Axwɛ 7

Stefano Apani aki Kutsatsa Ʋidi yo

1Lɛ Kusumu yo ɔka ʋidi ye eʋi Stefano si, “Eboa la gi bɛkɔ ní wɔ su i, alɛ la mɛ na a?”

2Lɛ Stefano ebu le onu si, “Benemi ba ni baka ba, mlata mɛ kutu u! Xe ableke blɔ ɔkatsi, Abraham iize ní Haran i, Aya gi ekeme e, ebu isu abasi yɛ ní Mesopotamia, 3lɛ asi yɛ si, ‘Sɛ ní wɔ benete ba ni wɔ kesea mɛ, tɔ trɛ ní kesea lia gi maabasɛ wɔ aʋa a!’

4“Lɛ loso e, asɛ ní Kaldeanɛ ma kesea aʋa lɛ azeeze ní Haran i. Ní Abraham yɛka kutseo kede e, Aya aki si ɔba kesea lia aʋa gi mlalɛ abla ɛ. 5Lipoe lɛ klɔ mɛ ɛ, Aya ɔki Abraham kesea kapɛmiatɔtɔ ŋwisi yɛ ɔŋakɔ kinɛ ɛ, pɔ̀ Aya aka aplɛ akí yɛ si, yɛ akɔ kesea kí yɛ lɛ kiaze yɛ ni yɛ besoebi bà kanɛ ɛ. Ní lipoe lɛ klɔ mɛ gi Aya aka aplɛ nite e, obi ɔtɔtɔ óze ní Abraham awla a. 6Liboe lɛ ya Aya apani aki yɛ, ‘Wɔ besoebi ba biaze ní kese dzedze gi kénu ba kanɛ aʋa a, niklɔ biaze banɔdzidzi lɛ biagbani ba ni litukpo me gagla a, lɛ biabu kini ki ba agɔ alafatiene e. 7Pɔ̀ maahe kutu kí banama gi ba biasumu i, ŋwisi banɔ dzidzi kinɛ ɛ, lɛ kede e, biasɛ kesea lia klɔ aʋa tɔ biaba sumu me ní ya.’ 8Lɛ Aya aki si Abraham oxo ɔyaʋi tsatsa lɔ ligoʋi le tɔ lize gyesi kí kunyanya ní Aya ni Abraham kusi. Lɛ loso gi bɛpɔ Isak ogle tole kede e, Abraham atsa ɔyaʋi aki yɛ, Isak atsa ɔyaʋi aki Yebi Yakob, lɛ Yakob fɛ atsa iyaʋi aki yɛ bebi liɔfɔ ni tiaʋa ba gi ba benu blɔ amade na baka ba a.

9“Gi Yakob yɛ bebi ba bɛkɔ kaŋuza ní ba onemi ye Yosef su onu i, bevu yeda tɔ oze ɔnɔdzidzi ní Egipte. Pɔ̀ Aya eze ni yɛ kude e, 10lɛ ebu ye ní yɛ kini mɔmɔɛ mɛ ɛ. Aya aki Yosef kuboete, lɛ aki si Yosef eku Egipte okusi ye Farao aŋu u, lɛ okusi ye abitɛ Yosef Egipte kesea ni kekusipea ɔʋadi i.

11“Lɛ kuʋɛ kwidɔ ní Egipte petee ni Kanaa i, gi banima beze ní kuxixa glegle me e. Blɔ bakatsi ba bámɔ kiŋaŋa ɛtɔtɔ ɔ. 12Gi Yakob enu si adeʋi alɛ ni Egipte e, akpɛ yɛ bebi ba gi benu blɔ bakatsitsi ba atsisi ní klɔ, ba kutɔpu yɔ ɔ. 13Kuʋlaa gi bɛdzɛ ɛ, Yosef ebu isu abasi yɛ benemi ba lɛ ebu ba abasi Farao kyɛ ɛ. 14Lɛ Yosef atsisi yɛka Yakob ni yɛ baŋanɛ ba petee gi beze banɔ avitegloele ni tietsu i, ole si ba ba Egipte. 15Nite si Yakob atrɛ ní Egipte, eze niklɔ kɔzɛna ni yɛ litsewe le, niklɔ yɛ bebi ba fɛ betse. 16Lɛ kede e, bɛmani ba bekpo ba ní Sixem, niklɔ bevive ba ní ɔdrɔ lɔ gi Abraham edzi ni kibɔ ní Xemor yɛ bebi ba awla a.

