Ebhikorwa bhya Abhatumwa 7
7
Obhwaiki bhwa Sitefwano mw-ibharaja
1Kweki omushengesi omukuru ˆnaabhuusha Sitefwano ati, “Ganu bhaaika goone kutyo, angu nikwo kutyo gari?” 2Sitefwano ˆnaaika ati, “Bhayiiri bhaani na bhaaraata, munyiitegeereshe! Nyamuwanga owa obhugungyo ꞉eebhuurire ku-jaaji Bhurayimu. Mu-kabhaga kayo Bhurayimu ꞉aariga ari mu-kyaro kya Mesopotamiya, akyari okungʼaanyira mu-musi gwa Araani. 3Nyamuwanga ˆnaamubhwira ati, ‘Nuusooke mu-kyaro kyawo na mu-bhayiiri bhaawo, ugende ku-kyaro kinu eniija okukweresha.’#7:3 Ringira Obhwambiro 12:1. 4Niwe Bhurayimu ˆnaangʼaanya mu-kyaro kyabho ekya Abhakaridaayo, ˆnaagenda okwikara ku-musi gwa Araani. Bhunu esemwene ꞉aafuuye, Nyamuwanga ˆnaamungʼaanya, ˆnaamureeta ku-kyaro kinu, kinu emwe mwikaaye-mo na woori.
5“Nawe Nyamuwanga ꞉ataamuyaaye omugabho gwonegwone mu-kyaro kinu, ꞉ataamuyaaye na kabhaara katooto aka okwisa okuguru kwaye okumwi. Tari, ꞉aamuragire okumuyaana ekyaro kinu, kibhe kyaye na abheebhurwa bhaaye, nawe mu-kabhaga kayo Bhurayimu ꞉aariga atari na mwana. 6Niwe Nyamuwanga ˆnaabhwira Bhurayimu ati, ‘Abheebhurwa bhaawo bharibha bheekasi mu-kyaro kya areera. Na abheekasi bheenda eyo bharibhakora okubha bhagaya bheebhwe, na bharibhanyansha muno myaka magana gana. 7Nawe, abhaanu bha ekyaro kiyo, niribhayaana ebhirusho. Ni anye enaaika. Nikamara okubhayaana ebhirusho, nirisoosha abhaanu bha orwibhuro rwawo mu-kyaro kiyo, abhaana bhaawo bhayo bharindamisha anu.’#7:7 Ringira Obhwambiro 15:13-14. 8Okumara gayo Nyamuwanga ˆnaakora iimuuma na Bhurayimu, iimuuma inu ꞉yaariga iri ya okumusaara omwene na abheebhurwa bhaaye abha ekirume. Mmbe, Bhurayimu ˆneebhura Isaaka. Bhunu Isaaka ꞉aayikiishe orusuku rwa munaana, Bhurayimu ˆnaamusaara. Isaaka ˆneebhura Yakobho, na Yakobho woone, ˆneebhura abhamura ekumi na bhabhiri, bhayo nibho bhaajaaji waasu.
9“Bhaajaaji waasu bhayo, mbabha na orwango ku-Yuusufu waamuwaabho, mbamugusha abhe mugaya mu-kyaro kya Miisiri. Nawe, Nyamuwanga ꞉aariga ari amwi na Yuusufu, 10ˆnaamwerusha mu-bhinyansho bhyaye bhyone kutyo. Nyamuwanga ˆnaamuyaana riibhando na obhwenge mu-meeso ga Fwaraawo omukama wa Miisiri woone ˆnaamwenda. Fwaraawo, ˆnaakora Yuusufu okubha omutungi mukuru mu-kyaro kya Miisiri, na ku-nyumba eya ekikama eya Fwaraawo.
11“Ginsiku ngitura-wo bhunu Yuusufu ꞉aariga ˆnaatunga, injara niibhuma ansi inda mu-kyaro kya Miisiri kyone kutyo, na mu-kyaro kya Kaanaani. Abhaanu mbanyanka muno. Bhaajaaji waasu bhoone mbabhurwa ebhyokurya. 12Niwe Yakobho ˆnoongwa ati mu-kyaro kya Miisiri bhiriyo ebhyokurya, ˆnaatuma abhaana bhaaye, bhaajaaji waasu bhayo bhagende-yo. Na ruyo nirwo ꞉rwariga ruri orugendo rwebhwe orwa okwamba okuyika Miisiri. 13Ku-rugendo rwebhwe orwa akabhiri, Yuusufu ˆneebhuura ku-bhaawaamuwaabho. Yuusufu ˆnaabhasira ku-Fwaraawo woone ˆnaabhamenya. 14Yuusufu ˆnaatuma abhaanu kw-isemwene, bhamubhwire woone agende Miisiri. Bhamubhwire agende na oruganda rwaye rwone kutyo. Abhaanu bhayo ꞉bhaariga bhari makumi mungati na bhataanu. 15Mmbe, Yakobho ˆnaagenda Miisiri. Na ginsiku gya okufwa kwaye bhunu ꞉gyayikire, ˆnaafwira eyo, na bhaajaaji bhayo bhoone ꞉bhaafwiriiye Miisiri eyo. 16Nawe emibhiri gyebhwe ngireetwa ewaabho ku-musi gwa Shekemu, ngibhiikwa mu-mbiiyira inu Bhurayimu ꞉aariga agurire eyo ku-bhayiiri Amoori.#7:16 Mu-kabhaga kayo, na ku-ntungwa gya Abhayawudi, imbiiyira ꞉yaariga iri insenga yimwi mbabhiikaga-mo bhaanu bhoone kutyo abha oruganda.
