Ebhikorwa bhya Abhatumwa 8
8
1Orusuku ruyo Sitefwano ꞉eetirwe, abhaanu bha Yerusareemu bhanu ꞉bhaariga bheekirisiishe Yeesu, mbaamba okunyansibhwa muno. Abhaanu bhayo mbabhirima, mbanyaragana mu-misi gyone kutyo egya Ebhuyawudi na Samaariya. Tari abhatumwa bha Yeesu era nibho ꞉bhaasigaaye Yerusareemu. 2Sitefwano ꞉eejire aafwa, abhaanu abhataakatiifu mbamubhiika, mbamuririra muno. 3Na Saawuri woone, ꞉ateendaga riikanisa rya Nyamuwanga rigenderere, ꞉aariga ˆneengira nyumba yimwiyimwi, ˆnaawurushaga anja abharume na abhagasi, ˆnaabhasira okubhoywa.
Firipo ari mu-musi gwa Samaariya
4Enu abheeyigira bhanu ꞉bhaagendaga, mbaamba okuraasisha abhaanu Amangʼana Amajomu aga Yeesu Kiriisitu. 5Firipo#8:5 Firipo. ꞉Aariga ari owumwi wa abhagabhi bha ebhyokurya mungati bharya, bhanu ꞉bhaasorerwe. Ringira Ebhikorwa bhya Abhatumwa 6:5. woone ˆnaagenda mu-musi gumwi gunu guri Samaariya, ˆnaamba okuraasisha abhaanu amangʼana ga Kiriisitu. 6Abhaanu bhaafu bhunu ꞉bhoongwaga amangʼana gaaye, na okurora ebhigwa bhinu ꞉aariga ˆnaakora, mbamwitegeeresha bheekomeeresiishe. 7Firipo ꞉aariga ˆnaabhirimya ebhiwi okusooka mu-bhaanu bhaafu, na bhunu ꞉bhyariga mbibhasooka-mo, ꞉bhaariga mbamwaya. ꞉Aariga ˆnaawosha abharema bhaafu, na abhandi bhaafu bhanu ꞉bhaariga bhafuuye emibhiri. 8Ku-bhikorwa bhiyo, abhaanu mbajomerwa muno mu-musi muyo.
Peetero kaagonya Simooni omurosi
9Mu-musi muyo, ꞉aariga ariwo omurosi wumwi, riisiina ryaye ˆnaatogwa Simooni. Simooni uyo ꞉aariga ˆnaakora ebhiwuufyo ˆnaaruguushaga abhaanu bhoone kutyo Samaariya eyo. ꞉Aariga ˆneekumangya ati, atariwo omuunu wa okuriingʼaana nawe. 10Abhaanu bhoone kutyo, abha ebhiinu na bhanu bhatari na bhiinu, ꞉bhaariga mbamwitegeeresha mbaaikaga ati, “Omuunu unu niwe obhuturo bhwa Nyamuwanga, bhunu obhutogwa ati Obhuturo Obhukuru.” 11Abhaanu bhayo ꞉bhaamwitegeereshaga, kwa okubha akaafu, ꞉aaruguushaga abhaanu na ebhiwuufyo bhyaye.
12Nawe Firipo bhunu ꞉eeyigisiishe Amangʼana Amajomu aga obhukama bhwa Nyamuwanga, na iiguru ya riisiina rya Yeesu Kiriisitu, abhaanu mbeekirisha, mbabhatiisibhwa abharume na abhagasi. 13Simooni woone ˆneekirisha Yeesu, ˆnaabhatiisibhwa. Firipo enu ꞉aajaga, Simooni woone ˆnaamuseeta, na bhunu ꞉aarorere ebhigwa ebhinene bhinu Firipo ꞉aariga ˆnaakora, ˆnaaruguura.
14Abhatumwa bha Yeesu Yerusareemu eyo, ꞉bhoonguuywe ati abhaanu bha Samaariya bheekirisiishe Riingʼana rya Nyamuwanga, niwe mbatuma Peetero na Yowana bhagende-yo. 15Bhunu ꞉bhaayikire, mbasabhira abhaanu, bharamire Mwoyo Omutaakatiifu, 16kwa okubha atariwo na wumwi weebhwe unu ꞉aariga aramiiye Mwoyo Omutaakatiifu. Tari ꞉bhaariga bhabhatiisiibhwe era kw-isiina rya Raatabhugenyi Yeesu. 17Niwe Peetero na Yowana mbatuura amabhoko geebhwe ku-bheeyigira bhayo, bhoone mbaramira Mwoyo Omutaakatiifu.
18Bhunu Simooni ꞉aarorere ati abhaanu abhatuurirwa-ko amabhoko era na abhatumwa mbaramira Mwoyo Omutaakatiifu, ˆnaasaka okuyaana Peetero na Yowana giiyera, ˆnaabhabhwira ati, 19“Muunaane-ko noone obhuturo bhunu, nikatuurira-ko omuunu okubhoko kwani, aramire Mwoyo Omutaakatiifu.”
20Peetero ˆnaamubhwira ati, “Nuufwire eyo na giiyera gyawo, kwa okubha awe owutoga ati owutura okugura ekiyaanwa kya Nyamuwanga na giiyera gyawo! 21Awe, utari na ebhaara ku-murimu gwa Nyamuwanga gunu, kwa okubha omwoyo gwawo guteemire ku-Nyamuwanga. 22Nuunuge kimwi obhubhiibhi bhwawo bhunu, usabhe Raatabhugenyi, akeenda akwabhire ku-bhwiganiirisha obhubhiibhi obhwa omutima gwawo. 23Enirora wiijuuye orwango na obhururu na ebhikayo bhyawo bhikubhoyere.” 24Simooni ˆnaamubhwira ati, “Munsabhire ku-Raatabhugenyi, amangʼana gayo mwaika gataaja okunyoora na rimwi.”
