Ebhikorwa bhya Abhatumwa 9
9
Okwerusibhwa kwa Saawuri
(Ebhikorwa bhya Abhatumwa 22:6-16, 26:12-18)
1Mu-kabhaga kayo, Saawuri ꞉aariga ˆnaagenderera na ebhikangyo bhyaye, ebhya okwita abheeyigira bha Raatabhugenyi. Orusuku rumwi, ˆnaagenda ku-mushengesi omukuru, 2ˆnaamusabha amuyaane giinyarubha ginu araagende nagyo mu-masunagoogi ga mu-musi gwa Dameesiki, insonga akanyoora eyo abheeyigira bha Yeesu, abharume na abhagasi, abhabhoye, abhareete Yerusareemu. Omushengesi omukuru ˆnaamuyaana.
3Mmbe, Saawuri ˆnaamba orugendo rwaye okugenda Dameesiki. Bhunu ꞉aariga arebhereeye omusi guyo, ˆnaataka era obhweru bhwafu okusooka mu-rwire mbumumirika mbaara gyone kutyo. 4ˆNaagwa ansi, ˆnoongwa obhuraka mbumubhuushaga ati, “Awe Saawuri! Awe Saawuri! Kubhaki owuunyansha?” 5Saawuri ˆnaabhuusha ati, “Ee Raatabhugenyi, ni awe niga?” ˆNaamubhwira ati, “Ni anye Yeesu, ni anye owunyansha. 6Iimuka! Wingire mu-musi agati, kwa okubha muyo nimwo owuuja okubhwirwa ganu wiisire okukora.”
7Abhaanu bhanu ꞉bhaariga mbasirana na Saawuri mbayambaara bhatari na rya kwaika, bheeki ꞉bhoonguuywe obhuraka bhuyo era, nawe ꞉bhataarorere omwaiki. 8Saawuri ˆneemuka ansi ayo, nawe bhunu ꞉aasakire okuringira na ameeso gaaye, ꞉ataaturire okurora kiinu kyonekyone. Mmbe, abheejaabho mbamugwata okubhoko, mbamutangasha mbamuyikya Dameesiki. 9ˆNeekara ayo nsiku esatu, atakurora. Mu-kabhaga kayo ꞉ataaryaga amwi ati kunywa kiinu kyonekyone.
10Dameesiki eyo, ꞉aariga ariwo omwiyigira wumwi owa Raatabhugenyi Yeesu, riisiina ryaye ˆnaatogwa Ananiya. Raatabhugenyi ˆnaabhirikira Ananiya mu-bhiroro ati, “Ananiya!” Ananiya woone ˆneetabhwa ati, “Yee, Raatabhugenyi, niriwo anu.” 11Raatabhugenyi ˆnaamubhwira ati, “Iimuka ugende, wiime ku-njira inu eyibhirikirwa ati Inu Iimire, iika ewa Yuuda, ubhuushe-wo omuunu wumwi asookereeye Taruso, riisiina ryaye ni Saawuri. Enikubhwira kutyo kwa okubha woori anu kutya Saawuri kaasaasaama Nyamuwanga, 12na aarora ebhiroro. Na ku-bhiroro bhiyo, aarora omuunu unu kaabhirikirwa Ananiya ˆneengira mu-nyumba iyo, ˆnaamutuura-ko amabhoko, insonga arore kweki.”
13Ananiya ˆnaaika ati, “Nawe Raatabhugenyi, nunguuywe amangʼana ga omuunu uyo okusookerera ku-bhaanu bhaafu, mbambwira kutyo Saawuri uyo ꞉aakoreeye amabhiibhi abhataakatiifu#9:13 Abhataakatiifu. Ringira riingʼana rinu mu-Mangʼana Amakomeeye. bhaawo Yerusareemu eyo! 14Woori, ari anu na aragiriiywe na abhashengesi abhakuru agwate abhaanu bhoone kutyo bhanu abhatogora riisiina ryawo.” 15Nawe Raatabhugenyi ˆnaabhwira Ananiya ati, “Genda era! Omuunu uyo, naamusora abhe mujuuma waani, insonga araashe riisiina ryani ku-bhanu bhatari Bhayawudi, ku-bhakama bheebhwe, na ku-bhaanu bha Ijirayeeri. 16Anye omwene eniija okumweresha ebhinyansho bhinu bhiisire anyoore ku-nsonga ya riisiina ryani.”
