Marcos 3
3
Chakisqa makiyuq runata Jesús sanoyachisqanmanta
(Mt 12.9-14. Lc 6.6-11)
1Jesusmi huktawan sinagogaman yaykurqa, chaypim kachkasqa chakisqa makiyuq runa. 2Fariseokunañataqmi Jesusta wateqachkarqaku samana punchawpi sanoyarachiptinqa chaymanta acusanankupaq. 3Jesusñataqmi chakisqa makiyuq runata nirqa:
Hatarispayki kay chawpipi sayay, nispa.
4Hinaspam llapa runakunata tapurqa:
¿Imatataq samana punchawpi ruwayta atichwan, allin kaqtachu icha mana allin kaqtachu? ¿Runapa vidan salvaytachu icha wañurachiytachu? nispa.
Paykunañataqmi upallalla karqaku. 5Chaymi Jesusqa muyuriqninpi kaqkunata piñasqallaña qawarispan rumi sonqo kasqankumanta llakikurqa; chay runatañataqmi nirqa:
Makikita haywariy, nispa.
Haywariykuptillanmi makin sanoyarurqa. 6Hinaptinmi fariseokuna lloqsiramuspanku Herodespa qatiqninkunawan huñunakuruspanku Jesusta imayna wañuchinankupaq tanteanakururqaku.
Achka runakuna Jesusta uyariq risqankumanta
7Jesusñataqmi discipulonkunapiwan qochapa patanman pasakurqaku, hinaptinmi achkallaña runakuna Galilea lawmanta qatirqaku. 8Jesuspa tukuy ima ruwasqanta yacharuspankum qawaq rirqaku Judea lawmanta, Jerusalenmanta, Idumeamanta, Jordán mayupa waklawninmanta, Tiro hinaspa Sidón llaqtakunapa muyuriqninkunamantapas. 9Achkallaña runakuna chaypi kasqanraykum discipulonkunata Jesús kamachirqa huk barcata alistanankupaq, chaynapi llapa runakuna mana ñitirunanpaq. 10#Mr 4.1; Lc 5.1-3.Chaynataqa kamachikurqa, achka onqoqkunataña sanoyarachisqanraykum tukuy rikchaq onqoyniyuqkunapas Jesusta llapchaykunankupaq ñitinakustin asuykusqankuraykum. 11Demoniopa huntasqan runakunañataqmi Jesusta rikuruspanku ñawpaqninpi qonqorakuspanku kaynata qaparirqaku:
¡Qamqa Diospa Churinmi kanki! nispanku.
12Jesusñataqmi paykunata chunkay-chunkayta kamachirqa pim kasqanmanta ama pimanpas willakunankupaq.
Chunka iskayniyuq discipulonkunata akllasqanmanta
(Mt 10.1-4. Lc 6.12-16)
13Chaymantam Jesusqa wakin puriqmasinkunata pusarikuspan orqoman rirqa, chaypi huñunakuruptinkum, 14paykunamanta chunka iskayniyuqta akllarqa paywan kuska purinankupaq, hinaspanmi kamachiptin Diospa munaychakuyninmanta willakamunankupaq. 15Hinaspam demoniokunata qarqonankupaq atiyta qorqa.
16Chay chunka iskayniyuq discipulonkunam karqa: Simón, paytam Pedrowan suticharqa; 17Jacobowan Juan, paykunaqa Zebedeopa churinkunam karqaku, paykunatam Boanergeswan suticharqa, chayqa “Rayopa churinkuna” ninanmi. 18Wakinñataq Andrés, Felipe, Bartolomé, Mateo, Tomás, Alfeopa churin Jacobo, Tadeo, cananista Simón, 19hinaspa Judas Iscariote, paymi Jesusta traicionarurqa.
Jesusta kamisqankumanta
(Mt 12.22-32; Lc 11.14-23; 12.10)
20Chaymantam Jesuswan discipulonkuna wasiman kutimurqaku, hinaptinmi huktawan achkallaña runakuna huñunakaramurqaku, chaymi Jesuspas nitaq discipulonkunapas manaña mikuytapas atirqakuñachu. 21Jesuspa ayllunkunañataqmi chaypi kasqanta yacharuspanku, “locoyarunmi” niptinkum pusanankupaq hamururqaku.
22 #
Mt 9.34; 10.25. Diospa leynin yachachiqkunapas Jerusalenmanta hamuspankum nirqaku:
Kay runaqa demoniokuna kamachiq Beelzebú nisqapa huntasqanmi kachkan, paypa atiyninwanmi demoniokunata qarqon, nispanku.
23Jesusñataqmi paykunata qayaspan rikchanachiykunawan nirqa:
¿Imaynataq Satanasqa kikillanta qarqokunman?
24Sichum huk nación iskayman rakinasqa kaspaqa manam takyanmanchu. 25Huk ayllupas rakinasqa kaspaqa manataqmi takyanmanchu. 26Chaynataqmi Satanaspas kikinpa contranpi hatarispaqa mana takyanmanchu, aswanqa puchukarunqam.
27Kallpasapa runapa wasintaqa manam pipas suwayta atinmanchu, payta manaraq puntata chaqnaruspaqa. Chaqnaruspam ichaqa tukuy imankunatapas suwarunman.
28Cheqaptapunim nikichik: Diosqa pampachanqam runakunapa huchankutawan kikin kamisqankutapas. 29#Lc 12.10.Chuya Espirituta kamiqkunatam ichaqa mana haykapipas pampachanqachu, aswanqa wiñaypaq huchayuqmi kanqaku, nispa.
30Chaytaqa nirqa: “Jesusqa mana allin espiritupa huntasqanmi kachkan”, nispa rimasqankuraykum.
Mamanwan wawqenkuna Jesusta maskasqankumanta
(Mt 12.46-50. Lc 8.19-21)
31Jesuspa kasqanmanmi mamanwan wawqenkuna chayarurqaku, hinaspam hawallamanta payta qayachirqaku. 32Chaymi Jesuspa muyuriqninpi tiyaqkuna nirqaku:
Mamaykiwan wawqekikunam maskasuspayki hawapi kachkanku, nispanku.
33Jesusñataqmi nirqa:
¿Pitaq mamaywan wawqeykunaqa? nispan.
34Hinaspam muyuriqninpi tiyaqkunata qawarispan nirqa:
Paykunam mamaywan wawqeykunaqa. 35Pipas Diospa munasqanta ruwaqmi mamayqa, wawqeyqa hinaspa paniyqa, nispa.
Nu markerat:
Marcos 3: RCHQ2
Märk
Dela
Kopiera
Vill du ha dina höjdpunkter sparade på alla dina enheter? Registrera dig eller logga in
Chuya Qellqa Revisión @ Sociedad Bíblica Peruana, 2012
