EXODUS 7
7
1 Bawipa nih khan Moses cu a thawh i, “Zohhmanh, nangmah cu Faro caah Pathian bantuk ah kan ser lai i na u Aaron nih na profet bantukin a sinah bia a chim lai. 2Na tuah awk a si tiah kan chimhmi vialte kha Aaron cu na chimh lai i Aaron nih cun Faro kha, Israel mi cu hi ram hin chuahter hna, tiah a chimh lai. 3Sihmanhsehlaw Faro cu a lung ka ṭhawnter lai i Izipt ram chungah hin khuaruahharmi thil tampi ka tuah lai nain #Lam 7.36 4na bia a ngai duh lai lo. Cu tikah ka ṭhawnnak cu Izipt ram ah khan ka langhter lai i Izipt mi kha fak piin dan ka tat hna lai; cun ka ralkapbu, Israel mi kha Izipt ram cun ka chuahpi hna lai. 5Izipt mi nih cun an cung i ka kut ka hler tik le Israel mi kha an ram chungin ka chuahpi hna tikah, keimah cu Bawipa ka si kha an hngalh lai,” a ti. 6Bawipa nih nan tuah lai tiah nawl a pekmi hna cu Moses le Aaron nih khan an tuah. 7Faro sin i bia an va chim ah khan Moses cu kum sawm riat a si i Aaron cu kum sawm riat le kum thum a si.
Aaron Ṭhiangṭhunh
8Cun Bawipa nih Moses le Aaron cu a thawh hna i, 9“Faro nih a rak in thawh hna i, ‘Nan tuah khawh taktak le tuah khawh taktak lo cu khuaruahharmi thil nan tuahmi in ta nan langhter,’ an ti hna ahcun, Moses nih Aaron kha, ‘Na ṭhiangṭhunh kha i lak law Faro hmaiah khan hlonh law rul ah canter,’ na ti lai,” tiah a ti hna. 10Moses le Aaron cu Faro sinah khan an va kal i Bawipa nih a fial hna bang khan an va tuah. Aaron nih khan a ṭhiangṭhunh cu Faro hmaiah khan a hlonh i rul ah aa cang. 11Cun Faro nih a mifim le camhthiam pawl kha a auh ve hna i annih zong nih cu bantuk cu an tuah khawh ve. 12An ṭhiangṭhunh kha an hlonh ve hna i rul ah an i cang ve. Sihmanhsehlaw Aaron ṭhiangṭhunh nih khan a dolh dih hna. 13Faro cu a lung a ṭhawng i Bawipa nih a chim bantukte khan an bia kha ngaih a duh lo.
Thisen
14Cun Bawipa nih Moses cu a thawh i, “Faro cu a lung a ṭhawng ngaingai i Israel mi hna kalter kha a duh lo. 15Cucaah cun va kal u law Faro cu Nail tiva i a kal caan zinglei ah va tong u. Tiva kam khan rak hngak u. Rul ah aa cangmi ṭhiangṭhunh kha i put u. 16Cun Faro cu, ‘Hebru mi Pathian Bawipa nih, nangmah sinah a kan thlah i, “Thetse ram ah an ka biak khawh nakhnga ka mi cu chuahter hna,” a ti tiah va chim a ka ti, asinain atu tiang na ngai duh lo. 17Cucaah Bawipa chimmi cu, “Ka tuah laimi thil thawng hin Bawipa ka si cu na hngalh lai,” ti hi a si. Zohhmanh, hi ṭhiangṭhunh hin tiva ti kha ka tuk lai i thisen ah a cang lai. #Biat 16.4 18Nga kha an thi lai i tiva kha a thut in a thut lai caah Izipt mi nih an ding kho lai lo,’ na ti lai,” tiah a ti.
19 Bawipa nih Moses cu a thawh i, “Aaron kha, ‘Na ṭhiangṭhunh cu Izipt ram chung ti vialte cungah hler tuah, tiva si hna seh, tilak si hna seh, tidil si hna seh, an cungah hler tuah. Ti cu thisen ah an i cang dih lai i ram chungah khan a dihlak in thisen a um lai, thing tikuang le lung tikuang hmanh ah thisen cu a um lai,’ tiah chim,” a ti.
20Moses le Aaron nih cun Bawipa nih a fial hna bang khan an tuah. Faro le a bawi hna hmaiah cun Aaron nih khan a ṭhiangṭhunh cu a hler i tiva kha a tuk, a chung ti vialte kha thisen ah an cang dih. 21A chung nga kha an thi i a thut tuk caah Izipt mi nih a ti kha an ding kho lo. Izipt ram chungah khuazakip ah thisen kha a um dih. 22Cun Izipt mi camhthiam pawl nih khan cu bantuk cu an tuah ve i Faro cu hmasa bantuk ṭhiamṭhiam khan a lung a ṭhawng ko. Bawipa nih a chim bantukte khan Moses le Aaron cu an bia a ngai duh hna lo. 23Faro cu aa thawh i a inn ah a ṭin, an tuahmi cu zeihmanh ah a relpiak hna lo. 24Tiva ti kha an din khawh lo caah Izipt mi vialte nih khan tiva tlang kha ti din awk ti kawlnak ah an cawh. 25Bawipa nih tiva a tuk cu ni sarih a si cang.
Nu markerat:
EXODUS 7: HCL06
Märk
Dela
Kopiera
Vill du ha dina höjdpunkter sparade på alla dina enheter? Registrera dig eller logga in
Lai (Hakha) Common Language Bible © Bible Society of Myanmar 2006