Markus 2
2
Yesu tə Mbandə Ndər Shiləkə nda Dza Cha tə Sanyadza
(Mat 9:1-8; Luk 5:17-26)
1Ahir hanyi yiɗau tanyi, Yesu ka shawa nyi a ɓəl yi Kafarnahum, ngə nja uya mafakə ənda ku ki cha. 2Nji ɗang tə tsəmtədza, mada'a anya nyaki a tsə'u mbwa da wa. Yesu kwa bəzə mafakə Hyel nənda. 3Kəl jan alenya nji kwa shili na vanya ndə nda dza cha sanyadza, nji fwaɗə kwa hə nyi. 4A da nda nau gwa nacha da Yesu wa aka dlama nji, ngə nda gi pakənda kəra pakəu məlna mbwa nda Yesu ti, ngə nda həu ndə nda səya dəhə ka sərpiya nyi.
5Nda Yesu tə la'a jirikur kənda, cha nar nyi nə ndə nda, “Zər ɗa, fartə nji bikə ngha.”
6Alenya maləm gadlagadla Musa da tangnda, nda kwa jigadəma ku ɗufwa nda, 7“Mi nga gwa'atə ndə na ɓwanya əna? Hyel ngə cho həyati! Wa ndə nda na gyalkur farbikər səpəla'a matsa Hyel zhang tanya?”
8Təma Yesu tə zəndəbiya sənda nda kwa jigadəma ku ɗufwa nda, ngə cha nar nda, “Mya gwa'atə hyo mər chul ngəna jigadəma? 9Manə ngə kusə lya, nja nar nyi nə ndər shiləkə na, ‘A fartə nji bikə nghə,’ zəma, aa nja na, ‘Hya'ati ka hətə sərpiya ngha ka ma'i’? 10Kəl ja, ga hya zəndə ənda gyalkur farbikər səpəla'a da tsa zər ndə tə dunəya na.” Ngə cha nar nyi nə ndə nda dza cha sanyadzə nda, 11“Ya nar ngha, hya'ati ka hətə sərpiya ngha ka ma'i kyo ki.” 12Təma ndə nda hya'atə ga hətə sərpiya nyi ga təra biya, dəhə nji kwa ndzam nyi nda kwa mər məngəl. Nda fal Hyel ga na, “Ana ea ta la'a chul nəna səwa.”
Yesu tə Nga Levi
(Mat 9:9-13; Luk 5:27-32)
13Yesu na shawa nyi a ɓəl biyanya fa'a Galili. Nji ɗang tə tsəmtədza, ga ɓandə nyi, cha kwa dlədləɓə nənda. 14Nda cho tərabiya ngə cha la'a Levi zər Halfa tə ngya atə mbwar tsəm tsachi. Ngə Cha nar nyi “Nəu ɗa.” Ngə Levi tə hya'atə ga nəu nyi.
15Vanya bəji Yesu ka shawa nyi kwa səm sərsum ku ki Levi, njir tsəm tsachi ka alenya njir mər səpəla'a ɗang tə ngya ka cha, aka nji ɗang tə nəu nyi. 16Nda ka maləm gadlagadla Musa inda ku dzuk njir Farisi tə la'a Yesu kwa səm sə ka njir mər səpəla'a ka njir tsəm tsachi. Ngə nda jau tsa shawa nyi, “Aka mi cho səm ka njir tsəm tsachi ka njir mər səpəla'a?”
17Manda Yesu tə ngatə ənga, ngə cha na, “Nji yiying do gwa'a ndər kuzəkə wa, kəl njir shiləka. A da ya shili ka ga ya nga njir mər sə tsa'atsa'a wa, kəl nda njir mər səpəla'a.”
Taɗər Laku Yesu ana Ɗəɗəmər Laku Njir Yahuda
(Mat 9:14-17; Luk 5:33-39)
18Aku bəji nda, shawa Yohana ndər mər baɓtisma ana nə njir Farisi kwa səmdzən. Ngə alenya nji tə shili ga jau Yesu, “Ma'a ngə shawa Yohana ndər mər baɓtisma ana shawa njir Farisi kwa səmdzən, ya janə a nənghə da kwa mər wa?”
19Yesu tə wuma, “Aman bazhinya sal gambəl kwa səmdzən ya tsəu tanda ka sal gambəla? 20Kəl ja, bəji kwa shili nda njo hənda sal gambəl tsa nda, aku bəji ngə ja nda kwa səmdzən.
21“A ndə nda kwa səbiya ləkutə halhal ana taɗənyi wa, aka macha mər ənga taɗənyi nda kwa tanda halhalənyi nda, ya cho tsakətə kutla 'ualəu matsa nda haaɗa. 22Ya a ndə nda kwa pəu taɗər ɓitir anap ku salakam halhal wa, aka macha mər ənga taɗər ɓitir anap nda kwa pətlənda salakam halhal nda, njo tar ɓitir anap ana salakam tsa'a kya'a. Taɗər ɓitir anap ja, nja pəu gu taɗər salakam!”
Jau təkəra Ɓəlatə Pəchir Ngyaməngya
(Mat 12:1-8; Luk 6:1-5)
23Atə vanya Pəchir Ngyaməngya, Yesu ka shawa nyi kwa ma'i tahə fa alkama. Ngə shawa nyi inda ghəya satə alkama nda.
24Ngə alenya njir Farisi tə la'a ga nar nyi nə Yesu, “Ndzama! Mya gwa'atə nda kwa mər sənda gadlagadla tə katə nji tsa mər tə Pəchir Ngyaməngya?#2:24 A gadlagadla njir Yahuda da ngyar nja mər tlər tə Pəchir Ngyaməngya wa, mada satə alkama.”
25Ngə cha wuma, “A da hya kəratsəntə sənda Dauda tə mər ku bəji nda huɓə tə mbatsə nyi, nanda ka nji'inda kwa ma'i kə'i cha wa ya? 26Aku bəji nda Abiyata gau fərist. Cha gwa ku vi həsəli Hyel, ga ɓanghə gwazhilakə nda nja fiya mar Hyel, sənda a da tsa'atsa'a ku gadlagadla kənda wa, kəl anə fərist. Cha nənyi ma'a nə nji'inda cha kə'iri.”#2:26 Kala ngyaməngya njo shili na taɗər gwazhilakə nə Hyel, njo hənda ɗəɗəmənyi nda. Nacha ngə kəl fərist ngə kwa ɓangha.
27Ngə Yesu tə nar nda, “Aka ndə ngə nja mər Pəchir Ngyaməngya, a da nja mər ndə ka Pəchir Ngyaməngya wa. 28Aka əngə ja, Zər Ndə ngə Tlakəu, ma'a nə Pəchir Ngyaməngya.”
Trenutno izabrano:
Markus 2: hbbNT
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
© Wycliffe Bible Translators, Inc. and © The Nigeria Bible Translation Trust 2018
