Axwɛ 5

Anania ni Safira bɛsɛ asia

1Pɔ̀ onyime ɔtɔ eze gi bɛzɛxwa si Anania a, yɛ ni yedze Safira bɛda ba bidɔ mɛ. 2Pɔ̀ ní yedze kutete me e, abla kibɔɛ kapɛatɔ ki isu lɛ akɔ kigɔgɔɛ akpɛ banɔkpɛkpɛ ba awla ɛ. 3Lɛ Petro apani si, “Anania ege loso wɔki si Satana aŋa wɔ aʋa te e, xe aki si woemeni Aya Ɔfuɛfuɛ nɔ ɔ, xe wɔkɔ kibɔɛ kapɛatɔ ɔ, gi wɔzɛ ní wɔ kesea litukpo ɔbla ki isu u? 4Xe wɔada kesea ɛ, aní wɔ kanɛ keze e? Lɛ gi wɔda ka ɛ, kibɔɛ aní wɔ kinɛ kíze e? Ege loso wɔbasɛ asia na a? Aní banɔ woemeno o, boŋu i Aya woemeno!” 5Gi Anania enu liboe le ko e, egleʋe lɛ etse e, niteme si banama gi benu liboe le e, lifu liku ba. 6Iyasɔʋi lɛ iba ɛxla okpo ye ni kusa mɛ lɛ befeke ye dono eze vive e.

7Ŋwisi inyɔsasa tita kede kinɛ ɛ, yedze gi óte liboe lɛ gi liba lɛ mɛ ɛ, eti eku kepea mɛ. 8Lɛ Petro eʋi ye si, “Si mɛ xe kibɔɛ liɛ kinu kibɔɛ petee gi wɔni wonye mlɛzɛ ní mlɔ kesea litukpo o. Ebu le onu si Ee kibɔɛ petee kɛ klɔ.”

9Lɛ Petro asi yɛ si, “Ege loso wɔ ni wonye mlɛtrɔ si mlɛkeni Aya Ɔfuɛfuɛ nɔ edi i? Benyime baklɔ gi bevive wonye e, bali kevunu ya, lɛ biafeke wɔfɛ kudono o!” 10Egleʋe adɔ kesea ní Petro aŋu mɛ kyɔŋ lɛ etse e. Gi iyasɔʋi lɛ itiku i, imɔ si etse, lɛ befeke ye dono xe bɛzeevive ye ní yenye su i. 11Lɛ loso lifu liku ɔsɔli ha zizi nɔ ni banɔ gɔgɔa ba petee gi benu eboa la ya ɛ.

Banɔkpɛkpɛ ba bɛbitɛ enugutseboe ni eboe gi etu banɔ kugyɔ ɛ

12Banɔkpɛkpɛ ba bɛzɛbitɛ enugutseboe ni eboe glegle gi ába eʋidi i ní banima kusi. Baʋaziŋa ba petee bɛzɛtsa ní Salomo ɔviva nɔ. 13Gani lɛ mɛ si banima bezegu kunugu gbã ní basu kyɛ, banama gi báma ní ba mɛ ɛ, bamɛ ɔtɔtɔ òkeni odi si yiti ipɔni ba a. 14Pɔ̀ banɔ glegle bɛba ɛpɔni ba gi benu benyime ni badzɛ linɔkpi i, gi lizi Ɔkaɛ aʋa ɛɛŋa ɛ. 15Kɔkpɛ kidiliɛ gi banɔkpɛkpɛ ba bɛzɛbitɛ loso e, banima bezefeke banyanya ba tsini ablɔ ʋa aʋa lɛ bɛzɛplɛ ba ní abati loo itɔsi lɛ aʋa a, tɔ xe Petro ɛga ɛza ɛ, tɔ yɛ kuyeo kwiadɔ ní ba mɛ batɔ aʋa. 16Lɛ anɔkpi la ɛdɔ imaɛ nɛ gi iklani Yerusalem mɛ ɛ, lɛ bɛmani banama gi ba isu mɛ igɔ loo banama gi ifuɛfuɛ zimizi ne iikpɛ ba kunugu yo e; lɛ ba petee bɛmɔ kuyɔyɔ ɛ.