17Mmbe, Ananiya ˆnaagenda, ˆnaayika, ˆneengira mu-nyumba iyo. ˆNaatuurira-ko Saawuri amabhoko, ˆnaamubhwira ati, “Mura Saawuri, Raatabhugenyi antumire ku-awe, insonga nikweshe ameeso kweki, na wiijusibhwe Mwoyo Omutaakatiifu. Unu antumire niwe Raatabhugenyi Yeesu, unu ꞉aakwijire-ko uri mu-njira bhunu ꞉waariga nuuja anu.” 18Mbataka era ebhiinu muna bhikaayi mbigwa okusooka mu-meeso ga Saawuri, ˆneera ameeso kweki. Kimwi ˆnaayambaara, ˆnaabhatiisibhwa. 19Kimwi ˆnaarya ebhyokurya, ˆnaanyoora amanaga kweki.
Saawuri kaaraasha Riingʼana rya Yeesu Dameesiki
Saawuri ˆneekara amwi na abheeyigira bha Yeesu bhanu ꞉bhaariga bhari Dameesiki eyo nsiku ntooto. 20Ku-nsiku giyogiyo, ˆnaamba okugenda mu-masunagoogi ga Abhayawudi, ˆnaaraashaga amangʼana ga Yeesu ati, ni Mwana wa Nyamuwanga. 21Abhaanu bhoone kutyo bhanu ꞉bhoonguuywe ameeyigisho ga Saawuri gayo, mbaruguura muno. Mbabhuushaanya ati, “Omuunu unu, atari urya ꞉aariga ˆneeta abhaanu bha Yeesu Yerusareemu erya? Atari niwe unu eejire enu insonga abhabhoye abhasire ku-bhashengesi abhakuru?” 22Nawe Saawuri weeki ˆnaagenderera okwiyigisha abhaanu amangʼana ga Yeesu oomiiye-ko, ˆnaabhwira kimwikimwi Abhayawudi bha Dameesiki ati, Yeesu niwe Kiriisitu. Bhunu ꞉aabhabhwiraga, ꞉aariga ˆnaagasoma mu-Makaamo Amataakatiifu, Abhayawudi mbataamibhwa okugarema.
23Bhunu ꞉gyaturire-wo nsiku nyafu, Abhayawudi mbakora ekiina kya okwita Saawuri. 24Mu-ngeta na mu-mwisi, ꞉bhaariga mbamwitegaanira mu-mawurukiro ga omusi guyo, insonga akawuruka era bhamwite. Nawe Saawuri ˆnaabhwirwa amangʼana ga ekiina kiyo. 25Mu-ngeta yimwi, abheeyigira bhaaye mbamwingisha mw-ikapo enene, mbamutusha mw-iwundu enene rinu ꞉ryariga riri ku-ndugu ya orubhago rwa omusi, mbamwisisha anja.
Saawuri kaagenda Yerusareemu
26Niwe Saawuri ˆnaagenda Yerusareemu, okuyika Yerusareemu eyo, ˆnaasaka okubha amwi na abheeyigira bha Yeesu. Nawe abheeyigira bhayo bhoone kutyo ꞉bhaariga bhamuubhayire, kwa okubha ꞉bhaariga bhatakwikirisha ati Saawuri aamarire okubha omwiyigira wa Yeesu. 27Nawe Bharinaabha ˆnaasira Saawuri ku-bhatumwa bha Yeesu. ˆNaabhabhwira kutyo Saawuri ꞉aarorere Raatabhugenyi ku-njira ˆnaagendaga Dameesiki, na kutyo Raatabhugenyi ꞉aaikire nawe. ˆNaabhabhwira na kutyo Saawuri ꞉aariga ari na riibhaasi rya okwiyigisha abhaanu bha Dameesiki iiguru ya riisiina rya Yeesu.
28Mmbe, Saawuri ˆnaasigara Yerusareemu ayo, ari amwi na abhatumwa bha Raatabhugenyi. ꞉Aariga ˆneeyinda Yerusareemu ayo, ˆneeyigisishaga abhaanu iiguru ya riisiina rya Yeesu ayaarire. 29Saawuri ꞉aaikaga na okubhambashaanya na Abhayawudi bhanu ꞉bhaaikaga iinyaaika ya Ekiyunaani, nawe abheene mbaagara injira ya okumwita. 30Abheeyigira abhandi bhunu ꞉bhaamenyere amangʼana gayo, mbamuyeregesha mbamuyikya mu-musi gwa Kayijaariya, kimwi mbamutuma agende ewaabho mu-musi gwa Taruso.