17“Gi lipoe le liti pɔnɔ si Aya ɔbitɛ ní yɛ kakaplɛa aʋa kí Abraham i, blɔ akɔanɛ ma ní Egipte bɛdɔ̀ ɛpɔnɔ. 18Lɛ kede Okusi dzedze gi óte liboeboe ní Yosef su i, ekpese kukusi kuŋa ní Egipte. 19Lɛ okusi liɛ ekyi blɔ baka ba axla a, lɛ abitɛ litukpo me gagla ní ba su i, emi ba tɔ bebu ba bebivigye ba zanɔ ní ba kupeo me tɔ betse.

20“Lipoe lɛ klɔ mɛ bɛpɔ Mose, eze obi gi eyi kuyasɔ ɔ. Yɛ bapɔnɛ ba bɛgani yɛ ní yɛka kepea mɛ badzidzi tiata, 21lɛ gi bátani yɛ kukpo ní kepea mɛ tɔ ɛ, bebú ye ní kepea mɛ, okusi ye yebidzɛɛ amɔ yɛ lɛ azɛ yɛ aganɔ ŋwisi yɛ ɔtutɔ yebinyime kinɛ ɛ. 22Bɛbasɛ yɛ Egipte banɛ ma kuboete kakaa, lɛ edzì ɔnɔ ʋidi ní kiboepani ni kiboebitɛ mɛ ɛ.

23“Gi Mose azɛ agɔ avitene e, egyoedi si yizeedi kiliɛ gi bɛɛbitɛ yɛ benemi Israelbanɛ ma a. 24Amɔ ba mɛ tole gi Egipteɔnɛɔtɔ azeebu kini akɔ ɛ, azɛɛpɔni yɛ lɛ beye Egipteɔnɛ ɛ. 25Akɔ lɛ si yɛ ɔtutɔ yɛ benete ba bianu lɛ ese si Aya yɛ akpɛ yɛ tɔ yibu ba, pɔ̀ bénu lɛ ese e. 26Gi kelea kɛti i, Mose edzi atrɛ ní báklɔ lɛ amɔ Israel bebi tiaʋa gi bɛzɛgɔni i, ekeni edi si yikpɛ ba likpɔ. Lɛ loso apani si, Benyime ba, mlata kutu, benemi Israel bebi mlenu; ege lɛ loso mlɛpɛ si mlɛkpɛ mlɔ ahanuglɔ ba ebi i?

27“Pɔ̀ ɔniliɛ gi yɛ ɛɛbu kinie ki yenemie e, etutru Mose atsini kapɛ lɛ eʋi ye si, ‘Nyaŋwɛ edu wo ɔʋaŋa ni otsixwa ní blɔ onu u?’ 28Kipɛ wɔpɛ si, ‘Wuye me kilɛ gi woye Egipteɔnɛɛ kivoe na a?’ 29Gi Mose enu liboe le e, ese ní Egipte lɛ azeeze ní Midia kesea aʋa ŋwisi ɔbaba kinɛ ɛ. Niklɔ apɔ bebinyime tiaʋa.

30“Agɔ avitene kede e, Aya ɔxwɛdzɛ ebu isu abasi Mose ní lifuha gi liisɔ ní bibu ose sisami ɔtɔ mɛ ɛ, ní ɔyaya kɔ ní Sinai lito le su. 31Mose yɛ onugu etse ní kidiliɛ gi amɔ su u, lɛ eti apɔni lifuha lɛ si yidi le mɔmɔmɔ. Pɔ̀ enu Ɔkaɛ yɛ ole lo si, 32‘Mɛ menu mlɔ bakatsi ba ba Aya, Mɛ menu Abraham, Isak ni Yakob ba Aya.’ Lifu liku Mose lɛ ókeni odi si yidi tɔ ɔ. 33Ɔkaɛ asi yɛ si, ‘Bu afɔkpa ʋa ní wɔ kuklikpɔɔ lɛ ese linu si niklɔ gi wɔlɛɛ ɛ, ɔdradra kɔ níklɔ onu. 34Manyamɔ kini glegle liɛ mɛ gi mɛ benete ba balɛ ní Egipte e. Menu ba kutani yɔ lɛ meple aba tɔ míbu ba a. Abla ɛ ba, maadzini wɔ kukpɛ ní Egipte.’

