LUKAS 23
23
I Yesus i ahop i Pilatus
(Mat. 27:1-2,11-14, Mrk. 15:1-5, Yoh. 18:28-38)
1Iwi-iwi' anu sinilimu' nongulus kiijo' tinuminjo, ka' nomboa i Yesus i ahop i Pilatus. 2I kiijo' aha nontampu'unimo nontuuk Ia. Koo-Nyo nu aha, “I humpak mami na Mian aiya, mompogulu' sala' hi mian daisan. Ia nonsale'i mian da boli mombayan hasin hi Tomundo, kalana tukoonyo Ia atina'mo i Kristus samian na Tomundo.”
3Lantas i Pilatus nompokilawa hi Yesus, “Totu'u Beleyum Tomundo nu mian Yahudi?”
I Yesus nontaami, “Sumo itina' kooyum.”
4Lantas koonyo i Pilatus hi kapala nu to ima-imam, ka' hi mian da'isan aijo', “Aku madi' nohumpak sa'angu' pe'e na kasala'an hi Mian aiya, da o hukum na Ia.”
5Panyo aha lebemo nontuuk mule', “Pangajalan-Nyo na bau ponsale'inyo mian songko-songko i Yudea; momonanyo i Galilea, ka' tempo' uuka ia tinokamo suele i aiya.”
I Yesus i ahop i Herodes
6Salatan i hongomo i Pilatus na aijo', ia nompokilawamo, “Pa' Mian aiya mian nu Galilea?” 7Salatan pinoto'i, taalu' i Yesus lengkat mae i da'erah anu nu kuasai Herodes, sinai i Pilatus na aha momboa i Yesus hi Herodes, anu tempo'nyo aitu ia kiijo' suele i Yerusalem. 8Sinanang hondo na i Herodes salatan nontoa i Yesus, kalana pininmo na ia nohongo lelenyo ka' mongka'oho' montoa Ia. Ia mongima-imani timbali monsakisi' i Yesus mombau anu okabangangi. 9Kalana aitu i Herodes nompokilawa manjoo' hi Ia, panyo i Yesus madi' hondo nontaami. 10Kapala nu to ima-imam ka' to gulu-gulu' agama suele nangadap i kiijo' ka' nontuuk tala-talalo i Yesus. 11I Herodes ka' to sulu-suludadu nombia-biangakonmo ka' nongambangimo i Yesus, lantas nompopakemo hi Ia baju' pesalin, lapas aijo' po'ule' mule' nonsai Ia da o boa hi Pilatus. 12I sinaa aijo' mule' i Herodes tiba i Pilatus anu u'utumae nompaha idekmo, po'ule'mo nompaha ima'.
I Yesus binee'an hukuman mate
(Mat. 27:15-26, Mrk. 15:6-15, Yoh. 18:39–19:16)
13I Pilatus nolimu' kapala nu to ima-imam, to pola-polaya' ka' layat. 14Lantas notatae hi aha, “Komiu nomboa mae Mian aiya hi belengku ka' notatae, tukoo miu Ia mompogulu' sala' hi to mia-mian. Uuka aiya i ahop miu pinalesangkumo na Ia. Panyo aku madi' hondo nohumpak sangahan pe'e na ka'idekan anu tinuukakon miu hi Ia. 15Sumo aitu mule' na koonyo i Herodes, kalana aitu ia mule' po'ule' nonsai da o boa na i Yesus minsusule' mae hi kami. Mian aiya madi' nombau apa-apaa anu patut o hukum nu hukuman mate. 16Kalana aitu ku dokeje na Ia, lapas aitu opolapas mo na Ia.”
[ 17De lameanmo nu Paskah, i Pilatus tionyo mompolapas samian na anu tinalungku' na layat.] 18Iwi-iwi' na mian anu sinilimu' i kiijo' noloboo', “Patei na Ia! Lapasakon na i Barabas hi kami!” ( 19I Barabas tinalungku' kalana nangamu' anu tinimbali i kota ka' nompateimo.)
20Pongka'oho' i Pilatus da opolapasamo na i Yesus, kalana aitu ia po'ule' notatae ninsan hi mian da'isan aijo'. 21Panyo aha noloboo', “Salibmo na Ia! Salibmo na Ia!”
