Luke 17
17
To'aladibidibi be tokoyona adi kivetuvetunu fa'ina.
Madiu 18:6-7,21-22; Maki 9:42
1Kadu'e Yesu ana tomuliya agaidiya gigahe gigayo, “Makewa'e koyona ana abavebe'u moya'aina ginalakayemu tu hoiyoi bana kaliva koyona againe gina'aladibidibiyedi-ma vita lakahina ginanuhagana! 2Ka'i kuga vita-mo'ena bana odone hidaluhifona be lehageya hidahegehobuyeni-yo gida'alika, au gidalubodana be gidamadu'alika-yo keke anafaiweya tamo kaliva kowakowana koyona againe ginavebe'uni-yo matahiwadi lakahina Yaubada nimane ginanuhagani. 3#Md 18:15Medema fa'ina taumiyao wana'itave'avimi. Ada ka'i tobohiyami ginahuluva koyona, au wanadakeyena be ka'i nuwana gina'avilana, au kadu yana koyona wanavenuwauluyena. 4Ada ka'i aiyeta sa'eyana againe yana koyona seveni agaimiya ada kadu tova seveni agaimiya, gina'elayewayewa ginagahegahe higa vaita yana koyona wadavenuwauluyena, au gilubodami be yana koyona wadavenuwauluyena.”
5 #
Mk 9:24
Au hidedemi Kaiwabu Yesu koyona ana venuwauluya moya'aina fa'ina gigahe-yo afositolo higahena higayo, “Kauveya, udavelugama be yama vetumagana udakivetubugina.”
6 #
Md 17:20
Ada Kaiwabu gigayo, “Ka'i yami vetumagana ana tubuga vaita masitada nafona kabikabi'ona tu gikabukabu lakahina amine, au amifaiweya hida aihala againe wanagahe wanagayo, Tauni unahabu be unana lehageya unamidi, au bonami gidavenogalena.
Agetoga yadi faisewa fa'ina.
7-8Ka'i kaliva sa'eyana agaimiya ana agetoga gidavehimeyena be yana faheya gidafifaisewa o ka'i yana sifi gida'ita'itave'avidi ma gidayewana melaleya againe, bana againe gavaimi gidagahe? Ka'i gidagayo, Auhe'ama u'ela uhiyoto be u'a? Keke-mo'a hidede amine gidagahe. Au gidagayo, Akuga ukidewadewa be unavaigau-yo unahaulili, aku bwai unahiwana be gana'a ganayu. Tu muliya-yo o unana una'a. Au hidedemi gidagahe. 9Kadu agetoga yana kauveya givehimeyena amine gihuluva fa'ina, ka'i yana kauveya bana againe ginavesiule? Keke-mo'a. 10Meda anafaiweya omi'iyao. Ka'i ami vehimeya matatabuna ganavelemi-ma wanafaisewa-'owodi amine gilubodami be wanagayo, Ime agetoga hawaveyamumu keke ama lauboda, fa'ina ama vehimeyagaga amine afaisewa.” Au hidedemi Yesu gigahe.
Yesu tovedawodawowo teni gisiveyawadi.
11Yesu Yelusalema againe ginauna tu Sameliya Galili ana fafali hinafadiya amine ginauna. 12-13#1Veh 13:45-46Ada melala sa'eyana againe giyemuyemu tu tovedawodawowo teni himadubodebodena. Yuwa himidilauva tu hikova'awafatafata higayo, “Yesu Kauveya, udahinekalikaliyema.”
14 #
1Veh 14:1-4; Lu 5:14 Yesu gi'itadi-yo gigahedi gigayo, “Wanana abaveyao ana tofaisewa agaidiya wowomi wanavehawaledi be wabwaina ma hina'itana.” Ada edeya hinauna tu hiyamumu.
15Tu kaliva sa'eyana agaidiya yana yamumu gi'ita-yo au Yesu againe giyewana, agona lakahina Yaubada gihawadavadavana. 16#Yo 4:9Au Yesu agene gi'ibo'ula-mo'a be givesiuleyena. Hida kaliva au kwanamiSameliya badi miYuda hivenibainedi amanadi. 17-18Bana Yesu gigahe gigayo, “Tovedawodawowo teni matatabudi gasiveyawadi. Tu hai kaliva naeni himimiyami? Gavadi-yo bana hida keke kwanamiIsileli anakaibe giyewa-yo Yaubada gihawadavadavani?” 19Ada kaliva againe gigahe gigayo, “Au umidi be unana. Uvetumaganeku fa'ina ubwaina.”
