LUKAS 24
24
I Yesus po'ule'mo tinumuu'
(Mat. 28:1-10, Mrk. 16:1-8, Yoh. 20:1-10)
1I sinaa nu Duminggu subu-subu hondo, to bou-boune haha aijo' namba i pinongkubunan nomboa posadiaon anu tinoukanmo nu aha. 2I pinongkubunan tinokan nu aha batu pinongkulubi nolingginmo. 3Lantas aha ninsoop i uno nu pinongkubunan aijo', panyo madi'mo ko bangke' i Tumpu Yesus kiijo'. 4Hau-haunyo aha tinjo-tinjo i kiijo' ka' bingong mompopikilakon han aijo', monti-montiik ua'aha na mian nimbaju' lonyi-lonyingkaban tinjo-tinjo koko aha. 5Aha nabuhukmo hondo, lantas tinolodadupu nonsombah i hampot i tano', hau-haunyo aijo' ua'aha na mian aijo' notataemo hi aha, “Ka' kadaka' komiu molio mian tumuu' i totonga' nu mian mate? 6#Mat. 16:21, 17:22-23, 20:18-19, Mrk. 8:31, 9:31, 10:33-34, Luk. 9:22, 18:31-33 Ia madi'an ko anu aiya. Ia po'ule'mo tinumuu'! Inau' apaa na anu tinaloakon-Nyo hi komiu tempo'nyo ia daagi' i Galilea, 7tukoonyo ‘Anak nu Mian tionyo obee' hi mian baladosa', lantas o salib, ka' i sinaa kototolu'nyo Ia po'ule'je tumuu'.’ ”
8Sahingga tinonginau' na to bou-boune haha aijo' i potatae i Yesus. 9Salatan ninsusule'mo lengkat mae i pinongkubunan aijo', aha nonsisikmo iwi-iwi' apaa na anu tinimbalimo aijo' hi sampulu' ka' sa'angu' na rasul, ka' hi iwi-iwi' na anu saja' mombatuki sangga'at. 10To bou-boune anu nomposumbu' iwi-iwi' aijo' hi anu saja' mombatuki Yesus, aijo'mo: I Maria Magdalena, i Yohana, ka' i Maria tinanyo i Yakobus, tiba to bou-boune sangga'at anu mosangalu tiba aha. 11Panyo to rasul-rasul haha aijo' nonsangka to bou-boune haha aijo' ola monsisik anu madi' totu'u. Aha madi' palesaya sisik nu to bou-boune haha aijo'. 12Panyo i Petrus tinuminjo ka' nopadeka' namba i pinongkubunan. Ia naninduku nondin nokaiyong i unonyo, lantas tinoanyo ola hude pinonsaput na daagi' kiijo'. I Petrus binangang hondo, lantas ninsusule' ka' solaa' nompotutugakon manjoo' i uno nu kinyonyoanyo mongkona apaa na anu tinimbalimo.
I tonga' nu jalan namba i Emaus
(Mrk. 16:12-13)
13I sinaa suele aitu ua'aha na anu saja' mombatuki Yesus hau-haunyo lumajang namba i sa'angu' na kampung ise', sanggonyo Emaus, kila-kila sampulu' ka' sa'angu' na kilometen kojo'onnyo lengkat i Yerusalem. 14Laja-lajang na aha batuk monsisik iwi-iwi' apaa na anu tinimbalimo aijo'. 15Hau-haunyo aha basisik ka' mompaha bebee'i pikilan, i Yesus tinoka ka' nojajalan hingga-hinggat aha. 16Aha nontoa i Yesus, panyo daagi' ko apa-apaanyo na nombau aha, sahingga madi' nonsumbu' Ia. 17Lantas i Yesus notatae, “Apaa na anu o sisik miu i tonga' nu jalan aiya?”