Bɛyɔ kedu ní Banɔkpɛkpɛ ba su

17Lɛ kusumu yo ɔka ʋidi ye ni yɛ benete ba petee, banama gi bali ní zadukianɛ ma ɔha lɔ mɛ ɛ, bɛkɔ kaŋuza tiitii ní banɔkpɛkpɛ ba su, lɛ bɛtrɔ si biabu ɔkli i. 18Bevu banɔkpɛkpɛ ba lɛ bɛkɔ ba ɛkpɛ ní ɔma nɔ ligba lɛ ɛ. 19Pɔ̀ elesi la ɛ, Aya yɛ ɔxwɛdzɛ adra ligba lɛ ipupo le e, lɛ etu ɔtɔ ni banɔkpɛkpɛ ba edono e, lɛ asi ba si, 20“Mlatrɛ tɔ mlazɛlɛ ní lisɔligba lɛ mɛ, tɔ mlapani asi banima ní ligbã́zeze vuvu nɛ su.”

21Banɔkpɛkpɛ ba bɛbitɛ ní lɛ aʋa lɛ olezatɔ nɔ ɛ, beti iku ní lisɔligba lɛ mɛ lɛ bekpese bidɔ kubasɛ ɛ. Lɛ loso Kusumu yo ɔka ʋidi ye ni yɛ baʋatrɔ ba bɛxwa Yudanɛ banɔtsitsi ba kí ɔha lɔ kutsatsa; lɛ bɛkpɛ ɔsã tsisi ligba lɛ bepepe ba tɔ bamani banɔkpɛkpɛ ba ní ba aŋu mɛ ɛ. 22Pɔ̀ gi baka ba beku i, bámɔ banɔkpɛkpɛ ba ní ligba lɛ mɛ, lɛ bedziba kutsatsaa mɛ lɛ bedo si, 23“Gi kwiku ni klɔ ɛ, kwimɔ si ipupo le ìda lɛ banɔpe ba fɛ balɛɛ xe bepe kevunu ya a, pɔ̀ gi kwidra ipupo le e, kúmɔ ɔnɔnɔ ní ligba lɛ mɛ ɛ!” 24Agi kusumu yo ɔka ʋidi ye ni ɔkaɛ ní lisɔligba lɛ bepepe ba onu benu liboe le e, bɛpisa ní kidiliɛ gi kiba banɔkpɛkpɛ ba aʋa su u.

25Lɛ onyime ɔtɔ aba asi ba si, “Mlata kutu! Benyime ba ya gi mlɛkpɛ ligba lɛ ɛ, bali ní lisɔligba lɛ mɛ gi bɛbasɛ banima bidɔ mɛ ɛ!” 26Lɛ banɔpe ba ɔkaɛ ni yɛ banima bɛzɛgbani banɔkpɛkpɛ ba dzini manɔ ɛ. Bákɔ kigagla ni ba, lɛ ese linu si bezese lifu si banima biasa ba akla.

27Gi bɛgbani banɔkpɛkpɛ ba ɛmanɔ ɛ, bɛtsini ba ní Yudanɛ ma betsixwa ba aŋu mɛ, lɛ kusumu yo ɔka ʋidi ye eʋi ba si, 28“Kwikpɛ ɔsã gagla ɛki mlɔ si mlakíbasɛ bidɔ ní onyime liɛ ya linyi ne me tɔ ɔ, pɔ̀ mledi kidiliɛ gi kɛ mlɛbitɛ ɛ! Mlene mlɔ bidɔbasɛbasɛ ʋɛ ní Yerusalem petee, lɛ mlɛpɛ si mlebu blo lipɔ si blɔ kwiye ye e!”

