Axwɛ 6

Baʋaziŋa ba bɛkya banɔpɔnɔ tiegloele

1Ni lipoetɔ kede gi badɔkpasi ba bɛzɛɛsrɛ pɔnɔ ɛ, kuboeŋwlɛ kwiku ní Yudanɛ ama gi bizɛpani Sihela sɛ ni Yudanɛ ama gi bɛpɔ ní ba tutɔ ba kesea mɛ kusi i. Yudanɛ ama gi bizɛpani Sihela sɛ ɛ, bɛmɔ si bizɛdɔ ba badzɛaba gi ba benye ba betse e, za ní liwe le kaʋadi ya mɛ. 2Lɛ banɔkpɛkpɛ liɔfɔ ni tiaʋa ba bɛxwa baʋaziŋa ba ɔha lɔ ɛkpɛ likpɔ lɛ bɛpani si, “Aní liboe gbã linu si kuyurɔ Aya liboe le kubasɛɔ tɔ kuvu kibɔ kulɛlɛ loo tɔ kuzedi badzɛaba gi ba benye ba betse ba su i aʋa. 3Lɛ loso e, benemi ba, mlebu benyime tiegloele dɔni mlɔ mɛ, gi mlete si benu anukwarɛ benete e, gi beyi nì Aya yɛ Ɔfuɛfuɛ nɔ ɔ, nì kuboeteo, tɔ kuki tɔ beze ní eboa la ya onu u. 4Tɔ blɔ tutɔ kukɔ blɔ lipoe le petee kukɔkpɛ ní Aya kuxwaxwa ni Aya yɛ liboe le kubasɛɔ axwɛ na mɛ.”

5Likpɔkpɛkpɛ lɛ petee limɔ isami ní banɔkpɛkpɛ ba batrɔtrɔ ʋa su, lɛ loso bebu Stefano, ɔnɔ gi eyi ni kuziŋa ni Aya yɛ Ɔfuɛfuɛ nɔ kɔpɔni Filipo, Prokoro, Nikanora, Timona, Pamena ni Nikolao gi ádɔ Antioxia xe ekyi eku Yudanɛ ma kusɔliɔ mɛ ɛ. 6Lɛ ɔha lɔ ɛgbani ba ɛmani banɔkpɛkpɛ ba ɛ, lɛ bɛxwa Aya ní ba litukpo o, xe bɛtrɔ awla ní ba aʋa ɛ.

7Lɛ loso Aya liboe le liizene onugu i pɔnɔ. Badɔkpasi ba ní Yerusalem bɛzɛɛsrɛ pɔnɔ lɛ kusumu yo baka glegle kyɛ bɛziŋa a.

Stefano Kuvuvu yo

8Stefano, onyimee gi Aya akrira glegle e, xe Aya kigaglaɛ kiyi yɛ mɛ ɛ, abitɛ enugutseboe ni eboe gi aʋíba ʋidi ní banima kusi i. 9Pɔ̀ banɔatɔ gi bɛdɔ ní Yudanɛ ma ɔtsa kɔ́ lɔ gi ɔlɛ ní Kirene e (gi bizɛxwa si benyime gi bɛzi isuwla mɛ kuzeze dɔni kunɔdzi me e), bɛyɔ kedu ni yɛ su. Banɔ ba ya benu Yudanɛ gi bɛdɔ ní Kirene ni Aleksandria. Yudanɛ gɔgɔa ba gi bɛdɔ Kilikia kuseo aʋa ani Asia ɛ, bekpese eboe kuŋwlɛ ni Stefano. 10Pɔ̀ Aya yɛ Ɔfuɛfuɛ nɔ ɛki Stefano kuboete nite me si gi apani i, bátani yɛ eboe la onu kulɛ ɛ.

11Lɛ loso bɛbitɛ kunyanya ni banɔatɔ ní kikpokpo me tɔ bapani si, “Kwinu gi ɛɛpani ebusioboe mani Mose ni Aya su u!”

12Lɛ loso bezizi banima, banɔtsitsi ba ni ɔsã nɔ badɔbasɛ ba ní Stefano su, lɛ bevu ye e, xe bɛtsini yɛ ní Yudanɛ betsixwa ba aŋu mɛ ɛ. 13Lɛ bɛzɛmani banɔatɔ si basɛ asia akpɛ yɛ awla si, “Onyime liɛ ya ɛ, ɛɛpani ebusioboe lipoe kakaa ní blɔ Lisɔligba lɛ mɛ gi kuzeesumu Aya a, ni Mose ɔsã nɔ su. 14Kwinu gi apani si Yesu Nazaret ɔnɛ ɛ, aakpa Lisɔligba lɛ, lɛ aatsrɛ ikɔ̀ɛ lɛ gi idɔ Mose klɔ ɛki blɔ ɔ.” 15Banama petee gi beze ní kutsatsa ʋidi yo me e, bedu aŋu ní Stefano aʋa lɛ bɛmɔ si yɛ aŋu na mɛ alɛ ŋwisi Aya yɛ ɔxwɛdzɛ anɛ kinɛ ɛ.

Iliyochaguliwa sasa

Axwɛ 6: avn

Kuonyesha

Shirikisha

Nakili