EXODUS 8
8
Utlak
1 Bawipa nih tiva kha a tuk hnu ni sarih ah, Bawipa nih Moses cu a thawh i, “Va kal law Faro cu, ‘Bawipa nih, “Ka mi hna cu luatter hna, keimah kha ka bia hna seh. 2Ngai hmanh, cucu na duh lo ahcun, na ram hi a dihlak in utlak in ka hrem lai. 3Tiva cu utlak in a khat lai i tiva cu an kaltak lai i na inn chungah an lut lai; na ihnak khaan le na ihkhun le na bawi pawl inn le na mi hna inn ah khan an lut lai; na tappi le na changreu sernak kheng chung tiangin an lut lai. 4Nangmah siseh, na mi si hna seh, na bawi pawl si hna seh an in kaihnawh hna lai,” a ti,’ tiah va chim,” tiah a ti.
5Cun Bawipa nih Moses cu, “Aaron kha, ‘Na ṭhiangṭhunh cu tiva cung le tilak cung le tidil cungah khan hler law Izipt ram chungah khan utlak kha chuak hna seh,’ tiah chim,” a ti. 6Cucaah Aaron nih cun a ṭhiangṭhunh cu ti cungah khan a hler i utlak kha an chuak ciammam i ram kha a khah in an khat. 7Asinain camhthiam pawl zong nih khan utlak cu ram chungah khan an chuahter ve hna. 8Faro nih Moses le Aaron kha a auh hna i, “Bawipa sinah cun thlacam u law ka mi hna sin hin utlak hi la hna seh, cun nan mi hna cu Bawipa sinah raithawinak an pekchanh khawh nakhnga ka kalter hna lai,” a ti. 9Moses nih Faro cu, “Utlak nih cun nanmah le nan inn hna kha an in kaltak hna i tiva chung lawngah an um nakhnga, zeitik ah dah nangmah ca le na bawi pawl hna ca le na mi hna caah cun thla cu ka cam lai, ka chim tuah,” a ti. 10Faro nih cun, “Thaizing ah,” tiah a leh. Cun Moses nih, “Asi, na chim bantukin a si lai, zeicahtiah Bawipa kan Pathian bantuk hi pathian dang ahohmanh an um lo ti kha na hngalh nakhnga,” a ti. 11Cun, “Utlak nih cun nangmah le na inn hna le na bawi pawl hna le na mi hna cu an in kaltak hna lai i tiva chung lawngah khan an um lai,” a ti. 12Moses le Aaron nih Faro cu an kaltak i Faro cungah a tluntermi utlak kong ah khan Bawipa sinah fak piin thla an cam. 13Moses nih a nawl bantuk khan Bawipa nih cun a tuah i inn chung i a ummi le tual i a ummi le lo i a ummi utlak vialte kha an thi dih. 14Izipt mi nih cun a pon in an pon hna i ram cu a thut in a thu. 15Faro nih thil cu a hung ṭha deuh ṭhan ti kha a hmuh tikah a lung a hak ṭhan i Bawipa nih a rak chim bantukte khan Moses le Aaron cu an bia ngaih kha a duh ṭhan hna lo.
Fikfa
16 Bawipa nih Moses cu, “Aaron kha, ‘Na ṭhiangṭhunh in vawlei kha tu law leidip kha fikfa ah an i cang lai i Izipt ram kha an khat lai,’ tiah chim,” a ti. 17Cuticun an tuah. Aaron nih khan a ṭhiangṭhunh cu a hler i vawlei kha a tuk. Leidip cu fikfa ah an i cang i mi le saṭil kha a zual in an zual hna. 18Camhthiam pawl zong nih khan fikfa chuahter cu an i zuam ve, sihmanhsehlaw an tuah kho lo. Fikfa nih cun minung he saṭil he awlok an chawnh hna. 19Camhthiam pawl nih khan Faro cu, “Hihi cu Pathian tuahmi a si,” an ti. Sihmanhsehlaw Faro cu a lung a hak ko i Bawipa nih a rak chim bantuk te khan Moses le Aaron cu an bia a ngai duh hna lo. #Luk 11.20
Tho
20 Bawipa nih Moses cu a thawh i, “Zingkate ah Faro cu tiva i a kal ah khan va tong law, ‘Bawipa, nih, “An ka biak nakhnga ka mi cu kalter hna seh. 21Ka mi cu a kalter hna lo ahcun amah le a bawi hna le a inn hna cungah tho ka tlunter hrimhrim hna lai. Izipt mi vialte an inn cung dihlak ah ka tlunter lai, cun an dirnak vawlei hmanh kha tho in ka khahter lai. 22Cu ni ah cun ka mi hna umnak Goshen ram kha cu ka zuah lai i cuka ah cun tho pakhat hmanh an um lai lo, zeicahdah cuticun a si lai ti ahcun, Faro nih keimah Bawipa nih hi ram ah rian ka ṭuan kha a hngalh khawh nakhnga caah a si lai. 23A mi le ka mi cu ka thleidan hna lai. Cun hi khuaruahharmi thil hi thaizing ah a tlung lai,” tiah nangmah cu an ti,’ tiah va chim,” tiah a ti. 24Cuticun Bawipa nih a tuah taktak i tho cu bu ngan pipi in Faro siangpahrang inn le a bawi pawl inn le Izipt ram dihlak ah cun an lut i ram cu tho nih cun a hrawh dih.
25Cun Faro nih khan Moses le Aaron kha a auh hna i, “Va kal u law hi ram chungah hin nan Pathian sinah cun raithawinak cu va tuah u,” a ti. 26Moses nih khan, “Cucu a ṭha lai lo, zeicahtiah Bawipa kan Pathian sin i rai i kan thawimi saṭil hna kha Izipt mi nih hin an fih hna lai. Izipt mi nih an fihmi saṭil kha kan hman hna i an mit hmuh i kan thawi hna ahcun, lung in thi lakin an kan cheh lai. 27Cucaah cun Bawipa kan Pathian nih a kan fial bantukin thetse ram chung ni thum lamkal ah kan kal hrimhrim awk a si lai i cuka ah cun Bawipa kan Pathian sinah khan rai cu kan vaa thawi lai,” a ti. 28Faro nih cun, “Lamhlapi nan kal lo ding ahcun, thetse ram ah khan Bawipa nan Pathian sin i raithawi awkah cun kan kalter ko hna lai. Thla ka campiak tuah u,” a ti hna. 29Moses nih cun, “Thaizing ah tho nih hin nangmah le na bawi hna le na mi hna kha an in kaltak hna nakhnga, ka kal cangka hin Bawipa sinah thla ka va cam lai. Asinain hlen cu na kan hleng ti hnga lo, Bawipa sin i raithawinak va tuah awkah mi cu kalter loin na thlauh ti hna hnga lo,” a ti. 30Moses nih Faro cu a kaltak i Bawipa sinah khan thla a cam i 31Bawipa nih cun Moses nih a nawl bantuk khan a tuah. Tho nih cun Faro le a bawi hna le a mi hna kha an kaltak hna i pakhat hmanh tang loin an kal dih. 32Sihmanhsehlaw cu caan tiang zongah cun Faro cu a lung a hak ṭhan i mi kha a kalter duh hna lo.
Nu markerat:
EXODUS 8: HCL06
Märk
Dela
Kopiera
Vill du ha dina höjdpunkter sparade på alla dina enheter? Registrera dig eller logga in
Lai (Hakha) Common Language Bible © Bible Society of Myanmar 2006