22Lantas kinopintolunnyo i Pilatus notatae daka-daka' hi aha, “Panyo apaa na kasala'an-Nyo? Aku madi' nohumpak sangahan pe'e na kasala'an hi Ia anu patut o hukum nu hukuman mate! Ku dokeje na Ia, lantas opolapasakonmo na Ia.”
23Panyo aha saja'mo noloboo' hoso-hoson, tukoonyo nu aha i Yesus tionyo o salib. Ka' ahennyo tinangala i loboo' nu aha. 24Jadi i Pilatus nompokonamo hukuman silaka hi Yesus susumo pongka'oho' nu to mia-mian haha aijo', 25ka' nolapasakon mian anu pinoita nu aha, aijo'mo mian anu tinalungku' kalana nangamu' ka' nompatei. Lapas aijo' i Yesus binee'nyomo hi aha, da nubau nu aha yayamo pongka'oho' nu aha.
I Yesus sinalib
(Mat. 27:32-44, Mrk. 15:21-32, Yoh. 19:17-27)
26Lantas i Yesus binoamo nu aha. I tonga' nu jalan aha siningkabotmo tiba samian, sanggonyo i Simon, anu lengkat mae i Kirene, anu hau-haunyo minsoopmo i kota. I hakop nu aha na ia ka' pinakisa nonsimbu kau' salib aijo' i hiku i Yesus.
27Da'isan na mian i lumajang aitu mae i hiku hi Yesus – i kiijo' daagi' ko to bou-boune. To bou-boune haha aijo' nohangimo ka' nontando'imo i Yesus. 28Panyo i Yesus nosiloi ka' notatae hi aha, “To bou-boune nu Yerusalem! Boli mohaangi Aku. Haangi na posi butongum ka' to ana-anakum. 29Kalana tokajemae na tempo'nyo mian motataemo, ‘Palias na ko untungnyo na to bou-boune anu madi' toho' nohempu, anu madi' toho' kino anak, ka' madi' toho' nomposusu bunga mea'!’ 30#Hos. 10:8, Why. 6:16 I tempo' aitu, mian motataeje i to bungku-bungkutnyo, ‘Tuda' mae na kami!’ Ka' to puge-puge'nyo, ‘Tabuhi mae na kami!’ 31Kalana de kona i kau' anu daagi' tutuu', mian mombaumo sumo aiya, pa' mosiaje mule' na nubau nu aha i kau' anu manggasmo!”
32Daagi' mule' ko ua'aha na mian sangga'at – ua-ua'aha mian ma'idek – anu binoa nu aha da o hukum mate hingga-hinggat tiba i Yesus. 33Salatan tinoka i tampat anu osanggohi, “Popoke',” aha nomposalibmo i Yesus ka' ua'aha na mian ma'idek aijo' – samian i sasu koanan ka' samian mule' i sasu kewe' i Yesus. 34#Mzm. 22:19 Lantas i Yesus binalado'a, “Tuuma, ampuniakon na aha! Madi' sinumbu' nu aha pa' apaa na anu binau nu aha.”
35 #
Mzm. 22:8, 19 Baju' i Yesus binagi-bagimo i kiijo' nu aha binauakon undi. To mia-mian anu tinjo-tinjo i kiijo' mompotoakon, hau-haunyo to pola-polaya' nu Yahudi mompudik i Yesus nu potatae, “Ia nomposalamatmo mian sangga'at; soba' uuka posi posalamatmo na butong-Nyo, de Ia totu-totu'u Tomundo anu Momposalamat anu pinile'anmo nu Tumpu!”
36 #
Mzm. 69:22
To sulu-suludadu suele nompopudikmo Ia. Aha tinokamo ka' nompo'inum anggur malosing hi Ia. 37Ka' notatae, “De Oko Tomundo nu Mian Yahudi, posalamatmo na butong-Um!”
38I bawo nu kau' salib i Yesus, tinulis na potatae aiya: “Aiyamo na Tomundo nu Mian Yahudi!”
