मर्कुस 16
16
इसु मर्याबाट ज्युँदिया
(मत्ति २८:१-८; लुका २४:१-१२; युहन्ना २०:१-१०)
1पट्याइको दिन स्हकियापछि मरियम मग्दलिनि र याकुबकि आमा मरियम अनि सलोमिले इसुको हडमै घस्न्या भुनिकन बास आउन्या चोखो किनिन्। 2भोलिपल्ट हप्ताको पैलो दिनमै ब्यानै घाम झुल्किया पछि तिनुहरु च्यानमै गइन्। 3तिनुहरुले जाँदैगद्दा “हाम्मा निम्ति च्यानको धेलौना ठुलो ढुंगो कोइले फालिदेला?” भुनि आपु आपु कुडा गद्दैछिन्। 4तर तिनुहरुले च्यानतिर हेद्दा तेइ ठुलो ढुंगो हटाइस्हक्या देखिन्। 5अनि तिनुहरुले च्यान भित्त पस्ता एकजुना सेता टाला लाया तुन्नेरि मान्ठकन च्यानको दाइन्यापट्टि बसिरया देखिन्, र तिनुहरु झस्याङ भइन्।
6तर तेइ तुन्नेरि मान्ठले तिनुहरुकन भुन्यो, “नझस्किअ, तुमिहरु नासरतका इसुकन खोइदिछौ, तिँ क्रुसमै टाँगिया छिया। तर अइले तिँ ज्युँदा भइ उठ्याछुन्। इसु न्या नाइ। तिनुकन राख्या ठौर हेर। 7अनि जाउ, र इसुका चेलाहरु र पत्तुरुसकन पुनि भुनिदेउ कि इसु तुमिहरुका अगि अगि गालिलमै जानैछुन्। इसुले तुमिहरुकन भुन्या उन्सार तुमिहरु इसुकन ताँइ देख्न्याछौ।”
8तब तिनुहरु च्यानबाट निस्केर डगुडिन्, क्यानकि तिनुहरु भेइ र अचुम्म मानि काम्दैछिइन्। अनि तिनुहरुले कैकनै केइ भुनिनुन्, क्यानकि तिनुहरुले भेइ मान्यइछिन्।
इसु मरियम मग्दलिनिति देखिया
(मत्ति २८:९-२०; लुका २४:१३-५३; युहन्ना २०:११-२३; प्रेरित १:४-११)
9[अनि इसु हप्ताको पैलो दिन ब्यानै ज्युँदा भइ उठ्यापछि इसु पैला मरियम मग्दलिनिति देखाला पड्या। इसुले तेइ स्हैनिबाट सात भुत धपाया छिया। 10मरियमले गयर इसुका चेलाहरुकन यइ रैबार दिइन्। तिनुहरु सोख गद्दै रोइरया छिया। 11इसु ज्युँदिया कुडा मरियमले तिनुहरुकन स्हुनाइन्, तर तिनुहरुले बिसास गर्यानुन्।
इसु दुइजुना चेलाहरु स्हात देखला पड्या
(लुका २४:१३-३५)
12तेइपछि दुइजुना चेलाहरु गाउँतिर गइरया बेला तिनुहरु स्हात इसु अक्कै रुपमै देखिया। 13अनि तिनुहरु फर्केर गयापछि अरुकन भुन्या। तर तिनुहरुले तिँ दुइजुना चेलाहरुकन पुनि बिसास गर्यानुन्।
इसु एगार चेलाहरु स्हात देखिया
(मत्ति २८:१६-२०; लुका २४:३६-४९; युहन्ना २०:१९-२३; प्रेरित १:६-८)
14तेइपछि इसु एगार चेलाहरु खच्च खान्याबेला देखिया, अनि तिनुहरुको बिसास नगन्न्या कठ्ठोर हिर्दयका निम्ति इसुले तिनुहरुकन हप्काया। क्यानभुन्या इसु मर्याबाट ज्युँदा भइ उठ्यापछि इसुकन देख्न्याहरुले भुन्या कुडाकन तिनुहरुले बिसास गर्या छियानुन्। 15अनि इसुले तिनुहरुकन भुन्या, “सारा सुन्सारमै गयार स्हबै मान्ठहरुकन राम्मो रैबार स्हुनाउ। 16बिसास गन्न्या र बप्तिस्मा ल्हिन्याले उद्दार पाउन्याछ, तर बिसास नगन्न्या दोसि हुन्याछ। 17अनि बिसास गन्न्याहरु स्हात यि चिनारिहरु हुन्याछुन्— मेरो नाउँमै तिनुहरुले भुत धपाउन्याछुन्, र तिनुहरुले नौला भासाहरुमै बोल्ल्याछुन्, 18तिनुहरुले स्हापहरु स्हमात्न्याछुन् र केइ बिसालु कुडा पिया पुनि केइ किसिमले तिनुहरुकन हानि हुन्यानाइ। तिनुहरुले मुदौराहरुमाथि हात राख्न्याछुन् र तिनुहरु भलो हुन्याछुन्।”
इसु सोर्ग ल्हिइया
(लुका २४:५०-५३; प्रेरित १:९-११)
19तब इसु प्रभुले तिनुहरु स्हात कुडा गरिस्हक्यापछि सोर्गतिर ल्हिइया, र परमेसोरको दाइन्यापट्टि बस्या। 20अनि तिँ चेलाहरु गयार स्हबै ठौरमै प्रचार गर्या। प्रभुले तिनुहरु स्हात काम गरिरया, र तिनुहरुले प्रचार गर्या कुडाकन अचुम्मका कामबाट स्हाँचो ठराइदिया। आमेन।]
Trenutno izabrano:
मर्कुस 16: JUML
Istaknuto
Podeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
© 2024 (Active), Mother Tongue Translators Society and Wycliffe Bible Translators, Inc. All rights reserved.
