Axwɛ Eboa la gi alɛ ní Banɔkpɛkpɛ ba Keplekpaa su i

Eboa la gi alɛ ní Banɔkpɛkpɛ ba Keplekpaa su i

Banɔkpɛkpɛ ba axwɛwawa la keplekpaa kenuLiboe gbã nɛ ŋwisi kiliɛ gi Luka aŋwlimi nɛ kinɛ ɛ, lɛ aʋa kutrɛtrɛ. Kidiliɛ koŋ gi kɛ loso aŋwlimi keplekpaa lia kinu si; tɔ yido kiliɛ gi gani Ɔfuɛfuɛ dradra nɔ mɛ ɛ, banɔ tɔpu ba gi bezeni Yesu kude e, bɛtani Liboe gbã nɛ ní yɛ su kuhle “ní Yerusalem, ní Yudea petee ni Samaria, kɔtsinɔ ní kelea odu klɔ.” (1:8) Aŋwlimi bidɔ ní Kristo banɛ ma kigaglaɛ mɛ su; kiliɛ gi kiikpese dɔni Yudanɛ ma kusi riɖiɖi i, xe kiba edzì kuziŋa ɛki kelea petee e. Ɔdɔŋwlimi yɛ apɛ si yitrɔ likla lɛ aʋa ɛki yɛ badɔkla ba si Kristo banɛ ma ɛ, bénu banɔ gi bɛyɔ kedu ní Roma kaʋaŋaa su u. Lɛ Kristo aʋa kuziŋaa kunu Yudanɛ ma kusɔliɔ kɔ mɛ kubaba.

Biatani banɔkpɛkpɛ ba axwɛwawa la kulɛ kpɛ ní kupɛ ʋidi tuta mɛ; gi kwibasɛ kiliɛ ɛ, gi Liboe gbã nɛ ní Kristo su u, ni Ɔsɔli ha lɔ kududu yo bine onugu i: (1) Kiliɛ gi Kristoanɛ ma kuzeze kwikpese ní Yerusalem i, gi bemuni Yesu itsinɔ lifunu ne kede e. (2) Kiliɛ gi Kristoanɛ ma bɛkaka eku ní Palestina kesea mɛ ɛ. (3) Kiliɛ gi Kristoanɛ ma bɛkaka eku ní Mediterania kuseo me e, xe bezeku Roma ɛ.

Banɔkpɛkpɛ ba axwɛwawa la Keplekpaa ka kapɛ veve katɔ kenu Ɔfuɛfuɛ dradra nɔ lɔ axwɛwawa la, kiliɛ gi ɛɛba ni kigagla ní baʋaziŋa ba aʋa a ní Yerusalem ní Pentekoste Liwe le aʋa. Ɔfuɛfuɛ dradra lɔ ɛtrɛ lɛ aʋa gi ɛɛgbani i, xe ɛɛkpɛ Ɔha lɔ ni lɔ onu bezeze ba kigagla a, gi bɛ su bɛŋwlimi bidɔ mɛ kpɛ ní keplekpaa lia mɛ ɛ. Bɛkpɛ Baʋaziŋa tɔpu ba eboe la likpɔ ní Aya yɛ liboe le kupaniɔ mɛ, lɛ eboa la gi ɛɛba la mɛ ɛ, xe bɛŋwlimi i kpɛ ní keplekpaa mɛ ɛ, ɛbasɛ kigaglaɛ liɛ gi kize ní eboe la mɛ ní baʋaziŋa ba agbã na mɛ ɛ ani likpɔkpɛkpɛɛ lɛ gi lize ní ɔha lɔ mɛ ɛ.

Eboa la gi alɛ keplekpaa lia mɛ ɛ

Kublabla ki liboe le katsalia 1:1-26

(a). Yesu yɛ ɔsã gɔgɔ lɔ ni yɛ kakaplɛa 1:1-14

(b). Ɔniliɛ gi yɛ aazè ní Yuda linyi ne me e 1:15-26

Katsalia ní Yerusalem 2:1—8:3

Katsalia ní Yudea ni Samaria 8:4—12:25

Paulo yɛ axwɛwawa la 13:1—28:31

a. Paulo yɛ kudegaga tɔpu yɔ 13:1—14:28

b. Kutsatsa ʋidi yo ní Yerusalem 15:1-35

d. Paulo yɛ kudegaga ʋla 15:36—18:22

ɖ. Paulo yɛ kudegaga tanɛɔ 18:23—21:16

e. Paulo eze ligba ní Yerusalem, Kaisarea ni Roma 21:17—28:31

Iliyochaguliwa sasa

Axwɛ Eboa la gi alɛ ní Banɔkpɛkpɛ ba Keplekpaa su i: avn

Kuonyesha

Shirikisha

Nakili

Je, ungependa vivutio vyako vihifadhiwe kwenye vifaa vyako vyote? Jisajili au ingia

Jifunze Mengi Kuhusu KUNYANYA VUVU YƆ

Axwɛ Eboa la gi alɛ ní Banɔkpɛkpɛ ba Keplekpaa su i

Mistari Maarufu ya Biblia kutoka
Axwɛ Eboa la gi alɛ ní Banɔkpɛkpɛ ba Keplekpaa su i

Biblia:

Avatime

Tolea: KUNYANYA VUVU YƆ - avn