THILTHAWHAI 25
25
Paulain Kaisar kuoma intlun a nuom
1Chuongchun, Festa chun ram chu a awp tah a; chun, ni thum hnungin Kaisaria inthawk chun Jerusalemah a hang feh a.
2Chun, thiempu lalhai le Juda hotuhai chun Paula chanchin chu a se tiengin an lo inhriettir a.
3Jerusalema hung inṭhuoitir ding- in lunginsietna an lo hni rak bawk a; lampuia lo inchâna that an tum a.
4Nisienlakhawm, Festa chun, “Paula Kaisariah an vêng zing a nih, kei khawm sâwtnawtêah ka fe ding a nih.
5Chuleiin, ama chun suolna a nei chun, nangni laia thuneituhaiin mi zui thla hai sienla, hêk raw hai se,” a ta.
6Chun, anni lai chun ni riet amanih, ni sâwm amani chau chu a châm nâwk a, Kaisariah a fe thlah a; chun, a zînga chun rorêlna ṭhungphaah a ṭhung a, Paula chu hung ṭhuoi dingin thu a pêk a.
7Chun, ama chu a hung tlung chun, Jerusalema inthawka Juda hung thlahai chu a vêla chun an ngir a, a chungah thupawi tamtak, rik tak tak an hril an hril a, a bul ruok chu an sui suok thei si nawh a.
8Chun, Paula chun a thiemna thu a hril a, “Judahai Dân chunga dâm, Pathien biekin thua dâm, Kaisar chunga dâm khawm, thil hrim hrim ka suksuol nawh,” a ta.
9Nisienlakhawm, Festa chun Judahai laia hmingṭhat a nuom a, Paula kuoma chun, “Jerusalema hang fea, khitaka ka hmaa i thu rêl i nuom am?” a ta.
10Paula ruok chun, “Kaisar rorêl- na ṭhungpha hmaah, ro rêlpêka ka umna ding hrima chun ngîr ka tih; Judahai chungah thil iengkhawm ka suksuol nawh, nang khawmin chu chu i hriet zing sih a.
11Mi suol ka nia, thina khawp rau thil thaw ka ni chun, thi khawm ka sêl nawh; nisienlakhawm, hienghai mi hêkna thil hi a bul iengkhawm a um naw chun, tukhawmin an kuomah mi pe thei naw ni hai, Kaisar kuomah intlun ka tih,” a ta.
12Chun, Festa chun a rorêlpuitu- hai a biek rawn zoin, “Kaisar kuoma intlun i tum vei a, Kaisar kuomah fe mawl i tih,” tiin a dawn a.
Agrippa le Berniki hmaa Paula thuhril
13Chun, ni iengzât amani chena chun lal Agrippa le Berniki chu Kaisari an hung tlung a, Festa chibai an bûk a.
14Chun, ni tamtak chutaka chun an châm leiin Festa chun Paula thu- pawi chu lal kuoma chun a hril a, “Felik khan intâng tû amanih a mâksan a.
15Jerusalema ka um lai khan thiempu lalhai le Juda upahaiin a chungchâng thu an mi hril a, thiem- naw inchangtir dingin an ngên a.
16Keiin an kuomah, ‘An ihêk le a hêktuhai an inhmaituok a, an hêkna kawngah a thiemna thu hril vena remchâng a hmu hmakhat chu, mi hrim hrim hrem dinga inthla hi Rom mi dân a ni nawh ie,’ tiin ka dawn a.
17Chun, hitaka an hung tlungin, sâwt riel loin, a zînga chun rorêlna ṭhungphaah ka ṭhung a, ama chu hung ṭhuoi dingin thu ka pêk a.
18Chun, a hêktuhai an ngîr laiin ka ring ang hrimin a chungah suolna thupawi an hril nawh a;
19an sakhuo dânhai le, Isu mi pakhat thi tahnung, Paula chun, ‘A hring nâwk a nih,’ tiin a hril a; chuong ang a hril lei chun a chungah thubuoihai an lo nei a lo ni lem a.
20Kei chun, chuong thuhai chu ngaituo ngaina hrim ka hriet nawh a, Jerusalemah fe a, khitaka chuong thu chu rêlpêk a nuom le nuom naw kân dawn a.
21Nisienlakhawm, Paula chun, Laltak rêl dinga khêk a ngên ta lem a; chuleiin, Kaisar kuoma kân fetir thei hmakhat chu vêng dingin thu ka pêk a,” a ta.
22Chun, Agrippa chun Festa kuoma chun, “Kei khawm chu thu hril chu ngai ka lo nuom rawp hlak hrim a nih,” a ta. Ama chun, “Zingah a thu hril ngai naw ti nîm,” a ta.
23Chuongchun, a zînga chun, Agrippa le Berniki chu ropuitakin an hung a, thu hrilna inah an hung lût a, sipai hotu lalhai leh, khuoa miṭha deu deuhai leh; chun, Festa thuin Paula an hung inṭhuoilûttir a.
24Chun, Festa chun, “Lal Agrippa le hitaka eini laia um po pohai, hi mipa hi in hmu hi a nih, a chungchâng thuah Judahai po poin, an rêngin hring ta lo dingin, khêk a, Jerusalema le hitaka an mi biekna kha a nih.
25Nisienlakhawm, thina khawp rauin iengkhawm a thaw nawh ti ka hriet a; amiruokchu, ama hin Laltak kuoma intlun a tum leiin tir ka tum a nih,
26nisienlakhawm, a thu mumal iengkhawm ka lal kuoma ziek ding ka hriet si nawh a. Chuleiin, in kuomah ka hung ṭhuoi suok hi, lal Agrippa, nanga hmaa hung ṭhuoi bîk deu khawm ka nih, suosal zoa ieng amani bêk ziek ding ka hmu theina dingin.
27Mi intâng Laltak kuoma tir a, a chunga an hêkna thu inhriettir sa naw chu, invêtthlâk niin ka hriet sih a,” a ta.
Nu markerat:
THILTHAWHAI 25: HMARCLBSI
Märk
Dela
Kopiera
Vill du ha dina höjdpunkter sparade på alla dina enheter? Registrera dig eller logga in
Hmar CL Bible - Pathien Lekhabu Inthieng
Copyright © Bible Society of India, 2015.
Used by permission. All rights reserved worldwide.
