Marcos 4
4
Muhu tarpuqmanta
(Mt 13.1-9. Lc 8.4-8)
1 #
Lc 5.1-3. Jesusmi qochapa patanpi huktawan yachachiyta qallaykurqa. Achkallaña runakuna huñunakaramuptinmi, qochapi barcaman qespispan Jesús tiyaykurqa, llapa runañataqmi qochapa patallanpi karqaku. 2Chaypim rikchanachiykunawan tukuy imamanta yachachispan nirqa:
3Uyariychik, huk runam tarpukuq lloqsirqa. 4Muhuta machqeptinmi, ñanman wakin wichirqa, hinaptinmi urpitukuna hamuruspa mikururqaku. 5Wakinñataqmi mana ancha allpayuq ranraman wichirqa, hinaspanmi as allpallapi kasqanrayku chaylla wiñaramurqa. 6Ichaqa mana allin sapichakusqa kasqanraykum inti ruparamuspa chakirachirqa. 7Wakin muhuñataqmi kichka-kichka ukuman wichiykurqa, hinaptinmi kichkakuna wiñaruspa eqoyarachirqa, chaymi mana rururqachu. 8Wakinñataqmi allin allpaman wichiykurqa, chaymi wiñaruspan allinta rururqa; huk muhullamanta rururqa kimsa chunkata, soqta chunkata hinaspa pachakninpi.
9¡Uyarikuqkunaqa kasukuchunyá! nispa.
Rikchanachiykuna imapaqmi kasqanmanta
(Mt 13.10-17. Lc 8.9-10)
10Sapallanña Jesús qeparuptinmi, paypa hichpanpi kaqkunawan kuska chunka iskayniyuq discipulonkuna tapukurqaku, ima ninanmi chay rikchanachiy kasqanmanta.
11Jesusñataqmi paykunata nirqa:
Qamkunamanqa Diosmi munaychakuyninpi pakasqa kaqkunata yachachisunkichik, hawapi kaqkunamanmi ichaqa rikchanachiykunawan yachachin, 12#Is 6.9-10.qawachkaspankupas mana rikunankupaq, uyarichkaspankupas mana entiendenankupaq, chaynapi Diosman mana kutirikunankupaq hinaspa huchankumantapas mana pampachasqa kanankupaq, nispa.
Rikchanachisqanpa imam ninanmanta
(Mt 13.18-23. Lc 8.11-15)
13Chaymantam Jesús nirqa:
¿Manachu qamkunapas kay rikchanachiyta entiendenkichik? Hinaspaqa ¿imaynataq wakin rikchanachiykunataqa entiendewaqchik? 14Chay tarpuqqa Diospa palabran willakuqmi. 15Ñanman wichiq muhuñataqmi allin noticiata uyariq runaman rikchakun, ichaqa Satanasmi hamuruspan sonqonpi tarpusqa Diospa palabranta chaylla hurqorun. 16Pisi allpayuq ranraman wichiq muhuñataqmi Diospa palabranta uyariykuspa kusikuyllawanña chaskikuq runaman rikchakun, 17ichaqa mana allin sapichasqa kasqankuraykum mana unaytachu takyanku. Diospa palabranrayku ñakarichisqa hinaspa qatikachasqa kaspankum chaylla kutikunku. 18Kichka-kichka ukuman wichiq muhum, Diospa palabranta uyariqkunaman rikchakun, 19ichaqa kay pachapi kaqkunamanta preocupakuykunam, qori-qollqella maskaykunam hinaspa tukuy ima munapayaykunam paymanta munaychakuruspan Diospa palabranta chinkarachin, chaynapi mana rurunankupaq. 20Allin allpaman wichiq muhuñataqmi Diospa palabranta uyariykuspa chaskikuq runaman rikchakun, paykunaqa achkanpim rurunku; paykunaqa chullallamantam rurun kimsa chunkata, soqta chunkata hinaspa pachakta, nispa.