39Sala'samian na mian ma'idek anu sinalib aijo' nompopo'ambangmo i Yesus. Ia notatae, “Te Beleyum misa' Tomundo anu Momposalamat? Yo, posalamatmo na butong-Um tiba kami!”
40Panyo mian ma'idek samian mule' nontewa' sangalunyo aijo', tukoonyo, “Te beleyum madi' nabuhuk hi Tumpu? Beleyum hingga-hinggat o hukum mate sumo Ia. 41Ola hukuman hi kita ohua' yo timbangnyomo tiba anu binaunto! Panyo Ia madi' hondo ko sala'nyo!” 42Lantas ia notatae, “Yesus, inau' mae na aku, de Kita po'ule'mo tokamo mae sumo Tomundo!”
43“Palesayamo,” na koonyo i Yesus hi ia, “Sinaa aiya beleyum hingga-hinggatmo ka' Aku i Firdaus.”
I Yesus sinilaka
(Mat. 27:45-56, Mrk. 15:33-41, Yoh. 19:28-30)
44Kila-kila jammo sampulu' ka' ohua' sonsu'unmo na sinaa, batu nu sinaa madi'mo najingka, ka' songko-songko na lipu' aijo' pinikatmo hondo sinangkut jam totolu' mamalom. 45#Kel. 26:31-33 Lalanse' anu kala-kalayo' i Laigan nu Tumpu nobeakmo tinimbali ohua'. 46#Mzm. 31:6 Lantas i Yesus noloboo' hoso-hoson, “Tuuma! I uno nu limanto Kusimpalakonmo na butong-Ku!” Noko potatae sumo aijo' ia sinilakamo.
47Salatan tinoa nu kapala nu suludadu apaa na anu tinimbalimo aijo', ia nompuji'mo Tumpu. Lantas ia notataemo, “Totu-totu'u, Ia madi' ko sala'nyo!”
48Mian da'isan anu tinoka i kiijo', da montoa, nontoamo apaa na anu tinimbali. Aha iwi-iwi' ninsusule' ka' nompele-pele'mo na kinyonyoa nu aha. 49#Luk. 8:2-3 Ka' iwi-iwi' na anu mompahasumbu' i Yesus sagala to bou-boune anu nombatuki Ia lengkat mae i Galilea, tinuminjo aijo' mae majo'on nontanggalakon iwi-iwi' aijo'.
Yesus i lamunmo
(Mat. 27:57-61, Mrk. 15:42-47, Yoh. 19:38-42)
50-51Daagi' ko samian sanggonyo i Yusuf, anu nolengkatmae i kota Arimatea, i lipu' nu Yudea. Ia mian anu manonong anu o adati nu mian, ka' anu hau-haunyo montanda'i Tumpu montampu'unimo mompalentah salaku Tomundo. Mau mule' ia minsoop Mian Kopian Daka' nu Agama, ia madi' setuju tiba kaputusan ka' pikilan nu Mian Kopian Daka' aijo'. 52I Yusuf aiya namba nangadap hi Pilatus momoita da bangke' i Yesus obee' hi ia. 53Lapas aijo' tinauhakonnyo na bangke' i Yesus aijo' i kau' salib ka' sinaputnyo nu hude lenan. Lapas aijo' pino'una'nyomo i uno nu pongkubunan anu binau i uno nu bungkut nu batu – pongkubunan aijo' ma'isa toho' pinake. 54Sinaa aitu sinaa nu Juma'at, ka' sinaa nu Sabat malia'mo otampu'uni.
55To bou-boune anu tinoka tiba i Yesus lengkat mae i Galilea nombatuki Yusuf ka' nontoa pinongkubunan aijo'. Aha suele nontoa mosia na bangke' i Yesus pino'una' i uno nu pongkubunan. 56#Kel. 20:10, Ul. 5:14 Lapas aijo' aha ninsusule'mo ka' nontoukai posadiaon ka' minya-minya' manohong da bau po minya-minya'i bangke' i Yesus.
I Sinaa nu Sabat aha madi'mo nombau apa-apaa, kalana montuluti atulan nu agama.
Trenutno izabrano:
LUKAS 23: LAILOE
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
