Nowaai sɨpɨyavɨ wɨla'dɨ'nyɨ Gotɨyai sɨmunya yawɨra'. Yawɨraka yɨhuta wakɨna kya' aalya' walyuina yadaasɨ lawe dɨkaai dɨkaai dɨ' kwavɨlava' aalya maalɨka warɨna kya', sɨpɨya' Ararata mugunyavɨ wara'. Kwara' sawɨta a'mwe pwaraare ata sɨvɨlɨraai kajɨnna' Nowaai sɨpɨyavɨya yɨrɨtɨnnyarɨkɨ baasaka mwasawɨ kaamyaakerɨ marapɨlakwaasɨna ya'. Kwaakevakɨ aalɨbunya wa'dɨsɨ kaamyaakei pɨlakuna. Pɨlakuna kya' Nowaai “Aalya tɨvi kye'nɨgwaimwaawɨ' daa'?” daka mwasawɨ kwaamɨryarɨ marapɨlakwaasɨna ya'. Aalɨbunya' kuna wa'dɨsɨ kwaamɨryai mwalaawia'neba kunewɨ wanganaka ayawɨnna sɨpɨyavɨna bulamwaaina. Bulamwaaina kya' sawɨta ata pwi yaka ata purɨdaa'nyɨ pwaraai kajɨnna' pɨgaa' Nowaai kwaamɨryarɨ marapɨlakwaasa'. Kamarapɨlakwaasa' sawɨsɨrɨ kwaamɨryai yɨta wolivɨyare kɨwasa' mudɨ'mɨlamaraawɨna ya'. Kamakaba' Nowaai tɨnna wanganaka “Kwaakeva' yaalɨka menanyɨra,” yawɨra'. Kyawɨra' sawɨta ata pwi ata purɨdaasɨ pwaraai kajɨnna' pɨgaa' Nowaai kwaamɨryarɨ kamarapɨlakwaasa' sa' kwaamɨryai yuna kaanna wɨna ya'. Wɨna kya' Nowaai sɨpɨyavɨya kaanya' baasaka wanganaasa'. Tɨnna dara wanganake' kwaake' yaalɨkevɨ wangana'. Mena kwangana' lawe pu'na kwavɨlava' Gotɨyai Nowaarɨ wɨdɨna, “Sarɨmɨ mwasabanna jɨkwalyaabila! Jɨlɨkyaawaryaraavɨ yɨkurɨyaawiaraavɨ dɨvuradɨhalamakwalyaama! Kumɨ sara kwaakevakɨ kwala naanga yariwannɨpɨ'derera.” Sara wɨdɨna kya' sɨpɨyavɨdaa'nyɨ Nowaalyɨ gamɨre gawaalɨsɨ yuya mwasabanna walyaabɨna ye'. Walyaabɨna kye' Nowaai sɨmunya yawɨraka “Gotɨyai neyɨvainɨwake'na nɨmɨ Gotɨyai tewannyarɨna yɨlaaya yɨgalɨde'na jɨlɨkyaawarya yɨkurɨyaawia wɨjaawɨwɨnabɨsa' dɨkevɨ gaayadɨka yɨravɨma!” yawɨraka Gotɨyarɨne simɨnye' lɨvalaaba'. Lɨvalaabaka dɨka marira'na yaka “Jɨlɨkyaawarya yɨkurɨyaawia kɨmaaka mwarikera,” daka maarɨna yaka simɨnye lɨvalaabakevɨ dɨkevɨ marakɨna ya'. Sɨmahurɨka wɨvwasɨ'na yakevɨdaa'nyɨ tɨrɨnya wabatɨrɨnya winnaka Gotɨyai da' “Dɨvi yunegaa' nɨmɨ ye'na sɨmudɨnya yadɨvɨsangɨ maramuneinyɨra.”