̍lɛ dlǔ-i kɛ̍n-ɛ, dě ɔ̍ iě waɛn la̍ sǔh, jɛ nɛ̀ ɔ̍ bɔ̌ dɛ̍-ɛ dǔ la̍ mu̍-ɛ dɛ dě gbò. 16Nɛ̀ nyɔ̍ ɔ̀ nɛ-a dě klè-ɛ, ɔ̍ bɔ̌ ɔ̍ dɛ̍wlo̍o̍ bola̍a̍ mu̍-ɛ dě de̍ wlɔ̀. 17Dǒ wǐh laa̍ di̍i̍ nɛ̀ ɛ̍ mu̍ wɔ̍n kma-dɛ̍ nu̍ dǒ kwlǐᵻ nynɔ̌gbaɔᵻ we̍, ɛ̍ ke juh-a nyǎ-ɛa nynuu̍-ɛ ke. 18Mɔ̀ ba̍le wɛ̀ ìh la i̍h-i je̍e nɛ dě wìla̍ di̍i̍. 19Dɛ̍nu̍ɛ, dǒ ti̍ laa̍ di̍i̍ jua̍i̍ sàɛ̀-ɛ ɛ̀ kɔn ba̍-a se̍a nɛ sɔ dě kmɔ̌-a gbɔ̀ tè la̍ wɛ̀ ɛ̍ iě-a ka ti̍ la jɛɛ-ɛ, nɛ̀ ɛ̍ bo ɛ̀ mu̍ nɛ. Sakǒ, ɛ̍ blaiɛ̍ se̍ gba̍ nɛ dɛ. 20Jɛ Joi chɛ̍n wǐh la dlǔ i̍. Pò ɔ̍ se̍ la̍a̍n nu̍ de-ɛ, nɛ̀ nyɔ̍ se̍-o tàn mu̍ de. Jɛ nyɔ̍ ùh ɔ̍ tba̍-a chèɛ̀-ɛ, u̍h-a tìh bo ɔ̍ chɛ̍n wǐh la dlǔ i̍.

21“Nɛ̀ pò nyɔ̍ la̍a̍ dě mɔ̀ we̍, ‘Mɔ̀ gbɛ̀n-e, Nyɔsoa-a Chèɛ̀ Tba̍ju la da̍a,’ àe̍e̍, ‘Mɔ̀ gbɛ̀n-e, ɔ̍-ɔ nɛ-a dě de̍à,’ nɛ̀ mɔ̀ bɔ̌ i̍h tìh chɛ̀ po̍-ɛ. 22Dɛ̍nu̍ɛ, Nyɔsoa-a Chèɛ̀ Tba̍ju-a si̍h naɛ ke Nyɔsoa-a tu̍owli po̍ nyɔ̍-a si̍h naɛ-a mu̍ mɔ̀ kɛ̍n wlǔh-i, u̍h iě nyɔ̍ wɔ̍n flɔn-ɛ dɛ̍ᵻ ke jbaɛdih po̍, wɛ̀ u̍h iě nyɔ̍ i̍ boe. Nɛ̀ pò ɛ̍ nɛ ɛ̍ ka̍-ɛ, nyɔ̍ ùh Nyɔsoa tba̍-a chèɛ̀-ɛ, nɛ̀ u̍h-a mu̍ u̍h i̍ boe ke. 23Ɛ̍ tìh-ɛ, mɔ̀ nu̍ mɔ̀-a chɛ̀-a nɛnɛ̌. Ɛ̍ kɔn ǐn si̍e̍ ti̍ nya̍ duedɛ wɛ̀ ǎn sèàɛ̍ mɔ̀ dɛ̍ᵻ kli̍hgbɛ̍ wlùh.

Nyi̍ɔ̍-a Jǔ-a ji̍-ɛ

(Matio 24.29-31; Luu 21.25-28)

24“Dǒ wǐh laa̍ di̍i̍ pò jua̍i̍ sàɛ̀ la ɛ̍ chɛn i̍-ɛ, ɛ̍ se̍-o wlè mu̍, nɛ̀ jlǔh-a mu̍ gbe, nɛ̀ chǔh se̍ fa̍n mu̍ dɛ. 25Nɛ̀ chǔhtlɛ̀n-a mu̍ dě ja̍u̍n wlì blu̍. Nɛ̀ gbǐh nɛ-a dě ja̍u̍n wlì-ɛ, i̍h-a mu̍ tèla̍ wlǔh. 26Nɛ̀ u̍h-a mu̍ Nyi̍ɔ̍-a Jǔ jě ɔ̍ iě dě nǐgbanᵻ kɛ̍n naɛ dě ja̍u̍n wlì dǒ gbǐh ìh ku̍-a wɔ̍n-ɛ we̍, ɛ̍ ke tìh-a i̍ bɛ̌-ɛ ke. 27Nɛ̀ ɔ̍ mu̍ Nyɔsoa-a ǐnchɔ̀ blǔh kàɛ̀n nɛ-a nyìɛ̍-ɛ we̍ i̍ dbo̍. Wɛ̀ ɔ̍ iě Nyɔsoa-a chèɛ̀ tba̍ nyɔ̍ i̍ gbòe, sɔ dě blǔh-a siee la ìè dě dɛɛ we̍ mu̍.

