O KISAH RASUL-RASUL 9
9
O Saulus womatoba
(Kis. 22:6-16, 26:12-18)
1Oraha gënanga o Saulus kahoko genangika dika woigo wa aniaya deʼ watoma ma Jou Yesus iwinöninïki. Unanga woiki maimam womomuliaika, 2deʼ wogahoko o kuaha mahurata mangale woiki o Yahudi manga puji manga tau mabalu-baluhika o Damsyikoka, hupaya nako ünanga wamäke dokengoka o nyawa yongaku-ngaku o Yesusika, ünanga wakunu watägoko önanga deʼ wa ao önanga o Yerusalemika.
3Maöraha aimeta o Damsyikika, öraha wotigioka de o kota gënanga, itodokanino o dararono moi o dihanguku itararono iwikilolitino o Saulus. 4Unanga woruba o tonakuku daha woihene o ilingi moi itemo unangika, ”Saulus, Saulus! Ma hababu okia ngona nohianiaya Ngohi?”
5O Saulus woleha, ”Ngona o nagona, Tuanga?”
O ilingi gënanga ihaluhu, ”Ngohi o Yesus, ngona nohi ö aniaya. 6Maöraha nënanga nomomiki deʼ nowohama o kotaika. Dokengoka aha inihingahu ngonaika okia kiani ngona nadiai.”
7O nyawa iwinöninïki o Saulus yatodokana hiädono koyo ilingua; karana önanga yoihene o ilingi gënanga, mä o nyawa moi-moiuaö yamäke. 8Daha o Saulus womaoko deʼ wahelenga ailako, mä ailako okia-kiaokauaö yakunu wamäke. Hoʼ onanga yasö ika aigiamika deʼ iwituda ünanga iwihingohama o Damsyikika. 9O wange hange madekana ünanga womahiorikua deʼ madekana gënanga ünanga wol̄omua de wokerua mata-mata.
10O Damsyikoka naga winöninïki ma Jou Yesus airomanga o Ananias. O lolega moi magoronaka, ma Jou witemo unangika. Ma Jou wato, ”Ananias!”
O Ananias wohaluhu, ”Ngohi, Jou.”
11Daha ma Jou witemo, ”Ika nomagoraka örahanënanga. Noiki o Yudas aitauika o Ngëkomo i Riko-rikotoka. Noleha dokengoka o nyawa airomanga o Saulus aiahali o Tarsus makotaino. O nyawa gënanga womaniata magogiria, 12deʼ o lolega moi mahidogoronaka ünanga wimäke womatëngo o nauru, airomanga o Ananias, woböa unangika deʼ wakelenga aigiama ail̄okuku hupaya ünanga wakunu womahiorikokali.”
13O Ananias wohaluhu, ”Jou, ngohi toihenoka o nyawa manga ngöe imateke ade-ade mangale o nyawa neünanga, maboboloi mangale o aniaya-o aniaya ünanga wadiaioka aniumatika o Yerusalemoka. 14Deʼ orahanënanga ünanga woböaka nenangino de o higumal̄a o imam-imam manga häekoka mangale watagoko mata-mata o nyawa iningaku-ngaku Ngonaika.”
15Mä ma Jou witemo o Ananiasika, ”Noiki dika! Hababu Ngohi tiirikoka ünanga mangale wohileleani Ngohi, hupaya ünanga wohi abari mangale Ngohi o hoana ilago-agomo mahomoaika yoagamauahi de o Yahudioka manga agama, deʼ o kokoanoika de o Israel maumatikaö. 16Deʼ Ngohi mahirete aha tohimatoko unangika mata-mata o hangihara, kiani ünanga watagongo karana Ngohi.”
17Ma o Ananiasö woiki o tauika gënanga, deʼ wakelenga aigiama o Saulus ail̄okuku. ”Riadodoto Saulus,” o Ananias wato, ö Jou Yesus Riadodoto nimäke o ngëkomo mahidogoronaka maöraha Riadodoto magogiriaka notagi nenangino, Unanga wohihuloko ngohi toböa hupaya Riadodoto yakunu nomahiorikoli, deʼ inikuaha ma Jou Madutu ai Womaha.” 18Orahagënanga dika okia naga moi hokä o nawoko maunaha itiha o Saulus ailakoino, deʼ unanga womahiorikokali. De unangö womomiki, daha wiohiki. 19Deʼ wol̄omo iböto, ünanga idadi wokuatokali.
O Saulus wadotoko o Damsyikoka
O Saulus wogogere o Damsyikoka de iwinöninïki o Yesus o wange muruono naga madekana. 20Unanga gila-gila woiki o puji matau-tauika, deʼ muläenge wohiabari o Yesus gënanga ma Jou Madutu ai Ngohaka.
21Mata-mata o nyawa yohëranga iwigihene o Saulus. Onanga yotemo; ”Mode koigoungua ünanga o Yerusalemoka watomaka o nyawa mata-mata yongaku-ngaku o Yesusika? Unanga woböa nenangino hababu mangale watagoko deʼ waao önanga o imam-imam manga häekika!”
22Mä o Saulus iholoi ikuata womanarama. Ma nyonyata-nyonyata ünanga wohihimanga mangale o Yesus hokogënanga wingaku, o Yesus gënanga o Koano Wohihohalamati, hiädono o Yahudioka manyawa yogogere o Damsyikoka yakunokaua iwipaluhu.
