O KISAH RASUL-RASUL 10
10
O Petrus deʼ o Kornelius
1O Kaisariaka naga o nauru womatëngo airomanga o Kornelius. Unanga o nyawa moi wokaputeni ”O Italia matentara ma Duonoka”. 2Manyawa ünanga wimodongo ma Jou Madutuika deʼ aitau manyawa yongodumu iwipuji ma Jou Madutuika. Unanga mangangöe wariwo o Yahudioka manyawa yomomihikini, deʼ unanga womatogu-togumua womaniata ma Jou Madutuika. 3O wange moiuku done hotakoro hange o wangeoka, ünanga wamäke de madodiai o lolega moi magoronaka, wo ma tëngo ma Jou Madutu ai malaekat wo böa deʼ wi ahoko ünanga, ”Kornelius!”
4O Kornelius wamäke o malaekat gënanga de wöhawana daha wötemo, ”Naga okia Tuanga?”
O malaekat gënanga ihaluhu, ”Aniniata deʼ anihininga mangongike ma Jou Madutu watarimaka deʼ ma Jou Madutu wonihininga ngonaika. 5Orahanënanga nähuloko o nyawa o Yopeika iwiahoko o Simon airomanga madutu o Simon Petrus. 6Unanga womahidodogumikahi o nyawa womatëngo o hapi makai wahohakai aitauoka airomanga o Simon, wogogere o dowongi madatekoka.” 7O malaekat imatemo-temo iböto de o Kornelius gënanga i oikoka, o Kornelius wä ahoko o nyawa yahinoto yolöleleani aitauoka deʼ womatëngo o nyawa o tentara aigogöana wongaku-ngaku. 8O Kornelius wa ade-ade onangika okia idadioka, daha ünanga wähuloko önanga o Yopeika.
9Yarehino mawange, önanga ka o dodagi mahidogoronakahi deʼ ngade imahiädono o Yopeika, o Petrus wodoa o tau mal̄okuil̄e mangale womaniata. 10Daha ünanga iwihahini duru wo mau wol̄omo. O inomo de ihidiai, ünanga wamäke o lolega moi. 11Unanga wamäke o dihanga ihelenga deʼ hokä ngöeroka moi ma ngoa-ngoata yawora o duniauku, de madidideoka malibuku iata. 12Magoronaka wamäke hagala irupa o aiwani mal̄ou iata, hagala o aiwani imatahe-tahe deʼ o totaleo ihuhuhuku. 13Daha naga o ilingi itemo unangika, ”Petrus nomomiki! Natoaka deʼ nol̄omo!”
14O Petrus wohaluhu, ”Kowali, Jou! Komaiwahi ngohi taol̄omo okia naga ahibohono ekola ipeseke.” 15Mä o ilingi gënanga itemo ihigalioli unangika, ”Okia ma Jou Madutu wohimatokoka anibohonua, uha ngona nato anibohono.” 16O lolega gënanga yogilio hiädono mahangeino, dahaö o ngöere gënanga igoraka o horogail̄e.
17O Petrus womahiorikokaua watibanga okia mamangarati o lolega gënanga. Kawa tiba-tibangohi o Petrus, o nyawa wähulo-huloko o Kornelius yamäkeoka o Simon aitau deʼ onanga nagaka o ngorana mahimangoka. 18Daha önanga yäahoko o nyawa deʼ yaleha, ”Bote nenangoka naga o nyawa iniado-adonino womahidodogumu, airomanga o Simon Petrus?”
19O Petrus kahokogenangikahi wohidibanga wohiöriki mamangarati o lolega gënanga, ma Jou Madutu ai Womaha iwitemo unangika, ”Hei Petrus, naga o nyawa yaruange mangagogiria inilingiri ngona. 20Ika itaiti nouti daukuku deʼ uha nodododato nanïki önanga, hababu Ngohi tahuloko önanga.” 21O Petrus wouti daukuku deʼ wätemo o nyawaika gënanga, ”Ngohi nanga roriadodoto nihilolingi-lingiri. Roriadodoto niböa mangale okia?”
22Onanga yohaluhu, ”Ma Kaputeni Kornelius womihüloko ngomi miaino. Unanga o nyawa moi maoa deʼ aimodongo ma Jou Madutuika, de duru iwihoromati o Yahudioka manyawa mata-mata. Ma Jou Madutu aimalaekat womatëngo wihuloko ünanga wogahoko Tuanga noböa aitauika, karana hokä mabobaluhu ainiata, ünanga iwihuloko wohigihene okia aha Tuanga notemo unangika.” 23O Petrus wä ahoko önanga yowohama mangale imatogumu genangoka.
Yarehino o Petrus womomiki deʼ yoiki dede önanga. Yamuruono naga o nyawa yongaku-ngaku o Yopeino onangö yonïki. 24O wange moi ipaha gënanga önanga imahiädono o Kaisariaika. Dokengoka önanga yädodamäka o Kornelius de airoriadodoto de aidodiawo-dodiawo irorahai waahokinoka. 25Maöraha o Petrus womahiädono, o Kornelius woiki wibuhuku ünanga deʼ watilabukuku aihimangoka. 26Mä o Petrus wihimoteke ünanga womaoko, daha witemo, ”Nomomiki! Ngohi mahireteö kao nyawa dika.” 27Kaima temo-temohi de o Kornelius, o Petrus wowohama o tau magoronaika. Genangoka ünanga wamäke o nyawa manga ngöe imatöomuinoka. 28Daha ünanga watemo onangika, ”Roriadodoto mahirete nihiöriki o Yahudioka manyawa manga agama yahigumal̄aua mangale yäädono ekola imakaganu de o nyawa mahomoaino. Mä ma Jou Madutu wohihimatokoka ngohino, ngohi iyakunua o nagona dika tato yopeseke ekola ahibohono. 29Hababu gënanga maöraha Tuanga nogahoko hupaya ngohi taino, ngohi tokabaratangua taino. Hoʼ orahanënanga ngohi toigo tohiöriki yadodoa Tuanga nogahoko ngohi taino.”