Yaubada yana abavehimeya yana yemu fa'ina.
20 #
Yo 3:3, 18:36 Tu tova sa'eyana tonagona tafatafalolodiyao adi egana Falisi Yesu againe hitoliluvaluva higayo, “Gava tova Yaubada yana abavehimeya kaliva agaideya ginalakayemu?” Bana gigayo, “Keke tamo iya'iyaya adafaiweya kana'itana-ma againe Yaubada yana abavehimeya ginalakayemu. 21Kadu keke kaliva hinagahe hinagayo, Hidede againe Yaubada yana abavehimeya giyemu, o ka'i hinagayo, Wadedei giyemu. Fa'ina Yaubada kaliva ase'asediya ahe givebutu givehivehimeya.”
Yesu yana yewa'ela fa'ina gilukahihi.
Madiu 24:23-27,36-41
22 #
Lu 21:7-8
Yesu hidedemi Falisi agaidiya gigahe-yo ana tomuliya gigahedi gigayo, “Aimo tova gi'ela'ela be againe wanagahe wanagayo, Ho nuwanuwama Bana Tohobu'ela yana ivemogatala ana aiyeta sa'eyana ana'itana! Hidedemi wanagahe tu keke wana'itani. 23Ada muliya valeya wananogalina vaita ahe gada'ivemogataliku ada kaliva hinagayo, Bana yuwa gi'ela, o ka'i hinagayo, Wa'ita hidei gi'ela. Yadi gahe keke wanamuliyeni. 24Fa'ina nama gisinamana be auhe'ama lobama fafalina kadu fafalina gituvemahali-'owona amine, meda kaliva moya'aidi hinamadu'itaku Iya Tohobu'ela yaku yewa'ela ana tova. 25Tu aku vehimeya gavaina higa kaliva tova adamoya himimiyami-ma hinakiloweku be aulolo moya'aina badi nimadiya gananuhagana.
26-27Boi tuwai-mo'ena Nowa yana toveya kaliva vevine himiyamiyabaubau, a'a hi'au'a bwai hiyuyu hinaginagi hivenavenagi, au yadi havivila tulina tulina hinunauwena tu Nowa waka againe giyage aiyetai-nadi. Giyage tu mala gituwa be moya'aidi gituwa'afufudi. Meda anafaiweya Iya Tohobu'ela yaku yewa'ela ana toveya kaliva vevine hinadewadewa.
28-29Meda boi tuwai-mo'ena Lota yana toveya kaliva himiyamiyabaubau, hi'au'a hiyuyu hilulukimokimone hifahafaha himanumanuwaiyogona, tu auhe'ama Lota gimidi Sodoma gihege-yo ai'ala'alata kadu gaitoma yagoyagona alamatafifailina lobameya gi'ililihiwana be moya'aidi give'alayauyaule-'owodi. 30Meda anafaiweya kaliva agaidiya ginalakayemu Iya Tohobu'ela gana'ivemogataliku ana toveya.
31 #
Mk 13:15-16
Tu medema aiyetai-nadi hai kaliva yana tolameya ginamiyami, medema keke yana manuweya ginaluku be higa yana lokoloko ginavaini. Meda anafaiweya hai kaliva yana faheya ginamiyami, medema keke anafaiweya melaleya ginayewani. 32Lota vavinena agaidiya nuwami ginanunauyena. Badi hi'ota'ota tu hihagaviladi fa'ina hi'alika. 33Gava kaliva keke Iya agaikuya ginahawahegeni tu taunaga yana miyami babiya ginanuwenuwena, medema yawaina ginanuhegena. Atu gava kaliva yawaina alikeya gihawahegena, medema yawai-vagahina ginanuhagana. 34Gagahemi bogi-nadi againe kaliva luhei ivi sa'eyana againe hinadauda tu sa'eyana gananauwena sa'eyana ginamiya. 35Vevine luhei gufeya hina'i'ivilavila tu sa'eyadi gananauwedi sa'eyadi hinamiya. [ 36Kaliva luhei faheya hinamiyami tu sa'eyana gananauwena sa'eyana ginamiya.]”
37Hidedemi Yesu gigahe-yo ana tomuliya hitoliyena higayo, “Kauveya, hida gaitomai-dina ha'againe hinalakayemu?” Bana gigayo, “Hai ubula siyona gilakalaka, medede againe manusiyo hinavaga'auta.” Hidedemi Yesu givenuwa'atadi.
Trenutno izabrano:
Luke 17: viv
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
© 2003, Wycliffe Bible Translators, Inc. All rights reserved.
