Usihangaike kwa sababu ya watenda mabaya,
Usiwahusudu wafanyao ubatili.
Maana kama majani watakatika mara,
Kama miche mibichi watanyauka.
Umtumaini BWANA ukatende mema,
Ukae katika nchi, upendezwe na uaminifu.
Nawe ujifurahishe katika BWANA,
Naye atakutimizia haja za moyo wako.
Umkabidhi BWANA njia yako,
Pia umtumainie, naye atakutendea.
Ataitokeza haki yako kama nuru,
Na hukumu yako kama jina la adhuhuri.
Utulie mbele za BWANA,
Nawe umngojee kwa subira;
Usihangaike juu ya afanikiwaye katika njia yake,
Wala mtu apangaye maovu.
Ukomeshe hasira, uache ghadhabu,
Usikasirike, mwisho wake ni kutenda mabaya.
Maana watenda mabaya watakatiliwa mbali,
Bali wamngojao BWANA ndio watakaoirithi nchi.
Maana bado kitambo kidogo asiye haki hatakuwapo,
Utapaangalia mahali pake wala hatakuwapo.
Bali wenye upole watairithi nchi,
Watajifurahisha kwa wingi wa amani.
Asiye haki hunuia mabaya juu ya mwenye haki,
Na kumsagia meno yake.
BWANA atamcheka,
Maana ameona kwamba siku yake inakuja.
Wasio haki wamefuta upanga na kupinda uta,
Wamwangushe chini maskini na mhitaji,
Na kuwaua wenye mwenendo wa unyofu.
Upanga wao utaingia mioyoni mwao wenyewe,
Na nyuta zao zitavunjika.
Kidogo alicho nacho mwenye haki ni bora
Kuliko wingi wa mali wa wasio haki wengi.
Maana mikono ya wasio haki itavunjika,
Bali BWANA huwategemeza wenye haki.
BWANA huwatunza waaminifu,
Na urithi wao utakuwa wa milele.
Hawataaibika wakati wa ubaya,
Na siku za njaa watashiba.
Bali wasio haki watapotea,
Nao wamchukiao BWANA watatoweka,
Kama uzuri wa mashamba,
Kama moshi watatoweka.
Programu ya Biblia
Programu ya Biblia kwa Watoto