23 #
2Kor. 11:32-33
Oraha muruono naga madekana ipahaika o Yahudioka manyawa imahikagaro mangale iwitoma o Saulus. 24Mä manga hininga madorou önanga wohiöriki unangika. O hutu deʼ o wange önanga iwigöana o kota mangorana ma amo-amokoka mangale iwitoma ünanga. 25Mä o hutu moiuku, iwinöninïki o Saulus iwil̄ë ünanga, daha iwiwora o karaja moi magoronaka ihidilakuru o kota mabebeno.
O Saulus o Yerusalemoka
26O Saulus woiki o Yerusalemika, deʼ dokengoka ünanga wohidailako womahi dogo de iwininïki o Yesus. Mä onanga iwimodongo unangika, hababu önanga yongakua ünanga igou-goungu wodadioka wininïki o Yesus. 27Maduruino o Barnabas waika unangika daha wiao o rasul-rasulika. O Barnabas wahi ade-ade onangika mangale sarakia o Saulus wimäke ma Jou o ngëkomo mahidogoronaka deʼ sarakia ma Jou witemo unangika. O Barnabas wohingahuö mangale sarakia aibarani o Saulus wodotoko o Damsyikoka de o Yesus airomanga. 28Ho gënanga o Saulus wogogere dede önanga, deʼ woriwayati de aibarani o Yerusalem ingodumu de ma Jou airomanga. 29Unanga imateke ade-ade deʼ imateke ributuö de o Yahudioka manyawa yotemo yoyo Yunani, mä onanga ihi dailako iwi toma ünanga. 30Maöraha o nyawa yongaku-ngaku mahomoa ihiöriki mangale o hali gënanga, önanga iwiao o Saulus o Kaisariaika, dahao iwihidingoto ünanga o Tarsusika.
31O jemaat ingodumu o Yudea, o Galilea deʼ o Samariaka idadi irïdi. De de ma Jou Madutu ai Womahino maroriwo, o jemaat-jemaat gënanga idogo ikuata deʼ idogo iwöe, karana önanga yowango de manga modongo ma Jouika.
O Petrus o Lidaka deʼ o Yope
32O Petrus woiki wokiloliti watailako o jemaat-jemaat. O wange moiuku ünanga watailako ma Jou aiumati yogogogere o Lidaka. 33Dokengoka ünanga imakamäke de womatëngo o nyawa o nauru airomanga o Eneas, wolugu deʼ womomomikokaua aingidu-ngidu mangïoka o taongo tufange madekana. 34O Petrus witemo o Eneasika, ”Eneas, o Yesus Kristus wonihitogumu ngona. Nomomiki deʼ nohidiai aningidu-ngidu mangï.” Oraha gënanga dika o Eneas womomiki. 35Mata-mata o Lida deʼ o Saron madol̄a iwimäke o Eneas, daha önanga mata-mata iwingaku ma Jouika.
36O Yopeoka naga o ngoheka momatëngo amiromanga o ngo Tabita. Münanga o nyawa moi mingaku o Yesusika. (Ami romanga de o Yunanioka manga demo o ngo Dorkas mamangarati o maijanga.) Münanga hoko genangika dika modiai o hali maoa-oa deʼ mariwo o mihikini manyawa. 37Oraha gënanga münanga mopanyake daha mohonenge. Ami mayeti yaohiki iböto, ënanga yakelenga o kamari il̄oku-l̄okuoka. 38O Yope hokokiaua magurutika de o Lida. Ho maöraha iwininïki o Yesus o Yopeoka iwigihene o Petrus naga o Lidaka, önanga yähuloko o nyawa yahinoto yoiki o Petrusika de o behehongo nënanga, ”Tai-taiti woböa nenangino.” 39O Petrus gila-gila womaoko deʼ wanïki önanga. Imahi adonika dokengoka ünanga iwiao o kamari il̄oku-l̄okuil̄e. O bobao mata-mata genangoka iwihidoomuino o Petrus deʼ yoari deʼ ihi matoko unangika o baju-baju deʼ manga juba-juba o ngo Dorkas mouriti mangale önanga maöraha münanga kamoma ngangoikahi. 40O Petrus wahuloko önanga mata-mata yohupu, daha ünanga watilabukuku deʼ womaniata. I böto gënanga ünanga wohimangika o ngo Dorkas amimayeti deʼ wotemo, ”Tabita, nomomiki!” O ngo Dorkas amilako mahelenga, deʼ maöraha münanga mimäke o Petrus, münanga mogogeruku. 41Daha o Petrus wasö amigiamika deʼ womihimoteke münanga momaoko. Ahao o Petrus wa ähoko o nyawa yongaku-ngaku genangoka de o bobao-bobaohi gënanga, daha womihilapahi o ngo Dorkas mowangoka gënanga onangika. 42O abari mangale okia idadi gënanga yodogerewoto o Yope ingodumu, hiädono o nyawa manga ngöe yongaku o Yesusika hokä to önanga manga Koano Wahihohalamati. 43O Petrus wogogere genangoka o wange muruono nagahi o nyawa womatëngo o hapi makai wohohakai aitauoka airomanga o Simon.
Nu markerat:
O KISAH RASUL-RASUL 9: TLB
Märk
Dela
Kopiera
Vill du ha dina höjdpunkter sparade på alla dina enheter? Registrera dig eller logga in
