Axwɛ 1

Befeke Yesu i tsini Lifunu ne

1Onemi Teofil, ní mɛ keplekpa tɔpu ya mɛ ɛ, maŋwlimi ní kidɔ kakaa gi Yesu abitɛ ɛ, xe abasɛ ɛ dɔni lipoe lɛ klɔ mɛ gi ekpese yɛ axwɛ na ɛ, 2kɔzɛna ni liwe lɛ klɔ gi Aya emuni ye atsini lifunu ne e. Xe biaseni yɛ omuno e, Yesu gani Ɔfuɛfuɛ Dradra lɔ kigaglaɛ mɛ, asi banɔkpɛkpɛ ba gi akya a si babitɛ eboa la ɔsã gi yɛ akpɛ aki ba ɛ. 3Kɔki ewe avitene ní yɛ kutseo kede e, ebu isu abasi ba lipoe glegle gi litrɔ likla lɛ aʋa si eze ligbã́ a. Lɛ egu kunugu ní Aya yɛ kaʋaŋaa su akí banama gi bɛmɔ yɛ ɛ. 4Lɛ lipoe tɔ lɛ gi azaaŋa bidɔ ni ba ɛ, akpɛ ɔsã lɔ ya aki ba si: “Mlakísɛ ní Yerusalem boŋu i, mlepe bidɔkɔkɔɛ klɔ su gi mapani aki mlɔ ɛ. Bidɔkɔkɔɛ ʋɛ su gi Mɔka aka aplɛ ɛ. 5Yohanes akpɛ kuni aki banima, pɔ̀ mlɔ kɔɔ Aya aakpɛ Ɔfuɛfuɛ Dradra nɔ ki mlɔ ní ewe klakla atɔ kede e.”

6Lɛ gi banɔkpɛkpɛ ba beze ní kutsatsa mɛ ni Yesu dzɛ ɛ, beʋi ye si, Ɔkaɛ, Wɔtradzini kaʋaŋaa ɛki Israel ní lipoe lɛ ya mɛ na a?

7Yesu asi ba si, “Aní mlɔ liboe linu si mlete lipoe le, ni bekyikyi ʋa a, ani kutrɔtrɔ liɔ gi Mɔka abitɛ ní yɛ ɔtutɔ yɛ kigaglaɛ mɛ ɛ. 8Pɔ̀ xe Ɔfuɛfuɛ Dradra lɔ ɛba mlɔ aʋa ɛ, mlaazi kigagla, lɛ mlaaze mɛ katsalia ní Yerusalem, Yudea petee, ni Samaria ani kesea ɔgɔgɔ klɔ ɔ.”

9Gi apani nite pɔ́ ɛ, Aya emuni ye atsini lifunu ne, lɛ gi bezeedi ye kpɛ ɛ, liplɛ ɛtɔ liba kpo ye lɛ bámɔ yɛ tɔ ɔ.

10Gi azaasɛ ní basu u, xe bezeedi lifune kpɛ ɛ, kyɔŋ klɔ ko e, benyime tiaʋa gi beze bidɔ pititi mɛ ɛ, bɛba lɛɛ ní basu, 11lɛ bɛpani si i, “Galileanɛ ma, ege loso mlalɛɛ ní ya xe mleedi lifune kpɛ te e? Yesu liɛ gi Aya asɛ ní mlɔ su atsini lifunu ne e, aadzi ba nite ke gi mlɛmɔ yɛ ɛ gi ɛɛtrɛ lifunu ne e.”

Bɛkya Matias Si Oze ní Yuda ozeklɔ

12Lɛ ya kede e, banɔkpɛkpɛ ba bedzitrɛ Yerusalem dɔni olif ye ise le ketokpaa aʋa, gi kalɛ ŋwisi ɔtiplɛkɔ tole ni kapɛ dɔni ɔma ʋidi no me e. 13Gi beku ɔma ʋidi no me e, bemu itrɛ ní ligba ɛlɛ klɔ mɛ gi beze e. Petro, Yohanes, Yakobo ni Andrea, Filipo ni Toma, Bartolomeo ni Mateo, Yakobo, Alfeo Yebi ni Simon gi bizɛxwa si Zelote ani Yuda Yakobo Yebi ye. 14Banɔ ba ya petee bɛzɛɛkpɛ likpɔ, ba ni badzɛ ba, Maria, Yesu yene ni Yesu yɛ beneminyime ba lɛ beze ní Aya kuxwaxwa aʋa lipoe me ni lipoe me e.