Ratachkaq mecherowan rikchanachisqanmanta
(Lc 8.16-18)
21 #
Mt 5.15; Lc 11.33. Jesusqa nirqataqmi:
¿Yaqachu mecherota ratachichwan cajón ukuman otaq camapa ukunman churarunapaq? Manam chaynachu; mecherotaqa ratachinku alto pataman churaptinku allinta achkinanpaqmi. 22#Mt 10.26; Lc 12.2.Chaynaqa, imapas pakasqa kaqkunaqa yachasqam kanqa, imapas upallallapi rimasqakunaqa uyarisqam kanqa. 23Uyarikuqkunaqa kasukuchunku.
24 #
Mt 7.2; Lc 6.38. Allintayá uyariychik. Imaynam runamasikichikwan ruwasqaykichikman hinam Diospas qamkunawan ruwanqa; qamkunawanqa aswantaraqmi ruwanqa. 25#Mt 13.12; 25.29; Lc 19.26.Kapuqniyuqmanqa mastaraqmi qonqa, aslla kapuqniyuqmantam ichaqa aslla kapuqnintapas qechunqa, nispa.
Muhuwan rikchanachisqanmanta
26Jesusmi nirqa:
Diospa munaychakuyninqa muhuta chakranpi tarpuq runamanmi rikchakun. 27Puñuptin otaq rikchaptinpas, tutapas otaq punchawpas, muhuqa paypa mana yachasqallantam wiñan. 28Chaytaqa allpam wiñachimun: Wiñamuptinñataqmi puntata tullun rikurimun, chaymantañataq espigamun hinaspam rurun; 29poqoruptinñataqmi, cosecha chayaramuptin rutuytaña qallarinku, nispa.
Mostaza muhuwan rikchanachisqanmanta
(Mt 13.31-32. Lc 13.18-19)
30Jesusmi huktawan nirqa:
¿Imawantaq Diospa munaychakuyninta tupachichwan? ¿Imawantaq rikchanachichwan? 31Mostaza muhu hinam. Mostazaqa allpapi tarpusqapas wakin muhukunamantaqa taksachallam, 32wiñaruspanmi ichaqa wakin qorakunamantapas aswan hatunraq, kallmankunapas hatun kasqanraykum alton pawaq urpitukunapas chaypi qesachakunku, nispa.
33Chayna rikchanachiykunawanmi runakunata Jesús yachachirqa entiendey atinankupaq hinalla. 34Mana rikchanachispaqa manam imatapas rimarqachu, discipulonkunamanmi ichaqa sapallankupi allinta entiendechiq.
Sinchi wayrata Jesús hawkayachisqanmanta
(Mt 8.23-27. Lc 8.22-25)
35Chay punchawmi tutaykaramuptin discipulonkunata Jesús nirqa:
Chimpaman hakuchik, nispa.
36Hinaspam llapa runakunata saqeruspanku Jesusta barcapi aparqaku; wakin barcakunapas waqtankutam rirqaku. 37Richkaptinkum sinchillaña wayra hatarirurqa, hinaptinmi yakupa olankunapas hoqarikuspa barcaman yaqaña huntarurqa. 38Jesusñataqmi sawnapakuykuspa qepa lawpi puñukuchkarqa. Chaymi rikchachispanku nirqaku:
Yachachikuq ¿manachu imapas qokusunki? ¡Chinkaykuchkanchikñam! nispanku.
39Jesusñataqmi hatarispan wayrata qaqcharqa, qochatañataqmi nirqa:
¡Hawkayay! nispan.
Chaymi wayra samaruptin lliw hawkayarurqa. 40Chaymantam discipulonkunata nirqa:
¿Imanasqataq mancharisqallaña kachkankichik? ¿Manachu iñiynikichik kan? nispa.
41Paykunañataqmi llumpay mancharisqallaña kikinkupura ninakurqaku:
¿Pitaq kay runaqa wayrapas yakupas kasunanpaqqa? nispanku.
Nu markerat:
Marcos 4: RCHQ2
Märk
Dela
Kopiera
Vill du ha dina höjdpunkter sparade på alla dina enheter? Registrera dig eller logga in
Chuya Qellqa Revisión @ Sociedad Bíblica Peruana, 2012
