मर्कुस 15
15
इसु पिलातसका अगेडि
(मत्ति २७:१,२,११-३१; लुका २३:२-३,१८-२५; युहन्ना १८:२८-४०; १९:१-१६)
1ब्याना हुना बित्तिकै मुख्य पुजारिहरु, अगुवाहरु र धर्मगुरुहरु, अनि ठुला सबाका सदस्याहरुले आपु आपु स्हल्ला गरि इसुकन बाँनेर ल्हिइ पिलातसति स्हुम्पिया। 2पिलातसले इसुकन स्होद्यो, “क्या तुमि यहुदिहरुका राजा हौ?”
इसुले तेइकन भुन्या, “तुमि आपै यइथो भुन्दैछौ।”
3मुख्य पुजारिहरुले इसुकन मथ्थै कुडाको दोस लाया। 4अनि पिलातसले इसुकन फेरि स्होद्यो, “क्या तुमिकन आम्नो बार्यामै केइ भुन्नु पड्न्यानाइ? हेर, तुम्मो बिरुद्दमै तिनुहरुले मथ्थै कुडाहरुको बद्दि लाउँनैछुन्।”
5तर इसुले फेरि केइ जबाफ नदिया देखि पिलातसले अचुम्म मान्यो।
पिलातसले इसुकन मार्ना बिअ स्हुम्पिदियो
(मत्ति २७:१५-१६; लुका २३:१३-२५; युहन्ना १८:३९—१९:१६)
6मुक्तिको त्युबारा बेला मान्ठहरुले माग्या भुन्या पिलातसले एकजुना कैदिकन तिनुहरुका बिअ छोड्न्या गद्दा छिया। 7तेइबेला एकजुना आन्दोलनकारि बारब्बा नाउँ गर्या मान्ठ छियो, तेइले मान्ठहरु पुनि मार्याछियो। 8अनि मान्ठहरु पिलातसति आयार बिन्ति गद्दै भुन्या, हामिकन पैला जैथै यइ बर्स्ह पुनि एकजुना कैदिकन छोडिदेउ। 9तब पिलातसले यइथो भुनि तिनुहरुकन स्होद्यो, “क्या मु तुमिहरुका निम्ति यहुदिहरुका राजाकन छोडिदिउँ त?” 10क्यानकि मुख्य पुजारिहरुका इखले गद्दा इसुकन आपु स्हात स्हुम्प्या हुन् भुन्न्या पिलातसकन थाँ छियो।
11तर मुख्य पुजारिहरुले मान्ठहरुकन उस्कायार हामिहरुका निम्ति बारब्बाकन छोडिदेउ भुन्न लाया। 12तब पिलातसले फेरि मान्ठहरुकन स्होद्यो, “तेस्हो भया जैकन तुमिहरु यहुदिहरुका राजा भुन्नाछौ, तेइकन मु क्या गरुँ त?”
13अनि मान्ठहरु फेरि कोक्काया, र भुन्या, “तेइकन क्रुसमै टाँग।”
14पिलातसले तिनुहरुकन भुन्या, “यइले क्या अपराद गर्याछ र?”
तर तिनुहरु झुन ठुलो डाको गरि कोक्कायर भुन्न लाग्या “तेइकन क्रुसमै टाँग।”
15तब पिलातसले मान्ठहरुकन खुसि पाड्न्या बिचारले तिनुहरुका निम्ति बारब्बाकन छोडिदियो, र इसुकन कोर्रा#१५:१५ कोर्रा काठको स्हमात्न्या बिँड बुनाइ छालाको लोताहरु बाटेर घोडा या अपरादिहरुकन हान्न्या एक किसिमको कोर्रा हो। लायर क्रुसमै टाँग्न दियो।
सिपाइले इसुको खिसि गर्या
(मत्ति २७:२७-३१; युहन्ना १९:२-३)
16सिपाइहरुले इसुकन ठुला हाकिमको दरबार भित्त ल्हियार अरु स्हबै सिपाइकन पुनि जुम्मा गर्या। 17अनि तिनुहरुले इसुकन बैजनि रंगको टाला, र काँडै काँडाले बुनाया सिरिपेच तिनुको कप्पालमै लाइदिया। 18तब तिनुहरुले इसुकन “यहुदिहरुका राजाको जय” भुन्दै सलाम गन्न लाग्या। 19अनि तिनुहरुले इसुको कप्पालमै निगालाले हान्नै थुक्या, र घुँडा टेकि इसुकन ढोग्या। 20तब इसुको खिसि गरिस्हक्यापछि तिनुहरुले उनुको बैजनि रंगका टाला फुकाइ दिया, र आम्नै टाला लाइदिया। तेइपछि तिनुहरुले इसुकन क्रुसमै टाँग्न बाइर ल्हिया।
इसु क्रुसमै
(मत्ति २७:३२-४४; लुका २३:२६-४३; युहन्ना १९:१७-२७)
21तेइबेला जाँदैगद्दा तिनुहरुले कुरेनि भुन्या ठौरका सिमोनकन गाउँबाट आइरया भेटाया। तिँ अलेक्जेन्डर र रुफसका बाबा छिया। अनि सिपाइहरुले इसुको क्रुस बोक्न कर गर्या।#रोमि १६:१३ 22तेइपछि तिनुहरुले इसुकन गलगथा भुन्न्या ठौरमै ल्हिया। गलगथाको अथ्थ खप्परै खप्पर भया ठौर हो। 23अनि तिनुहरुले इसुकन मुर्र#१५:२३ मुर्र यइ एक किसिमको ओक्तो हो जैकन बासको निम्ति चलाउन्या गद्दाछुन्। मिसाया अंगुरको जाँड दिया। तर इसुले पियानुन्। 24जब तिनुहरुले इसुकन क्रुसमै टाँग्या। अनि इसुका टाला कैको भागमै पड्छ भुनि चिट्टा हाल्यार तिनुहरुले टाला आपु आपु बाँड्या।#भजनसंग्रह २२:१८ 25तिनुहरुले इसुकन क्रुसमै टाँग्न्याबेला ब्याना नौ बज्या छियो। 26अनि इसुको दोस पत्तरमै “यहुदिहरुका राजा हो” भुन्न्या लेखिया छियो। 27तिनुहरुले इसुकन क्रुसमै टाँग्दा दुइजुना डाँकाहरुकन इसुका दाइन्या र दाब्र्या पट्टि टाँग्या। 28[यइगरि धर्मसास्तरको बचन पुरा भयो, “इसु अपरादिहरु स्हात गुनिया।”]#यसैया ५३:१२