35“Mose liɛ ke Israelbanɛ ma begbe, gi beʋi ye si, ‘Nyaŋwɛ edu wo ɔʋaŋa ni otsixwa ní blɔ onu u?’ Yɛ onu ɔniliɛ gi Aya akpɛ si ɔŋa banima aʋa tɔ obu ba gani Aya yɛ ɔxwɛdzɛɛ gi ebu isu abasi yɛ ní lifuha lɛ mɛ ɛ aʋa. 36Yɛ etu ɔtɔ ni banima edono ní Egipte, xe abitɛ enugutseboe ni eboe mamɔ edi la ní Egipte e, ní axu kyíkyĩ la kutu, ani agɔ avitene na mɛ gi beze ní ɔyaya klɔ ɔ.

37“Mose liɛ ke asi Israelbanɛ ma si, ‘Aya aatsisi mlɔ oboedoplɛ, kiliɛ gi atsisi mɛ ɛ, lɛ aaze mlɔ tutɔ mlɔ mɛ tole e.’ 38Yɛ akpɛ blɔ baka ba likpɔ ŋwisi Israel banɛ ní ɔyaya klɔ lɛ yɛ Aya ɔxwɛdzɛɛ apani akɔ ní Sinai lito le aʋa a, lɛ yɛ azɛ Aya eboe la gi izɛki ligbã aki blɔ ɔ.

39“Pɔ̀ blɔ bakatsi ba begbe bénu kutu aki yɛ ɛ, boŋu i, beku ye ɔwlaku lɛ begyodi ní ba ina nɛ mɛ si biadzitrɛ ní Egipte e. 40Lɛ bɛsi Aron si, ‘Bitɛ etugu gi aaze ɔtɔ xe agbani blɔ ɔ. Kúte liboe lɛ gi liba onyime liɛ Mose e, gi yɛ ebu blo adɔ ni Egipte aʋa a.’ 41Ní lipoe lɛ klɔ mɛ ɛ, bɛʋɔ litugu ní ligume kilɛlɛɛ mɛ, lɛ bɛmani lɛ bidɔ kɔkɔ gi bɛkɔ eyi busu iiki lɛ, lɛ bɛŋa liwe ni isami gi bɛkɔ ɛkpɛ kubùbù ní kidiliɛ gi ba tutɔ bɛʋɔ su u. 42Pɔ̀ Aya adzi kede ní ba su u, lɛ ayurɔ ba tɔ besumu lifunu ne Liwo le, ɔdzidzi yɛ ni badzidziebi ʋa a, kiliɛ gi bɛŋwlimi kpɛ ní beboedoplɛ ba keplekpaa mɛ ɛ si,

“ ‘Israel banɛ ma! Aní mɛ loso mleye baga ʋa xe mlɛki bidɔ pɔʋi pɔʋi ʋɛ ɛ

agɔ avitene na ní ɔyaya klɔ.

43Mlemuni Molɛx yɛ libugba lɛ,

ni Romfan ɔbu yɛ yɛ ɔdzidziobi ye;

ba beze etugu gi mlɔ tutɔ mlɛʋɔ xe mlezeesumu u.

Lɛ loso e maatsisi mlɔ ní aboyo la me ní Babilonia kesea kede.’

44“Aya likatsa lɛ lize ní blɔ bakatsi ba su ní ɔyaya klɔ. Bɛwa lɛ kiliɛ gi Aya asi Mose si ɔwa lɛ ɛ, ní kilɛlɛ liɛ klɔ mɛ gi Aya abasi Mose onu u. 45Lɛ klɔ ʋa kede e, gi blɔ bakatsi ba bɛzi likatsa lɛ dɔni ba baka ba klɔ ɛ, betu le gi bezeni Yosua kude e, xe bɛzi kesea ní amade ana na gi Aya akpikpini edono awla a, ní kiliɛ gi bɛzɛtrɛ onu u. Lɛ lize ní kesea mɛ zɛkɔna ni Dawid lipoe le. 46Gi amɔ lipomepɛpɛ dɔni Aya kɔ lɛ eʋi Aya tɔ ɔki yɛ kude tɔ yiwa ozekɔ ki Yɛ Yakob yɛ Aya. 47Pɔ̀ Salomo yɛ awa ligba aki Aya.