25Bhunu Peetero na Yowana ꞉bhaamarire okubhwira abhaanu amangʼana ganu Yeesu ꞉aariga abhakoreeye, na okubheeyigisha Riingʼana rinu eryaikira Raatabhugenyi Yeesu, mbaamba orugendo rwebhwe orwa okusubha Yerusareemu. Bhunu ꞉bhaariga mbagenda, ꞉bhaaraashaga Amangʼana Amajomu aga Yeesu mu-magunguri maafu aga Samaariya.
Firipo kaaikana na Omwisiyopiya
26Rusuku rumwi, maraayika wa Raatabhugenyi Nyamuwanga ˆnaabhwira Firipo ati, “Nuugende uture ku-njira inu eyitura orubharika rwa ebhuwanga, ku-njira ya orukungu inu eyooromoka okusooka Yerusareemu okuja Gaaja.” 27Mmbe, Firipo ˆneemuka, ˆnaamba orugendo, ˆnaagwata injira iyo. Bhunu ꞉aariga ari ku-njira iyo, ˆnaanyookana na Omwisiyopiya wumwi mujigaru. Omwisiyopiya uyo ꞉aariga ˆnaayambaarira ebhiinu bhyone kutyo ebhya Kandake, Omugore wa ekyaro kya Isiyopiya. ꞉Aariga agendere Yerusareemu okuramya Nyamuwanga. 28Mu-kabhaga kayo ꞉aariga ˆnaasubha iika, eekaayega kw-ibhirigiti ryaye ndikururwaga na iifwaraasi enu ˆnaasomaga mu-kitabho kya omuragi Isaaya.
29Kimwi Mwoyo Omutaakatiifu wa Nyamuwanga ˆnaabhwira Firipo ati, “Genda bhwangu uribhashaanye na riibhirigiti riyo.” 30Mmbe, Firipo ˆnaaribhirimira, ˆnaariyika-ko. Okuyika, ˆnoongwa Omwisiyopiya uyo ˆnaasomaga ku-kitabho kya omuragi Isaaya. Kimwi Firipo ˆnaamubhuusha ati, “Angu amangʼana gayo owusoma, owugasombookerwa?” 31Weeki ˆnaaika ati, “Enitura kutiki okusombookerwa amangʼana ganu, nitaabha na omuunu wa okunyiyigisha?” Kimwi ˆnaabhwira Firipo ariinye, eekare nawe kw-ibhirigiti, amusomboorere. Kimwi mbeekara amwi. 32Amakaamo Amataakatiifu ganu omukuru uyo ꞉aariga ˆnaasoma, ni ganu, ati,
“꞉Aatangasiibhwe muna iingʼondi#8:32 Iingʼondi. Ringira riingʼana rinu mu-Mangʼana Amakomeeye. inu eyija okubhaagwa,
enu ajibhiiyega rwa iingʼondi,
kutyo eyisiiriika ikabha niitemwa amafufi.
33꞉Aajeererwe ˆnaateesibhwa na ganu ꞉gaariga gamwisire.
Niga kaaja okwaikira amangʼana ga orwibhuro rwaye,
kwa okubha ꞉eetirwe ku-kyaro anu.”#8:32-33 Ringira Isaaya 53:7-8.
34Omwisiyopiya uyo ˆnaabhuusha Firipo ati, “Enikusabha umbwire, ku-mangʼana ganu, omuragi unu kaaikira niga? Angu ni gaaye omwene eraa, kaaikira omuunu wundi?” 35Kimwi Firipo ˆnaambira ku-mangʼana gayo Omwisiyopiya uyo ꞉aariga ˆnaasoma, ˆnaamara ˆnaamubhwira iiguru ya Amangʼana Amajomu aga Yeesu.
36Bhunu ꞉bhaariga mbagenderera ku-njira, mbayika anu amanji ꞉gaariga gari. Omwisiyopiya uyo ˆnaabhwira Firipo ati, “Ringira! Anu gariwo amanji. Kiriwo kiinuki ekya okuyinga anye nisige okubhatiisibhwa?” [37Firipo ˆnaamubhwira ati, “Ukeekirisha Yeesu Kiriisitu ku-mutima gwawo gwone kutyo, owutura okubhatiisibhwa.” Woone ˆnaamubhwira ati, “Eniikirisha ati Yeesu Kiriisitu niwe Omwana wa Nyamuwanga.”] 38Kimwi ˆnaasiiga riibhirigiti riitegere. Okumara okwitegera, mbeeka-mo, mbooromoka okuja mu-manji gayo, Firipo ˆnaamubhatiisha. 39Bhunu ꞉bhaasookere mu-manji, Mwoyo Omutaakatiifu wa Raatabhugenyi Nyamuwanga ˆnaasoosha-wo Firipo. Omwisiyopiya uyo ꞉ataamurorere kweki, nawe ˆnaagenderera na orugendo rwaye okuja Isiyopiya enu ajomeeywega. 40Firipo woone ˆneenyoora ari ku-musi gwa Ajoto. ˆNaagenderera na orugendo ˆnaaraashaga Amangʼana Amajomu aga Raatabhugenyi Yeesu mu-misi gyone kutyo egyenda eyo, okuyikira anu ꞉aayikiiye omusi gwa Kayijaariya.
Trenutno izabrano:
Ebhikorwa bhya Abhatumwa 8: kya
Istaknuto
Podeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
© 2023, Wycliffe Bible Translators, Inc. All rights reserved