29ताँइबाट भयर जान्या मान्ठहरुले मुन्टो हल्लाउँदै यइथो भुन्दै इसुको गिल्ला गर्या, “याइ! तो मुन्दिर ओद्दाइ तिन दिनमै बुनाउन्या,#भजनसंग्रह २२:७ 30आपुकन बचा र क्रुसबाट ओल्लिकन आइजा।”
31तेइथैगरि मुख्य पुजारिहरुले पुनि धर्मगुरुहरु स्हात यइथो भुन्दै आपसमै इसुको गिल्ला गर्या, “यइले अरुकन बचायो, तर आपुकन बचाउन स्हक्योन। 32याइ इस्राएलिहरुका राजा ख्रिस्ट! अब क्रुसबाट ओल्लेर आइजा, हामिले देख्न्याछौं र बिसास गन्न्याछौं।”
अनि इसु स्हात क्रुसमै टाँगियाहरुले पुनि तिनुको खिसि गर्या।
इसुको मित्तु
(मत्ति २७:४५-५६; लुका २३:४४-४९; युहन्ना १९:२८-३०)
33दिउँसो बार बज्यादेखि तिन बज्यास्हम्म पुरै देसकन उद्यारोले ढाक्यो। 34तिन बज्यातिर इसुले ठुलो डाको गद्दै भुन्या, “इलोइ, इलोइ, लामा सबखथनि?” — जैको अथ्थ हो, “हे मेरा परमेसोर, हे मेरा परमेसोर, तुमिले मुकन क्यान छोड्यौ?”#भजनसंग्रह २२:१
35ओरपर, उभिन्याहरुमद्दि कोइ-कोइले यइ स्हुन्यार भुन्या, “स्हुन, तेइले एलियाकन घोइर्याउँदैछ।” 36अनि एकजुनाले डगुडेर गइ अंगुरको चुकिलो रसमै टालो चोपेर एक लामो निगालामै यइथो भुनि इसुकन पिन दियो, “हेरौं, कैले एलिया तेइकन ओराल्ल आउँछुन् कि?”#भजनसंग्रह ६९:२१ 37तब ठुलो डाको गर्या र इसुको परान गयो।
38अनि मुन्दिर भित्तको पर्दामाथि देखि तलिस्हम्म दुइ भाग भइ चिरियो।#प्रस्थान २६:३१-३३ 39तब यइथैगरि इसुको परान गया देखिकन तिनुहरुका अगेडि उबिया कप्तानले भुन्यो, “यि मान्ठ स्हाँच्चि नै परमेसोरका छोरा रैछुन!”
40ताँइ केइ स्हैनिहरु छिन। तिनुहरु मद्दि मरियम मग्दलिनि नानो याकुब र योसेफकि आमा मरियम अनि सलोमि पुनि छिन्। 41इसु गालिलमै हुँदा तिनुहरुले इसुकन पछ्याउदिछिन्, र तिनुको सेबा गद्दिछिन्। इसु स्हातै यरुसलेममै आयइ अरु मथ्थै स्हैनिहरु पुनि ताँइ छिइन्।
इसुकन गाड्न्या काम
(मत्ति २७:५७-६१; लुका २३:५०-५६; युहन्ना १९:३८-४२)
42तेइ तैयारिको दिन, या पट्याइको दिनको अग्याल्लो दिन, झल पड्दैछियो। 43अरिमाथिया सहरका योसेफले तेइ बास्हा पल्टि आँट गरेर पिलातस स्हात इसुको ल्हास माग्या। योसेफ ठुला सबाका मान्यागुन्या सदस्या छिया। तिनुले परमेसोरको राज्याकन ढुकि बस्याछिया। 44इसु अगि नै मर्या कुडा स्हुनेर पिलातसले अचुम्म मान्यो। अनि कप्तानकन आपुति घोइर्याइ इसु मर्या होकि हैन भुनि स्होदपुछ गर्यो। 45पिलातसले इसु मरिस्हक्या कुडा कप्तानबाट थाँ पायापछि पिलातसले इसुको मर्या हड योसेफकन ल्हिन दियो। 46अनि योसेफले सुतिका टाला किन्यो, र ल्हास तल झार्यो र टालाले गुथ्यो। तब पडामै खोपि बुनाया एक च्यानमै राख्यो। तेइपछि च्यानको मुखमै तेइले ठुलो ढुंगो राखिदियो। 47मरियम मग्दलिनि र योसेफकि आमा मरियमले इसुकन राख्या ठौर हेरिराख्याइ छिन्।
Trenutno izabrano:
मर्कुस 15: JUML
Istaknuto
Podeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
© 2024 (Active), Mother Tongue Translators Society and Wycliffe Bible Translators, Inc. All rights reserved.