17“Mmbe, akabhaga ka Nyamuwanga okukuumisha obhuragi bhwaye ku-Bhurayimu, nkarebherera okuyika. Na obhukumi bhwa abhaanu bheeswe Miisiri eyo mbugenderera okubha bhwafu muno. 18Kimwi omukama owundi unu ꞉aariga atakumenya amangʼana goonegoone aga Yuusufu, ˆnaamba okutunga. 19Omukama uyo ꞉aajimiishe abhaanu bhaasu, ˆnaabhakorera amabhiibhi, ˆnaabhasiiga bheese abhaana bheebhwe abhajaare, insonga bhafwe.
20“Mu-kabhaga kayokayo Musa ˆneebhurwa. Na ꞉aariga ari mwana mujomu muno mu-meeso ga Nyamuwanga. ˆNaarerwa na abheebhusi bhaaye mu-waabho, ngatura meesi gasatu. 21Abheebhusi bhaaye mbataamibhwa okugenderera okumubhisa mu-nyumba, mbamusira iibhara. Omuyara wa omukama Fwaraawo ˆnaamubhooja. Omuyara uyo ˆnaamurera rwa omwana waaye. 22Musa ˆneeyigisibhwa obhwenge bhwone kutyo obhwa Abhamiisiri, ˆnaabha mumenyi ku-bhwaiki, na ku-bhikorwa bhyaye.
23“Bhunu Musa ꞉aayikiishe ekura rya myaka makumi gana, ˆnaaramura mu-mutima gwaye okutaarira-ko abhayiiri bhaaye, Abhaijirayeeri. 24ˆNaanyoora Omumiisiri wumwi ˆneewoneraga Omuijirayeeri, kimwi ˆnaarwana Omumiisiri uyo. Na mu-kisiyomba kiyo Musa ˆneeta Omumiisiri uyo. 25Musa ˆnaatoga ati abhayiiri bhaaye bhayo abhaaja okumenya ati Nyamuwanga niwe kaabheerusha okuturira ku-bhusakisi bhwaye. Nawe bheeki riyo ꞉bhataarimenyere.
26“Mwejo, ˆnaanyoora Abhaijirayeeri bhabhiri mbayombaga. ˆNaasaka okubhataanya bhasige okurwana, ˆnaabhabhwira ati, ‘Bhamura, emwe muri bhamwi! Ndora omwenda okuwutaashaanya?’ 27Nawe unu ꞉aariga ˆneewonera oweejaabho ˆnaakuurira Musa ku-mbarika, ˆnaaikaga ati, ‘Niga unu akutuuye-wo awe ubhe omutungi na omuramusi weeswe? 28Oweenda okunyita rwa kutyo wiitire Omumiisiri urya iigoro?’#7:28 Ringira Obhungʼaanyi 2:14. 29Bhunu Musa ꞉oonguuywe amangʼana gayo, ˆnaabhirimira mu-kyaro kya areera kinu ꞉kyariga nkitogwa ati Midiyaani. Bhunu ꞉aariga eekaaye eyo, ˆneebhura-yo bhaana bhabhiri bhamura.
30“Midiyaani eyo, ꞉eekaaye emyaka makumi gana. Orusuku rumwi, bhunu ꞉aariga ari ku-nsi ya orukungu ayeeyi na ekiima kya Sinaayi, maraayika wa Raatabhugenyi Nyamuwanga ˆnaamwibhuura-ko. Maraayika uyo ꞉aamwibhuurire-ko aturiiye mu-kasaka kanu ꞉kaariga nkooka omuriro. 31Bhunu Musa ꞉aarorere akasaka kayo ˆnaaruguura muno, ˆnaakafugera-ko akaringire kujomu, ˆnoongwa obhuraka bhwa Raatabhugenyi, mbumubhwira ati, 32‘Anye ni Nyamuwanga wa bhaajaaji waanyu, Bhurayimu, Isaaka, na Yakobho.’#7:32 Ringira Obhungʼaanyi 3:6. Bhunu Musa ꞉oonguuywe gayo, ˆnaamba okuyarara muno, ˆnoobhaya na okuringira akasaka kayo.
