Markus 1
1
Yohana Ndər Mər Baɓtisma tə Bəzə Ɓwanya Hyel
(Mat 3:1-12; Luk 3:1-18; Yoh 1:19-28)
1Nənna nacha ngə Mafakə Mənakə təkəra Yesu Kəristi#1:1 Kəristi: Nacha ngə tləmər Təl ana Ndər Dləuya nda Hyel tə na cho sətə shili tə dunəya. Zər Hyel. 2Tə ghəya tang wi nda Ishaya ndər mətakər tə tsəfəbiya ga na,
“Hyel tə na,
‘Jan yo sətə vanya ndəu,
cha təra biyama ngha ka cha bəzə mafakə ɗa,
cho ɓatliya nghə laku.’ ”
3“Vanya ndə kwa nga na kurakəu,
kwa nga kwa takəu,
‘Ɓatliya ma laku ka shilir Tlakəu,
hya'abiya ma laku ta'i ka cha.’ ”
4Ngə Yohana ndər mər baɓtisma tə shili kwa takəu, cho bəzə mafakə ana cho mər baɓtisma, cho na nə madawa, “Sha ma shili da Hyel, hya shar ngya kəhi, nja mərtə hi baɓtisma, ga nja farbikər səpəla'a kəhi.” 5Nji ɗang ku ɓələr hə'i Yahudiya ana njir Urshalima kwa shili da cha. Nda pə səpəla'a kənda, ngə cha mərtə nda baɓtisma aku Dəl Urdun. 6Nja tsatə ləkutə Yohana ana shishi dləgwam. Cha mbabiyadza ana gyarakən chi. Ha'i ba'a mwamwa takə ngə sərsum nyi. 7Yohana tsəu kwa bəzə, cho na, “Vanya ndə da kwa shili hiɗa, a ndəɗə ɗa təcha ana gyalkur, a naya nji mada ka ya uzhi ya pələya sər mba ɓiɓi nyi wa. 8Naya, ana ɓiti ngə ya mərtə hi baɓtisma, kəl ja, nacha, cho mərtə hi baɓtisma ana Shanguɗə Karti.”
Nja Mərtə Nyi Baɓtisma nə Yesu
(Mat 3:13-17; Luk 3:21-22)
9Vanya pəchi, Yesu tə hya'atə vu Nazarat atə hə'i Galili, ngə Yohana mərtə nyi baɓtisma aku Dəl Urdun. 10Nda Yesu kwa zəbiya ku ɓiti, təma cha la'a huɗamələm kwa mbəɗa ana Shanguɗə Karti wi mbətla kwa səya təkəra cha. 11Ngə kurakə hya'atə kya huɗamələm tə na, “Naka Zər ɗa kə nda yo nyida ngha. Yo ngatə məsəɗakəkur nakə gagaɗa.”
Sərtakə tə Dzə Yesu
(Mat 4:1-11; Luk 4:1-13)
12Ngə Shanguɗə Karti tə maɗətə Yesu gwa takəu. 13Cha hanyi fwaɗəkumənyi kunda, Shantan kwa dzə nyi. Yesu tə ngya tə mbwa nda a ndə da wa kəl kum takə pampaməu, Chama Hyel i tsə'u kwa vala nyi aku laku pampaməu.
Yesu tə Ghəya Tlər Nyi
(Mat 4:12-17; Luk 4:14-15)
14Ahir nda nja fəu Yohana ndə mər baɓtisma ku jarum, ngə Yesu tə təra yi Galili cho bəzə Mafakə Mənakə nda hya'atə tsa Hyel, cho na, 15“Bəji ɗati! Təlkur Hyel ɗatə ləhəu! Shar ma ngya kəhi, hya nənyi jiri nə Mafakə Mənakəu.”
Yesu tə Nga Njir Timi Fwaɗəu
(Mat 4:18-22; Luk 5:1-11)
16Vanya pəchi nda Yesu kwa ma'i anya fa'a Galili, cha la'a Shiman ana zamə nyi Andrawus nda kwa bəzə hiɗi kənda aka nanda njir timi nda. 17Ngə Yesu tə nar nda, “Nəu ɗa ma, hya ɗa ka shawa ɗa, yo shandə hi ka njir nga nji shili daya.” 18Təma nda ngyar hiɗi kənda ga nəu nyi.
19Nda cha tsaɗar dzə kushu, ngə cha la'a Yakubu zər Zabadi ana zamə nyi Yohana aku param, nda kwa ɓatlə hiɗi kənda. 20Təma cha nga nda, ngə nda nəu nyi ga ngyar adan nda ka njir mər tlər wazəba inda nda fa'atə aku param.