Fei-tu̍-a cheǎn-a dɛ̍

(Matio 24.32-35; Luu 21.29-33)

28“Tlo-tu̍ u̍h-a dǎɛ-a fei-ɛ, dǒ ɛ̍ pùn bo mɔ̀ iě dɛ̍ cheǎn-ɛ. Pò mɔ̀ jě ɛ̍ wlɔ̍nᵻ i̍h po̍ plɔ̀ᵻ wɛ̀ i̍h iě wa̍-ɛ, nɛ̀ klǎᵻ wlè nɔɔ-a kɔǎn la̍ we̍. 29Kǎ ɛ̍ nɛ ke, pò mɔ̀ jě ìh la i̍h ja la̍ nɛ-ɛ, nɛ̀ mɔ̀ juo-o dɛ̍ i̍ ka ti̍ kɔǎn-a we̍ wɛ̀-ɛ. Ɛ̍ nɛ dǒ mɔ̀-a gbò wɔ̍i̍n wɛ̀. 30Bɔ̌ ǐn sèàɛ̍ mɔ̀ tìh-a taǐn wlùh, nyɔ̍ la ùh nɛ-a ka kmɔ̌-ɛ, u̍h se̍ mɛ̌ mu̍ te̍e̍ wɛ̀ ìh kli̍hgbɛ̍ la i̍h iě gbǎ. 31Blǔh ke ja̍u̍n-a tìh-a mu̍ i̍ sì, jɛ ǎn wlu̍ nɔ̀ɔ̍, ɛ̍ se̍ i̍ sì mu̍.

Nyɔ̍ se̍ weɛ̍ ke ɛ̍ ti̍ juo

(Matio 24.36-44)

32“Nyɔ̍ se̍ ɛ̍ weɛ̍ ke ɛ̍ ti̍ laa̍ juo. Nyɔsoa-a ǐnchɔ̀-a chɛ̀ nɛ-a dě ja̍i̍wlɔ̀-ɛ se̍ ɛ̍ juo. Jǔ wɔ̍ se̍ ɛ̍ juo ke. Baa due gbài̍ bo ɔ̀ juo ɛ̍. 33Ɛ̍ tìh-ɛ, mɔ̀ nu̍ mɔ̀-a chɛ̀-a nɛnɛ̌, mɔ̀ sà nyinɔ̍ jlǐh i̍, dɛ̍nu̍ɛ, mɔ̀ se̍ ti̍ ti̍-a mu̍-a nyni̍-ɛ juo. 34Ɛ̍ wɔ̀ jɔ̍gbau due-a dihwa̍a̍ mu̍-ɛ. Ɔ̍ wɔ̌an mu̍-u tìh-ɛ, wɛ̀ ɔ̍ si̍e̍ gbò dě ɔ̍ pòi̍nynuu̍ kwa̍a̍, iě ɔ̍ gblè u̍h dbo̍ jii̍. Wɛ̀ ɔ̍ sèàɛ̍ gbò jlǐhɛ̍ tù nyɔ̍ wlùh ɔ̍ iě ɛ̍ jlǐhɛ̍ tù. 35Ɛ̍ tìh-ɛ, mɔ̀ tù-o jlǐhɛ̍, dɛ̍nu̍ɛ, ti̍ gbò joi-a mu̍-a ja-a, pò flìwe̍, pò maɔ̍ tòloo, pò sɔ̀nwɔ̍i̍n, iě pò klàɛ̍we̍, mɔ̀ se̍ ɛ̍ juo o. 36Pò ɔ̍ kèè mɔ̀ kɛ̍n-ɛ, wɛ̀ ɔ̍-ɔ je̍e mɔ̀ nyinɔ̍ i̍ jɛɛ o. 37Nɛ̀ dɛ̍ ǎn bla̍-a dě mɔ̀ we̍-ɛ, ǎn bla̍ ɛ̍ dě nyɔ̍ kli̍hgbɛ̍ we̍. Na̍a̍, mɔ̀ tù-o jlǐhɛ̍ o.”

Iliyochaguliwa sasa

Maɛ 13: KDNT

Kuonyesha

Shirikisha

Nakili