33“Niwe Raatabhugenyi ˆnaabhwira Musa ati, ‘Fuura ebhikwirya bhyawo, kwa okubha anu uyambaaye, ni ataakatiifu. 34Kimari naarora kutyo abhaanu bhaani abhanyansibhwa mu-kyaro kya Miisiri, noongwa ekiriro kyebhwe. Iyo niyo insonga inu yaakora niike okusooka mu-rwire, nibheerushe mu-bhugaya. Mmbe woori nuuje, nikutume usubhe Miisiri.’#7:33-34 Ringira Obhungʼaanyi 3:5-10.
35“Musa uyo, niwe abhaanu bhayo ꞉bhaaremere mbamubhwira ati, ‘Niga unu akutuuye-wo awe ubhe omutungi na omuramusi weeswe?’ Musa uyo, niwe Nyamuwanga ꞉aatumire okubha mutungi na omutuurya weebhwe, okuturira ku-maraayika unu ꞉eebhuurire ku-Musa mu-kasaka karya. 36Okumara gayo Musa ˆnaakora ebhiruguusho na ebhimenyegesho bhyafu mu-kyaro kya Miisiri. ˆNaatangasha Abhaijirayeeri okusooka mu-kyaro kiyo, ˆnaakora na ebhigwa ebhindi ku-nyanja ya Shaamu, na ku-nsi ya orukungu, kwa ebhaga rya emyaka makumi gana.
37“Musa uyo, niwe ꞉aabhwiriiye Abhaijirayeeri bhayo ati, ‘Nyamuwanga kaaja okubhareetera omuragi rwa anye, okusooka agati wa Abhaijirayeeri bheejaanyu.’#7:37 Ringira Ekiyiityo kya Ebhiraagiro 18:15. 38Musa uyo, niwe ꞉aariga ari amwi na Abhaijirayeeri ku-nsi ya orukungu. Niwe ꞉aaikire na maraayika urya ku-kiima kya Sinaayi, ˆnaaika kweki na bhaajaaji. Niwe ꞉aaramiiye amangʼana ga obhurame, ˆnaakireetera eswe.
39“Nawe Abhaijirayeeri bhayo, bhaajaaji waasu bhayo, ꞉bhaaremere okuungwa Musa, mbamukuurira ku-mbarika. Emitima gyebhwe ngiigomba okusubha Miisiri. 40Mbabhwira Aruuna ati, ‘Nuukiroosishe ebhisusano bhibhe emisambwa, gikitangashe ku-njira. Musa uyo, niwe ꞉aariga ˆnaakitangasha okusooka mu-kyaro kya Miisiri, woori kitakumenya amangʼana ganu gamunyoorere eyo.’#7:40 Ringira Obhungʼaanyi 32:1. 41Ku-nsiku giyo mbaroosha riisusano ndisusaga na ekimoori kya iingʼombe mbarikora ndibha esambwa ryebhwe. Mbarisoosisha ekimweso,#7:41 Ekimweso. Ringira riingʼana Emigabho mu-Mangʼana Amakomeeye. mbajomererwaga ekiinu kinu ꞉bhaariga bheeroosisiishe na amabhoko geebhwe abheene. 42Mmbe, Nyamuwanga ˆnaayinduka ˆnaabhasiga bharamye riisuubha, okwesi, na ginjota, rwa kutyo ꞉yaakaamirwe mu-kitabho kya abharagi ati,
‘Emwe Abhaijirayeeri,
bhunu ꞉mweekaaye ku-nsi ya orukungu emyaka makumi gana,
angu, ꞉mwariga munsoosisha ebhimweso na emigabho?#7:42 Emigabho. Ringira riingʼana rinu mu-Mangʼana Amakomeeye.
43Uri! ꞉Mwariga mwitwika riiwuuna rya Moreki.
Na Moreki ꞉gwariga guri musambwa gwemwe,
na ginjota gya Refwani.
Refwani ryone riri esambwa ryemwe,
ebhisusano bhiyo ꞉mweeroosisiishe insonga mubhiramye.
Woori noone, eniija okubheesa areera muno okukira Bhabheri.#7:43 Bhabheri. Ringira riingʼana rinu mu-Mangʼana Amakomeeye.’#7:42-43 Ringira Amoosi 5:25-27.”