Yesu tə Gədləbiya Məlləm ku Kəra Ndəu
(Luk 4:31-37)
21Yesu ka njir nəu nyi tə gu mələm Kafarnahum. Nda Pəchir Ngyaməngya tə ɗa, ngə cha gu vi pətlənya ga ghəya dlədləɓə nə nji. 22Nji kwa mər məngəl na dlədləɓə nyi, aka cho dlədləɓə ana gyalkur a da wi ka maləm gadlagadla Musa wa.
23Kəl jan vanya ndər məlləm tə səgwa ku vi pətlənya nda, cho ləlla, cho na, 24“Yesu ndər Nazarat, mi ko gwa'a na ea? A ka shili ka kə kuɗənda ea ya? Kwa zəndə nghə ya, nakə ngə Ndə Karti nə Hyel!”
25Ngə Yesu tə tsə məlləm nda ga na, “Bəgə ɗiyu! Biya ka ngyar ndə na!”
26Ngə məlləm nda gudzaɓətə ndə nda, cha ləlla ga ngyar ndə nda. 27Dəhə nji tə ulə hwa'a nda kwa na nə kərnənda, “Amah! Sər minə əna? Jan mən la'atə taɗər dlədləɓə nda na gyalkur nya ja! Cho nənyi ma'a gadlagadla nə məlləm, ya nda kwa nəuwa!”
28Ɗəɗəu tanyi ɓwanya təkəra Yesu tə ma'i mada abari aku ɓələr hə'i Galili.
Yesu tə Mbandə Səlkənya Shiman
(Mat 8:14-15; Luk 4:38-39)
29Yesu tə ngyar vi pətlənya nanda ka Yakubu ana Yohana, ngə nda gu ki ka Shiman ana Andrawus. 30Amanya mala Shiman tə piya ana gyang. Gwakura Yesu ngə alenya nji ku ki nda tə nar nyi. 31Ngə cha yi dzə nyi, cha gəzəya cha cha ga hya'andə nyi. Ngə gyang nda wuniya nyi, cha hya'ati ga ghəya mər sərsum nənda.
Yesu tə Mbandə Nji Ɗanghəu
(Mat 8:16-17; Luk 4:40-41)
32A ba akəu, ahir təɗər pəchi, nja shili na njir shiləka ana njir məlləm ɗang nə Yesu. 33Ngə dəhə njir mələm nda tsəmtədzə anya nyaki nda. 34Yesu tə mbandə nji'inda na shiləkə pampaməu ɗanghəu, cha gədləbiya məlləm ku kəra nji ɗanghəu. Ya a da cha ngyar məlləm inda ɓwanya wa aka kwa zəndə nda ndara wa cha.
Yesu tə Pətlənya tə Vanya Mbwa Zhang Tanyi
(Luk 4:42-44)
35Tsəɗakə mbudla, tsə'u vi shuɗshuɗəu, Yesu tə biya, ga təra kyatə vanya mbwa nda a ndə da tangnda wa ga pətlənya. 36Kəl Shiman ana nji'inda cha kə'iri tə biya ka nda gwa'a nyi. 37Ahir nda la'a nyi, nda nar nyi, “Nji witə kəɓang nda kwa gwa'a ngha.”
38Ngə Yesu tə nar nda, “A mən təra kyo alenya mələm inda ləhə tangna, ka ga ya yi bəzə mafakə hinda tsə'u. Nacha ngə sənda shili naya.”
39Əngə cha zhulitə dəhə hə'i Galili, cho bəzə mafakə aku vi pətlənya kənda, cho gədlə məlləm ku kəra nji.
Yesu tə Mbandə Ndər Bibi
(Mat 8:1-4; Luk 5:12-16)
40Ngə vanya ndər bibi tə shili da Yesu, cha uzhi ma nyi cho gədi nyi, cho na, “Macha kwa i ka, kwa nau kə mbandə ɗa ya ɗa chaməu#1:40 Ma bibi tə səya ndər Yahuda, cho ɗa hiɗahiɗa mar Hyel kəl macha nda mba..”
41Aku təhuɗəu, Yesu tə ha cha cha ga tsəka nyi ni, ga na, “A i tiya, mbə ja.” 42Təma cha mbə na bibi nda.
43Ngə Yesu tə tsau nyi bar ga na, “Ma'i. 44Ngwa ka dəkə nə madawa wa, kəl nda ka ki char nyi kərnghə nə fərist, ana ka handa təmachi, tang wi nda gadlagadla Musa tə na, ka char nyi nə dəhə nji ənda mbətə ka.”
45Kəl ja, ndə nda təra ga ki bəzəya sənda mada amani. Nacha katə Yesu tsa gu mələm tə babal, kəl cho maka ngyata nyi biya tə ya mələm tə mbwa nda a ndə da wa. Dəhə ka ənga, kəl nji kwa shili da cha hya'atə tə mbwa pampaməu.
Trenutno izabrano:
Markus 1: hbbNT
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
© Wycliffe Bible Translators, Inc. and © The Nigeria Bible Translation Trust 2018