31Mu-nsiku giyo, riikanisa#9:31 Riikanisa. Ni bhaanu bhanu bheekirisiishe Yeesu okubha Omwerusha na Esebhugenyi weebhwe. ꞉ryariga ndigenderera okubha na omurembe mbaara gyone kutyo egya Ebhuyawudi, Gariraaya, na Samaariya. Abhaanu bha riikanisa mbanyoora amanaga, mbagenderera okuungwa Raatabhugenyi. Mwoyo Omutaakatiifu ˆnaagenderera okubhasimbiisha, na obhukumi bhwa abheeyigira mbubha bhwafu.
Ayineya kaawosibhwa
32Peetero weeki ꞉aariga ˆneeyindayinda mbaara gyone kutyo. Rusuku rumwi ˆnooromokera Ruda okutaarira abhataakatiifu abhandi bhanu ꞉bhaariga bheekaaye eyo. 33Ruda eyo, ˆnaanyoora-yo omuunu unu ꞉aariga afuuye omubhiri, riisiina ryaye ˆnaatogwa Ayineya. Ayineya ꞉aariga ari ku-bhuriri ebhaga rya myaka munaana. 34Peetero ˆnaamurora ˆnaamubhwira ati, “Ayineya, Yeesu Kiriisitu aakuwosha. Iimuka! Wanje obhuriri bhwawo.” Mbataka era Ayineya ˆneemuka. 35Na abhaanu bhoone kutyo bhanu ꞉bhaariga bheekaaye mu-musi gwa Ruda ayo, na abha kw-igera rya Sarooni, bhunu ꞉bhaarorere Ayineya ˆnaaribhata, mbeekirisha Raatabhugenyi.
Peetero kaasuura Dorikaasi
36Mu-musi gumwi gunu ꞉gwariga ngubhirikirwa ati Yopa, ꞉aariga ariwo omugasi wumwi. Omugasi uyo woone ꞉aariga ari mwiyigira wa Yeesu, riisiina ryaye ˆnaatogwa Tabhita. Mu-nyaaika ya Ekiyunaani, riisiina rinu ni Dorikaasi.#9:36 Dorikaasi na Tabhita. Insonga yeende-ko ni Kiraara. Dorikaasi uyo ꞉aariga ˆnaasakira abhatobhu, na ꞉aariga ˆnaakoraga ebhikorwa ebhindi ebhijomu. 37Mu-nsiku giyo Dorikaasi ˆnaarwara, ˆnaafwa. Abhaanu mboosha omubhiri gwaye, mbamumaamya esiiko mu-kyumba kinu ꞉kyariga kiri ku-ngereka. 38Kwa okubha omusi gwa Yopa ꞉gwariga guri ayeeyi na ogwa Ruda, abheeyigira mboongwa ati Peetero ꞉aariga ari Ruda. Kimwi mbatuma abhaanu bhabhiri ku-Peetero. Abhabhiri bhayo mbeesaasaama Peetero mbamubhwira ati, “Ekikwisaasaama kigende bhwangu ewaasu erya!”
39Peetero woone ˆnaagenda ari amwi nabho. Bhunu ꞉bhaayikire Yopa, mbamusira mu-kyumba kiyo ꞉bhaariga bhamaamiishe-mo omufuuye. Mmbe, abhakimari bhaafu abha ekigasi mbamwiyinda mbariraga. Mbamweresha amakanju, na gingibho egindi ginu Dorikaasi ꞉aabhabhariiriraga akyari muworu.
40Peetero ˆnaabhawurusha bhoone kutyo anja, ˆneefukama, ˆnaasaasaama ku-Nyamuwanga. Okumara gayo ˆnaayindukira omufuuye uyo, ˆnaaika ati, “Tabhita, iimuka!” Tabhita ˆnaafumbura ameeso gaaye. Bhunu ꞉aarorere Peetero, ˆneemuka, ˆneekara. 41Peetero ˆnaamugwata okubhoko ˆnaamusakira okuyambaara. Kimwi ˆnaabhirikira abhakimari bha ekigasi na abhataakatiifu abhandi, ˆnaatuura Dorikaasi imbere weebhwe ari omuworu. 42Amangʼana gayo ngaswerana mu-musi gwa Yopa gwone kutyo, na bhunu ꞉bhoonguuywe, abhaanu bhaafu mbeekirisha Raatabhugenyi. 43Peetero ꞉eekaaye Yopa ayo nsiku nyafu. Bhunu ꞉aariga ari Yopa ayo, ꞉aariga eekaaye ewa Simooni omuroosha wa amaayi.
Trenutno izabrano:
Ebhikorwa bhya Abhatumwa 9: kya
Istaknuto
Podeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
© 2023, Wycliffe Bible Translators, Inc. All rights reserved