1 Sámìɔ̀ 6
6
Félésã́ã̀mɛ̀nù wò nù Wòdɔwò Gblɔ̀n ká Ézrɛ̀ sɛ̀ gɥ́
1Yàwɛa Wòdɔwò Gblɔ̀n ɓɛ è kǝ̀ Félésã́ã̀ sɛ̀ gɥ́ sú lɔ́ɔ́yià ɓà. 2Lɛ̀kɔ̀ɔɛ Félésã́ã̀mɛ̀nù wó sraɓo mɛ̀nù wãã̀ dɛ̀bɔmɛ̀nù lɔ̀ɔ̀kǝ̀ wó pɵ wo lǝ̀, “Mǝ̀ kwáloà kǝ Yàwɛa Wòdɔwò Gblɔ̀n ɓɛ káɛ? Kà pǝ yí loà kpaà kǝ nyíì à bɔ e dɔ̀lɛ̀ɓàɛ̀ biɛ̀ yilǝ̀.”
3Wô pɵ, “Àyé ka Ézrɛ̀ Yàwɛa Wòdɔwò Gblɔ̀n ɓɛ bɔa Ézrɛ̀ sɛ̀ gɥ́ɛ, kɵ́kǝ̀ kâ bɔ wɛ́á fèè, kǝǝ zɛ̃ã sáálɵɛ káɛ kà gǝ̃́ga dààpíé. Yàkɔɔ́ɛ kalò kǝ pɵ́nɵ́-pɵ̀nɵ̀, kǝ pǝkǝ̀ à kɔ̀ gbín kǝ̀ ka là teelɵɛ kã́ã̀ gɥ́ma.”
4Wó lɛ̀ɛ̀kpɔ́ kǝ̀ wòa nɛ̀ɛ̀, “Mǝ̀ yí loà nu Yàwɛ lǝ̀ gǝ̃́ga káɛ?”
Wô pɵ, “Góòlìɛ̀ sɔ́ɔ́lú wãã̀ góòmɔ̀ sɔ́ɔ́lú wó dɔ Félésã́ã̀ ɓɔ̀umɛ̀ sɔ́ɔ́lú ɓɛ wo pĩã̀ɛ̃̀, ɓií Yàwɛ kɔ̀gbín è kǝ̀ ka sáálɵɛ ka là é kǝ̀ kaa ɓɔ̀umɛ̀nù là pɵ́. 5Lɵɛ è kaɓà pǝnù wó kaa sɛ́ gɥ́sìèlà nɛ̀ɛ̀ lìɛ̀ wãã̀ mɔ̀ lɵ́ɛ kã́ã̀ wo bĩ́nù kǝ, ĩ́ĩ́ kã́ã̀ tɔ́ɓɔle nu Ézrɛ̀a Aaɓi lǝ̀. Yigbúkáɛ è lò e kɔ̀ kǝ fɵ́ɵ́fɵ̀ ka làluo ĩ́ĩ́ kaa aaɓinù wãã̀ kaa sɛ́ ɓɛ làluo. 6Mǝ̀ lo ka zòɔ kǝ grɔ́ɔ́grɔ̀ nɛ̀ɛ̀ Ízèmɛ̀nù wãã̀ kíŋ Fɛ́rò lɵ́e? Lɛ̀ Yàwɛ yàà kǝ wà kǝ nɛ̀ɛ̀ bɔ̃́ɔ̃̀mɛ̀nù lɵ́ɛ, waá gó Ézrɛ̀mɛ̀nù zɥ̀ wɔ̃̀ɔ̃̀ ló, é wó loà? 7Lɛ̀ é pɵ́ɛ, kà káà dɔ̀ù pǝ̀kǝ ká yókè dà dùbǝ́ǝ̀ pèètɛ é waá yókè dà wo ɓɔà doɛ ɓɔà ká wo krù káà#6.7 Káà Káà àyé nɛ̀ à màzín kâlɵ̀. Yàkǝɛ dùnù wô gã̀ã̀. ɓɛ ɓà, kǝǝ kà wo nǝ́nù kṹ wo píé ká wo ye kruú. 8Kà Yàwɛa Wòdɔwò Gblɔ̀n ɓɛ sɥ́ kâ dɔ káà ɓɛ là, ká góò pǝbĩ́nù é kálóà wo ká gǝ̃́ga ká ɓɛ dà gblɔ̀n nǝ́ é gblɔ̀n và ɓɛ sɛ̃́ĩ̀ɛ̃̀ gɥ́. Yàkɔɔ́ɛ kàà bɔ é yaa lóɓo. 9Kǝǝ kàa nyákǝà. Àyé yà ló e dè yaa sɛ́gɥ́ Bɛ̀símɛ̀ pɵɵɛ, kǝ Ézrɛ̀mɛ̀a Aaɓi é wɔ̃́gbéè sùu kǝ̀nǝǝsɥ̀ kǝ̀ kwaá ɓǝ. Kǝ é yaá kǝpɵ́ɛ, kwalòà gɥ́dɔ nɛ̀ɛ̀ yekũ é wɔ̃́gbéè kǝ̀ kwaá, kǝ kǝwɔ̃̀wɛ́á é gbɛ̀ì là mɛ làɛ̀ é gbɛ̀ì kwalà ɓǝ.”