48“Pɔ̀ Kaka Aya Baka ba Ɔkaɛ óʋize ní agba gi ɔnɔ gbagbe awa mɛ ɛ, ŋwisi kiliɛ gi oboedoplɛɛ apani kinɛ ɛ si,

49“Ɔkaɛ si, ‘Lifunu ne linu mɛ likusigbo, lɛ kesea kenu mɛ ikli lɛ odukɔ. Ligba woli lu mlaawa kimɛ ɛ? Lɛ nífɔ aaze mɛ ozekɔ ɔ? 50Ani mɛ ɔtutɔ mɛ mabitɛ bidɔ bɛ ya petee e?’

51“Stefano atrɛ lɛ aʋa si, “Kítɛ xe mlɔ ina nɛ ili ŋwisi babubitɛ ba ini nɛ kinɛ ɛ, xe mlɔ batu ʋa bali gagla si mlápɛ si mlenu Aya liboe le e! Mlalɛ ko ŋwisi mlɔ bakatsi ba kinɛ; mlɔ fɛ mlɛyɔ kedu ní Aya yɛ Ɔfuɛfuɛ nɔ su lipoe kakaa! 52Oboedoplɛ ɔtɔ eze gi mlɔ bakatsi ba báyɔ kedu ní yɛ su edi na a? Beye Aya yɛ banɔkpɛkpɛ ba, gi bedo le eplɛ si ɔniliɛ gi onu Aya yɛ ɔnɔsumu Dradra yɛ ɛ, gi yɛ bede ʋa bɛgyɔ ɛ, atrába. Lɛ abla ɛ, mlebu ye kɔ lɛ mleye ye e. 53Mlɔ mlenu banama gi mlɛzi Aya ɔsã nɔ, gi Aya baxwɛdzɛ ba bɛkɔ ɛki mlɔ, pɔ̀ mlaʋíbitɛ ní lɔ aʋa a!”

Bɛsa Stefano Akla

54Gi kutsatsa ʋidi yo me banima benu Stefano liboe le ní ba su i, beyeʋi isu nyani nyani nì yɛ. 55Stefano pɔ̀ ɛ, Aya yɛ Ɔfuɛfuɛ nɔ ɛki si edi lifunu ne, lɛ amɔ Aya yɛ kuklekleo ni Yesu gi ɔlɛɛ ní Aya yɛ kaŋaa mɛ ɛ! 56Lɛ apani si, “Mledi! Mamɔ lifunu ne gi lidra ɛ, lɛ ɔnɔɛ Yebi ye ɔlɛɛ ní Aya yɛ kaŋawla mɛ ɛ!”

57Banima bɛkpɛ ozi lo gagla, lɛ betsí ba atukpa la ni ba iwla lɛ ɛ. Lɛ ba petee behuiku yɛ aʋa a, 58behe ye dono ní ɔma ʋidi no me lɛ beku yɛ akla kusa mɛ ɛ. Banama gi beze liboe le katsalia ɛ, bɛyurɔ ba ewu la ɛki ɔyasɔʋi ɔtɔ gi bizɛxwa si Saulo si ozedi la aʋa a.

59Gi bɛzɛsa Stefano akla na ɛ, axwa Aya si, “Ɔkaɛ Yesu, zi mɛ Ɔfuɛfuɛ nɔ!” 60Lɛ adɔ yɛ aklamasi na aʋa lɛ akpɛ ozi ni ole gagla si, “Ɔkaɛ! wukívu kuzimizi uliɔ ya ɛplɛ kí ba a!” Gi apani nite ko e, ada yɛ onugu lo.

Iliyochaguliwa sasa

Axwɛ 7: avn

Kuonyesha

Shirikisha

Nakili