44Sitefwano ˆnaagenderera okwaika ati, “Ku-nsi ya orukungu eyo, bhaajaaji waasu bhayo ꞉bhaariga mbayenga na riiwuuna rya ekibharikisho ku-Nyamuwanga. Riiwuuna riyo ꞉ryaroosiibhwe rwa kutyo Nyamuwanga ꞉eeresiishe Musa okuriroosha. 45Okumara gayo, bhaajaaji waasu bhanu ꞉bhaariga bhatangasiibhwe na Yoshuwa ꞉bhaariramiiye. Bhoone mbarireeta ku-kyaro kinu ꞉bhaateesiishe abhaanu bha amayito agandi, bhunu Nyamuwanga ꞉aabhirimiishe abhaanu bhayo, ndisigara mu-kyaro kiyo okuyikira mu-kabhaga ka omukama Dawudi. 46Dawudi unu ꞉aariga eenderwe na Nyamuwanga. ˆNaasabha Nyamuwanga ˆnaaikaga ati, ‘Ee Nyamuwanga wa Yakobho, nuunyiikirisishe nikuumbakire iinyumba.’ 47Nawe omukama Seremaani niwe ꞉oombakire iinyumba iyo.
48“Nawe, Nyamuwanga ari iiguru wa ebhiinu bhyone kutyo, na atakwikara mu-nyumba ginu egyumbakwa na abhaanu. Rwa kutyo omuragi ꞉aaikire ati,
49‘Raatabhugenyi kaaika kutya,
Orwire, nikyo ekitebhe kyani ekya ekikama,
na mu-kyaro, niwe enituura amaguru gaani.
Ni nyumba ya mbagaki inu omuuja okunyumbakira?
Kyaike ati owa okumuunyira anye kaaja okubha aaki?
50Bhinu bhyone kutyo, angu tari ni anye omwene ꞉naabhibhumbire?’#7:49-50 Ringira Isaaya 66:1-2.”
51Niwe Sitefwano ˆnaagenderera okwaika ati, “Emwe ni bhachaamu! Emitima gyemwe na amatwi geemwe gari rwa aga abhapagaani. Nsiku gyone kutyo omurema Mwoyo Omutaakatiifu, rwa kutyo bhaajaaji waanyu bhoone ꞉bhaariga mbamurema! 52Angu, ariyo omuragi na wumwi, unu ꞉bhataanyansiishe? ꞉Bheetire na abharagi bhanu ꞉bhaariga mbasoosha obhuragi bhwa okuuja kwa omurengeresi wa Nyamuwanga! Omurengeresi uyo niwe emwe ꞉mwariiye injeejemo, mumwita. 53꞉Mwaramiiye ebhiraagiro bhya Nyamuwanga okusooka ku-maraayika waaye, nawe ꞉mutaamuunguuywe.”
Okwitwa kwa Sitefwano
54Bhunu abhakuru bhayo ꞉bhoonguuywe amangʼana ga Sitefwano gayo, mbabhiiyirwa muno, mbamurumira gimba. 55Nawe Sitefwano enu eejuuywe Mwoyo Omutaakatiifu, ˆnaaragamira iiguru ku-rwire, ˆnaarora obhugungyo bhwa Nyamuwanga, na Yeesu ayambaaye orubhaara orwa ebhuryo orwa Nyamuwanga. 56Kimwi ˆnaaika ati, “Muringire! Enirora orwire rweguka, na Omwana wa Adaamu#7:56 Omwana wa Adaamu. Ringira riingʼana rinu mu-Mangʼana Amakomeeye. ayambaaye orubhaara rwa ebhuryo orwa Nyamuwanga!”
57Kimwi abhakuru bha Abhayawudi bhayo mbasibha amatwi na amabhoko geebhwe, mbamwaya. Bhoone kutyo mbeejungira Sitefwano mbamugwata, 58mbamuwurusha ku-kibhara bhamubhume na amagina. Bhakyari okwamba okumubhuma, bhanu ꞉bhaamubheeyereshaga mbafuura amakooti geebhwe mbagasiga ayeeyi na omumura wumwi agaangarirega. Omumura uyo ꞉aariga ˆnaatogwa ati Saawuri.
59Bhunu ꞉bhaariga mbabhuma Sitefwano na amagina, Sitefwano ˆnaasaasaama ku-Raatabhugenyi ˆnaaikaga ati, “Ee Raatabhugenyi Yeesu, nuuramire omwoyo gwani!” 60Kimwi ˆneefukama, ˆnaamura obhuraka ˆnaariraga ˆnaaika ati, “Raatabhugenyi, waasiga okubhabharira ebhikayo bhyebhwe bhinu.” Bhunu ꞉aamarire okwaika kutyo, ˆnaafwa. Saawuri woone ꞉aarorere ekikorwa kya okwitwa Sitefwano ati ꞉kyariga kiri kijomu era.
Trenutno izabrano:
Ebhikorwa bhya Abhatumwa 7: kya
Istaknuto
Podeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
© 2023, Wycliffe Bible Translators, Inc. All rights reserved