10Gɔ̃ɔ̃̀nù ɓɛ wô kǝ̀ pɵ́, wó dùmu bǝ́ǝ̀ pèètɛ krù kóà wô yà káà ɓɛ ɓà, wó dùnǝ́nù ye krugɥ́. 11Lɛ̀kɔ̀ɔɛ wó Wòdɔwò Gblɔ̀n ɓɛ dɔ káà ɓɛ là wãã̀ gblɔ̀n nǝ́ wó góòmɔ̀ wãã̀ góòlìɛ̀ dààgɥ́ɛ ká. 12Lɛ̀ yà kɔɔ́ɛ dùnù ɓɛ wó lo kpenlɵ Bɛ̀símɛ̀ pɵ̀ dén ká zɛ̃ãdè píé, wâ gbɵbɔ̀ wâ lòa waa nǝ́ nù wó to kruúɛ mɔ́ɔ̀wɔ̃̀ã̀. Waá liɛ̀ wo krɛ̀ɛ̀gɥ́ ĩ́ĩ́ wo kɔàgɥ́, é Félésã́ã̀ ɓɔ̀umɛ̀nù wó to wo píé wó wòa Bɛ̀símɛ̀ pɵ̀ nàpíé lɛ̀ɓà.
13À yi ɓɛ káɛ mɛnù wó go Bɛ̀símɛ̀ pɵɵɛ wò kǝ̀ ɓlɥ́ɵ̀ goopíélɛ̀ do ɓà waa wítì kã́lɛ̀à. Lɛ̀ wóo gɔ̀ sɥlúú wó Wòdɔwò Gblɔ̀n ɓɛ yeɛ, wo grúlì wã̀ã̀ ye. 14Káà ɓɛ è nù Zásùà gó Bɛ̀símɛ̀a wítì ɓlɥ̀ɵ̀ gɥ́ é dɔsɛa mɥ́. Gùǝ̀kpo và dèèdè è kǝ̀ mɥ́. Lɛ̀kɔ̀ɔ̀ɛ wó káà xlɥ́ pɛ̀ wɔ́ká wó gɥ́ɵ́sràɓo dùnù ɓɛɛ ká Yàwɛ lǝ̀. 15Lɛ̀kɔ̀ɔɛ Lívàmɛ̀nù wó Yàwɛa Wòdɔwò Gblɔ̀n ɓɛ yɔ̀ɔ̀ sɛa wãã̀ gblɔ̀n nǝ́ é kǝ̀àsɔ́ é góò gbàapǝ̀nù kǝ̀àgɥ́ ɓɛ ká wóo dɔ gùǝ̀ và ɓɛ là. É gɔ̃ɔ̃̀nù wó go Bɛ̀símɛ̀ɛ wó gɥ́ɵ́srà wãã̀ sra ɓáá plǝǝ̀zǝ̀ ɓo Yàwɛ lǝ̀ yi ɓɛ ká. 16Lɛ̀ Félésã́ã̀ ɓɔ̀umɛ̀ sɔ́ɔ́lú wó nuɛ wà wɔ̃́ ɓɛ yeɛ, wó yìɛ̀ wo zɥ́ yi ɓɛ ká wó lo Íkrɔ̀n pɵɵ.
17Félésã́ã̀mɛ̀nù wò góòlìɛ̀ sɔ́ɔ́lú ɓɛ bɔ̀ Yàwɛ lǝ̀ gǝ̃́ga ká. Ásídɔ̀ ɓà do, Gázà ɓà do, Ásíkɛ́lɔ̀n ɓà do, Gáà ɓà do, ĩ́ĩ́ Íkrɔ̀n ɓà do. 18Wó góòmɔ̀ bɔ Yàwɛ lǝ̀ pɵ́. Wò dɔ Félésã́ã̀ pɵ̀ vàvà sɔ́ɔ́lú é kíŋ lɵ́ wo gɥ́ sáálɵ é pɵtróó nìɛ̀ wo zɥ̀ɛ̀ wãã̀ síélɵ-lɛ̀nù é tró yaákǝ woɓàɛ̀ pĩã̀. Gùǝ̀kpo và wó Yàwɛa Gblɔ̀n dɔalà Zásùà gó Bɛ̀símɛ̀ píé ɓlɥ́ɵ̀ɛ̀ é tɔɔ gòò é wòa gbɛ̃́ã̀ ɓà.
19Gɔ̃ɔ̃̀nù gbú wó kǝ̀ Bɛ̀símɛ̀ pɵɵɛ wò lɛ̀gà Yàwɛa Wòdɔwò Gblɔ̀n ɓɛ gɥ́, é Yàwɛ è gɔ̃ɔ̃̀nù gɔ́ɔ̀ lɔ́ɔ́yià wó lɛ̀gà Wòdɔwò Gblɔ̀n ɓɛ gɥ́ɛ zǝ wo son. É Bɛ̀símɛ̀mɛ̀nù wó gbɵbɔ yénzǝ̀ká, ɓií Yàwɛ yà mɛ zǝsɥ̀ và kǝ wo píé. 20Lɛ̀kɔ̀ɔɛ Bɛ̀símɛ̀ gɔ̃ɔ̃̀nù wô pɵ, “Dɵ é mɔ̀à nyɛ̀ɛ̀ dɔ Yàwɛ pɛáɛ, Aaɓi sɵ́ŋɵ́-sɵ̀ŋɵ̀ nɛ̀? Yi lò Wòdɔwò Gblɔ̀n nɛ̀ bɔ dɵpíé nyɛ̀ɛ̀ lo nyɛ̀ɛ̀ gó yi píée?” 21Wó mɛ bɔ nyàà biɛ̀ Kɛ́ríá-zérìn mɛ̀nù lǝ̀ nɛ̀ɛ̀, “Félésã́ã̀mɛ̀nù wà nu Yàwɛa Wòdɔwò Gblɔ̀n ɓɛ ká. Kà nu kâ sɥ́ káloá ka píé má.”
Currently Selected:
1 Sámìɔ̀ 6: DHB
Highlight
Share
Copy
Want to have your highlights saved across all your devices? Sign up or sign in