15Ní ewe ala klɔ mɛ ɛ, Petro ayɔ alɛ ní baziŋa ba kusi gi ba kisrɛsrɛ mɛ kize ŋwisi alafa tole ni avi taʋa kinɛ ɛ. 16Lɛ apani si i, “Mɛ benemi ba, linu si kuŋwlimi dradraa kuba kɔ mɛ gi Ɔfuɛfuɛ Dradra lɔ ɛpani gani Dawid aʋa ɛ. Dawid apani aplɛ ni Yuda gi eze ɔtɔ ɔ aki banama gi bevu Yesu su i, 17Yuda eze blɔ mɛ tole, lɛ ese linu si bebu yɛ fɛ tɔ ɔmɔ ɔbitɛ kɔ ní blɔ lixwɛ nɛ mɛ.”

18Kibɔɛ liɛ gi Yuda amɔ adɔ ni yɛ kiboebitɛ zimizi ye me e, kidzi kese ní níklɔ gi etse e, xe awɔli adɔ ni ɔgyɔgyɔ kɔ ɔ, gi ata a, xe yɛ lipo le me iyaʋi lɛ ido ebali i. 19Banama petee gi balɛ ní Yerusalem i, benu liboe le, lɛ ní ba tutɔ ba siya sɛ mɛ ɛ, bɛxwa kesea lia klɔ si Akeldama, gi lɛ ese linu si ‘Ika kese e.’

20Petro atrɛ lɛ aʋa si, “bɛŋwlimi kpɛ Psalomo ʋa keplekpaa mɛ si,”

‘Yɛ ozeklɔ odzi kepe yaʋiyaʋi, lɛ ɔnɔnɔ okíze ní ka mɛ ɛ.’

Bɛŋwlimi kyɛ si, ‘Lɛ yɛ axwɛ na fɛ ɛ, ɔnɔ dzedze ɔzɛ la.’

21“Lɛ loso, liziã si bakya ɔnɔ tole dɔni benyime ba ya gi beze blɔ kusi lipoe kakaa mɛ ɛ, dɔni lipoe lɛ klɔ mɛ gi Ɔkaɛ Yesu aba a, xe azaaga klanɔ ní blɔ kusi i, 22dɔni Yohanes kuni kpɛkpɛɔ aʋa zɛkɔna ni liwe lɛ klɔ gi bɛzi Yesu itsini lifunu ne ní blɔ su i, ba mɛ tole odzi Yɛ kuyɔyɔɔ katsalia pɔni blɔ.”

23Lɛ bɛkɔ banɔ tiaʋa, Yosef gi bɛxwa si Barsaba ɔniliɛ klɔ ke onu Yusto, ni Matias. 24Lɛ bɛxwa Aya a, xe bɛpani si i, “Ɔkaɛ, wote banima petee ba ina nɛ mɛ, basɛ blɔ ní banɔ tiaʋa ya kusi, ba mɛ iliɛ gi wɔkya a, 25si ɔwa axwɛ na ŋwisi ɔnɔxwaxwa kinɛ ɛ, ní Yuda gi adzi kede ní blɔ su u, tɔ yitrɛ ní klɔ gi egyeni ye e, linyi ne me.” 26Lɛ gi bɛta exoeʋi la ɛ, ɛdɔ ní Matias aʋa, lɛ bebu ye pɔni banɔkpɛkpɛ liɔfɔ ni tole ba ɛ.

Iliyochaguliwa sasa

Axwɛ 1: avn

Kuonyesha

Shirikisha

Nakili