Aha tinolotinjomo, panyo ohup nu aha molibos. 18Lantas sala'samian anu aitu hi aha sanggonyo i Kleopas nompokilawa hi Yesus, “Te i Bapak, sala'samian anu i santano'an, anu madi' jojoong i Yerusalem, ka' madi' monsumbu' apaa na anu tinimbalimo kiijo' sala-sala'je uuka aiya?”
19“Te apaa na tinimbali?” tukoo-Nyo i Yesus.
“Anu tinimbali hi Yesus, mian lengkat mae i Nazaret aijo',” tinaaman nu aha. “Ia nabi. Potatae-Nyo ka' anu nubau ko kuasa-Nyo hondo – mau i pontoa nu Tumpu, maumo i pontoa nu iwi-iwi' na mian. 20Kapala nu to ima-imam ka' to pola-polaya' nu bansanto nombee'mo Ia da i hukum mate, ka' aha nonsalibmo Ia! 21Yo, padahan kami nontaha'imanimo, saba' Iamo na mompobebas Israel! Ka' sinaa aiya sinaamo kototolu'nyo salatan pe'e han aijo' tinimbali. 22Ka' mule' to pia-piangkuka na boune bubuu' kami, nompotolokengkengmo kami. Subu-subu hondo aha namba i pinongkubunan, 23panyo madi' nontokai bangke'-Nyo i kiijo' mae. Lantas aha ninsusule'mo mae ka' notatae, tukoonyo aha nontoamo malaikat, ka' malaikat aijo' notatae, tukoonyo, i Yesus tinumuu'mo. 24To pia-piangkuka na mian sangalu mami, lantas namba i pinongkubunan ka' nontokai saba' apaa na anu tinaloakonmo nu boune haha aijo', memang sumo aijo', ola aha madi' nontoa i Yesus.”
25Lantas i Yesus notatae hi aha, “Komiu memang ponga'! Talalo bata-bata na komiu mompalesaya iwi-iwi' anu tinaloakonmo nu to nabi-nabi! 26Te misa' Tomundo anu Momposalamat tionyo mongoa'i pe'e kasansala'an aijo', atina'je ka' mohumpak Kadaka'an?” 27Lapas aijo' i Yesus nontutuhakonmo hi aha apaa na anu tinulis i uno nu ingko-ingkot Kitab nu Tumpu mongkona butong-Nyo, lengkat pe'e i Kitab-kitab i Musa ka' kitab nu to nabi-nabi.
28Hau-haunyo aijo' aha nongohanimo kampung ise' anu nu panjolongi nu aha. I Yesus nombau susumo au'aitu lumajangmo lau-laus na ia. 29Panyo aha nontewa' Ia. “Jojoongmo i tampat mami,” koonyo nu aha hi Ia, “aiya malia'mo malom ka' mule' montampu'unimo pintung.” Sahingga i Yesus ninsoopmo sonso'mo male' i tampat nu aha. 30Tempo'nyo suha-suhang mongkaan tiba aha, i Yesus nongala roti, nontalima kaseh hi Tumpu, nompuge-puge roti aijo' nu limanyo, lantas nombee' hi aha. 31Lapas aijo' sininsumbu'mo na aha taalu' aijo' i Yesus. 32Panyo ia madi'mo tinoa nu aha. Koonyo nu aha samian ka' samian, “Te misa'o kinyonyoanto ingoa'an sinanangmo hondo salatan ia binasisik tiba kita i tonga' nu jalan, ka' nontutuhakonmo isi nu Kitab nu Tumpu hi kita?”
33Balo tempo' aitu aha nolengkat ka' ninsusule' i Yerusalem. I kiijo' tinokan nu aha sampulu' ka' sa'angu' na anu saja' mombatuki Yesus hau-haunyo sinilimu'mo tiba sangga'at. 34Aha aijo' notatae, “Memang totu'u Tumpu po'ule'mo tinumuu'! Ia nompotoamo butong-Nyo hi Simon!”
