Ebhikorwa bhya Abhatumwa 6
6
Okusorwa kwa abhasakisi mungati
1Mu-nsiku giyo obhukumi bhwa abheeyigira bha Yeesu ꞉bhwariga mbugenderera okubha bhwafu. Mu-bheeyigira bhayo ꞉bhaariga bharimo Abhayawudi bhanu iinyaaika yeebhwe ꞉bhaaikaga Ekiyunaani, na abhandi bhanu ꞉bhaaikaga iinyaaika ya Ekiebhuraaniya. Mmbe, bhanu ꞉bhaaikaga Ekiyunaani ꞉bhaariga mbeesigiinyira abheejaabho ati ku-nsiku bhunu ꞉bhaariga mbagabha ebhyokurya, ꞉bhaariga mbarabhirwa okugabhira abhakimari bha ekigasi abha Ekiyawudi bhanu ꞉bhaaikaga Ekiyunaani. 2꞉Geejire gaabha kutyo, abhatumwa ekumi na bhabhiri mbabhirikira abheeyigira bhoone kutyo, mbabhabhwira ati, “Itari kujomu eswe kisige okwiyigisha Riingʼana rya Nyamuwanga ku-nsonga ati kigabhire abhaanu ebhyokurya. 3Woori, Bhakiriisitu bheejaasu, musore abhaanu mungati agati weemwe. Musore bhanu omurora ati bhari na emitima emijomu, ni bheenge na bheejuuywe Mwoyo Omutaakatiifu. Bhayo nibho kibhayaane emirimu giyo, 4bhakamara okubha-wo eswe kyone kibhe na ebhaga ejomu erya okusaasaamaga Nyamuwanga, na okwiyigisha abhaanu Riingʼana ryaye.”
5Obhuramusi bhuyo mbujomera abhaanu bhoone kutyo bhanu ꞉bhaariga bhasangire ayo. Kimwi mbasora Sitefwano. Obhwikirisha bhwa Sitefwano ꞉bhwariga bhuri bhunene na ꞉aariga ari omuunu unu eejuuywe Mwoyo Omutaakatiifu. Na mbasora Firipo, Porokoro, Nikanora, Tiimooni, Parimena, na Nikoraawo omwikasi wa Antiyokiya unu ꞉aariga amarire okuyindukira ku-diini ya Abhayawudi. 6Mbabhareeta abhaanu mungati bhayo imbere wa abhatumwa, kimwi mbabhatuurira-ko amabhoko mbabhasabhira.
7Riingʼana rya Nyamuwanga ndigenderera okuswerana mu-bhaanu. Na obhukumi bhwa abheeyigira bha Yeesu mbubha bhwafu muno Yerusareemu ayo, na abhashengesi bhaafu, bhoone mbeekirishaga Yeesu.
Okugwatwa kwa Sitefwano
8Sitefwano uyo, Nyamuwanga ꞉aariga amusakiiye iinema nyafu, na amuyaaye obhuturo bhwafu. Sitefwano ˆnaakoraga ebhimenyegesho, na ebhigwa bhya okuruguusha ku-bhaanu. 9Nawe Abhayawudi abhandi mbaamba okusaka okubhambashaanya nawe. Abhayawudi bhayo ꞉bhaariga mbasooka mw-isunagoogi#6:9 Riisunagoogi. Ringira riingʼana rinu mu-Mangʼana Amakomeeye. rinu ꞉ryabhirikirwaga ati, Riisunagoogi rya Abhaanu bhanu Bheeyagaarire, bhayo ꞉bhaariga bhasookere Kureene, Arekijandiriya na abhandi okusooka Kirikiya na Asiya. 10Nawe ꞉bhataaturire okuyajana na Sitefwano, tari ꞉aariga ˆnaabhayigira ku-bhwenge bhwa Nyamuwanga bhunu ꞉aariga amuyaaye, na Mwoyo Omutaakatiifu unu ꞉aamusakiraga okwaika.
11Kimwi Abhayawudi bhayo, mbakongya abhaanu bhagende bhabheeyereshe Sitefwano ati, “Kyamuungwa ˆnaafumaga Musa na Nyamuwanga.” 12Bhunu ꞉bhaaikire amangʼana gayo, ngasooyeresha muno abhaanu, bharimo bhakaruka bha Abhayawudi na abheeyigisha bha ebhiraagiro bhya Musa. Kimwi mbagwata Sitefwano, mbamusira mw-ibharaja rya abhakuru bha Abhayawudi. 13Mbatuura-wo abhaanu bha okubheeyeresha Sitefwano. Kimwi mbamubheeyeresha mbaaikaga ati, “Omuunu unu atakusiga okwaika amangʼana ga injabhuro kw-iyekaru rya Nyamuwanga rinu, na ku-bhiraagiro bhya Musa! 14Kwa okubha kyamuungwa ˆnaaikaga ati Yeesu owa Naajareeti uyo arikambura riiyekaru rinu, ati ariyindura na gintungwa ginu Musa ꞉aakisigiiye.”
15Abhaanu bhoone kutyo bhanu ꞉bhaariga bhari mw-ibharaja riyo mbamogorera Sitefwano ameeso, mbarora obhusu bhwaye mbungʼarabhya rwa obhusu bhwa maraayika.
Trenutno izabrano:
Ebhikorwa bhya Abhatumwa 6: kya
Istaknuto
Podeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
© 2023, Wycliffe Bible Translators, Inc. All rights reserved