30O Kornelius wohaluhu, ”O wange hange ipahaika, done maöraha hokonenangoli, ngohi tomaniata magogiria tongohi ahitauoka o takoro hange o bimaoa. Itodokanino o nyawa womatëngo o nauru womaoko ahihimangoka. Ai pakeanga o nyawa gënanga kaimahi doleletonguku. 31Unanga wotemo, ’Kornelius! Ma Jou Madutu watarimaka aniniata deʼ aha wohininga anihininga maoa. 32Hoʼ nähuloko o nyawa o Yopeika iwiahoko o nyawa airomanga o Simon Petrus. Unanga womahi dodogumika o nyawa womatëngo o hapi makai wohohakai aitauoka airomanga o Simon; o tau gënanga o gahimadatekoka.’ 33Hababu gënanga ngohi dema dataitoka tähuloko o nyawa yoiki iniahoko Tuanga. Deʼ Tuanga i goungu anihininga iyaoa mangale noböa nenangino. Oraha nënanga ngomi mata-mata mimatöomu nenangoka ma Jou Madutu aihimangoka, mangale mi ihene mata-mata ma Jou Madutu wonihulokoka Tuanga nomi temo ngomino.”
O Petrusai pidato
34 #
Ul. 10:17
Daha o Petrus wotemo, ”Orahanënanga igou-goungu ngohi tamäo ma Jou Madutu wodiai o nyawa mata-mataika kaima däene. 35O nyawa de manga modongoka ma Jou Madutuika deʼ yomanarama o diai, o nyawa gënanga wätarima ma Jou Madutu, ünanga wohaduliua o hoana okiaino dika. 36Roriadodoto nihiorikoka o abari madol̄a ma Jou Madutu wohiadonoka o Israel manyawaika. O abari gënanga naga imakorona o Abari ma Oa mangale o dame de o Yesus Kristus, enagënanga o nyawa mata-mata manga Jou. 37Roriadodoto nihiöriki okia idadioka o Yudea ingodumu, enagënanga imuläenge o Galileaino ipaha o gohiki o Yohanis wohiö abari. 38Ngini nihiöriki ma Jou Madutu wiirikoka o Yesus o Nazaret manyawa gënanga deʼ wihidöaka Unangika ma Jou Madutu ai Womaha deʼ Ai kuaha. Ngini nihiorikö o Yesus gënanga wodagioka kiaika honanga mangale wodiai o oa; Unanga wahitogumu mata-mata o nyawa yakokuaha o Ibilihi, hababu ma Jou Madutu witomoteke Unanga. 39Ngomi nënanga manyawa miamäkeoka mahirete, hagala moi-moi Unanga wadiaioka o Yahudi manyawa manga bereraka deʼ o Yerusalemoka. Ngaroka hokogënanga, önanga iwisalib deʼ iwitoma Unanga. 40Mä o wange hangeoka ma Jou Madutu wihiwangookali Unanga o honengino, deʼ Unanga womahimatoko o nyawaika; 41o nyawa mata-mata ikaua, mä duga-duga ngomino ma Jou Madutu womi irikoka iholoi ihira mangale midadi Ai hakihi-hakihi: Ngomi miol̄omo deʼ miokere dede Unanga, womomiki ipahaino. 42Deʼ Unanga womihuloko ngomi mihingahu o Abari ma Oa gënanga hagala o nyawaika, deʼ mihidöaka o hakihi ma Jou Madutu wigoraka Unanga wodadi o Hakimi hagala o nyawa yowango-wangohi deʼ o nyawa yohone-honengoka. 43Mata-mata o nabi yotemo mangale Unanga. Onanga yotemo mata-mata o nyawa yongaku o Yesusika, aha yahi apongo manga baradoha de o Yesusino Ai kuaha.”
Hagala o nyawa o Yahudi okaua manyawa yamäke ma Jou Madutu ai Womaha
44O Petrus kawotemo-temohi magogiriaka, ma Jou Madutu ai Womaha iuti deʼ yakuaha mata-mata o nyawa yoihene o abari gënanga. 45O Yahudioka manyawa iwingaku-ngakuoka o Yesusika deʼ o Petrus iwininïki o Yopeino, mata-mata yohëranga yamäke ma Jou Madutuö wahidöaka ai Womaha hagala o nyawa o hoana mahomoaika o Yahudiokaua. 46Hababu önanga yoihene o nyawa gënanga yotemo-temo irupa-rupa o demo deʼ ihigiriri ma Jou Madutu aimulia. Daha o Petrus wotemo, 47”Beika niälega, o nyawa nënanga yamäkeoka ma Jou Madutu ai Womaha hokä ngone. Hoʼ yakunu o nyawa yatätatoko önanga, mangale imaohiki de o akere?” 48O Petrus wähuloko önanga imaohiki de o Yesus Kristus airömanga. I böto gënanga önanga yogahoko hupaya o Petrus wögogere dede önanga o wange muruono naga madekana.
Nu markerat:
O KISAH RASUL-RASUL 10: TLB
Märk
Dela
Kopiera
Vill du ha dina höjdpunkter sparade på alla dina enheter? Registrera dig eller logga in
