EXODUS 9
9
Saram An Thi
1 Bawipa nih Moses cu a thawh i, “Va kal law Faro cu, Hebru mi hna Pathian Bawipa nih, ‘Ka mi cu an ka biak nakhnga kalter hna. 2Na kalter duh ṭhiamṭhiam hna lo i na tlaih peng ko rih hna ahcun, 3nan saṭil cungah rai ṭihnung ka tlunter lai: nan rang si hna seh, nan laa si hna seh, nan kalauk si hna seh, nan caw si hna seh, nan tuu si hna seh, nan meheh si hna seh, an cungah rai ka tlunter lai. 4Israel mi hna saṭil le Izipt mi hna saṭil kha ka thleidan hna lai i Israel mi ta a simi cu pakhat hmanh an thi lai lo. 5Bawipa nih caan ka khiah cang; thaizing ah ka tuah lai,’ a ti, tiah na va chimh lai,” a ti. 6A thaizing ah Bawipa nih a chim bantuk cun a tuah taktak i Izipt mi saṭil vialte cu an thi dih, sihmanhsehlaw Israel mi hna saṭil cu pakhat hmanh an thi lo. 7Faro nih khan zeitindah thil umtuning a si ti kha a hal tik hna ah, Israel mi ta a simi saṭil cu pakhat hmanh an thi lo ti kha a hngalh. Sihmanhsehlaw Faro cu a lung a hak ṭhiamṭhiam i a kalter duh hlei hna lo.
Hma
8 Bawipa nih Moses le Aaron cu a thawh hna i, “Meiphu vutcam kha va ṭhuam u law Moses nih cu vutcam cu Faro hmaiah khan thlitu lakah vorh seh. 9Izipt ram dihlak cungah khan leidip bantukin an zuang lai i a khuazakip ah minung cung le saram cungah hma an chuahter lai,” a ti. 10Cucaah meiphu vutcam kha an i ṭhuam i Faro hmaiah cun an dir; Moses nih khan thli lakah cun a hlonh i minung cung le saram cungah hma kha an chuahter. #Biat 16.2 11Camhthiam pawl kha, annih zong cu hawi dang bantukin hma nih cun a tlunh ve hna caah Moses hmaiah khan an chuak kho lo. 12Sihmanhsehlaw Bawipa nih Faro kha a lung a hahter i Bawipa nih a rak chim bantuk khan a kalter duh ṭhiamṭhiam hna lo.
Rial
13 Bawipa nih Moses cu, “Zingka tein tho law Faro cu va tong law, ‘Hebru mi hna Pathian Bawipa nih, “Ka mi cu kalter hna law ka bia hna seh. 14Atu cu dantatnak vialte kha keimah hrimhrim nih nangmah cung le na bawi pawl cung le na mi hna cungah ka tlunter lai, cu ti in ka tuah lai cu vawlei cung dihlak ah hin keimah bantuk pathian dang ahohmanh an um lo ti kha na hngalh nakhnga caah a si. 15Nangmah le na mi hna cung i rai tlunter awkah ka kut kha rak samh ning law nan rak lo dih cikcek cang hnga. 16Sihmanhsehlaw ka ṭhawnnak kha nangmah cu kan hmuhsak khawh nakhnga kan nunter i cuticun ka minthannak nih vawleicung kha a cul dih lai. #Rom 9.17 17Asinain ka mi hna cungah na ruam a kai ṭhiamṭhiam rih i kalter na duh hna lo. 18Ngai hmanh, thaizing atu tikah hin rial ngan pipi ka tlakter ciammam lai i cu bantuk rial cu Izipt ram a thawhkehnak in ahohmanh nih an hngalh bal lomi rial an si lai. 19Cucaah hmun lawng i a ummi nan saṭil vialte le thilri vialte hna kha dornak a ngeimi hmun ah chia dih hna u tiah nawl pe hna. Khuhzarh a ngei lomi vialte kha, mi si hna seh, saṭil si hna seh, rial nih cun a tlak hna lai i an thi dih lai,” a ti,’ tiah va chim,” a ti. 20Faro bawi a cheu pawl kha cu Bawipa nih a chimmi kha an ṭih i cucaah an salle le an saṭil kha inn chungah an khumh hna. 21Asinain a cheu nih cun Bawipa chimmi kha zeihmanh ah an rel lo i an salle le an saṭil hna kha lo lakah cun an kaltak ko hna.
22Cun Bawipa nih Moses cu a thawh i, “Van lei ah na kut hler law Izipt ram chungah a dihlak in, mi cung le saṭil cung le lo chung i a ummi thlai kung vialte cungah rial cu tla seh,” a ti. 23Cucaah Moses nih a ṭhiangṭhunh kha van leiah a hler i Bawipa nih cun khua a ritter, rial le ṭek kha vawlei ah an tla. Bawipa nih rial cu Izipt ram cungah khan a tlakter. 24Rial fak piin a tla i nimtlau kha a kenkip ah a lek; Izipt ram a thawhkehnak in Izipt ram cungah cu bantuk thlichia cu a um bal rih lo. #Biat 8.7; 16.21 25Izipt ram chung dihlak ah khan leng i a ummi paoh cu minung he saṭil he rial nih cun a den dih hna. Lo chung thlai kung vialte kha a den dih hna i thingkung vialte kha a khiah dih hna. 26Israel mi an umnak Goshen ram lawnglawng kha rial a tlak lonak hmun cu a si.
27Faro nih Moses le Aaron kha a auhter hna i, “Tutan cu keimah ka sual; Bawipa cu ahmaan i kei le ka mi hna cu kan palh. 28Bawipa sinah cun thlacam u; hi khuari le rial hi kan ing kho ti hna lo. Nan kal lai, tiah bia kan kam hna, sau nan hngah a hau ti lai lo,” a ti. 29Cun Moses nih amah cu, “Khuapi chungin ka chuah cangka tein Bawipa sinah ka kut ka va hler lai. Vawlei hi Bawipa ta a si ti kha na hngalh naklai khuari cu a dai lai i rial cu a dih lai. 30Asinain nangmah le na bawi pawl nih Bawipa Pathian cu nan ṭih rih lo ti kha ka hngalh,” a ti.
31Khum le barli cu an rawk dih, zeicahtiah barli cu a hmin cang i khum cu a par lio a si. 32Changvut le fangvoi tu cu an rawk lo, zeicahtiah annih cu tlai deuh i a vuimi an si.
33Moses nih Faro cu a kaltak i khuapi chung khan a chuak. Thlacamnak in Bawipa sinah a kut kha a hler i khuari le rial kha an dih i ruah kha a dong. 34Faro nih ruah le rial le khuari kha an dih cang ti a hmuh tikah a sual ṭhan hoi i a bawi hna he khan lung hak in an um ṭhan. 35Bawipa nih Moses sinin a rak chim bantuk te khan lung hak cun a um i Israel mi cu kalter kha a duh hna lo.
Nu markerat:
EXODUS 9: HCL06
Märk
Dela
Kopiera
Vill du ha dina höjdpunkter sparade på alla dina enheter? Registrera dig eller logga in
Lai (Hakha) Common Language Bible © Bible Society of Myanmar 2006