35Ua'aha na anu saja' mombatuki Yesus anu sala'je tinoka aijo' balo nonsisik apaa na anu tinoa nu aha i tonga' nu jalan, ka' mosia na aha nonsumbu' Tumpu, tempo'nyo Ia nompuge-pugemo roti.
I Yesus nompotoamo butong-Nyo hi anu saja' mombatuki Ia
(Mat. 28:16-20, Mrk. 16:14-18, Yoh. 20:19-23, Kis. 1:6-8)
36Hau-haunyo aha daagi' basisik, monti-montiik i Yesus tinjo-tinjomo i totonga' nu aha ka' notatae, “Sinalamatmo na komiu!”
37Aha tinolokengkengmo ka' nabuhukmo, kalana koonyo pe'e aha nontoamo setan. 38Panyo i Yesus notatae, “Kadaka' komiu mabuhuk? Kadaka' bata-bata i uno nu kinyonyoaum? 39Toa na limang-Ku ka' toa na tengkeng-Ku. Akumo na aiya da osumbu'. Kanyang ka' toa ima-ima', kalana setan madi' ko antoknyo kabai bukunyo sumo anu otoa miu hi beleng-Ku.”
40I Yesus notatae sumo aijo' ka' nompotoa hi aha lima ka' tengke-Nyo. 41Ka' hau-haunyo aha ma'isa pe'e talalo palesaya, kalana talalomo i lame' ka' binangang, i Yesus nompokilawamo hi aha, “Pa' daagi' ko anu okaan na komiu u'uka?” 42Aha nombee'i Ia sampadot na ikan goleng. 43Ingala i Yesus na ikan aijo', ka' kinaannyo i ahop nu aha.
44Lapas aijo' Ia notataemo hi aha, “Aiyamo na hahan anu pinoto'ingkumo hi komiu tempo'nyo Aku daagi' nojajalan tiba komiu: tukoongku apa-apaa na anu tinulis mongkona Aku i uno nu Kitab-kitab i Musa, to Nabi-nabi, ka' Mazmur, tionyo timbali.”
45Lapas aijo' i Yesus nombukamo pikilan nu aha da monsumbu' apaa na koonyo nu Kitab nu Tumpu. 46Lantas Ia notataemo hi aha, “I uno nu Kitab nu Tumpu tinulis, tukoo-Nyo, ‘Tomundo anu Momposalamat tionyo mongoa'i sansala ka' tionyo pu'ule' tumuu' lengkat i kasilakan i sinaa kototolu'nyo.’ 47Sumo aitu mule' i uno nu sanggo nu Tomundo anu Momposalamat aijo' tionyo ahi' pagala opoto'i hi iwi-iwi' bansa, saba' mian tionyo ahi' balatobat, ka' saba' Tumpu mongampunimo dosa'. Ka' lele aijo' tionyo ahi' pagala opoto'i, otampu'uni lengkat mae i Yerusalem. 48Komiumo na to saki-sakisinyo iwi-iwi' aijo'. 49#Kis. 1:4 Ka' Akuje na monsai hi komiu apaa na anu jinanji'mo nu Tuuma. Panyo komiu tionyo tataap montanda'i i kota aiya, sampe kuasa lengkat mae hi Tumpu mompinsoopimo komiu.”
I Yesus i hangkatmo nokiita' i suluga'
(Mrk. 16:19-20, Kis. 1:9-11)
50Lapas aijo', i Yesus nomboamo aha nosabat i kota tinoka i Betania. I kiijo' mae i hangkat-Nyomo na lima-Nyo, lantas nombalakati aha. 51Hau-haunyo Ia nombaumo sumo aijo', tinolohangkatmo na Ia nokiita' i suluga', lantas noga'atmo ka' aha. 52Aha nonsombah Ia, lapas aijo' ninsusule'mo i Yerusalem, kinyonyoa nu aha ilame'mo hondo. 53Ka' saja'mo nompuji-puji' Tumpu i Laigan nu Tumpu. 114
Trenutno izabrano:
LUKAS 24: LAILOE
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