29Lɛ Petro ni banɔkpɛkpɛ gɔgɔ ba bebu le onu si, “Linu si kunu kutu kí Aya sani kí banima. 30Blɔ bakatsi ba Aya yɛ ayɔni Yesu adɔ ni bekpo ʋa mɛ gi mleku ye ní ose lo su u, xe etse e. 31Aya emuni ye atsinɔ yɛ kaŋaa mɛ tɔ oze Okusi obi ni Ɔnɔbu, tɔ ɔki Israelanɛ ma kudeonu tɔ bekyi tɔ Aya aakɔ̀ ba eboe zimizi na kɔ kyɛ ba. 32Kunu katsali aki eboa la ya, blɔ ni Aya Ɔfuɛfuɛ nɔ, gi Aya aki blɔ banama gi kuzeenu kutu ikí yɛ ɛ.”

33Gi banama a gi bɛtsa xe benu liboe le e, bɛmɔ kusuyeʋi gbɛgbɛ nite si bɛpɛ si beeye banɔkpɛkpɛ ba xe e. 34Pɔ̀ betsixwa ba mɛ tole e, Farisi ɔnɛ gi bizɛxwa si Gamaliɛl i, gi onu Mose ɔsã nɔ ɔdɔbasɛ ɛ, xe edzì onu ɔnɔ ɔ gi banima pɔ́ bɛkpɛ kubùbù yɛ su i, ayɔ alɛɛ ní kutsatsaa mɛ. Aki si bebu banɔkpɛkpɛ ba, 35lɛ asi kutsatsaa si, “Israelbanɛ ma, mledi mumɔ ní kidiliɛ gi mlɛpɛ si mlɛbitɛ mani banɔ ba ya su u. 36Mlɛplɛ aŋu si Teuda aŋwi lipoetɔ lɛ, gi amɔ isu ya si yenu ɔnɔ ʋidi i, lɛ ŋwisi banɔ alafatiene kinɛ ɛ bezeni yɛ kude. Pɔ̀ ɛ, beye ye, lɛ banɔ ba klɔ gi beze ni yɛ kude petee behle e, lɛ yɛ ɔha lɔ ɛŋini i. 37Lɛ kede e, Yuda Galilea ɔnɛɛ aŋwi ní banima lìklapoe le, gi ehe linɔkpi apɔni isu ya a, pɔ̀ beye yɛ kyɛ, lɛ banama gi bezeni yɛ kude e, ba petee behle. 38Lɛ loso e, ni liboe lɛ ya mɛ ɛ, mɛɛgba mlɔ si, mlakíkɔ liboe ní benyime ba ya su u. Mlayurɔ ba! Xe ba batrɔtrɔ ʋa ni kiboebitɛɛ kidɔ banima kɔ ɛ, biadu, 39pɔ̀ xe bidɔ Aya kɔ ɛ, mlatrátani ba aʋa kuŋa a. Mlaamɔ isu ya si mlɛɛta kigũ ni Aya!” Kutsatsaa kwizi Gamaliɛl yɛ kugbagba.

40Lɛ gi bɛxwa banɔkpɛkpɛ ba ɛmanɔ ɛ, bekusi ba, lɛ bɛkpɛ ɔsã ɛki ba si bakípani ní Yesu linyi ne me liwewe tɔ ɔ; lɛ bɛyurɔ ba ɛ.

41Gi banɔkpɛkpɛ ba bɛsɛ ní kutsatsaa mɛ ɛ, isami iku ba, lɛ ese linu si Aya ebù ba si begyeno si bakyɛ biaŋa kuye kɔkpɛ Yesu. 42Lɛ liwe kakaa a, ní lisɔligba lɛ mɛ, ní banima kupeo me, bɛzɛɛbasɛ bidɔ lɛ bezeedo Aya yɛ liboe Gbã nɛ ní Yesu gi onu Kristo ye su u.

Iliyochaguliwa sasa

Axwɛ 5: avn

Kuonyesha

Shirikisha

Nakili